ثابراتّ ثامزواروتّ ن ـ ؤمازان بولوس ئي يمومنّ ن ـ ثمدينث ن ـ كورنتوس
1
لْهْنَا دْ تْژَالِّيتْ
1 نكين بولوس، نّا ئختار ربي س لموراض نّس، حما أد ݣخ امازان ن عيسى لمسيح. ؤريخ-تابرات-اد نكّين د سوستانوس، ؤماتنخ ݣ ليمان،
2 ئ ؤݣراو ن-ئمومن نّا ئلّان ݣ تمدينت ن كورنتوس د ميدّن نّا ئخطار أد ݣين ئمقدسن س عيسى لمسيح، ئخطارتن أد ݣين وينّس نيتني د وينّا ئقّارن س-ئسم مولانا عيسى ݣ مايد ئݣان أنسا، نتا أݣّان مولانا نّخ د مولانا نسن.
3 أد-اون ئوش ربّي ئبّاتنخ د مولانا عيسى لمسيح نعمت د لهنا!
نعمت ن ربي يي مومن ن كورينتوس
4 دا تحمادخ ربّي ديما خف نعمت نّا أون ئوشا، س-عيسى لمسيح.
5 ستيت، س عيسى لمسيح، ربّي ئوشاون مايد ئݣان لخير ن واوال د وين توسنا،
6 ؤرغورون شّكّ ئدْ أينَّاون ننَّا خْفْ مُولانا نّخْ عيسى لمسيح ئِصْحَا.
7 دغي، غيرون توكّيوين كول نّا ياكّا رّوح ن ربي، كونّي نّا ئتراجان أسّ نّا ݣ-ئدّا أد ياغول مولانا نّخ عيسى لمسيح.
8 نتّا س-ئخف نّس أيد ئدّان أداون ئوش لجهد أر أسّ أنݣّارو، حما ؤر ديݣون ئتّيلي أود يان لعيب أسّ ݣ-ئدّا أد ياغول مولانا نّخ عيسى لمسيح.
9 هان ربّي دا ئتݣّا دّيما أينّا ئقّاول، نتّا س-ئخف نّس أيد أون ئغران أت تعاشرم ممّيس، مولانا نّخ عيسى لمسيح.
ؤر ئتيلي ؤمخيلاف ئنݣراتون
10 أيايتما، دا اون تتّرخ ݣ-ؤدم ن مولانا نّخ عيسى لمسيح، أت تمساسام، حما تسّيولم س يون ؤقمو، ؤر ئتّيلي ئنݣراويت بطّو، تمساسام ݣ لعقل د رّاي.
11 ئدّخ أيايتما نّاني أيت-ؤخام ن ولماتنخ خُلْوي، ئلّا بطّو ئنݣراويت.
12 هان أينّا ريخ أد ئنيخ: كو يون زّيݣون دا ئتّيني: «نك زݣ ؤربيع ن بولوس»، د يان ياضن دا ئتّيني: «نك زݣ أبولوس»، د يان ياضن دا ئتّيني: «نك زݣ بطرس»، ئد يون ياضن دا ئتّيني: «نك زݣ لمسيح».
13 ئسّ ؤر ئد غاس يون ن لمسيح أيد ئلّان؟ ئد بولوس أيد ئتّوصلبن غيفون؟ نغد ئس تّغبّژم ݣ وامان خف ؤدم ئنو؟
14 دا تحمادخ ربّي، ئدّخ ؤر دجين غبّيژخ أود يون زّيݣون ݣ وامان، ماعدا كريسبس د غايوس،
15 حما ؤر ئتّيني أود يون هاتين ئتّوغبّژ ݣ وامان خف ؤدم ئنو.
16 تّوخ، هاتين غبّژخ ألّو ستفانوس د-أيت ؤخام نّس، ؤرعيّينخ مش غبّژخ شا ن حدّ ياضن.
17 ئدّخ ؤر يي ديوزين لمسيح أد غبزخ ميدّن، ماشان حما أد برّحخ س لينجيل، أها ؤر ساوالخ س لحكما ن ميدّن ن دّونييت، حما ؤر تّݣ لموت ن لمسيح نّا ئتّوصلبن كيف والو.
أينّا ئݣان تيحيطّ غر ربّي، يوݣر لحكما ن ميدّن
18 ئدّخ أوال خف لموت ن لمسيح خف ئحناݣ ن-ؤطورق ئݣا تيحيطّ غر وينّا ئفغن أبريد ن ربّي، ماشان غورنخ نكني نّا ئفوكّان، ئݣا لجهد ن ربّي.
19 ئدّخ ئتواري ݣ لشتاب ن ربّي: «أد خلوخ لحكما ن وينّا ئنژن، أها كّسخ تاعقّولت ن-ئعقّوليين».
20 ئوا، ماني ؤنژيژ؟ ماني لمعلم ن شّرع؟ ماني بولعقل ن زّمان-اد؟ ئسباين ربّي ئد لحكما ن دّونييت-اد تݣا تيحيطّ!
21 ئدّخ ميدّن ن دّونييت، س لحكما نسن ؤر تّيغين أد ئسينن لحكما ن ربّي، خف ؤياد ئرا ربي أد ئفوكّا ئمومن س ؤبرّح ن لينجيل نّا ئݣان غر ميدّن تيحيطّ.
22 ؤداين دا تتّرن لموعجيزا، د وينّا ؤر ݣينين ؤداين دا ؤرزّون لحكما.
23 ئد نكني دا نتبرّاح س لمسيح نّا ئتّوصلبن، أياد ئݣا لعترت ئ ؤداين أها ئݣ تيحيطّ غرلݣنوس ؤرݣينين ؤداين.
24 ماشان وينّا ئختار ربّي ݣان ؤداين نغد لݣنوس ؤرݣينين ؤداين، هان لمسيح ئݣا لجهد ن ربّي أها ئݣ ألتو لحكما نّس.
25 ستيت أينّا ئݣان تيحيطّ غر ربّي، يوݣر لحكما ن ميدّن. د-ؤينّا ئݣان ضّعف غر ربّي، يوݣر لجهد ن ميدّن!
26 سموقلات أيايتما، ميمشي تݣام لّيݣ أون ئغرا ربّي؟ ؤر ديݣون شايݣان ن ميدّن نّا فهمنين، ؤلا ديݣون شايݣان ن ميدّن مي ئخاتر وادّور، ؤلا شايݣان ن شّرفا.
27 والاينّي ربّي ئخطار ئحياض ن دّونييت حما أد ئسحشم ؤنژيژن. أها ئخطار ئمضعوفن ن دّونييت حما أد ئسحشم وينّا جهدنين.
28 ربّي ئخطار وينّا غر ؤر ئلّي شّان، ئمحقورن، د وينّا ؤر ئواتان والو ݣ دّونييت حما أد ئخلو ئمعنݣرن.
29 ئمشيد، أود يون ن بنادم ؤر ئدّي أد ئفيّش خف ربّي.
30 والاينّي س ربّي نكني نݣا وين لمسيح نّا ياغولن ئݣا لحكما نّا د-ئتدّون زݣ ربّي، داي س لمسيح نݣا ميدّن نّا منانين، ميدّن ن ربّي أها ئفوكّاخ زݣ لمعصييات.
31 ئوا، أم ؤينّا ئتّيني لكتاب ن ربّي: «ونّا ئران أد-ئفيّش، أد ئفيّش س-ؤينّا ئݣا مولانا».