7
ييول
1 دغي، أد سيولخ خف ئسكّين نّا خف مي تسيولم ݣ تبرات نّون: هاتين ييف يي ؤرݣاز ؤر ئتّاول.
2 والاينّي حما ؤر ئتّيلي لفساد، كو أرݣاز أد غورس تيلي تامطّوطّ نّس، د كو تامطّوطّ أد غورس ييلي ؤرݣاز نّس.
3 ئلازم خف ؤرݣاز أد ئوش يي تمطّوطّ نّس لحقّ ن ييول، أها تݣ تمطّوطّ ألّو ئمشيد يي ؤرݣاز نّس.
4 هان تامطّوطّ ؤر دا تنباض خف دّات نّس، ئدّخ تݣا تين ؤرݣاز نّس. د-ؤرݣاز ألّو ؤر ئلي نّبض خف دّات نّس ئدّخ ئݣا وين تمطّوطّ نّس.
5 أود يون ؤر ئخصّا أد ئسحرم ئخف نّس خف وايّاض غاس مش مساسان خف شا ن لوقت، حما أد غورسن تيلي لوقت ن تژالّييث. والاينّي فّير ن تژالّييث ݣّانات ݣ يون ؤدغار، باش أت تيليم نّبض يي ئخف-اون نّون أها ؤر كون ئتجرّاب شّيطان.
6 أياد أون تّينيخ ؤر ئݣي لامر والاينّي لوصييت.
7 مور ؤفيخ أد ݣين ميدّن كول أم نك، ماشان كو يون د-توكي نّا س-ئوشا ربّي، يون ئوشاس يوت ن لحاشت د يان ياضن ئوشاس أسكين ياضن.
8 أها أر تّينيخ يي وينّا ؤر ييويلن د تيدجال، هاتين ييفاون مش ؤر تيويلم، أت تقّيميم أم نك.
9 ماشان مش ؤر تغييم أت تنبضم ݣ-ئخفاون نّون، ييف أت تاولم ؤلا أد كون تنغ شهوت.
10 د وينّا ييولن، دا تن توصّاخ، ؤر ئد نكّين واليني مولانا أيدا تن ئتّامرن، ئخصّا يي تمطّوطّ ؤر توطّو د-ؤرݣاز نس.
11 ماشان مش تبضا أݣيدس ئخصّا ؤر تّاول، نغد أت تدّو أت تمصالاح د-ؤرݣاز نّس. د-ؤرݣاز ؤر ئتلّف يي تمطّوطّ نّس.
12 ئد ميدّن ياضن، نكّين أيد أسن ئساوال ؤر ئد مولانا. مش ئلاّ شا زݣ أيتماتنخ ئمومن غورس تامطّوطّ ؤر دا تّامن س عيسى لمسيح، ماشان ترا أت تقّيم أݣّيدس، ئخصّا يي ؤرݣاز نس ؤر-اس ئتلّف.
13 نغد شا زݣ ئستماتنخ غورس أرݣاز ؤر دا ئتّامن س عيسى لمسيح أها ئرا أد أݣيدس ئقّيم ؤر أس ئخصّا أت تبضو أݣيدس.
14 ئدّخ أرݣاز نّا ؤر يومين ئݣا وين ربّي س تمطّوطّ نّس، د تمطّوطّ نّا ؤر تومين تݣا تين ربّي س-ؤرݣاز نّس نّا يومن. نغد ؤر دّين ئشيرّان أت تّوباركن، ماشان دغي، هاتين ݣان وين ربّي.
15 وَالَايْنِّي مشْ تَامْطُّوطّْ نَّا ؤُرْ تومِينْ نْغْدْ أَرْݣَازْ نَّا ؤُرْ يُومِينْ ئِرَا ؤُلُوفْ، ِئلَّفْ، ئِوَا أَرْݣَازْ أَمُومْنْ نْغْدْ تَامْطُّوطّْ تَامُومْنْتْ ؤُرْ ئِقِّيمْ ئِمْزْدَايْ دْ وَايَّاضْ نَّا ؤرْ يُومِينْ. ئِدّخْ ربِّي ئِغْرَاوْنْ حْمَا أَدْ غُورُونْ يِيلِي لْهْنَا.
16 علاحقّ ميمش تݣات أتّيسيند أتامطّوطّ تامومنت ئس ئدّا ؤرݣاز نّم أد ئفوكّا ئسّم؟ نغد ميمش تݣات أتّيسيند أيارݣاز أمومن ئس تدّا تمطّوطّ نّك أت تفوكّا ئسك؟
ضعات ربي ديما
17 غاس ئخصّا كو يون أد ئدّو ݣ-ؤبريد نّا س-ئقسّم مولانا، نّا ݣ-أر ئتدّو ݣ لوقت لّيݣ-اس ئغرا ربّي. أياد أيدا تّينيخ يي ئݣراون ن-ئمومن كول.
18 مش شا ن بنادم يومن س ربّي د نتّا ئزيّن ياد، ئخصّا ؤر ئخزّن أزيّن نّس. نغد مش شا ن يون ياضن يومن س ربّي د نتّا ؤر ئزيّين، ؤر-ئخصّا أد ئزيّن.
19 ئدّخ ونّا ئزيّن د ونّا ؤر ئزيّين ݣان كيف كيف، ماشان أينّا يݣان صّح، أن نضاع أوال ن ربّي.
20 ئلازم خف كو يون أد ئقّيم ݣ لحالت نّا ݣ-ئلّا لّيݣ تيختار ربّي.
21 ئس تݣييت ئسمغ لّيݣ ئختارك ربّي؟ أد ؤر تكولا. ماشان مش توفيد شا ؤبريد أت تفوكّاد زݣ تسمغت، أد ؤر-اس تادجا أد ئراح.
22 ئدّخ ونّا ت-ئختار مولانا د نتّا ئݣا ئسمغ هاتين ئفوكّا زݣ تنباط لمعصيت، د-اود ونّا ؤر ئݣين ئسمغ أها ئختارت مولانا دا ئتّاغول ئسمغ ن لمسيح.
23 هان ربّي ئسغاكون أها ئوشا غيفون أتيݣ ئغلان، ئوا أد ؤر تّݣّات ئسمغان ن ميدّن.
24 يّيه، أيايتما، ئخصّا كو يون أد ئقّيم دات ن ربّي، ݣ لحالت نّا ݣ-ئلّا لّيݣ أس ئغرا ربّي.
ميدّن نّا ؤر ييويلن د تيدجال
25 ئد تيعرمين ؤر ييويلن، هاتين ؤر غوري شا ن لوصييت زݣ مولانا أد-اسنت ت-ئنيخ، ماشان دّيخ أد ئنيخ رّاي ئنو أم يون ؤرݣاز ݣ-ئلّا لامان س رّحمت ن مولانا.
26 خف سّيبت ن تمارا نّا ئلّان دغي، ييف يي بنادم ؤر ئتّاول أد ئقّيم دا عرّيم.
27 مش غورش تامطّوطّ، أد ؤر ؤرزّو أت تلّفت. مش ؤر تيويلد، أد ؤر ؤرزّو أت تاولد.
28 والاينّي مش تيولد هاتين ؤر تݣيد لمعصييت، د تعرّيمت مش تيول، أود نتات ؤر تݣي لمعصييت، ئد ميدّن نّا ييولن تدّا أد غيفسن تكّ شايݣان ن تمارا ݣ دّونييت. د نكّين ؤر ريخ أد غيفسن تكّ تمارا-اد.
29 أيايتما، هان أينّا ريخ أد ئنيخ: هاتين ؤر تقّيم شايݣان ن لوقت. زݣ دغي، ميدّن نّا ييول ئخصّا أد ݣين أمّي ؤر ئويلن،
30 وينّا دا ترون ݣين أمّي ؤر دا ترون، وينّا مي ترشق أد ݣين أمّي تطيراسن، د وينّا ئسّاغن أد ݣين أمّي ؤر غورسن والو.
31 د وينّا ئتبرّاعن ݣ لخير ن دّونييت-اد أد ݣين أمّي ؤر دا تبرّاعن، ئدّخ دّونييت-اد تدا أت تزري س-ئسكّين نّا ديكس ئلّان.
32 ؤر رّيخ أت تاسيم أنزݣوم. هان ونّا ؤر ييويل أت تياوي ݣ-ئسكّين ن مولانا، لهمّ نّس أد ئݣ أينّا ئتّيعجيبن يي مولانا،
33 ماشان ونّا ييول دا تيتّاوي ݣ-ئسكّين ن دّونييت، ئدّخ لهمّ نّس أد ئݣ أينّا ئتّيعجيبن يي تمطّوطّ نّس،
34 أها ئشوّش لعقل نّس. هان تامطّوطّ نّا ؤر ييويلن د تعرّيمت دا تتّاوين ݣ-ئسكّين ن مولانا، أر ؤرزّونت أد ݣين وينّس س دّات د لعقل. ئد تامطّوطّ مّ-ؤرݣاز دا تتّاوي ݣ-ئسكّين ن دّونييت-اد أها أر تورزّو أت تݣ أينّا ئتّيعجيبن يي ؤرݣاز نّس.
35 دا تّنيخ أياد خف نّفع نّون، ؤر ئد حما أكون كرفخ، ماشان حما أت تݣيم أينّا يليقن أها تدفارم مولانا س ؤلاون نّون.
36 دغي، مش دا ئتدمو شا ؤعرّيم ئس ؤر دا ئتوقّار تاعرّيمت نّا ئتّر يي ييول. أها ئنغيت فاد أد ياول. ئوا أد ئݣ أينّا ئرا أها مياولن، هاتين ؤر ئݣي لمعصييت.
37 والاينّي ونّا ئران س وول نّس، ؤر غيفس شا ن ژيّار، ئلي نبض يي ئخف نّس أها ؤر ئري أد ياول تنّا ئتّر، هاتين ئݣا لمزييت.
38 ئوا، هان ونّا ييول ئݣا لمزييت، د ونّا ؤر ييويل ئݣا ؤݣار.