4
ئمزان لمسيح
1 هاتين ئخصّا يي ميدّن أد-اخ حاسبن نكني ئمازان غاس أم ئخدّامن ن لمسيح، د-ئد لوكيل نّا مي ئتّمووش أد سباين لاسرار ن ربّي.
2 د-ؤينّا ئتواتارن زݣ ئد لوكيل: أد ديكسن ييلي لامان.
3 ئد نكّين ؤر دا تتّاويخ مش غيفي تحكمم كنّي نغد ئحكم غيفي لمجليس ن بنادم، ستيت نكّين ؤر دا حكّمخ خف ئخف ئنو قّاح،
4 ماشان مولانا أيد ئݣان أنحكام ئنو. لخاضر ئنو ؤر دا يي ئتلامّا خف ؤينّا ݣيخ. د ؤياد ؤر دا ئسضهير ئس صفيخ.
5 ئوا أد ؤر حكمات خف أود يون ماحد تسول لوقت ؤر تيويض، أر دياوض مولانا نّا ئدّان أد ئسباين ئسكّين نّا ئفّرن ݣ تالّست د نّييت ن وولاون. داي ئدّا ربّي أد ئݣ لعزّ يي ونّا ئستاهل.
6 أيايتما، هاتين نّيخ ياد ئسكّين-اد غيفي د خف أبولوس، حما أد-اون نسباين أها تعلمم:«أد ؤر دزيدات خف ؤينّا ئتوارين ݣ لكتاب ن ربّي»، ئمشي أود يون ؤر ئتفيّاش خف يون ياضن.
7 ئدّخ ماس تيفد شݣ ميدّن ياضن؟ أينّا غورش ئلّان كول، ئوشاكت ربّي. ئوا مش-اش ئتمووش، مّاخ ألّيݣ دا تفياشت أمّي ؤر-اش ئتمووش؟
8 دغي، تدجيونم أها تݣام شّبّاع! تݣام ئݣلّيدن ئد نكني ؤر تن نݣي! أوا مور تݣيم ئݣلّيدن ستيت، حما أن نامو أݣيدون أود نكني ݣ تݣلّيت!
9 نكّين دا تراعاخ ئس أخ ئݣا ربّي نكني ئمازان ݣ ؤدغار أنݣّارو، هاتين نݣا أم ونّا خف مي ئتّوحكم س لموت، ئدّخ نݣا لفراجت ݣ دّونييت، غر لمالايكا د ميدّن.
10 نكني دات ن ميدن نݣا ئحياض س سّيبّت ن لمسيح، ئد كونّي تلّام س لعقل، ئدّخ تݣام زݣ لمسيح. نكني نݣا ئمضعوفن ئد كونّي تصحام. كونّي ئتواݣاون شّان ئد نكني نتوحقّر.
11 ئوا أر دغي، تسول دا غيفنخ تّك تمارا س بوهيّوف د-ئريفي، حژّوضي د تيتي أها نݣ ئهدّاويين،
12 أر نتوحيل ݣ لخدمت س-ئفاسن نّخ. دا خ رݣمن أر اسن نتتّر لباراكا. أر غيفنخ تعدّان أر نتصبار.
13 أدّاي دا ديݣنخ سّوالن س ݣار أوال، دا سن نساوال س لوقر. ناغول نݣا أم ؤشطّاب ن دّونييت د-ؤكرياس ن ميدّن ار دغي.
14 هاتين ؤردا أون تّاريخ أياد حما أكون سّحشمخ، والاينّي حما أكون وصّاخ أم ئشيرّان ئنو ئعزّين.
15 علاحقّ مغار غورون عشرالاف ن-لمعلّمين ن-ؤبريد ن لمسيح، أد غورون ييلي غاس يون ن-ئبّاتون. نكّين أيد ئݣان ئبّاتون، ئدّخ تومنم س لمسيح، لّيݣ برّحخ غورون س-لينجيل.
16 ئوا عافاون، تفارات أبريد ئنو.
17 خف ؤياد، ؤزنخاون تيموتاوس، ئݣان أم ممّي ئعزّين نّا ݣ ݣيخ لمان أد ئݣ لخدمت ن ربي، أها ئادّ أداون ئسكتي لقاعيدا نو نّا يي ئتݣوّادن ݣ-ؤبريد ن لمسيح. أياد أيدا تعلاّمخ ديما ݣ مايد ئݣان أدغار د مايد ئݣان أݣراو ن-ئمومن.
18 هان ئتس زّيݣون دمان ئس ؤر دّيخ أد-اغولخ غورون، أياد أخف غيفي ؤفّن.
19 والاينّي دّيخ أد غورون د دّوخ فيمرّا، مش ئرا مولانا، أها أنّايخ ئس ئلا غرئمفيشناد لجهد ن ربي ماد غاس أوال.
20 ئدّخ تاݣلدييت ن ربّي ؤر دا تّيلي س واوال، ماشان س لجهد.
21 ئوا، ئنياتي ماي ترام؟ ئد أد د دّوخ غورون س تغرييت نغد س تايري د تاضفي؟