11
1 تفارات أبريد ئنو، ئمشينّا تفارخ نكّين أبريد ن لمسيح.
أغميس ن ييخف لوقت لعبادا
2 أد كون ئبارك ربّي، ئدّخ دا يي تكتّيم دّيما أها تسولم دا تضاعم أَينَّاوْنْ سْقراخْ.
3 ماشان ريخ أت تيسينم: لمسيح أيدا ئتنباضن ݣ مايد ئݣان أرݣاز، أرݣاز دا ئتنباض ݣ تمطّوط، د ربّي دا ئتنباض ݣ لمسيح.
4 أدّاي دا ئتژالّا شا ؤرݣاز نغد دا ئساوال س واوال نا س-ئنّا ربّي س-ييخف ئغمس، هاتين ؤردا ئتّوقّار لمسيح.
5 ئد تامطّوطّ نّا ئتژالّان نغد أر تساوال س واوال نّا س-ئنّا ربّي د نتات ؤر تغميس يي ييخف، هاتين دا د تاوي لعار يي ؤرݣاز نّس، أها تݣا أم تنّا ئحففّن أشكوك.
6 ئدّخ مش ؤر دا تغمّس تمطّوطّ يي ييخف، ئوا ئلازم غيفس أت تبّي أشكوك نّس، داي ئدّخ ئݣا حشوما خف تمطّوطّ أت تبّي نغد أت تحفّف أشكوك نّس، هاتين ئلازم غيفس أت تغمس يي ييخف.
7 أرݣاز ؤر ئحدادجا أد ئغمس يي ييخف نس، ئدّخ ئݣا صّورت ن ربّي أر ئسبيان لعزّ نّس، ئد تامطّوطّ دا سبيان لعزّ ن ؤرݣاز.
8 علاحقّ، أرݣاز ؤر ئتّوخليق زݣ تمطّوطّ، ئد تامطّوطّ تّوخلق زݣ ؤرݣاز،
9 د-ؤرݣاز ؤر ئتّوخليق يي تمطّوطّ، والاينّي تامطّوطّ تّوخلق يي ؤرݣاز.
10 أياد أخف ئخصّا يي تمطّوطّ أد غورس تيلي نّيݣ ن-ييخف تاماتارت ن طّاعت خف سّيبت ن لمالايكا.
11 والاينّي غر مولانا، ؤر تلّي تمطّوطّ بلا أرݣاز، ؤلا أرݣاز بلا تامطّوطّ.
12 ئدّخ مش تّوخلق تمطّوطّ زݣ دّات ن-ؤرݣاز، ئوا، هان أرݣاز دا ت تّارو تمطّوطّ، دْ مَاݣَانْ أَسْكِّينْ ئِدَّادْ زݣْ ربِّي.
13 ئوا، حكمات كونّي س-ئخف-اون نّون، ئس ئليق يي تمطّوطّ أد تژّال يي ربّي د-ييخف ؤر ئغميس؟
14 هان طّبيعت س-ئخف نّس تسلمد-اون ئس ئݣا لعيب أد ئسغزيف ؤرݣاز أَشْكُوكْ،
15 والاينّي مش ترژم تامطّوطّ يي ؤشكوك نّس أغزاف هاتين لعزّ نّس أينّا! ئدّخ ئتموشاس ؤشكوك حما أد-اس ئݣ لحجاب.
16 داي مش ئرا شا ن يون أد ئسيول ألّو خف ئسكّين-اد، ئخصّا أد ييسين: هاتين ؤر ئلّي ؤياد ݣ لعات نّخ ؤلا غر ئݣراون ن-ئمومن.
ئمنسي ن مولانا
17 ماشان أدّاي كون توصّاخ خف ؤياد، ؤر دا كون سغوداخ، ئدّخ تيݣراوين نون تلّا ديكسنت لماضرّا ؤݣار ن نّفع.
18 ݣ-ؤمزوارو، سلاخ ئس ؤر دا تمساسام ݣ تمّونت نّون، أها أر تّامنخ ئس ئصحا شا زݣ ؤياد.
19 علاحقّ لابدّا أد ييلي ؤمخالاف ئنݣراتون، حما أد باينن وينّا ئݣان ئمومن ستيتّ.
20 ئد كونّي، أدّاي تمّونم ݣ يون ؤدغار، ؤر دا تمّونم حما أت تتشيم ئمنسي ن مولانا،
21 ئدّخ أدّاي دا تتّام، كويون دا ئتزوير أد ياسي ئمنسي نّس، قّيمن ئتس س لاژ، د-ئتس ياضن دا سّان شّراب أر فّغن لعقل نّسن.
22 ئس ؤر غورون تيدّار نّاݣ دا تتّام، أر تسّام؟ ماد ئس تحقّارم أݣراو ن-ئمومن أها أر تسحشامم وينّا غر ؤر ئلّي شا؟ ما غا أون ئنيخ؟ ماد أد كون سغوداخ؟ لاّ، ؤر دا كون سغوداخ خف ؤياد.
23 ئدّخ أينّا ؤمژخ زݣ مولانا أيد أون سّيوضخ، ئد ݣ-ئض نّا ݣ ئتّوغضر مولانا عيسى، يومژ أغروم،
24 ئحمد ربّي، ئبّيت أها ئنّا: «واد أيد ئݣان دّات نّا دّيخ أد وشخ غيفون. ئوا ݣات أياد حما أد يي تشتيم».
25 داي ضارت ن-ئمنسي، ياسيد لكاس أها ئنّا: «ئدامّن ئنو نّا ئلاّن ݣ لكاس-اد أيد ئݣان لعاهد ؤجديد، ئوا سوات زّيݣس حما أد يي تكتيم».
26 أدّاي دا تتشيم زݣ ؤغروم-اد أها تسويم زݣ لكاس-اد، تدّام أد تبرحم س لموت ن مولانا أر د ياغول.
27 خف ؤياد، ونّا ئتشان أغروم-اد، نغد ئسوا زݣ لكاس-اد ن مولانا د نتا ؤر دا ت-ئتوقّار، هاتين ييوي أموتّل يي دّات ن مولانا د-ئدامّن نّس.
28 والاينّي ئخصّا كو يون أد ئحاسب ئخف نّس، داي فّيراس أد ئتّش زݣ ؤغروم-اد أها ئسو زݣ لكاس-اد.
29 ئدّخ ونّا ئتتّان نغد أر ئسّا د نتّا ؤر دا ئتوقّار دّات ن مولانا، هاتين دا د-ئتّاوي لعيقاب يي ئخف نّس.
30 أياد أخف غورون لّان شايݣان ن-ئموضين د-ئكوشّام أها متن شايݣان.
31 مور دا نتحساب ئخف-اون نّخ، ن دّا أنك ئديس يي لعيقاب.
32 والاينّي ئحكم غيفنخ مولانا حما أد أخ ئسربّا أها ؤر-اخ ئتعاقاب د ميدّن ن دّونييت.