26
بولوس دا يتّرارا خف ئخف نس داث ن - ؤݣلّيد أغريباس
1 داي ينّاياس ؤݣلّيد أغريباس ئي بولوس: «نوشاياش لحقّ أتّرارد خف ئخف نش، ئوا سيول». ئهزّا بولوس أفوس نس ئسفالّ أر ئساوال خف ئخف نس أر ئتّيني:
2 «أياعرينو أسّا لّيݣ بدّيخ داثاش أياݣلّيد أغريباس حما أد رارخ خف ئخف ئنو خف ؤينّا خف ئي دعان ووداين كول،
3 لومعنّا ئدّخ سّنخ ئيس ثحسيد لقاعيداث ن ـ ووداين د ـ ثغاوسيوين نّا خف دا تّناغن. خف ؤياد، دا زّيكش تتّرخ أد تسّوسعد لخاضر نش أݣيدي أها ثسغدّ غوري».
4 «ؤداين كول سّنن ميمش أي ثݣا ثودرث ئنو زݣّوس مژّيخ ݣ ـ ثمازيرث نّاݣ لوليخ، د ـ ݣ ـ لقدس.
5 لاّن سنّي زݣ واهوّا، مش ران، دّان أداون ئنين ئيس ݣيخ زݣ ثربيعث ن ـ ئفرّيسين نّا يحضان شّرع نّخ عنوݣا.
6 دغي هايي دا غيفي يتّوحشام ئدّخ غوري يلّا رّجا ئيس ئدّا ربّي أد ئيݣ أينّا يقاول ئي يمزوورا نّخ.
7 أود ثيقبيلين نّخ س ـ ثناعش ئلّا غورسنث رّجا ياد، أر تّعبادن ربّي س ـ واسّ د ـ ييض خف ؤياد. هاثين خف رّجا ياد أخف ئي دعان ووداين أياݣلّيد أغريباس.
8 ئوا مّاخ ألّيݣ ؤر دا تّامنم ئيس ئغي ربّي أدّ ئسكّر ئمتّين؟».
9 «هاثين كّيخ أر تّيغالخ ئيس ئي يخصّا أد ݣخ أينّامي غيخ كول حما أد ضاضّخ عيسى ؤنّاصيرا.
10 أياد س ـ ئخف نس أيد ݣيخ ݣ - لقدس. داي ݣرخ شايݣان ن ـ ئمومنّ س ـ لماسيح ݣ ـ لحبس س ـ ثنباطّ نّايي وشان ئنمغورّ ن ـ ثدّارث ن ـ ربّي، د ـ أدّاي غيفسن حشمن س ـ لموث، أر تّمساساخ أݣيدسن.
11 أر غيفسن تكّاخ ثيمزݣيديوين كول أرثن تكّرفاصخ حما أداسن ݣخ دّرع أد نكرن ليمان نسن. داي أر غيفسن تغدّادخ، أر ثن تّثفارخ أود غر ثمدينين نّا لّانين برّا ن ـ ثمازيرث ن ـ أيث ياهودا».
(ئمازانّ 9: 1-19؛ 22: 6-16)
12 «أينّا أخف دّيخ يان واسّ غر ديماشق س ـ ثنباطّ نّايي وشان ئنمغورّ ن ـ ثدّارث ن ـ ربّي.
13 نتّا لّيخ ݣ ـ ؤبريد أتّاين ن ـ وامّاس ن ـ واسّ أياݣلّيد أغريباس، ئنقّرد غيفي يان ؤسيدّ زݣ ييݣنّا يوݣرن وين ثافوشث، أها يسّيدّد غيفي نكّ د ـ ئسمونّ ئنو.
14 داي نتّوتّي كول نّخ س ـ أشال، شوي سلّاخ ئي يان واوال ئغرايي س ـ ثعيبرانيث نّخ أها ينّايي: "أشاوول، أشاوول، مّاخ ألّيݣ دايي تّكرفاصد؟ هاثين ؤر تّيغيد أتنّالد أينّا ريخ"».
15 «داي نّيخاس: "ماي ثمسد أسيدي؟" أها ينّايي: "نكّينثين عيسى نّا دا تّكرفاصد.
16 كّر، بدّ خف ئضارّ نش ئدّخ هاثين فّغخد غورش حما أكّ سثيخ أتّݣد أمزيلّز ئنو، ثݣد ئنيݣي ئنو، ثسيولد ئي ميدّن خف ؤينّا ثنّايد أسّا د ـ ؤينّا دّيخ أداش سنعثخ كول فّير ن ـ ؤياد.
17 دّيخ أش حضوخ زݣ ووداين د - زݣ لݣنوس ضنين نّا غر دّيخ أش أزنخ،
18 أداسن ثرژمد ألّن أد أغولن زݣ تيلّاس غر أسيدّ د - زݣ ثنباطّ ن - شّيطان غر ثين ربّي، حما أدّاي أمنن ئسّي أداسن تّوغفرنت لمعصياث نسن، ييلي غورسن ؤمور ئنݣر ن ـ ميدّن نّا سثيخ أد ݣين وينو"».
19 «زݣ لوقث نّا، أياݣلّيد أغريباس، ؤر عصيخ أينّا ييد ئنّا ربّي زݣ ييݣنّا.
20 داي كّرخ برّحخ س ـ ئنغميسن ژيلنين ئي يايث ديماشق ديمزوورا، برّحخ ئي يايث لقودس د ـ أيث ثمازيرث ن - ياهودا كول، برّحخ أود ئي لݣنوس نّا ؤر ݣينين ؤداين. أراسن تّينيخ أد ثوبن أغولن غر ربّي، أها ݣين ئسكين نّا دا سنعاثنين ئيس ثوبن سثيتّ.
21 خف ؤياد أخف ئي يومژن ووداين ݣ - ثدّارث ن - ربّي، ئرين أد ئي نغين.
22 ماشان ئحضايي ربّي أر أسّاد حما أد ئنيخ أياد ئي ميدّن كول ئمژّيان د ـ ئخاثارّ. هاثين ؤر دا تّينيخ غاس أينّا نّان لانبيا د - سيدنا موسى ئيس ئدّا أد ييلي،
23 ئيس ئدّا لماسيح أد ئتّوكرفص أها يمّث، ئيݣ أمزوارو نّا غا ديكّرن زݣ لموث حما أد ئبرّح س ـ ؤبريد ن ـ ؤسيدّ ئي ووداين د - ئي لݣنوس ضنين».
24 نتّا أر ئتّيني بولوس أياد، داي يبّياس فاستوس أوال أها ينّاياس س ـ ؤغويّي: «أبولوس هاثين ثحّويضّ، شايݣان ن - ثوسنا ثسّوفغش ئي يخف نش!»
25 أها ينّاياس بولوس: «ؤر حّويضخ شا أسيدنا فاستوس، ماشان أينّا دا تّينيخ ئݣا سثيتّ ئيݣ لمعقول.
26 هان أݣلّيد أغريبّاس ئسّن ئسكّين أد، سّنخ ئيس ؤر غيفس ئنثيل أو ئميقّ ئدّخ أياد ؤرئجري ݣ ـ شان ثغمرث نّا ينثلن، أينّا خف مي دّيخ أداس سيولخ س ـ طّايطاي».
27 داي ينّاياس بولوس ئي وݣلّيد أغريباس: «ئيس دا تّامند س ـ ؤينّا نّان لانبيا أياݣلّيد أغريباس؟ سّنخ ئيس دا ييسّ تّامند».
28 داي ينّاياس ؤݣلّيد أغريباس: «ئيد ئيس ثريد أدي ثرارد أد ݣخ أماسيحي غاس ݣ ـ ؤياد ن ـ شوي ن - لوقث؟».
29 أها ينّاياس بولوس: «أمّ ئݣا شوي أمّ ئݣا شايݣان، دا تتّرخ ئي ربّي غيفش د ـ خف وينّا دا غوري سّغادنين كول أسّا أد ݣين أم نكّينثين ماشان س ـ وار ئشوراف أد».
30 داي يكّر ؤݣلّيد أغريباس د - ؤنبّاض فاستوس د - برينيكا د - وينّا لّانين أݣّيدسن كول
31 فّغن، أر تّمساوالن ئنݣراسن أر تّميينين: «هان أرݣاز أد ؤر ئݣي ماخف ئتّواثا لموث نغد لحبس».
32 داي ينّاياس ؤݣلّيد أغريباس ئي فاستوس: «مور ئيد ئس ؤر ئسموتّي ؤرݣاز أد دّعوث نس غر أݣلّيد ݣ ـ روما، أليݣ أس ئتّورژم».