25
بولوس ئسموتّي دّعوث نس غر أݣلّيد ن ـ رّومان
1 ييوض ؤنبّاض فاستوس غر قايصاريّا، ئيكّ ديكس شراض ن ـ ووسّان أها يعيّن لقدس.
2 داي دّوند غورس ئنمغورّ ن ـ ثدّارث ن ـ ربّي د - ئخاثارّ ن - ووداين حما أداس دعون ئي بولوس غورس، قّيمين أر ثسحوژّورن،
3 نّاناس: «مش ثريد أداخ ثعديلد ؤلاون، عافاش أوياخد بولوس غر لقدس»؛ يافثنيد لحال لّان عوّلن أداس حاطّرن ݣ ـ ؤبريد حما أث نغين.
4 ئميل ئنّاياسن ؤنبّاض فاستوس: «بولوس ئدّا أد ئقّيم ئتّييمژ ݣ ـ قايصاريّا، د ـ نكّين س ـ ئخف ئنو دّيخ أد عايدخ غر دينّ دغيا.
5 داي مش ئݣا شا نّا يخّان، أزناث أݣّيدي وينّا غر ثلّا ثنباطّ ديݣون أها دعوناس غوري دينّ».
6 ئيكّ ؤنبّاض فاستوس ݣ ـ لقدس شان ثمانيا ن ـ ووسّان ماد عشرا، ياغول غر قايصاريّا. س - أسكا نس، ئقّيم ݣ ـ وانسا نس ݣ ـ لمݣليس حما أد ئحشم ݣ ـ دّعوث، أها ينّاياسن ئي يعسكرين أدّاوين بولوس غر داثاس.
7 غاس ئكشمد بولوس، مّوترن غيفس ووداين نّا ددّانين زݣ لقدس أر ئيسّ تّشثوان خف شايݣان ن - لفعايل خّانين نّامي أس نّان ئݣّاثنث؛ ماشان ؤر غين أد ؤشين أود يوث ن ـ ثماثارث خف ؤينّا ئيس ئݣا سثيتّ.
8 ماشان ئرورا بولوس خف ئخف نس ئنّاياسن: «هاثين ؤر رژيخ شّرع ن - ووداين ؤلا سخنونسخ ثدّارث ن - ربّي، ؤلا نّيخ أود يان واوال نّا يخّان خف ؤݣلّيد ن ـ رّومان».
9 داي يرا ونبّاض فاستوس أد ئعديل ؤلاون ئي ووداين، أها ينّاياس ئي بولوس: «ئيس ثريد أتدّود غر لقدس أد غيفش حشمخ دينّ خف ئسكين أد؟»
10 ئرار غيفس بولوس ئنّاياس: «ئهي، نكّين بدّيخ دغي ݣ ـ لمݣليس ن ـ ؤݣلّيد ن ـ رّومان، ئوا ديكس أݣ ئخصّا أد غيفي ئتّوحشم. شݣّ س ـ ئخف نش ثلّيد ثسّند ئيس ؤر ݣيخ شا ئي ووداين.
11 مّور ئيد ئيس ݣيخ شا نّا خف واثاخ منغيوث، ؤر دا روݣّلخ زݣ لموث. ماشان مش ؤر غين ميدّن أد أدّاوين أود يوث ن ـ ثماثارث خف ؤياد نّا غيفي نّان ئيس ئݣا سثيتّ، أود يوكّ ؤر غورس لحقّ أد ئي يصّيوض ئي يفاسّن نسن أد غيفي حشمن. دغي ريخ أد سموتّيخ دّعوث ئنو غر أݣلّيد».
12 داي يمشاوار ؤنبّاض فاستوس د ـ أيث لمݣليس نس أها ينّاياس ئي بولوس: «دغي ݣ ـ ثسموتّيد دّعوث نّش غر أݣلّيد، ثدّيد أتدّود غر ـ روما أتكّد داثاس».
بولوس دا يساوال داث ن ـ ؤݣلّيد ن ـ ووداين أغريباس
13 زرين شان ووسّان، ئدّودّ ؤݣلّيد أغريباس نتّا د - ؤلثماس برينيكا غر ثمدينث ن - قايصاريّا حما أداس رحبن ئي ونبّاض فاستوس.
14 أها قّيمين ديسّ شايݣان ن - ووسّان. داي يكّر فاستوس ئقّيساس ئي وݣلّيد أغريباس خف دّعوث ن ـ بولوس ئنّاياس: «ئلّا يان ؤرݣاز داد ئزريث ؤنبّاض فيليكس ݣ - لحبس.
15 لّيݣ دّيخ غر لقدس، دعاناسدّ غوري ئنمغورّ ن ـ ثدّارث ن ـ ربّي د - ئخاثارّ ن ـ ووداين، تّرن زّيݣي أد غيفس حشمخ س ـ لموث.
16 أها نّيخاسن، هاثين ؤر ثݣي لقاعيدا نّخ نوكني ييرومانين أنحشم خف شان يوكّ ئسول ؤر ئمنالا ؤدم س ـ ؤدم د ـ وينّاس دعانين حما أد ئرار خف ئخف نس داثاسن.
17 داي مونندّ أݣيدي غر داد، كّرخ دغيا س ـ أسكّا نس قّيمخ ݣ وانسا نو ݣ ـ لمݣليس حما أد حشمخ ݣ ـ دّعوث نسن، أها نّيخاسن ئي يعسكرين أدّ أوين أحبّاس.
18 نتّا كّرن وينّاس دعانين أر ساوالن، داي ؤر ؤفيخ ݣ ـ ؤينّاس أر غيفس تشثوان أود يان ؤسكّين ئخّان زݣ ؤينّا دميخ.
19 ماشان أر تّناغن أݣيدس غاس خف ييتّس ن - ئسكين ݣ - دّين نسن، د ـ خف شان يون ئسم نس عيسى ئمّوث، ئيد بولوس أر ئتّيني يلّا يدّر.
20 داي ؤر سّينخ ماي تݣّاخ ݣ ـ دّعوث نسن، أها سقساخ بولوس ئيس ئرا أد ئدّو غر لقدس أد غيفس ئتّوحشم ديسّ.
21 ئميل ئسموتّي دّعوث نّس غر أݣلّيد ن ـ رّومان حما أد غيفس ئحشم نتّا س ـ ئخف نس، داي رارخث أد ئقّيم ݣ ـ لحبس أر ثازنخ غورس».
22 داي ينّاياس ؤݣلّيد أغريباس ئي ونبّاض فاستوس: «ريخ أود نكّين أد سّغدخ ئي ماي دا يتّيني ؤرݣاز أد». أها ينّاياس فاستوس: «أسكّا، ثدّيد أداس ثسّغدّ».
23 س ـ أسكّا نس، ئدّودّ ؤݣلّيد أغريباس نتّا د - ؤلثماس برينيكا ݣ ـ يان لعزّ أخاثار، كشمن غر لمݣليس نثني د ـ ئخاثارّ ن - لعسكر د - ئخاثارّ ن - ثمدينث، داي يازن فاستوس ئعسكرين أويند بولوس غر داثاسن.
24 ئسيول فاستوس ئنّاياسن: «أياݣلّيد أغريبّاس د - أوينّا لاّنين كول داد، هاثين أرݣاز أد نّا يبدّان داثاون أميدّ دعان غوري ووداين ن - لقدس كول د - وين داد أر سغويّون أر تّينين ؤراس ئخصّا أد ييدير.
25 ئيد نكّين ؤر ديكس ؤفيخ شا نّا خف ئواثا لموث، ماشان ئدّخ ئسموتّي دّعوث نس غر أݣلّيد نّخ، عوّلخ أث أزنخ غورس غر روما.
26 ئميل ؤر غوري يلّي شا يصحان خف دّعوث نس نّا غاس أريخ ئي سيدنا، خف ؤياد أخف ثيد ئويخ غر داثاون كول نّون، لومعنّا شݣّ أياݣلّيد أغريباس، حما أدّاي ثسقساد أد أفخ ماغاس أريخ.
27 ئدّخ مايد ئي يضهرن نكّين، ؤر ئعديل أداس أزنخ أحبّاس ئي وݣلّيد بلا أداس سّفروخ ماخف أس ئتّودعا».