27
بولوس ئتّياوي غر روما
1 نتّا مساسان ئنبّاضن حما أندّو ݣ ـ ؤغرّابو غر طّاليان، ؤشين بولوس د ـ ييتس ن ـ ئحبّاسن ضنين ئي يان لفسيان حما أد غيفسن ئعسّس ئسم نس يوليوس، ئݣان زݣ ثربيعث ن - لعسكر ن ـ ؤݣلّيد ن ـ رّومان.
2 داي نني ݣ - يان ؤغرّابو ن ـ ثمدينث ن ـ أدراميت نّا غا يكّين خف لمرصاث نّا يلّان ݣ - ثمازيرث ن - أسيّا. ئمون أݣّيدنخ أراستارخوس ئݣان زݣ ثمدينث ن - تاسالونيكي نّا يلّان ݣ ثمازيرث ن - ماكيدونيّا.
3 س ـ أسكّا نس ناوضنّ غر صايدا. ييلي لفسيان أر ئتنهلاّ ݣ ـ بولوس، داي يادجّيث أد ئدّو أدّ ئيكّ ئمدّوكال نس نّا لّانين ديسّ حما أداس ؤشين أينّاس ئخصّان.
4 نتّا ندّا زݣ لمرصا ن ـ صايدا، ئنّالاخد ؤزوو زݣ داث، داي ناغول نمون د ـ ئديس ن ـ ثݣزيرث ن - قوبروص حما أد زّيكس نسّنثل.
5 أها نبّي لبحر نّا يلّان منيد ن ـ ثمازيرث ن - كيليكيّا د - ثمازيرث ن - بامفيليّا، ناوضنّ غر لمرصا ن - ميرا نّا يلّان ݣ - ثمازيرث ن - ليكيّا.
6 داي ياف لفسيان ديسّ يان ؤغرّابو ن - ثمدينث ن - ليسكاندارّيا دا يتدّو غر طّاليان أها يسنياخ ديكس.
7 أر ئيسّنخ ئتدّو ؤغرّابو س ـ تّاويل شايݣان ن - ووسّان، غاس ثينّا حرّانين أس نّيوض غر ثاما ن - ثمدينث ن - كينيدوس. ماشان ؤراخ يودجّي ؤزوو أنزايد غر داث، داي نكّ زݣ ثمناطّ ثافاسيث ن - ثݣزيرث ن - كريتّ زݣ ثاما ن - سالموني حما أنسّنثل.
8 نمون د ـ ثاما ن ـ ثݣزيرث أها ناوضنّ س - دّرع غر يان وانسا داس تّينين "لمرصاث ژيلنين"، ثاما ن - ثمدينث ن - ليسائيّا.
9 داي نزّري شايݣان ن ـ لوقث ديسّ ألّيݣ ثاغول ثوادا ݣ - لبحر ثوعر، يافد لحال أود لوقث ن - واژوم a ثدّا ثزري، داي يكّر بولوس أرثن ئتّنهو،
10 ينّاياسن: «أيارّاو، هاثين مش ئي ثݣام س ـ رّاي ثاوادا ياد لخاطار أي ثݣا، ئدّخ مش نفّغ زݣ سّياد ثدّا أداخ ثوث لخضيث، ؤر ئيد غاس أد ئرژ ؤغرّابو أها دّون ئسكّين نّادّ يوسي، ماشان أود نوكّني ندّا أنخلو».
11 ئميل ؤر تّيوي لفسيان ݣ ـ واوال ن ـ بولوس أها يݣاس س ـ رّاي ئي لقبطان ن ـ ؤغرّابو د ـ باب نس.
12 ثيلي لمرصا نّا ؤر ثژيل أديكس نزّري ثاݣرسث. داي مساسان أيث ؤغرّابو س ـ ؤماثا حما أنزايد غر داث بار أنّاوض غر لمرصا ن ـ فينيكس حما أديكس نزّري ثاݣرسث. فينيكس ثلّا أود نتّاث ݣ ـ ثݣزيرث ن ـ كريتّ، ݣ ـ يان وانسا نّا ينثلن زݣ ؤزوو نّا يوعرن.b
13 شوي يحرّشدّ يان ؤزوو أفسّاس زݣ ثمناطّ ثافاسيث داي غالن ئيد أد ئغين أنّاوضن أدغار نّا ران. هزّاند أݣنزيم ن ـ ؤغرّابو أد دّون، أها مونن د ـ ثاما ن - ثݣزيرث.
شّوطّ
14 غاس شوي فّير ن ـ ؤينّا، ئصوضدّ زݣ ثنيلا ن ـ ثݣزيرث يان ؤزݣو ئجهدن داس تّينين "أحارّاف أژلماض"،
15 داي ينهم ؤغرّابو ؤر ياد نغي أديكس نباض، أها نادجّيث أرث ئحرّي ؤزوو.
16 ئسيكّاخ زݣ ثاما ن - يوث ن - ثݣزيرث ثامژّيانث داس تّينين "كودا"، ناغول نسّنثل شوي زݣ ؤزوو. نݣ دّرع ألّيݣدّ نسّيلي ثاغرّابوت ن - ؤفوكّا نّا يوݣلن غر ضارث ن ـ ؤغرّابو.
17 داي حما أد أوين بعيتّ ئي وغرّابو أد ؤر ئرّاژ، سضورناس ئزاكارن أها أسّينث. نتّا ݣّدن أث ئحري ؤزوو غر لبحر ن ـ ليبيا يعمّرن س - ؤكژاژ نّا دا يتموتّوين، داي سضرند أسݣلف أدجّين أغرّابو أرث ئتّاوي وزوو.
18 س ـ أسكّا نس، ثادر غيفنخ شّوطّ ؤݣار، داي كّرن أر ݣّارن س ـ ييتس ن ـ ئسكّين نّاد يوسي ؤغرّابو ݣ ـ لبحر حما أث سّفسوسن.
19 غر وانيݣن أسكّا نس، أسين دّوزان ن - ؤغرّبو س ـ ؤماثا ݣرينيسّ ݣ ـ لبحر.
20 شايݣان ن - ووسّان ؤر دجّين نانّاي ثافوشث ؤلا ييثران، ثقّيم شّوط أر غيفنخ تّادر ألّيݣ أر نتّيني ؤر ندّي أنراح.
21 يافدّ لحال ميدّن نّا لّانين ݣ ـ ؤغرّابو ؤر تّشين شا شايݣان ن - ووسّان، داي يكّر بولوس ئبدّ ݣ - وامّاس نسن أها ينّاياسن: «أيارّاو، مّور ئي ثݣيم س - رّاي أها نقّيمنّ ݣ ـ ثݣزيرث ن - كريتّ، ؤر دا نتّكرفاص ئمشيد ؤلاخ ثوث لخضيث أد.
22 ماشان دغي دا زّيݣون تتّرخ أد ؤر تݣّدم، هاثين ؤر ئدّي أود يون ديݣون أد ئمّث، غاس أغرّابو أغا يرژين.
23 ئدّخ هاثين ئضلّي، ئفّغد غيري يان لمالاك، يوزنثيد ربّي نّامي ݣيخ وينس أرث تّعبادخ.
24 أها ينّايي: "أد ؤر تݣّد أبولوس! هاثين ئقّنشينّ أنّثاوضّ غر روما، ثبدّد داث ن ـ ؤݣلّيد ن ـ رّومان. د ـ ݣ ـ وودم نش ئدّا ربّي أد ئسراح وينّا لّانين أݣّيدش كول".
25 غاس أد ؤر تݣّداث أيارّاو، ئدّخ هاثين ؤمنخ ݣ ـ ربّي ئيس ئدّا أد ئيݣ أينّا يي ينّا.
26 ماشان ئقّنن أداخ ݣرينث ثمزازين غر شان ثݣزيرث».
ثيرژي ن - ؤغرّابو
27 لّيݣ ييوض ييض ويسّ ربعطاعش، نّلا نسول أراخ ئتّاوي وزوو ݣ - لبحر ن - أدريّا. أتّاين ن ـ وامّاس ن ـ ييض، غالن ئنبدادن ن ـ ؤغرّابو ئيس نّيوضن غر ثاما ن ـ ثغارث.
28 داي عبرن ثيغبي ن - وامان أفيننّ أمّ ربعين ن ـ لميترو. نتّا دّان شوي، عبرن ديخ ألتو أفينن أمّ ثلاثين ن ـ لميترو.
29 داي ݣّدن أداخ ئحري ؤزوو غر شان وانسا نّاݣ لّان ئقشميرن، أها ݣرين ربعا ن - ئݣنزام ݣ - وامان زݣ ضارث ن - ؤغرّابو حما أد ئبدّ، قّيمن أر تّينين أومي يفّو لحال.
30 ئرين ئنبدادن ن ـ ؤغرّابو أد رولن، داي ݣين أمّي ران أد ݣرين شان ؤݣنزيم زݣ داث ن ـ ؤغرّابو أها سضرن ثاغرّابوتّ ن - ؤفوكّا غر أمان.
31 داي ينّاياس بولوس ئي لفسيان د ـ ئعسكرين: «هاثين مش ؤر قّيمين ئنبدادن ݣ ـ ؤغرّابو ؤر ثدّيم أتّروحم».
32 داي كّرن ئعسكرين بّين ئزاكارن ئي ثغرّابوتّ أدجّينت أتتّوتّي ݣ - لبحر.
33 نتّا يدجّاور لحال أد ئفّو، ئسحوژّر بولوس وينّا لّانين كول ݣ ـ ؤغرّابو أد تشّين شا، أها ينّاياسن: «هاثين أسّا ويسّ ربعطاعش أي دا تّعايانم ؤر تشّيم أود لقرط.
34 دغي، عافاون تشّاث شا حما أتّراحم، هاثين أود يون ديݣون ؤر ئدّي أداس ئجرو أود ئميقّ».
35 فّير ن ـ مايد ئنّا بولوس أياد، ياسي أغروم ئشكر غيفس ربّي داثاسن كول أها يبّيث، ياسي أر ئتّتا.
36 داي أغولن كول نسن زعمن، كّرن أود نيثني أر تتّان.
37 نيلي ݣ ـ ؤغرّابو س - ميثاين د - ستّا وسبعين ن ـ يوكّ.
38 ضارث ن ـ مايد تّشان، كّرن أر ݣّارن س ـ ييردن غر أمان حما أد زايدن أد سّفسوسن أغرّابو.
39 نتّا يفّو لحال، ؤر ؤكيزن ئنبدادن ن ـ ؤغرّابو أنسا نّا غر نّيوضن، ماشان أنّاين يان وانسا ݣ يير ن ـ لبحر نّا يسّنثلن زݣ ؤزوو، داي مساسان أد ݣين دّرع أد غورس حرين أغرّابو.
40 أها بّين ئزاكارن ئي يݣنزام أدّجينثنينّ ݣ ـ لبحر، سرين ئزاكارن نّا يوسّان ثيفلوث نّاس دا حرّين أغرّابو، أها هزّان أسݣلف ن ـ داث أدجّين أزݣو أثن ئحري غر ثغارث.
41 ماشان ئمناقّار ؤغرّابو د ـ ثوريرث ن ـ ؤكژاژ نّا يلّان دّاو ن ـ وامان. داي يتّواعر ؤغنبو نس ݣ ـ ؤكژاژ، ئيد ضارث نس رژانتّ ثمزازين.
42 داي ران ئعسكرين أد نغين ئحبّاسن حما أد ؤر كّاثن س ـ لعوم غر ثغارث أها روولن.
43 ماشان ؤر ثن يودجّي لفسيان حما أد ئفوكّو بولوس أد ؤر ئتّونغا أود نتّا، أها ينّاياسن ئي وينّا غينين أد ؤثن س ـ لعوم أد نݣّزن ديمزوورا غر أمان نضون غر ثغارث.
44 ئيد وينّا ؤر غينين، ئخصّاياسن أثن ثفارن خف ثفلوين ن ـ ؤغرّابو د ـ خف لقراطي نّا زّيكس ئقّيمان. س ـ وامشيد ئوضننّ كول نسن غر ثغارث ؤر ثن ياغ أود ئميقّ.