8
تيمغراص نّا ئتوغرصن خف لاصنام
1 زݣ تنيلا ن تمغراص نّا ئتوغرصن خف لاصنام، هاتين نسّن كول نخ ئسكّين-اد. توسنا دا تتّاوي يي بنادم لفيش، ئد تايري دا تتادجا يي ميدّن أد أمنفاعن ئنݣراتسن.
2 داي مش ئلّا شا ن يون دا ئتدمو ئس ئسّن شا ؤسكّين، هاتين ؤر ئسّين والو زݣ ؤينّا مي ئخصّا أد ييسين.
3 والاينّي ربّي ئسّن ونّا ت-ئتّيرين.
4 ئوا، ئد أن نتش زݣ ؤكسوم ن تمغراص نّا ئتّوغرصن خف لاصنام؟ هاتين نسّن ئس ؤر ئلّي شا ن لاصنام ئݣان ربّي ستيت ݣ دّونييت-اد، أها ؤر ئلّي غاس يون ن ربّي.
5 ئدخ مغار عديلن ميدن ئد ربي نسن نا لاّنين ݣ-ئݣنوان ؤلا ݣ وشال، ها تين عدّان وينّا مي تّينين ئد ربي نغد ئد مولانا.
6 ماشان غورنخ غاس يون ربّي، نتّا أيد ئݣان ئبّاتنخ، نتّا أيد ئخلقن مايد ئݣان شا د نتّا أخف مي ندّر. أها ؤر غورنخ غاس يون ن مولانا نّا ئݣان عيسى لمسيح، ئس أس ئلّا مايد ئݣان شا د نتّا أيداخ ياكّان تودرت.
7 أياد ؤر دا ت تسّين كول ميدّن. ئتس والفن دا تعبادن لاصنام، أها سولن أر دغي دا تتّين زݣ تمغراص-اد، دا تّينين ئس ݣان تين لاصنام. ئدّخ لعقل نّسن ئسول ؤرئخاتر، ار تدمون ئس ؤر صفين،
8 ماشان ؤر ئد ؤتشي أيد أخ ئسحادزان غر ربّي. هاتين ؤر أخ ئدّي والو مش ؤر ت نتّشي، أها ؤر ندّي أن نربح أود ئمّيق مش ت نتشا.
9 هاتين غورون لحقّ أت تݣيم أينّا ترام، ماشان رارات لبال حما ؤر ئتلي لحقّ-اد غورون ئلاّن سباب ن لعترت يي ميدّن نّا مي ئدروس ليمان.
10 ئدّخ، شݣّ نّا ئسّن لحقّ، مش ك يانّاي شا ن يون زݣ وينّا مي ئسول لعقل نّس ؤر ئخاتر دا تتّاد ݣ تادّارت ن لاصنام، ئس ؤر ئدّي أد ئسّزعيم ئخف نّس أها ئتّش زݣ تمغراص نّا ئتّوغرصن خف لاصنام؟
11 ئوا، تدّا أت تلي توسنا نّش سّيبت ݣ تخلي ن بنادم-اد مي ئدروس ليمان، ؤماك نّا خف ئمّوت لمسيح.
12 مش تݣيد لمعصييت-اد، هاتين تسخصرد لخاضر يي ؤماك نّا مي ئسول لعقل ؤر ئخاتر، أها تعصييت لمسيح س-ئخف نّس.
13 خف ؤياد، مش ئدّا شا ن ووتشي أد ئݣ لعترت يي ئݣما، ؤر تتّاخ أكسوم أبدّا، حما ؤر تݣّاخ سباب لعترت يي ئݣما!