14
توكي نّاݣ ئلا لخير نّا ئتنفاعن ميدن
1 أيايتما، ئخصّا أتݣ تيري لهم نّون، ترزوم توكّي نّا يكّا رّوح ن ربّي، لومنّا توكّي ن-ؤبشّر س واوال نّا أون ئنّا ربّي.
2 ئدّخ ونّا ئساولن س ئيلس ؤر ئتواسننس ؤر دا ئساوال د ميدّن ماشان د ربّي. لاحقّاش ؤر دات ئتفهام أود يون، والاينّي دا ئساوال س لجهد ن رّوح ن ربّي خف ئسكّين نّا ئفّرن.
3 ماشان ونّا ئساوالن س واوال نّا س-ئنّا ربّي، هاتين دا ئساوال يي ميدّن حما أتن ئسخيتر ݣ ليمان، أت تن ئسّزعيم أها ئعاونتن.
4 ونّا ئساوالن س ئيلس نّا ؤر ئتواسّن دا ئتنفاع غاس ئخف نّس، ئد ونّا ئساوالن س واوال نّا س-ئنّا ربّي دا ئتنفاع أݣراو ن-ئمومن.
5 ريخ أت تسيولم كول نّون س والسيون نّا ؤر تواسّنين، ماشان دا تّيريخ أت تسيولم س واوال نّا أون ئنّا ربّي. ئدّخ ونّا ئساوالن س واوال نّا س ئنّا ربّي دا ئتنفاع ؤݣار ن ونّا ئساوالن س والسيون نّا ؤر تواسّنين. ماعدا مش ئلّا شا ن يون ن غا ت-ئسفهمن حما أد ئسنفع أݣراو ن-ئمومن.
6 أيايتما، مش غورون د دّيخ، أها أر أون ساوالخ س والسيون نّا ؤر تواسنين، ما س مي دّيخ أكون نفعخ؟ ؤر دّيخ أكون نفعخ س والو ماعدا مش سيولخ أݣّيدون س توسنا نغد س-ؤينّا يي ئنّا ربّي نغد س-ؤلمد.
7 أود دوزان ن-ئزلان نّا ݣ-ؤر ئلّي رّوح، أم تغانينت د لوطار، مش ؤر دا تسّوفوغ أوال ئفرّزن، ماكا تݣّاد أت تاكزد لّغا ن تغانينت د وين لوطار؟
8 ئوا مش ؤر ئفرّيز ؤغويّي ن لبوق، مايد ئدّان أد ئسوجد ئخف نّس يي لحرب؟
9 أود كونّي، مش دا تساوالم س ئيلس ؤر ئتواسنن، ميمش ئدّا ؤمسّغد أد ييسين أينّا تّينيم؟ ئدّا واوال نّون أت تياوي واضو!
10 هاتين عدّان والسيون ݣ دّونييت، د كو ئلس غورس لمعنا.
11 والينّي مش ؤر فهيمخ لمعنا ن شا ن واوال، أد ݣخ أم ؤبرّاني غر ونّا ئس ئساوالن، أها ئدّا أود نتّا أد غوري ئݣ أم ؤبرّاني.
12 ئد كونّي ألّو ئنغاكون فاد ن توكّيوين نّا يكّا رّوح ن ربّي، رزّويات غيفسن حما أد خاترن ئݣراون ن ئمومن ݣ ليمان ؤݣار.
13 خف ؤياد، ونّا ئساوالن س ئيلس نّا ؤر ئتواسّنن، أد ئتّر يي ربّي أد-اس ئوش توكّي ن-ؤسفهم ن والسيون.
14 ئدخ مش ژّولّيخ س ئيلس ؤر ئتواسّن، رّوح ئنو دا ئتژالّا أود نتا، ماشان لعقل ئنو ؤر دا ئتفهام أينّا تّينيخ.
15 ئوا ماي تݣّاخ؟ دّيخ أد ژّالخ س رّوح ئنو، أها ژّالخ ألتو س لعقل، دّيخ أد ئنيخ تيمليازين ن لحمدو س رّوح ئنو، أها ئنيختن ألّو س لعقل.
16 هاتين مش دا تحمادت ربّي س رّوح نّش، ئوا ميمشي ئدّا ؤمسّغد ؤجديد نّا بحرا د-ئدّان أد ييني: «أمين» خف لحمد نّش، د نتّا ؤر ئسين مايدا تّينيد؟
17 شݣّين تحمدت ربّي مليح، ماشان يون ياضن ؤر ييوي شا ن نفع.
18 دا تحمادخ ربّي، ئدّخ دا ساوالخ س والسيون ؤر ئتواسّن ؤݣار نّون،
19 والاينّي أدّاي ئليخ ݣ-ؤݣراو ن-ئمومن، ييفييي أد ئنيخ خمسا ن-ئواليون فرّزنين حما أت تن سّلمدخ يي ميدّن ياضن، ؤلا أد ئنيخ عشرا لاف ن واوال س-ئلس ؤر ئتواسنن.
20 أيايتما، أد ؤر تݣّات أم ئشيرّان ݣ لعقول نّون. ماشان ݣات أم نيتني ݣ تيخّيت، ئد ݣ لعقل ئخصّا أت تݣيم ئرݣزن تمرنين.
21 هاتين ئتواري ݣ شّرع: «دا ئتيني مولانا: أد سيولخ يي شّعب-اد س واوال ن ميدّن ياضن د س ئقما ياضن، داي واخّا ئمشيس، ؤر دّين أد يي سلّين».
22 هان توكّي ن واوال س والسيون ؤر ئتواسنن تݣا تاماتارت ن ربّي يي وينّا ؤر دا ئتّامنن. ئد توكّي ن واوال س-ؤينّا أون ئنّا ربّي، تݣا تاماتارت يي وينّا ئتّامنن.
23 مش ئمّون ؤݣراو ن-ئمومن، أها أر ساوالن ميدّن كول س والسيون ؤر ئتواسنن، كشمن ئتس ؤر قرانين نغد وينّا ؤر ئݣين ئمومن، ئس ؤر دّين أد ئنين غيفون تݣام ئحياض؟
24 والاينّي مش كول نسن دا ئسّوالن س واوال نّا سن ئنّا ربّي، أها ئكشم غورسن شان يون ؤر ئقران نغد ونّا ؤر ئݣين أمومن، هاتين ئدّا أوال نّسن أت ئلامّا، أها حكمن غيفس كول نّسن،
25 د-ؤينّا ئفرن ݣ وول نّس أد ئتّوفضح، داي ئتّوتي س-اشال خف ؤدم نّس أد ئعبد ربّي أها ئقرّا ستيت ئس ئلّا ربّي أݣّيدون.
لعيبادا، ئخصّا أد تواݣ س صّواب د نّيضام
26 دغي، أيايتما مايد ئخصّا أت تنݣ؟ أدّاي تمونم، شا ن حدّ دا ئتّيني تمليازت ن ربّي، شا ن حدّ دا ئسلماد ميدّن، حدّ ياضن دا ئساوال خف توارݣيت نّا س ئسباين ربّي، د حدّ ياضن دا ئساوال س ئيلس ؤر ئتواسنن، د شا ياضن دا ئسفهام ئ-ميدّن. أياد كول ئلازم أد ئعاون ئمومن أد خاترن ݣ ليمان.
27 داي مش دا ساوالن ميدّن س والسيون ؤر ئتواسنن، أد سيولن سين نغد شراض مش عدّان، والاينّي أد ݣين تاوالا أها ييلي ترجمان.
28 داي مش ؤر ئلّي ترجمان، ئخصّا يي ونّا ئساوالن ؤر ئساوال س-ؤغويّي ݣ-ؤݣراو ن-ئمومن، ماشان أد ئسيول ئنݣراس د-ئخف نّس د-ئنݣراس د ربّي.
29 ئد وينّا ئساوالن س-ؤينّا سن ئنّا ربّي، أد سيولن زيكسن سين نغد شراض، ماشان وييّاض أد رَارنْ لْبَالْ يي وَاوَالْ نْ وِينَّا ئِسَاوَالْنْ.
30 والاينّي مش ئسيول ربّي يي شا ن يون زݣ وينّا قّيمنين، ئخصّا يي ونّا أر ئساوال أد ئسوسم،
31 ئدّخ كول نّون تغييم أت تسيولم س-ؤينّا ئنّا ربّي يون فّير ن يون، حما أد لمدن ميدّن كول أها زعيمن.
32 وينّا ساوالنن س واوال نّا سن ئنّا ربّي، د تلين نّبض ݣ ئخفاون نسن، ئخصا أد ݣين تاوالا يون فّير يون.
33 علاحقّ ربّي ؤر ئݣي وين تيريتّ، ماشان وين لهنا، أم ؤينّا ئݣا لحال ݣ-ئݣراون ن-ئمومن كول.
34 ئخصّا يي توتمين كول أد سوسمنت ݣ تݣراوين ن-ئمومن، هاتين ؤر-أسن ئزري أد سيولنت، أها ئخصّاسن أد ضاعنت أݣراو أم ؤينّا ئتّيني شّرع ن موسى.
35 مش رانت أد ئسينت شا ؤسكّين، ئخصّاسنت أد سقسانت ئرݣزن سنت ݣ تيدّار، ئدّخ ؤر ئلاق يي تمطّوطّ أت تسيول ݣ تݣراوين ن-ئمومن.
36 ئد زݣ غيرون أيد ئدّا واوال ن ربّي؟ نغد ئدّاوند غاس كونّي؟
37 ونّا ئنّان ݣ-ئخف نّس ئݣا نّبي نغد غورس توكّي ن رّوح نّا يكّا ربّي، ئخصّا أد ييسين ئس ئݣا ؤياد أون ؤريخ لوصييت ن مولانا،
38 ماشان مش ؤر ئري شا ن يون أد-ئقرّا س-ؤياد، هاتين نتّا س-ئخف نّس ؤر-ئس ئقرّا ربّي.