15
تنكرا لمسيح زݣ لموت
1 أيايتما، ريخ أد أون سّكتيخ دغي لينجيل نّا خف أون سيولخ ياد، تقبلمت أها تْسُولْمْ تُومْژْمْ دِيكْسْ.
2 س لينجيل-اد أس دا تفوكّام مش تحضام أوال نّا أون نّيخ، ماعدا مش تومنم باطّل.
3 ݣ ؤمزوارو أسكّين أختار نّا ؤمژخ هاتين سّيوضخاونت: لمسيح ئمّوت خف سّيبت ن لمعصيات نّخ أم ؤينّا ئلّان ݣ لكتاب ن ربّي.
4 ئتّونضل، أها ئكّر ݣ واسّ ويس شراض، أم ؤينّا ئلّان ݣ لكتاب ن ربّي.
5 داي ئضهرد يي بطرس، فّيراس يي ئمحضرن س طناعش،
6 ضارت ن-ؤياد، ئبايند يي ؤݣار ن خمسميا زݣ أيتماتنخ ݣ يوت ن لمرت. شايݣان زّيكسن سولن دّرن، ماشان مّوتن ئتس.
7 أها ئضهرد يي يعقوب، داي فّيراس يي ئمازان كول.
8 غر تنݣيرا، ئضهريييد أود نكّين. هاتين ݣ واسّ نّا، ݣيخ أم شا ؤحيوض.
9 ئدّخ نكّين أمي ئمژّي شّان ݣ-ئمازان كول، أها ؤر ستاهلخ أد ݣخ أمازان، لاحقّاش تعدّاخ شايݣان خف ؤݣراو ن-ئمومن.
10 ماشان أينّا ݣ لّيخ دغي، س نّعمت نّا س غيفي ئنعم ربّي، د نّعمت نّا يي ئوشا ديكس نّفع، خدمخ ؤݣار ن-ئمازان كول، والاينّي ؤر ئد نكّين أيد ئخدمن، هاتين نّعمت ن ربّي نّا أݣيدي ئلّان.
11 نكّين نغد ئمازان ياضن أينّا س نتبرّاح أس تومنم.
ئمومن نّا ئمّوتن دّان أد كرن
12 هاتين مش دا نتبرّاح س تنكرا ن لمسيح زݣ ئنݣر ن-ئمتّين، ئوا مّاخ ألّيݣ دا تّينين ئتس زّيݣون ؤر تلّي تنكرا ن-ئمتّين؟
13 ئوا، مش ؤر تلّي تنكرا ن-ئمتّين، هان أود لمسيح ؤر ئكّير.
14 هاتين مش ؤر ئكير لمسيح، هان أبرّح نّخ ئبطل أها ئبطل أود ليمان نّون.
15 مش ستيت ؤر دا تكرن ئمتّين زݣ لموت، لمعنا ن-ؤياد ربّي ؤر ئسكّير لمسيح. ݣ لحالت-اد، هاتين نݣا شّهود ن لباطل، ئدّخ نشاهد ئس د-ئسكّر ربّي لمسيح زݣ لموت.
16 علاحقّ مش ؤر دا تكّرن ئمتّين زݣ لموت، هان لمسيح ألتو ؤر ئكّير.
17 داي مش ؤر ئكّير لمسيح زݣ لموت، هان ليمان نّون ئبطل أها تسولم تݣام ئمعصان،
18 د وينّا ئمّوتن أها أر تّمّن ئيس هاتين توهلكن!
19 مش نݣا رّجا نّخ ݣ لمسيح غاس ݣ دّونييت-اد، هاتين ئخوباخ ؤݣار ن ميدّن كول.
20 والاينّي أينّا ئݣان صّاحت ن واوال، لمسيح ئكّر زݣ ئنݣر ن-ئمتّين، نتا أيد ئݣان أمنزو ن وينّا أد-ئكرن زݣ لموت.
21 ئدّخ س سّيبت ن بنادم تدّاد لموت، ئوا أود تانكرا ن-ئمتّين تدّاد س سّيبت ن بنادم.
22 ميدّن كول ݣان زݣ تاروا ن آدم، دّان أد متن أم آدم. ئد وينّا ئتّامن س لمسيح، دّان أد ئديرن أم نتّا.
23 ماشان كو يون د توالا نّس، لمسيح د أمزوارو، ضاراس وينّا ئݣان زّيكس أدّاي د ياغول.
24 فّير ن-ؤياد أت تدّو تينݣيرا ن دّونييت. أد ئخلو لمسيح شّياطن د-ئخاتارن نّسن د ئنبّاضن ؤرغودانين أها ئوش تاݣلدييت يي ربّي ئبّاتنخ.
25 ستيت لابدّا أد ئݣ لمسيح أݣلّيد أر ئݣ ربي ئعداون نّس كول دّاو ن-ئضارن نّس.
26 أعداو أنݣّارو نّا ئدّا ربّي أد ئخلو : لموت.
27 ئدّخ لكتاب ن ربّي دا ئتّيني: «ئݣاس ربّي كولشي دّاو ن-ئضارن نّس». والاينّي ئضهر ئس ؤرئلّي دّاو ن-ئضارن نّس، ئدخ نتّا أيد ئݣان كولشي دّاو ن-ئضارن نس.
28 والاينّي أدّاي ييلي كولشي دّاو ن-ئضارن لمسيح، لوقت نّا، ممّيس ن ربي ئدّا أد ييلي دّاو ن تنباطّ ن ربّي نّا ت-ئݣان د أݣلّيد خف كولشي، حما أد ئنبض ربّي خف كولشي.
29 دغي، مش ئصحا ئس ؤر دا تكّرن ئمتّين أبدا، ئوا ماتّا نفع ئلان غرؤينّا ئتغبّازن ݣ وامان خف ئمتّين؟ مّاخ ألّيݣ دا تغبّازن ݣ وامان ݣ-ؤدغار نّسن؟
30 ئوا مّاخ أد نݣر ئخف-اون نّخ غر لموت كو لوقت؟
31 أيايتما، نكّين دا تانّايخ لموت كوياسّ! دا أون تّينيخ أياد ئبورزييي ئسّون خف لخدمت نّا ئݣا عيسى لمسيح مولانا نّخ.
32 مش ݣيخ بنادم نّا ئدّان أد ئفنو، ماتّا نفع غيري لّيݣ نّوغخ د ميدن ئݣان أم لوحوش ݣ تمدينت ن أفسس؟ مش ؤر دا تكّرن ئمتّين، أد نيني د ؤينّا نّانين «أوريو أن نتش نسو، ئدّخ ندّا أن نمّت أسكّا.
33 أد ؤر سخضويات ئخف-اون نّون: «هان تامونت ن ݣار ميدّن دا تسخسار بنادم ئغودان».
34 أغولات س-ئخف-اون نّون، أد ؤر تݣّات لمعصييات، ئدّخ ئتس زّيݣون ؤر سّين ربّي كول. دا تّينيخ أياد، حما أكون سحشمخ.
دّات دا تكّر زݣ لموت
35 والاينّي شا ن حدّ أد-ئسقسا: «ميمشي دّان ئمتّين أد-كرن؟ ماتّا دّات أس دّان أد أغولن؟»
36 أحيوض أيد تݣيد! هان ئفس ؤر دا ئتمغي مش ؤر ئمّوت.
37 د-ؤينّا تزرّعد ؤر ئد نتّا أيد ئݣان أمغاي نّا ئدّان أد ئمغي، ماشان ئفس ن-ئردن نغد شا ئفس ياضن.
38 د ربّي ئدّا أد-اس ئوش دّات نّا ئرا، د كو ئفس غورس دّات نّس.
39 أود يون ن دّات ؤر دا ترويس دّات ياضن، بنادم غورس دّات نّس، د لبهايم غورسن دّات وحدو نّسن، د دّات ن-ئجضاض وحدو نّسن، د-ئسلمان غورسن دّات نّسن.
40 أها ئلين ئد دّات ݣ-ئݣنّا د-ئد دّات ݣ واشال، ماشان زّين ن-ئد دّات ن-ئݣنّا وحدو نّسن د زّين ن-ئد دّات ن واشال وحدو نّسن.
41 تافوكت غورس زّين نّس، د وايور غورس زّين نّس، د-ئتران غورسن زّين ياضن، زّين ن كو ئتري ؤر ئݣي أم زّين ن-ئتري ياضن.
42 ئوا هاتين ئمشيد يي تنكرا ن-ئمتّين: لݣنازت دا ننطّل تمّوت، أدّاي تكّر دا تّيدير أبدا.
43 دا تّونضال لݣنازت تݣا تامضعوفت أر تكّر تعمّرس لجهد، أر تّونضال تݣا تامخيبت، أر تكّر ݣ لعزّ.
44 لݣنازت نّا ئتّونضال تݣا تين دّونييت أها أر تكّر زݣ لموت ديكس رّوح. هاتين مش تلّا دّات ن دّونييت، تلّا ألّو دّات ن رّوح.
45 لكتاب ن ربّي دا ئتّيني: «أدام، أرݣاز أمزوارو يغول ئݣا لموخليقت ئدّرن.». ئد آدم أنݣّارو ياغول ئݣا رّوح نّا ياكّان تودرت.
46 (ئوا رارات لبال)، بنادم وين رّوح ؤر دا ئتدّو د-أمزوارو، ماشان بنادم ن دّونييت دا ئتدّو أمزوارو ئدّود فّيراس وين رّوح.
47 ربّي ئعديل بنادم أمزوارو زݣ واشال. بنادم-اد ئݣا زݣ أشال ئد بنادم ويسّين ئداد زݣ ئݣنّا.
48 وينّا ئݣان زݣ واشال ݣان أم ونّا ئتّوعدلن زݣ واشال، ئد وينّا ئݣان زݣ ئݣنّا ݣان أم ونّا د-ئدّان زݣ ئݣنّا.
49 ئوا ئدّخ نرويس ونّا د-ئدّان زݣ واشال، ئوا هاتين ندّا أن نرويس ونّا د-ئدّان زݣ ئݣنّا.
50 أيايتما، هاتين دا أون تّينيخ ئس ؤر دا ئتكوسا ؤكسوم د-ئدامّن تاݣلدييت ن ربّي، ونّا ئدّان أد ئفنو ؤر دا ئتكوسا ونّا ؤر دا يوفنّو.
51 دغي، دّيخ أد-اون ئنيخ يون ؤسكّين ئݣان لعجب: ؤر ندّي أن نمّت كول نخ، ماشان ندّا أن نبدّل كول نخ.
52 فيمرّا، ݣ يون ؤغماز ن تيطّ، أدّاي ئسغوي لبوق ݣ واسّ أنݣّارو. ئدّخ أدّاي ئسغوي لبوق، دّان أد كّرن ئمتّين حما ؤر تمتاتن أبدا، ئد نكني ندّا أن نتوبدّل.
53 علاحقّ دّات-اد نّا ئترشون ئقّن أت تاغول أت تݣ تنّا ؤر دا ئترشون، د دّات نّا ئتمتاتن أت تبدّل غر تنّا ؤر دا ئتمتاتن.
54 أدّاي تاغول دّات-اد تيمرشوت أت تݣ تنّا ؤر دا ئترشون، د دّات نّا ئتمتاتن أت تݣ تنّا ؤر دا ئتمتاتن، ئدّا أد ئجرو ؤينّا ئتوارين ݣ لكتاب ن ربّي : «تواكس لموت، أها تشمّل لغلوبيت».
55 ئوا، آلموت، ماني أسنّان نّم؟ ئوا، آلموت، ماني لغلوبيت نّم؟
56 هان أسنّان ن لموت لمعصييت أيت ئݣان، د لجهد ن لمعصييت شّرع أيت ئݣان.
57 والاينّي نحمداست يي ربّي نّا خ ياكّان لغلوبييت س مولانا عيسى لمسيح.
58 ئوا أيايتما ئعزّين، تبتات أها ؤر كون ئتزعزاع أود يون زݣ وانسا نّون. تݣات لمجهود ݣ لخدمت ن مولانا، كونّي تسّنم لخدمت نّا تݣّيم ݣ-ؤدم ن مولانا ؤر تدّي أت تضيّع.