9
أينّا مي ئخصّا أت تݣين ئمزلزن ن لمسيح
1 ئس دا ديݣي ئتنباض شا ن حدّ؟ ئس ؤر ݣيخ أمازان؟ ئس ؤر أنّايخ عيسى مولانا نّخ؟ ئس ؤر ئد كني أيد ئݣان لغلت لخدمت ئنو غر مولانا؟
2 مش ؤر ݣيخ أمازان غر ميدّن ياضن، هاتين ݣيخت غورون، ئدّخ كونّي أيد ئسبيان ئس ݣيخ أمازان ن مولانا.
3 أياد أس دا تواجابخ وينّا يي ئتسقسان:
4 ئس ؤر غورنخ لحقّ أن نتشّ، نسو زݣ لخدمت نّخ؟
5 ئدخ ئمزان ياضن د ووماتن ن مولانا د بطرس دا تمونن د تعيّالين نسن ݣ سّفرات نسن، ئس ؤر غورنخ لحق أنݣ أم نيتني؟
6 نغد غاس نكّين د برنابا أمي ئخصّا أن نخدم حما أن نجبر أغروم؟
7 ئِنْيَتِي ئس دجين تسلّيم: يون ؤعسكري ئدّا غر ئمنغي خف لحساب ن جّيب نّس؟ نغد يون ؤرݣاز ئغرس دّيليت أها ؤر ئتشي زݣ لغلت نّس؟ نغد شا ؤمكسا ئسّاوغن لمال أها ؤر دا ئسّا أغو ن توالا نّا ئكسّا؟
8 ئس تدمام دا ساوالخ خف ئسكّين-اد أم ؤينّا ئتّيني لحكام ن بنادم؟ ئس ؤر دا ئساوال شّرع ن موسى خف ئسكّين-اد ألتو؟
9 شّرع ن موسى دا ئتّيني: «أد ؤر تݣّا تاشمامّوت يي ؤعجلي أدّاي دا ئسروات». ئس دا تيتّاوي ربّي ݣ-ئعجلين؟
10 ئس ؤر ئد غيفنخ أيدا ئتّيني أياد كول؟ يّيه نكني أخف دا ئتّيني أياد ݣ لشتاب ن ربّي، ئدّخ ئخصّا يي ونّا ئكرّزن د ونّا ئسرواتن أد غورسن ييلي رّجا ئس ئدّا كو يون أد يامژ أمور نّس زݣ لغلت.
11 هاتين نزرع ݣ وولاون نّون أوال ن ربّي. ئوا ئس ئݣا لعيب مش زّيݣون نومژ شا ئسكّين ن دّونييت؟
12 مش لان ميدّن ياضن غورسن لحقّ أدامزن زݣ ئسكّين ن دّونييت، ئس ؤر ئد نكني أيد ئزوورن؟ ماشان نكني ؤر نتّير لحقّ-اد، هاتين نصبر يي مايد ئݣان شا حما ؤر نتّݣ لعترت ݣ-ؤبريد ن-ؤبرّح س لينجيل ن لمسيح.
13 ئس ؤر تسّينم ئد ميدّن نّا خدّمنين ݣ تادّارت ن ربّي دا تتّان زݣ ؤينّا د تتّاوين ميدّن ياضن يي تادارت ن ربّي، د وينّا خدّمنين ݣ-ؤسغرص دا تّاوين أمور زݣ تمغراص؟
14 ئمشيد أس يومّر مولانا ميدّن نّا ئتبرّاحن س لينجيل أد أمژن لعولت نّسن زݣ ؤبرح-اد.
15 ماشان نك ؤر دجين ؤمژخ أود يان لحقّ زݣ لحقوق-اد، أها ؤر دا تّينيخ أياد دغي حما أد أمژخ شا ؤسكّين، ئدّخ ييفييي أد متخ ؤلا أد يي ئكّس شا ن يون مّاترضا.
16 هاتين مش دا تبرّحخ س لينجيل ؤر غوري ماس غيفون تفيّاشخ، ئدّخ ئݣا لفرض. أويها نو مش ؤر دا تبرّاحخ ئس.
17 مش دا تݣّاخ لخدمت-اد س لخاضر ئنو أد-امژخ غيفس تيغراض، ماشان مش ؤر دا ت تݣّاخ س لخاضر ئنو، ئوا هاتين دا تݣّاخ لخدمت نّا يي يومّر ربّي.
18 مايد ئݣان تيغراض ئنو؟ تيغراض ئنو أت تبرّاحخ س لينجيل فابور، أها ؤر تتّرخ أود يان لحقّ نّا يي ئوشا لينجيل خف لخدمت ئنو.
19 نكّين ؤر دا ديݣي ئتنباض أود يون أها ؤر ݣيخ ئسمغ غر أود يان. والاينّي ݣيخ ئخف ئنو د-ئسمغ غر ميدّن كول حما أد داويخ شايݣان ن ميدّن يي لمسيح.
20 عايدخ غر ؤداين أم شا ؤداي، حما أد داويخ ؤداين يي لمسيح. مغار ؤر لّيخ دّاو ن تنباطّ ن شّرع، عايدخ غر ميدّن نّا ئلّان دّاو ن تنباطّ ن شّرع ن موسى أمّي لّيخ دّاو ن تنباطّ ن شّرع، حما أد داويخ وينّا ئلّان دّاو ن تنباطّ ن شّرع يي لمسيح.
21 أها عايدخ غر وينّا ؤر دا تݣين س شّرع أم شا ن يون ؤر دا ئتّݣ س شّرع، حما أت تن داويخ يي لمسيح، والايني ؤر تتّوخ شّرع ن ربّي، ئدّخ دا تضاعخ شّرع ن لمسيح.
22 أغولخ غر وينّا مي ئدروس ليمان أم شا ن يون مي ئدروس ليمان، حما أت تن داويخ يي لمسيح. عايدخ مايد ئݣان شا غر ميدّن كول حما أد فوكّاخ ئتس زّيكسن.
23 هاتين دا تݣّاخ أياد كول، ݣ-ؤدم ن لينجيل، حما أد غوري ييلي ؤمور ݣ لباراكات نّس.
24 ئس ؤر تسّينم، أدّاي دا تݣّان ميدّن حمزوار دا تّازلان كول نّسن، ماشان غاس يون أيدا ئتّاوين رّبح؟ ئوا أزلات حما أت تاويم رّبح.
25 وينّا تزلانين دا تّيلين نّبض ݣ-ئخف-اون نّسن ݣ مايد ئݣان شا حما أد أمژن يون ن رّبح نّا يوقطّون، ئد نكني دا نتّازلا حما أن نامژ يون ن رّبح نّا ؤر دا يوخلّون أبدا.
26 خف ؤياد، نك سّنخ ما خف تّازلاخ، أر كّاتخ ألّو س ؤحودّيز، ؤر ئد أم ونّا ئكّاتن ݣ-ؤزوو،
27 ماشان أر سكّاخ شايݣان ن تمارا خف دّات ئنو أها أر تين سضاعاخ، ئدّخ ݣدخ ؤر تّنجاحخ نكّين ئتبرّاحن يي ميدّن س لينجيل.