12
تُوكِّيوين ن رّوح
1 دغي أيايتما ئعزّين، ريخ أد-اون سيولخ خف تُوكِّيوين نّا يكّا رّوح ن ربّي، ريخ أت تيسينم ستيتّ توكّيوين-أد.
2 هاتين تسّنم لّيݣ تسولم ؤر تومينم س ربّي، أر تعبادم لاصنام نّا ؤر دا ئساوالن أها تّوحريم غورسن س لخاضر.
3 أياد أخف ريخ أت تيسينم ئس ؤر ئلّي أود يون ن بنادم نّا ئساوالن س رّوح ن ربّي أد ئغي أد ييني: «ئݣا عيسى ؤنعيل!» أها ؤر ئلّي أود يون ن بنادم نّا ئغين أد ييني: «عيسى أيد ئݣان مُولَانَا!» مش ؤر-اس ت-ئنّي رّوح ن ربّي.
4 يّيه، لّانت شايݣان توكّيوين، والاينّي غاس يون رّوح ن ربّي أيد ئلّان.
5 لّان شايݣان ئبردان أد ݣخ لخدنت يي مولانا، والاينّي غاس يون ن مولانا أيد ئلّان.
6 أها لّانت شايݣان ن لخدامي، والاينّي غاس يون ن ربّي أيد ئلّان، نتّا أيدا ئتعاوان ميدّن كول حما أد ئِݣْ كو يون لخدمت نّس.
7 د كو يون دا ئتّامژ توكّي حما أد ئسبايان لجهد ن روح ن ربي، د ؤياد ديكس لخير يي ميدّن كول.
8 رّوح ن ربّي ئوشا يي يون أد ئسيول س وَاوَالْ لحكما. أها ئوش يي يون ياضن أَدْ ئِسِيوْلْ سْ وَاوَالْ نْ تُوسْنَا.
9 رّوح-اد س-ئخف نّس دا ياكّا يي يون ليمان، ئوش يي وايّاض توكي ن ؤجوجي ن-ئموضين.
10 أها أر يكّا يي يان لجهد أد ئݣ لموعجيزات. ئد يان ياضن داس يكّا أد ئسيول س واوال نّا س-ئنّا ربّي. د يان ياضن داس يكّا أد ئفرّز ئنݣر ݣار رّوح د رّوح ئغودان. د يان ياضن داس يكّا أد ئسيول س والسيون ؤر ئتواسنن، ئد يان ياضن داس يكّا أد ئݣ ترجمان ن واوال-اد.
11 ئسكّين-اد كول دا تن ئتّݣ غاس رّوح-اد س-ئخف نّس، أها أر تن يوطّو خف كو يون أم ؤينّا ئرا.
يون دّات د شيݣان لمفاصل
12 دّات ن بنادم غاس يون أيد ئݣا واخّا ديكس شايݣان ن لمفاصل. لمفاصل-اد مقّار ݣّوتن دا تݣين يون ن دّات، هاتين ئمشينّا أيد ئݣا دّات لمسيح.
13 ئدّخ كول نخ نتوغبّزس يان رّوح حما أن نݣ يون ن دّات، نݣا ؤداين نغد وينّا ؤر ݣنين ؤداين، ئسمغان نغد ئحوريين. كول نخ نسوا زݣ يان ن رّوح.
14 دّات ألتو ؤر ئݣي غاس يون لمفصل، ماشان ئݣا شايݣان ن لمفاصل.
15 مش ئنّا ؤضار: «نكّين ؤر ݣيخ أفوس، هاتين ؤر ݣيخ زݣ دّات!» ئوا ئس ؤر ئݣي ستيت زݣ دّات؟
16 داي مش ئنّا ؤمژّوغ: «نكّين ؤر ݣيخ تيطّ، ئوا نكّين ؤر ݣيخ زݣ دّات!» ئس ؤر ئݣي ستيت زݣ دّات؟
17 داي مش ئݣا دّات كول تيطّ، ئوا ما س مي ئدّا أد ئسغد؟ يي مش ئݣا دّات كول أمژّوغ، ئوا ما س ئدّا أد ئكضو؟
18 والاينّي ربّي ئݣا لمفاصل كول ݣ دّات أم ؤينّا ئرا.
19 مور ݣان لمفاصل كول غاس يان ن لمفصل، ماني دّات؟
20 هاتين مغار عدّان لمفاصل، مشان دّات ئݣا غاس يون.
21 خف ؤياد ؤر تّيغي تيطّ أد تيني يي ؤفوس: «ؤر كين حدادجخ!» نغد أد ييني ئخف يي ئضارن: «ؤر كون حدادجاخ!»
22 ماشان لمفاصل ن دّات نّا تغالد ݣان ئمضعوفن، هاتين نيتني أمي ئخاتر وادّور.
23 د لمفاصل ن دّات نّا ؤر دا نتوقّار أمي دا نتݣا شايݣان ن شّان. ئد لمفاصل نّا ؤر ئليق أد غيفسن نسيول، نيتني أݣ مي دا نتهلّا شايݣان.
24 ئد لمفاصل نّا ضهرنين، هاتين ؤر حدادجان يي تّاهلّوياد. ماشان ربّي ئعديل دّات أها ئنهلّا ݣ لمفاصل نّا ؤر ئواتان والو.
25 حما، ؤر ئدّي أد ييلي بطّو ݣ دّات، أها دّان لمفاصل أد مياساين أنزݣوم.
26 مش ئلاّ شا ن لمفصل دا ئتهوّال، هاتين لمفاصل كول دا تهوّالن أݣّيدس، ماشان مش ئتواݣ لعزّ يي شا ن لمفصل، دا أݣّيدس فرحن لمفاصل ياضن.
27 ئد كونّي تݣام دّات ن لمسيح أها ئݣ كويون زّيݣون لمفصل ن دّات-اد.
28 هان ربّي ئݣا ݣ-ؤݣراو ن-ئمومن: ݣ ؤمزوارو ئمازان، ويس سّين لانبييا، ويس شراط ئسلمادن، ضاراسن ميدّن نّا مي ئتمووش أد ݣين لموعجيزات، د وينّا ئجوجيين، د وينّا ئتعاوان، د وينّا ئتݣوّادن، د وينّا ئساوالن س والسيون ؤر ئتواسنن. 29 ئوا ئس ݣان كول نّسن ئمازان؟ ئس ݣان كول نّسن لانبييا؟ ئس ݣان كول نّسن ئسلمادن؟ ئس دا تݣين كول نّسن لموعجيزات؟
30 ئس أسن ئوشا روح ن ربّي كول نّسن توكّي ن-ؤجوجي؟ ئس دا ساوالن كول نّسن س والسيون ؤر ئتواسنن؟ ئس ݣان كول نّسن ئد ترجمان؟
31 هاتين ئخصّاون أت ترزوم توكّيوين تيخاتارين، ماشان دغي دّيخ أد أون سنعتخ أبريد نّا ييفن وييّاض.