24
ؤداين دعاناس ئي بولوس غر أنبّاض فيليكس
1 خمسا ن - ووسّان فّير ن ـ ؤينّا، ئدّود ؤنمغور ن ـ ثدّارث ن ـ ربّي حانانيا غر قايصاريّا، ئموندّ د ـ ييتس ن ـ ئخاثارّ ن ـ ووداين، د - يان بوݣّاضو ئسم نس تارتولّوس أها دعوناس ئي بولوس غر أنبّاض فيليكس.
2 داي غريند ئي بولوس، ئقّيم تارتولّوس أر ئيسّ ئتّشثوا داث ن ـ ؤنبّاض فيليكس أر ئتّيني: «أسيدنا فيليكس بو وادّور أخاثار، هاثين ثݣيد لهنا ݣ ـ ثمازيرث نّخ، ثݣد شايݣان ن - ئسكّين ژيلنين س ـ ثانژّي نش.
3 د ـ نوكّني كوياسّ دا نتقرّا س ـ لخير نش ݣ ـ مايد ئݣان أنسا، أراش نتّيني ثانمّيرث خف ؤياد نّاخ ثݣيد كول.
4 داي حما أد ؤرش سماضالخ، دا زّيكش تتّرخ عافاش أداخ ثساعفد، تسّغدّ ئي دّعوث نّا يلّان ئنݣراخ د ـ ؤرݣاز أد، ؤر دّيخ أد غيفش سّغزيفخ أوال.
5 هاثين نوفا يارݣاز أد أر ئسخسار ميدّن أر ئسكّار ثيريتّ ئنݣر ن - ووداين ݣ ـ مايد ئݣان أنسا ݣ ـ دّونيث، أها يݣ أنمغور ن - يوث ن ـ ثربيعث داس تّينين "ثاربيعث ن ـ ئناصيرين".
6 ييري ديخ ألتو أد ئسخنونس ثدّارث ن - ربّي، أها نامژث.
7 a 8 مش ئيث تسقرّاد شݣ س ـ ئخف نش دغي، تدّيد أتّيسيند ئيس ئݣا وينّاش ننّا غيفس كول سثيتّ».
9 داي كّرند أود ووداين أر صّوحان أوال ن ـ تارتولّوس، أر تّينين هان أينّا ينّا كول سثيتّ أيد ئݣا.
بولوس دا يتّرارا خف ئخف نّس
10 فّير ن ـ ؤينّا، يهزّا ونبّاض فيليكس أفوس نس ئي بولوس حما أد ئسيول، داي يسيول بولوس أر ئتّيني: «أسيدي، هاثين سّنخ ئيس أر تّنباضّ خف ثغاوسيوين ن ـ ثمازيرث أد شايݣان ن - ئسݣّاسن أياد، أينّا خف مي دّيخ أد رارخ خف ئخف ئنو داثاش د ـ وول ئنو يهنّا.
11 أتّيغيد دغيا أتّيسيند ئيس ؤر ثزري أود ثناعش ن - واسّ أياد س ـ دّيوضخ غر لقدس حما أد عبدخ ربّي.
12 ؤر دجّين ئي نّوفين ووداين أر تمغانّاخ د ـ أود يوكّ ݣ ـ ثدّارث ن - ربّي، نغد أر سحورّوشخ ميدّن أد سكّرن ثيريتّ، لا ݣ ـ ثمزݣيديوين ؤلا ݣ ـ أود يان وانسا ݣ ـ ثمدينث.
13 أها ؤر تّيغيين أداش ؤشين أود يوث ن ـ ثماثارث خف ؤياد نّاش نّان غيفي دغي ئيس ئݣا سثيتّ.
14 هاثين دا تقرّاخ داثاش ئيس دا تثفارخ أبريد ن ـ لماسيح نّا خف دا تّينين نثني ؤر ئݣي وين سثيتّ، ماشان سولخ دا تّعبادخ ربّي نّا أر تّعبادن ئمزوورا نّخ، أر تّامنخ س ـ ؤينّا يلّان كول ݣ - شّرع ن ـ سيدنا موسى د - لشثوب ن - لانبيا.
15 أها ييلي غيري رّجا ݣ ـ ربّي ييمشينّا غيرسن ئلّا أود نثني ئيس ئدّا أدّ ئسكّر ئمتّين، وينّا منانين د ـ وينّا عصانين.
16 أياد أخف مي أود نكّين دا تݣّاخ ثامسّومانث حما أد ئزدّيݣ لبال ئنو كّوياسّ زݣ ثنيلا ن ـ ؤينّا دا تݣّاخ منيد ن - ربّي د - منيد ن ـ ميدّن».
17 «مشثا ن - ئسݣّاسن أياد ؤر لّيخ ݣ ـ لقدس، دغي أغولخدّ حما أدّ صّيوضخ شان لموعاواناث ئي أيث ثمازيرث ئنو أها وشخ ثيمغراص ئي ربّي.
18 داي أفينين ييتس ن ـ ووداين ݣانين زݣ ثمازيرث ن ـ أسيّا ݣ ـ ثدّارث ن - ربّي، لّيخ زّديݣخ ئخف ئنو أمّ لقاعيدا ن ـ شّرع نّخ، ؤر غيفي سمونخ ميدّن ؤلا سكّرخ ثيريتّ،
19 نثني أمي يخصّا أدّ دّون غورش أدي دعون مش غيفي يوفان شا.
20 نغد سقسا ويد نّيث نّا لّانين داد أداش ئنين ئيس غيفي ؤفان شا لّيݣ كّيخ داثاسن ݣ ـ لمݣيلس.
21 غاس مش ران أد غيفي يامژن أوال نّا نّيخ داثاسن س ـ ؤغويّي لّيݣ أسن نّيخ: "هاثين بدّيخ داثاون أسّا ݣ ـ لمݣليس نّون أد غيفي ثحشمم ئدّخ دا تّامنخ ئيس نّيقّن ئمتّين أدّ كّرن زݣ لموث"».
بولوس ݣ - لحبس ن - قايصاريّا
22 يافد لحال أنبّاض فيليكس ئسّن شايݣان خف ؤبريد ن - لماسيح. داي ئسموتّي لمݣليس غر شان واسّ ضنين أها ينّاياسن: «دّيخ أد حشمخ ݣ ـ دّعوث نّون أدّاي دّيدّو ؤخاثار ن ـ لعسكر ليسياس».
23 أها يوصّا يان لفسيان أد ئعسّس خف بولوس، ماشان أد ؤر غيفس ئتقّن، أها يادجّ ئمدّوكال نس أد غورسد تدّون أداس تݣّان أينّاس ئخصّان.
24 شان ووسّان ضارث ن ـ ؤينّا، ئدّود ؤنبّاض فيليكس نتّا د - تمطّوط نّس دروسيلّا، يݣان ثودايث، أها يغرد ئي بولوس ئقّيم أر ئسّغاد ئي وينّا أر ئتّيني خف ليمان س ـ سيدنا عيسى لماسيح.
25 ماشان لّيݣ أراسن ئساوال خف ميمش أيداس ئخصّا ئي بنادم أد ئمنو داث ن ـ ربّي أها يباض ݣ ـ ئخف نس، د ـ خف واسّ نّاݣ ئتّحاساب ربّي ميدّن كول، ئݣّد فيليكس داي ينّاياس: «ويدا أسّا، غاس دّو دغي، أدّاي سولاخ دّيخ أداش دّغرخ ديخ».
26 يافد لحال فيليكس يرا بار أداس ئوش بولوس لفلوس حما أداس ئرژم، أينّا خف مي أراسدّ ئقّار كوثوال أر أݣّيدس ئتّمساوال.
27 زرين سين ن - ئسݣّاسن س ـ وامشيد، ئدّود ضارث ن ـ ؤينّا يان ؤنبّاض ضنين ݣ - ؤدغار ن - فيليكس ئسم نس بوركيوس فاستوس. ماشان حما أد ئيݣ فيليكس ؤودم ئي يخف نس غر ؤداين ؤراس ئرژيم ئي بولوس.