2
أبشر ن بولس ئ ايت كورنتوس
1 أيايتما، لّيݣ غورون ددّيخ أد-اون سيولخ خف سّر ن نّا خ-ئسباين ربّي، ؤر سيولخ س واوال أضرافي د لحكما ن ميدّن.
2 ئدّخ، لّيݣ غورون لّيخ عوّلخ أد سّيولخ غاس خف عيسى لمسيح نّا ئتوصلبن.
3 داي لّيݣ غورون لّيخ، ؤكيخ د-ئخف ئنو مّوحلخ، كّدخ أها أر ترݣيݣيخ شايݣان.
4 أينّا نّيخ د-ؤينّا أون علمخ، ؤر تݣيخ س واوال أضرافي د لحكما ن ميدّن. والاينّي ربّي ئسباين س جّهد ن رّوح نّس ئد أينّا نّيخ ئݣا لحقّ،
5 حما ؤر ئتّݣ لساس ن ليمان نّون لحكما ن ميدّن، ولايني أد ئݣ لساس نّس لجهد ن ربّي.
لحكما ن ربّي
6 مغار دا تعلامخ لحكما يي مومن ئخاتارن ݣ ليمان، لحكما-ياد ؤر تݣي تين دّونييت-اد ؤلا تين ئنبّاضن نّس نّا ئدّان أد فنون.
7 والاينّي لحكما نّا نتعلام، لحكما ن ربّي نّا ئيݣان سّر، تنّا تخزن زݣ ميدّن، ئسوجديت ربّي دات ن-اد ئخلق دّونييت، حما أداخ ئيݣ لعزّ.
8 لحكما-ياد، أود يون ؤنبّاض ن دّونيت-اد ؤر ت-ئسّين. مور تين سّن ؤر صلبن مولانا نّا غر ئلّا لعزّ.
9 ماشان ئمشينّا ئتّيارو ݣ لكتاب ن ربّي: «أينّا ؤر دجين ينّاي بنادم س-تيطّ، ؤلا ئسلاس س-ؤمژّوغ، ؤلا ئخمّم ديكس، أيد ئݣا ؤينّا ئسّوجد ربّي يي وينّا ت-ئتّيرين».
10 هاتين نكني أمي ت-ئسضهر ربّي س رّوح نّس، ئدّخ رّوح ن ربّي دا ئتّيسين مايد ئݣان شا، أود ئسكين ئغبان ن ربّي.
11 مايد ئسّن مايد ئلّان ݣ لعقل ن بنادم؟ غاس رّوح نّا ديكس ئلّان. أود لومور ن ربّي ؤر تن ئسّين غاس رّوح ن ربّي.
12 وليني نكني ربي ئوشاخ روح نس، أياد أخف ؤر دا نتخممام أم ميدن ݣ دونيت-اد حما أد نسين ألتو لبركات نّاخ ئوشا ربي.
13 أدّاي دا نساوال يي ميدّن خف ئسكّين-اد، ؤر دا نساوال س واوال نّا خ تعلم لحكما ن بنادم، ماشان س-ؤينّا خ-ئعلم رّوح ن ربّي، أر نسفهام لومور ن ربّي س-ئواليون ن رّوح ن ربّي.
14 والاينّي بنادم نّا ئضفورن شّهوات ن دّات، ؤر دا ئتّيري ئسكّين نّا د-ئتدّون زݣ رّوح ن ربّي، ئدّخ دا ئتّيني ئس ݣانت تيحيطّ. ؤر دا ئتّيغي أتن ئفهم، ئدّخ ئخصّا أد-ئكس ييلي رّوح ن ربّي.
15 نكني نّا ݣ-ئلّا رّوح ن ربّي دا نحكّم س لحق خف ئسكين نّاخ ئسباين رّوح. واليني ونّا ݣ-ؤريلي روح ن ربي ؤر تّيغين أد حكمن غيفنخ س لحق.
16 ئمشينّا ئتّيارو ݣ لكتاب ن ربّي: «مايد ئسّن ئخمّيمن ن مولانا حما أت ت-ئعلّم؟» ئد نكني غورنخ لعقل ن لمسيح.