6
أمخيلاف ئنݣر ئمومن
1 مش ئلّا شا ؤمخيلاف ئنݣرويت كني ئمومن، ئد أد تّيغيم أد-ت تمسواضن غر ئنحكامن نّا ؤر ئسّين ربّي، ئس ؤر-اون ئخصّا أت تمسواضم غر وينّا سّنين ربي؟
2 ئس ؤر تسّينم ئد ئمومن أݣ دّان أد حكمن خف دّونييت؟ ئوا مش كونّي أيد ئدّان أت تحكمم خف دّونييت، ئس ؤر تّيغيم أت تحكمم أود خف أمخيلاف أمژيان؟
3 ئس ؤر تسّينم ئس ندّا أن نحكم أود خف لمالايكا؟ وْعْسّاكْ ئسكّين ن دّونييت-اد.
4 ئوا مش ئلّا شا ن ؤمخيلاف ئنݣراويت خف ئسكّين ن دّونيت-اد، ئس تدّام أت تدّوم غر لقاضي نّا ؤر ئواتان والو غر أݣراو ن ئمومن ربّي؟
5 دا تّينيخ أيا حما أكون سّحشمخ! ئس ؤر ئلّي ستيت ئنݣراون شا ؤماتنخ ئنژّين أد ئحكم ئنݣر ن-واوماتن؟
6 ئس دا ئسّاواض شا زݣ أيت ماتنخ ؤماس غر لقاضي نّا ؤر ئسّين ربي؟
7 كونّي دا تمساواضم غر لقاضي، د-ؤياد ئݣا لعيب. ئس ؤر-اون ئژيل أت تصبرم خف ؤتعدّا أها تصبرم مش تّواشرم؟
8 والاينّي كونّي دا تعدّام خف ميدّن ياضن، أر تّاشرم أود أيتماتون ئمومن!
9 ئس ؤر تسّينم وينّا تݣين لعار ؤر ئدّي أد غورسن ييلي ؤمور ݣ تݣلدييت ن ربّي؟ ئوا ؤر كون ئتغرّا أود يون، هان ميدّن نّا تݣّانين أينّا ؤر ئحلين، د وينّا تعبادنين لاصنام، د وينّا ئتفسادن، د وينّا ݣّانن د-ئرݣزن أم نتني،
10 د-ئشفّارن، د-ئضمّاعن، د وينّا ئسّان شراب أر دوخن، د ئرݣامن د ئقطّاعن أود يون زݣ ميدّن-اد ؤر غورسن ئتّيلي ؤمور ݣ تݣلدييت ن ربّي.
11 ئمشيد أيد ݣان ئتس زّيݣون. ماشان دغي ئسّيرد كون رّوح ن ربّي زݣ لمعصيات نّون، أها تاغولم تݣام وين ربّي س- مولانا عيسى لمسيح د س-رّوح ن ربّي نّخ.
ݣات لعز ئ ربّي س دّات نّون
12 «مايد ئݣان شا ئحلّايي»، يّيه، والاينّي هاتين ؤر ئلّي نّفع ݣ مايد ئݣان أسكّين. «مايد ئݣان شا ئحلّايي»، ماشان ؤر تّادجاخ يي ئخف ئنو أد ئݣ ئسمغ ن أود يون ؤسكين.
13 هان ؤتشي يي ؤديس د-ؤديس يي ووتشي، يّيه، والاينّي ربّي ئدّا أت تن ئخلو سّين نسن. ئد دّات ؤر تݣي تين لفساد، هاتين تين مولانا، د مولانا وين دّات.
14 ربّي ئسكّر مولانا نّخ زݣ لموت، ئمشينّا ئدا أخ ئسكّر أود نكني س لجهد نّس.
15 ئس ؤر تسّينم ئد صّواحات نّون ݣان يون لمفصل ݣ دّات ن لمسيح؟ ئد أد ئغيخ أد امژخ لمفاصل ن دّات ن لميسح أها وشختن يي يوت ن تنفساتّ؟ حاشا!
16 ئس ؤر تسّينم مش دا ئتمون شا ؤرݣاز د شا ن تنفساتّ، هاتين دا تݣّين يوت ن دّات. هان لكتاب ن ربّي دا ئتّيني «دّان أد ݣين سّين نّسن يوت ن دّات».
17 ئد ونّا ئتمون د مولانا دا ئتّݣ أݣّيدس غاس يوت ن رّوح.
18 أياد أخف-اون ئخصّا أت توشيم تّاسيع يي لفساد، ئدّخ كول لمعصيات نّا ئݣا بنادم تلّا برّا ن دّات نّس، ئد ونّا ئفسّدن دا ئتݣّا لمعصييت يي دّات نّس.
19 ئس ؤر تسّينم ئد دّات نّون تݣا أزدّوغ ن رّوح لقدس نّا ئلّان ديݣون نّا أون ئوشا ربّي؟ أها ؤر تݣيم وين ئخف-اون نّون واليني وين ربّي،
20 ئدّخ ئسغاكون س واتيݣ ئغلان، ئوا ݣات لعزّ يي ربّي س دّات نّون.