3
ئسمغان ن ربي
1 ستيتّ أيايتما، ؤرغيخ أد-اون سيولخ أمي دا ساوالخ يي ميدّن نّا ݣ ئلّا رّوح ن ربّي، ماشان ئلا غيفي أد-اون سيولخ أم ميدّن نّا ئتباعن شهوات نسن، وينّا غر ؤرئلّي رّوح ن ربّي، نغد أم تسلميوين نّا ئبدان دا تدّون ݣ-ؤبريد ن لمسيح.
2 خف ؤياد وشيخ-اون أغو، ؤر-اون وشيخ ؤتشي أقورار ن-ئخاتارن، ئدّخ تسولم ؤر-اس تغييم. أها أود دغي تسولم ؤر-اس تقادّام،
3 لاحقّاش تسولم تݣام أم ميدّن نّا ئتباعن شهوات نسن، ئسول ئلّا ئنݣراويت لحسد د-ئمنغان. ئس ؤر تݣيم أود كونّي زيكسن أها أر تݣّيم أم نيتني؟
4 ئوا، أدّاي دا ئتّيني شا زّيݣون: «نكّين وين بولوس»، ييني وايّاض «نكّين وين أبولّوس». ئس ؤر تݣيم أم ميدّن-اد؟
5 ئنياتي، مايد ئمس أبولّوس؟ د مايد ئمس بولوس؟ ئس ؤر ئد غاس ئسمغان ن ربّي؟ هاتين نيتني أيد ئݣان سّابوب حما أت تّامنم. كو يون دا ئتݣّا لخدمت نّا س-ئوشا مولانا.
6 نكّين زرعخ، أبولوس ئسّوا، ماشان ربّي ئسخاتر.
7 ونّا ئزرعن د ونّا ئسّوان ؤر واتان والو، ماشان ربّي نّا ئسخيتيرن أمي ئمقّور وادّور.
8 ونّا ئزرعن د ونّا ئسّوان ݣان كيف كيف، والاينّي كو يون ئدّا أد يامژ تيغراض نّس خف لحساب ن لخدمت نّا ئݣا.
9 ئدّخ نكني دا نخدّم غر ربّي، ئد كونّي تݣام ئݣر ن ربّي د لبني نّس.
10 س نعمت نّا يي ئوشا ربّي، بنيخ لّساس أم شا ن لمعلّم ن-ئبنّاين، دغي، دا غيفس يوبنّو حدّ ياضن. غاس، ئخصّا كو يون أد ئرار لبال ميمشي يوبنّو.
11 ئدّخ لّساس نّا ئلّان ياد، نتا أيد ئݣان عيسى لمسيح، د-اود يون ؤر ئتّيغي أد ئݣ لّساس ياضن.
12 والاينّي، مش ئبنا شا ن يون خف لّساس-اد س دّهب نغد س نّقرت نغد س دياماند نغد س-ؤكشّيض نغد س-ؤخشلاع نغد س واليم،
13 ݣ واسّ ن لحساب، تدّا ات تباين لخدمت ن كو يون أها توا سّن. ئدّخ أسّ نّا أد ئݣ أسّ ن لعافيت تاخاتارت، لعافيت اد أت تسنعت ميمشي تݣا لخدمت ن كو يون.
14 مش تدا أت تقّيم لخدمت نّا ئتوبنان خف لّساس، ئدّا أد يامژ باب نّس تيغراض،
15 والاينّي مش تدا أتغوس، ؤر ئدّي أد يامژ تيغراض، نتا س-ئخف نّس ئدّا أد ئفوكّا، ماشان ئݣا أمّي ئزري زݣ أمّاس ن لعافييت.
16 ئس ؤر تسّينم ئد كونّي أيد-ئݣان تادّارت ن ربّي، أها ئزدغ ديݣون رّوح ن ربّي؟
17 ئوا، مش دا ئسخنونس شا ن يون تادّارت ن ربّي، ئدّا ربّي أت تيخلو. ئدّخ تادّارت-اد تين ربّي أيد تݣا، د كونّي أيد ئݣان تادّارت-اد.
18 غوراون أد ئغشّم شا ن يون زّيݣون ئخف نّس! مش ئدما شا ن يون ئس غورس لحكما ن دّونييت-اد، هاتين ئخصّا أد ياغول أد-ئݣ أحيوض حما أد ئݣ بولعقل ستيتّ.
19 ئدّخ لحكما ن دّونييت-اد تݣا تيحيطّ غر ربّي، لاحقّاش ئتّيارو ݣ لكتاب ن ربّي: «أد يامژ ربّي أيت لحكما س تحراميت نّسن».
20 أها أر ئتّيني ألّو: «مولانا ئسّن ئخمّيمن ن أيت لحكما، ؤر ديكسن لفايت».
21 خف ؤياد، ؤر ئخصّا يي أود يون أد ئفيّش خف ميدّن، ئدّخ مايد ئݣان أسكّين وينّون أيد ئݣا،
22 ئݣا بولوس نغد أبولّوس نغد بطرس نغد دّونييت نغد تودرت نغد لموت نغد شا ؤسكّين ن تاسّاعت-اد نغد شا ؤسكّين نّا ئدّان أد ئدّو. ئسكّين-اد كول وينّون أيد ݣان.
23 ئد كونّي تݣام وين لمسيح، ئݣ لمسيح وين ربّي.