13
تاييري
1 مش دا ساوالخ س واوال ن ميدّن د واوال ن لملايكا أها ؤر دا تّيريخ ميدّن،
ئوا هاتين ݣيخ أم والّون ئتزنزينن نغد أم نّاقوس ئتطنطينن.
2 مش غوري توكّي نْ وَاوَالْ
أد سيولخ س-ؤينّا يي ئنّا ربّي،
فهمخ أينّا ئفّر،
ئسينخ مايد ئݣان شا،
مش ديݣي ليمان أخاتار
أد سموتّيخ لاجبال،
مش ؤر دا تّيريخ ميدّن هاتين ؤر وتاخ شا.
3 أداي وشيخ كول لمال ئنو يي ئمژلاض،
ݣرخ دّات ئنو ݣ لعافييت أت تغوس.
مش ؤر دا تّيريخ ميدّن
ؤر ئدّي أد يي ئصاحا والو.
4 ونّا ئتيرين ميدن دا ئتصبار، أر ئتݣّا لخير،
ؤر دا ئحسّد، ؤر دا ئتفيّاش،
أها ؤر دا ئتّاف س لكيبر،
5 ؤر دا ئتݣّا لعار، ؤر دا يورزّو لهمّ نّس،
ؤر دا س-ئطيّار، ؤر دا ئتّامژ لحسيفت،
6 ؤر دا ئفرّح س تاعدّو،
ماشان دا ئفرّح س لحقّ،
7 دا ئتسماح يي كولشي، أَرْ ئِتْݣّا لَمَانْ ݣْ كُلْشِي،
غورس رّجا ݣ مايد ئݣان شا أها أر ئتصبار يي مايد ئݣان شا.
8 تايري ؤر دا توفنّو أبدا. أبرّح س ؤينّا ئنّا ربي أد ئبدّ،
أَوَالْ سْ وَلْسِيوْنْ ؤر تواسننْ أدْ قْضُون،
توسنا ؤر تدّي أت تدام.
9 ئدروس ؤيناخ ئسباين ربي، أها ئدروس ؤينّا س-نتبرّاح
10 ماشان أينّا ئشمّلن ئدّا أد ئباين يون ن واسّ،
ئدّا ؤينّا ؤر ئشمّيلن ؤر ئتغيما.
11 لّيݣ ݣيخ ئشيرّي أر ساوالخ أم ئشيرّي
أر تخمّامخ أم ئشيرّي
أر تفرّازخ أم ئشيرّي.
والاينّي لّيݣ ݣيخ أرݣاز ݣريخ س-ئسكّين كول ن-ئشيرّان.
12 دغي، دا نتراعا ݣ لمري يوت ن تّصويرت نّا ؤر ئضهيرن مليح،
ماشان ندّا أد ت نانّاي ؤدم ݣ-ؤدم.
أسّ-اد سّنخ شا ن توسنا ؤر ئشميلن.
فّيراس تدّا أت تشمّل ئمشينّا يي ئسّن ربّي.
13 والاينّي دغي، شارض ئسكّين أيد ئتدامن:
ليمان، رّجا د تايري.
ماشان تنّا ئمقّورن شايݣان تايري ن ربي.