10
لعيبادا ن لصنام
1 أيايتما، هاتين ريخ أت تسينم أينّا ئجران يي لجدود نّخ ؤداين ݣ صحرا ݣ لوقت ن موسى، أسمالون كول نّسن يي ؤسݣنو، نضون كول نّسن لبحرأزݣاغ،
2 توغبّژن ݣ-ؤسݣنو د لبحر أد ݣين ئمحضر ن موسى.
3 كول نّسن تّشان زݣ يون ؤتشي نّا ديدّان زݣ ربّي،
4 سوان كول نّسن أمان نّا د ئتدّون زݣ ربّي. أمان-اد أر تفغن زݣ ؤقشمير ن ربّي. أقشميراد دا أݣيدسن ئتمون د نتّا أيد ئݣان لمسيح س ئخف نّس.
5 والاينّي ݣوتن وينّا ؤر ئعجيبن يي ربّي خف ؤياد موتن ݣ صّحرا.
6 هاتين جران ئسكّين-اد أد أخ ݣين تاماتارت، حما ؤر نتّيري أد نݣ ݣار لفعايل أم نيتني،
7 أد ؤر تعبادات لاصنام أم ؤينّا ݣان ئتس زݣ لجدود نّخ. ربّيِ دا ئتِّينِي ݣْ لْكْتابْ نّسْ:«قّيمن ميدّن أد تّشين، سوين. فّيراس كّرن أد شطحن».
8 أد ؤر فسدات أم ؤينّا ݣان ئتس ن ميدّن زّيكسن، داي ݣ يون واسّ، متن تلاتا ؤعشرين ألف ن بنادم.
9 أد ؤر تجرّابات لمسيح أم ؤينّا ݣان ئتس زّيكسن، داي نغينتن ئفاغريون.
10 أد ؤر تݣمݣيمات أم ؤينّا ݣان ئتس زّيكسن، داي ئخلوتن لمالاك ن لموت.
11 جران-اسن ئسكّين-اد كول حما أد-اخ ݣين تاماتارت أها توارين أخ علمن نكني نّا ئلّان ݣ زّمان-اد.
12 خف ؤياد، ونّا ئتّينين ݣ-ئخف نّس ئس ئبدّ، ئخصّا أد ئرار لبال حما ؤر-يتّوتوي.
13 ئجرّيبن نّا كون ئتّاغن ݣان كول نّسن أم وينّا ئتّاغن ميدّن كول. ربّي ؤر دا ئتتّو أقاول نّس، ؤر ئدّي أد-اون يادج أت توجرّبم ؤݣار ن لجهد نّون. والاينّي، ݣ لوقت ݣ-ئدّا أد د ئدّو ؤجرّب، ئدّا ربي أد أون ئݣ تّويل أها تفوكّام زّيكس د-ئمشيد تدّام أتصبرم.
أد ؤر تعبادات لاصنام.
14 أيايتما ئعزّين، أد ؤر تعبادات لاصنام.
15 هاتين دا ساوالخ أمّي دا ساوالخ د ميدّن ئعقّوليين، ئوا خممات ݣ-ؤينّا تّينيخ.
16 أدّاي دا نتحماد يي ربّي خف لكاس ن لباراكا أها أر نسّا زّيكس، ئس ؤر دا نتّامّو ݣ لبركا نّا ديتدون زݣ-ئدامّن ن لمسيح؟ ألّو، أدّاي دا نوطّو أغروم أها أر نتتّا زّيكس، ئس ؤر دا نتّامّو ݣ لبركا نّا ديتدون زݣ دّات ن لمسيح؟
17 ئوا، نكني نّا ئعدّان نݣا يوت ن دّات، ئدّخ يون ؤغروم أيد ئلّان، هاتين كول نخ نامّو ديكس.
18 سموقلات غر أيت إسرائيل، ئس ؤر ئد وينّا ئتتّان زݣ تمغراص، دا تّامّون ݣ لخدمت ن ربّي ݣ-ؤسغرص؟
19 ئوا، ئس تفرام أوال ئنو؟ لا صنام ؤر ئݣي ربّي ستيت، د تمغراص ؤر نّين أت ترارن أد ئݣ ربّي.
20 لا! والينّي تيمغراص نّا غرّصن ميدّن نّا ئتعبادن لاصنام دا تن غرّصن يي شياطن ؤر ئد يي ربّي. ئوا نكّين ؤر ريخ أت تّاموم د شياطن.
21 هاتين ؤر تّيغيم أت تسوم زݣ لكاس ن مولانا د تين ن شياطن. أها ؤر تّيغيم أت تامّوم ݣ لميدا ن مولانا د تين ن شياطن.
22 هاتين مش نݣا أياد ندّا أد نسحرق مولانا. ئس ت نوݣر ݣ لجهد؟
غوراون أتسخضوم ميدن
23 يّيه، دا تّينيم: «كولشي ئحلّا»، والاينّي ؤر-اخ ئژيل كولشي. «كولشي ئحلّا»، والاينّي ؤر ئلّي نّفع ݣ مايد ئݣان شا يي ميدّن.
24 ؤر ئخصّا يي بنادم أد ئرزو غاس لهمّ نّس، ماشان ئخصّا أد ئرزو أود لهمّ ن ميدّن ياضن.
25 غورون لحقّ أت تشيم زݣ ؤكسوم كول نّا ئنزّان ݣ سّوق. أد ؤر تسقسات ماني زݣ ديدّا، باش أت تكسم شّك.
26 ئدّخ أشال د-ؤينّا ديكس ئلّان وين مولانا أيد ئݣا.
27 مش شا ن حدّ نّا ؤر دا ئتّامن ئعرّضيش، داي مش تمّوند أݣّيدس، ئوا تّش أينّا ش-ئݣا. أد ؤر تسقسا ماني سّا د-ئكّا ؤتشي-اد، باش أت تكسد شّك.
28 والاينّي مش-اش ئنّا شا ن يون: «هان أكسوم-اد وين تمغروصت ن لاصنام». أد ؤر زّيكس تتّا أبدا خف سّيبت ن ونّا ش-ئنّان أياد د-خف ؤسنّيرس ن لعقل.
29 نكّين ؤر دا ساوالخ خف لعقل نّك شݣ، والاينّي خف لعقل نّا ئسولن ؤر ئخاتر ن وايّاض. ئوا مّاخ لعقل ن-وايّاض أد ئحكم خف لحوريّا نّش؟
30 مش دا تحمادخ ربّي خف ؤينّا تتّاخ، ئوا، مّاخ أد ييلامّا يون ياضن خف نّعمت نّا خف تحمادخ ربّي؟
31 هاتين مش دا تتّاد نغد دا تسّاد ؤُلَا دا تݣاد شا، ئوا أينّا تݣّاد كول ݣِيتْ حمَا أتْ تْݣتْ لْعزّ يِي ربّي.
32 أد ؤر تݣات أژرو ن تفيشيت يي ووداين د وينّا ؤر تنݣين ؤلا يي ؤݣراو ن-ئمومن ن ربّي.
33 ئمشيد أيدا تݣّاخ أود نكّين، دا ؤرزّوخ أد ݣخ أينّا ئتيعجيبن يي ميدّن كول، ؤر دا تتّاويخ ݣ-ؤينّا ݣ-ئلّا نّفع ئنو، والاينّي دا ؤرزّوخ أد ݣخ لهمّ ن ميدّن كول حما أد فوكّان.