6
أراو د ـ لواليدين نسن
1 أياراو، ئدّخ ثݣام وين موﻻنا، تّضاعاث لوالدين نّون ئدّخ أياد أيد غيفون ئلّان أتّݣيم.
2 «تّوقّار ئبّانش د ـ ئمّانش» أيد ئݣان لوصيث ثامزواروتّ ݣ ـ لوصييّاث ن ـ ربّي نّامي يسّثثفار لقيوال نّاݣ ئنّا:
3 «حما أداش ئسخّر ربّي مايد ئݣان شا أها ثغزيرف ثودرث نّش خف واشال.»
4 ئيد كونّي ألوالدين، أد ؤر تژيّاراث a أراو نّون أرد أسن ئطيّر؛ ماشان سّݣماتّن أها سّلمدثن، ثسربّامثن ئمشينّا يرا مولانا.
ئسمغان د ـ ئيد بابين نسن
5 أييسمغان، تّضاعاث ئيد بابين نّون ݣ ـ مايد ئݣان شا ئمشينّا دا تّضاعم لماسيح، أر ثن توقّارم شايݣان س ـ وولاون نّون،
6 ؤريد غاس أدّاي دا ديݣون تراعان ئمشينّا دا تݣّان وينّا دا تّيرينين أد غيفسن رضون ميدّن، ماشان ئدّخ ثݣام ئسمغان ن ـ لماسيح تݣّاواث أينّا يرا ربّي س ـ وولاون نّون.
7 أراسن ثخدّمم س ـ لخاضر نّون غاس أمّي دا ثخدّمم ئي مولانا س ـ ئخف نّس، ؤر ئيد ئي ميدّن.
8 هاثين ثسّنم ئيد كول ؤنّا دا يتݣّان أينّا يژيلن، ئدّا مولانا أداس ئخلّص أمّ ئݣا ييسمغ أمّ ؤر ثيݣي.
9 أود كونّي أييد بابين ن ـ ئسمغان، ئژيلاث د ـ ئسمغان نّون، أد ؤر تتݣالّاواث ديكسن. ثيسينم ئيد باب نّون كول نّون ئلّا ݣ ـ ئݣنّوان، د ـ نتّا ؤر دا يتݣّا ثودماوين.
سّناح نّا داخ ياكّا ربّي
10 ئقّيمايي أداون ئنيخ أيايثما د ـ ئسثما، عوّلاث خف مولانا أداون يوش لجهد س ـ ثيغيتّ نّس ثاخاثارث.
11 أسياث سّناح ن ـ ربّي س ـ ماس ئلّا حما أتّيغيم أتنّاليم ثيخندالّاسين b ن ـ شّيطان.
12 ئدّخ ؤر ئيد بنادم أي دا دنتّمواث، ماشان دا نتّمّواث د ـ ئنمغورّ د ـ ئنبّاضن نّا ؤر دا نتّانّاي، د ـ وينّا نّا دا تّنباضنين خف دّونيث أد مّ ـ ثيلّاس، أر نتّمّواث د ـ وادّجنون نّا زدغنين ئنݣر ن ـ ييݣنّا د ـ واشال.
13 خف ؤياد، أسياث سّناح نّاون ئوشا ربّي كول أمّي ثنسام أعبان حما أتّيغيم أتنّاليم شّيطان ݣ ـ واسّ نّا ݣ ـ غيفون ديهدّجم، أها ثقّيميم ثزݣّام ؤر تّعايادم غر ضارث أرد ثشمّلم ئمنغي.
14 ئوا زݣّاواث ثفكسم س ـ لحقّ ثݣيمث د ـ أمّ ؤفكّاس، ثݣيم أينّا يصلحن د ـ أمّ ثزيبّا أداون ثحضو ئدمارّ نّون.
15 ثقّنم زّعامث ئي يضارّ أمّ ئدوكا حما أتبرّحم س ـ ئنغميسن ژيلنين خف لهنا.
16 د ـ نّيݣ ن ـ ؤياد كول، ليمان نّون ݣ ـ مولانا أداون ئيݣ أمّ ثمسّنثلث نّاس تّيغيم أتنّاليم ثانّبلين ن ـ شّيطان نّاݣ ثاغ لعافيث.
17 د ـ ليمان نّون ن ـ ئيس كون ئفوكّا ربّي أكون ئحضو ئمشينّا دا ثحطّو طّاݣيّا ن ـ ووزّال ئقرّا نّون، ثاسيم أوال ن ـ ربّي أمّ ثفروتّ نّاون ئوشا رّوح نّس.
18 تݣّاواث أياد كول س ـ ثژالّيتّ د ـ ثوثرا ئي ربّي، أر تژالّام ݣ ـ مايد ئݣان لوقث د ـ رّوح ن ـ ربّي ئدّا أكون ئسعاون. حضوياث ثژالّيتّ أد ؤر زّيكس تّوحيلاث، أر تتّرم ئي ربّي كّوياسّ زݣ ثنيلا ن ـ ئمومنّ كول.
19 ثتّرماس زݣ ثنيلا نو أو نكّينين أد ئي يتّاكّا ئواليون نّا يي يخصّان حما أد تبرّاحخ س ـ طّايطاي ئي ميدّن خف ؤينّا يفّرن ݣ ـ ئنغميسن ژيلنين،
20 نّامي ݣيخ أمازان ئتّوشرفن س ـ ثيفرين، ثتّرماس حما أد ئغيخ أد ئسّن تبرّاحخ س ـ طّايطاي ئمشينّا غيفي يلّان.
أمسافاض
21 داي حما أتّيسينم مايد ئي ثعنا د ـ مايدا تݣّخ، ئدّا ݣماثنخ ئعزّان تيخيكوس، نّا دا يتݣّان لخدمث ن ـ مولانا س ـ وول نّس، أداون ييني أينّا يلّان كول.
22 ئدّخ أياد س ـ ئخف نّس أخف أون ثينّ ؤزنخ حما أداون ييني مايداخ ئݣا لحال، أها يسنّيرس ؤلاون نّون.