23
أوال ن - بولوس ݣ ـ لمݣليس ن - ووداين
1 ئسموقّل بولوس ݣ ـ أيث لمݣليس أها ينّاياسن: «أيايثما، هاثين ئهنّا لخاضر ئنو زݣ ثنيلا ن ـ ؤينّا ݣيخ كول ݣ ـ ثودرث ئنو منيد ن ـ ربّي أر أسّا».
2 داي ينّاسن حانانيا، ئݣان أنمغور ن ـ ثدّارث ن ـ ربّي، ئي وينّا بدّانين ثاما ن ـ بولوس أث ؤثن غر أقمو.
3 أها ينّاياس بولوس: «ئدّا ربّي أش ئوّث ألمونافيق! ئيس ثقّيميد ديسّ أد غيفي ثنبضّ س - ؤينّا دا يتّيني شّرع، د ـ شݣين س ـ ئخف نش ثرژيد شّرع ن ـ ربّي لّيݣ أسن ثنّيد أدي وثن غر أقمو».
4 داي نّاناس وينّا بدّانين ثاما نس ئي بولوس: «ئيس دا ثرݣّمد أنمغور ن ـ ثدّارث ن ـ ربّي؟»
5 أها ينّاياسن بولوس: «سامحاثي أيايتما، هاثين ؤر سّينخ ئيس ئݣا أنمغور ن ـ ثدّارث ن ـ ربّي، ئدّخ دا يتّيني لشثاب ن ـ ربّي: "أد ؤر تّرݣام ونّا يݣان أنمغور ن ـ ميدّن نش"».
6 ييلي بولوس ئسّن ئيس ݣان ييتّس ن ـ أيث لمݣليس زݣ ثربيعت ن - ئصدّوقين د - ييتّس ضنين زݣ ثربيعت ن - ئفرّيسين، داي ينّاياسن س ـ ؤغويّي: «أيايتما، هاثين أفرّيسي ممّيس ن - ؤفرّيسي أيد ݣيخ، نكّين دغي لّيخ داد دا غيفي يتّوحكام غاس ئدّخ غوري ئلّا رّجا ئيس نّيقّن ئمتّينّ أدّ كّرن زݣ لموث».
7 غاس ئنّا بولوس أياد، داي يكّر ئمنغي ئنݣر ن - ئفرّيسين د - ئصدّوقين أها بضون أيث لمݣليس ݣين سناث ن ـ ثمناضين.
8 ئدّخ ئصدّوقين ؤر تّامنن ئيس دا تكّرن ئمتّين زݣ لموث، ؤلا لّانث لمالائيكاث د ـ لارواح، ئيد ئفرّيسين دا تّامنن س ـ ؤياد كول.
9 زايدن أر سغويّون كول نسن، داي يطيّراسن ئي ييتّس ن ـ ئسّلمادن ن ـ شّرع ݣانين زݣ ئفرّيسين، أها كّرن بدّين أر تفقّاعن أر تّينين: «هاثين ؤر نوفي أود يان لعيب ݣ - ؤرݣاز أد، ئوا عينخ سثيتّ ئسيولاسدّ شان رّوح نغد شان لمالاك».
10 ئمغور ئمنغي شايݣان ألّيݣ ئݣّد ؤخاثار ن - لعسكر أد ݣين ميدّن بولوس د ـ تيقدّيدين، داي ينّاياسن ئي ئعسكرين أد سرّحن أثيد نزغن زݣ وامّاس نسن أها رارينث غر لقشلا.
11 أسّ نّا غر ݣّيض، ئفّغد مولانا غر بولوس أها ينّاياس: «زعم أد ؤر تݣّد، هاثين ئمشينّا ثبرّحد ئي ميدّن غيفي ݣ - لقدس ئخصّاياش أتدّود أداسن ثبرّحد أود ݣ - روما».
ؤداين أر ؤرزّون أد نغين بولوس
12 داي س ـ أسكّا نس ثيفاوث، مساسان ييتّس ن - ووداين أد ݣين شان ثخندالّاسث حما أد نغين بولوس، ݣّالّين ؤر تتّان ؤلا سوان أرد ئيث نغين.
13 ئلين س - ؤݣار ن ـ ربعين ن ـ ؤرݣاز.
14 داي دّون غر ئنمغورّ ن ـ ثدّارث ن ـ ربّي د ـ ئخاثارّ ن - ووداين أها نّاناسن: «هاثين نݣّولّا كول نّخ س ـ ثݣالّيتّ ثاخاثارث ؤر نتتّا والا نسوا أرد ننغ بولوس.
15 ئوا أزناث كونّي د ـ أيث لمݣليس غر أخاثار ن - لعسكر ثتّرم زّيكس أداون دّيرار بولوس غر لمݣليس أمّاني ثرام أتّعاودم أتّنژوم ݣ ـ دّعوث نس، د ـ نوكّني نلّا نوجد أث ننغ ݣ ـ ؤبريد قبل أنّياوض غورون».
16 نتّا يسلّا ممّيس ن - ؤلثماس ن - بولوس ئي وينّا خف مساسان ووداين، ئدّو غر بولوس غر لقشلا يعلماس.
17 داي يغردّ بولوس ئي يان لفسيان أها ينّاياس: «أوي أعرّيم أد غر أخاثار ن ـ لعسكر ئرا أداس ييني شا».
18 ياويث لفسيان غر أخاثار نسن ئنّاياس: «هاثين ئغرايي بولوس أحبّاس ئتّر زّيݣي أداشدّ أويخ أعرّيم أد ئرا أداش ييني شا».
19 داي يامژ ؤخاثار ن ـ لعسكرأعرّيم زݣ ؤفوس، ياويث غر تّيساع ئسقساث: «ماي ثريد أدي ثينيد؟»
20 داي ينياياس: «هاثين مساسان ووداين أد زّيكش تّرن أداسن ثرارد بولوس أسكّا غر لمݣليس، دّان أداش ئنين هاثين ران أد عاودن أد نژون ݣ ـ دّعوث نس.
21 ماشان أد ؤر ثن تّامن، ئدّخ هاثين ؤݣار ن - ربعين ن - ؤرݣاز زّيكسن أيد ئدّان أداس حاطّرن ݣ ـ ؤبريد حما أثنغين، هاثين ݣّولّان ؤر تتّان ؤلا سوان أرد ئيث نغين. دغي لّان وجدن، دا تّعايانن غاس أداسن ثينيد واخّا».
22 داي يوصّا ؤخاثار ن ـ لعسكرأعرّيم ئنّاياس: «أد ؤر تّيني أياد نّا يي ثنّيد ئي أود يوكّ». يازنث ئبردان نس.
23 ئغرد ؤخاثار ن ـ لعسكر ئي سينّ ن - ئيد لفسيان أها ينّاياسن: «سموناثدّ ميثاين ن - ؤعسكري، د - سبعين ن - ؤمناي، د - ميثاين ن - ؤعسكري س ـ ثفاليوين، ثسّوجدم ئخفاون نّون أتدّوم غر قايصاريّا ئضا ݣ - لتسعود.
24 ثاويماسدّ ئي بولوس شان ئسان نّاخف ئتّنوي، ثصّيوضمثين ݣ - لمان غر أنبّاض فيليكس».
25 ياري ؤخاثار ن ـ لعسكر ئي ونبّاض يوث ن - ثبراتّ، داس ئتّيني ديكس:
26 «أزول غيفش أيانبّاض أخاثار فيليكس. هاثين أخاثار ن ـ لعسكر كلوديوس ليسياس أيداشنّ يوزنن ثابراتّ أد.
27 هاثين ؤمژن ووداين أرݣاز أد، ئرين أثنغين. نتّا سّنخ ئيس ئݣا أروماني، أها أزّلخ غورس نكّ د ـ ئعسكرين ئنو فوكّوخثيد.
28 داي ريخ أد ئسينخ مايداسن ئݣا أها ياويخث غر لمݣليس نسن.
29 أفخثنينّ داث تلامّان غاس خف شان ئسكين ݣ - شّرع نسن نّا خف ؤر ئواثا منغيوث ؤلا لحبس.
30 ماشان غاس ئتّوينّايي ئيس مساسان ييتس ن ـ ووداين أد ݣين شان ثخندالّاسث حما أثنغين، أزنخاشثينّ دغيا، أها نّيخاسن أنّ دّون غورش دعوناس، ئوا ربّي أكّ ئعاون».
31 داي ݣين ئعسكرين أينّاسن ئنّا وخاثار نسن، أوين بولوس ݣّيض صّيوضنثينّ غر ثمدينث ن ـ أنتيباتريس.
32 س - أسكا نس، عايدن نثني غر لقشلا، أدجّين ئمناين أد سثامّان بولوس غر قايصاريّا.
33 نتّا ييوضننّ ئمناين غر قايصاريّا، ؤشيناس ثابراتّ ئي ونبّاض، سّكشمن غورس بولوس.
34 ئقّرا ونبّاض فيليكس ثابراتّ، داي يسقسا بولوس خف ماتّا ثمازيرث نّا زݣ ئݣا. نتّا يسّن ئيس ئݣا زݣ كيليكيّا،
35 أها ينّاياس: «دّيخ أد سّغدخ ئي ماي تّينيد أدّاي ددّون أيث دّعوث نش». داي ينّاياسن ئي يعسكرين أث ݣين ݣ ـ لقصر ن - هيرودوس أها عسّسن غيفس.