22
بولوس دا يتّرارا خف ئخف نس
1 «أ يايثما د - ئخاثارّ نّخ، سّغداث ئي ماي ريخ أداون ئنيخ دغي حما أد رارخ خف ئخف ئنو».
2 نتّا سلّاناس أراسن ئساوال س - ثعيبرانيث ئݣان أوال نسن، أغولن نّيرسن ؤݣار، أها ينّاياسن:
3 «نكّين ؤداي أيد ݣيخ. لوليخ ݣ - ثمدينث ن ـ طرسوس ݣ - ثمازيرث ن - كيليكيّا، ماشان ݣميخ داد ݣ ـ لقدس، أها لمدخ خف ؤفوس ن - غامالائيل ألمّود ئصحان خف شّرع ن ـ سيدنا موسى. هاثين أود نكّين دا يي تّاسي نّعرث خف لخدمث ن ـ ربّي غاس أمّ ؤياد نّا ثݣام كول نّون أسّاد.
4 كّيخ أر تكرفاصخ وينّا ثفارنين أبريد ن ـ لماسيح، أها سبّبخ كول ݣ ـ لموث ن ـ ييتس ديكسن. كّيخ أرثن تّامژخ س ـ ئرݣزن د ـ ثوثمين أرثن ݣّارخ ݣ ـ لحبس.
5 هان أنمغور ن ـ ثدّارث ن ـ ربّي د - لمݣليس ن ـ ووداين ݣان ئنيݣان خف ؤياد نّاون نّيخ ئيس ئݣا سثيتّ، ئدّخ نثني أيد ئي يوشان ثيبراثين أثنث أويخ ئي أيثماثنخ ؤداين نّا لّانين ݣ - ديماشق، ثيبراثين نّا أر ئي ياكّانث تّسريح حما أد أمژخ ئمومنّ نّا لّانين ديسّ، أها رارخثنيد غر لقدس شرفن حما أد غيفسن ئتّوحشم».
(ئمازانّ 9: 1-19؛ 26: 12-18)
6 «داي دّوخ يان واسّ غر ديماشق. نتّا دجّاورختينّ أتّاين ن - وامّاس ن - واسّ، هان يان ؤسيدّ ئجهدن ئنقّردّ غيفي زݣ ييݣنّا أمّ ووسم ئسّيدّا غيفي.
7 داي تّوتّيخ س ـ أشال، سلّاخ ئي شا أر ئي يتّيني: "أ شاوول، أ شاوول، مّاخ ألّيݣ دا يي تكّرفاصد".
8 سقساخث نّيخاس: "ماي ثمسد أسيدي؟" أها ينّايي: "نكّين عيسى ؤناصيرا نّا دا تّكّرفاصد".
9 ئسمونّ ئنو أنّاين أسيدّ، ماشان ؤر سلّين ئي واوال ن ـ ونّا أر ئي يساوالن.
10 داي نّيخاس: "ماي ثريد أد ݣخ أمولانا؟" أها ينّايي مولانا: "كّر بدّ، تّامّاد غر ديماشق، دينّ ئدّا أداش ئتّوييني مايد غيفش ئلّان أتّݣد".
11 داي ئدّخ ؤر أر تّانّايخ ئعمايي جّهد ن ـ ؤسيدّ نّا غيفي دّينقرن، أمژني ئسمونّ ئنو أفوس ألّيݣ ئي نصّيوضن غر ديماشق».
12 «ييلي ديسّ يان ؤرݣاز ئمنان ئحضان شّرع ن ـ ربّي ئسم نس حانانيا، ؤداين كول نّا زدغنين ݣ ـ ديماشق أرث تّوقّارن شايݣان.
13 ئدّاد غوري، ئبدّ ثاما نو أها ينّايي: "أݣما شاوول، تّانّاي". ݣ ـ وانسا ئعايديدّ ئژري نو أها يانّايخث داثي.
14 داي ينّايي: "ربّي نّا أر تّعبادن ئمزوورا نّخ ئسثيش حما أتّيسيند أينّا يرا، ثانّايد أمزيلّز نس ئمنان أها ثسلّاد ئي واوال زݣ ؤقمو نس.
15 ئدّخ هاثين ئقّنشينّ أتّݣد ئنيݣي نس داث ن ـ ميدّن كول خف ؤينّا ثانّايد د - وينّامي ثسلّاد.
16 دغي ماي دا تّعاياند؟ كّر ثتّوغبّزد ݣ - وامان ثسّيردّ ئخف نش زݣ لمعصيّاث نش، أها ثتّرد ئي مولانا أداش ئغفر"».
17 «فّير ن ـ ؤينّا أغولخ غر لقدس. نتّا أر تژالّاخ يان واسّ ݣ - ثدّارث ن - ربّي، ئسوي شا،
18 داي يفّغد غوري سيدنا عيسى ينّايي: "سدّرف ئخف نش، فّغ دغيا زݣ لقدس ئدّخ ؤر دّين ميدّن نس أش أمنن أدّاي داسن تقّيسد غيفي أينّا ثانّايد د ـ ؤينّامي ثسلّاد".
19 داي نّيخاس: "ماشان أمولانا هاثين سّنن ئيس كّيخ أر تدّوخ غر ثمزݣيديوين أر تّامژخ وينّا دا تّامنّين ئيسّك أرثن ݣّارخ ݣ - لحبس، أرثن تهرّاسخ.
20 ئليخ لّيݣ ئتّونغا ستيفانوس ئدّخ أر ئساوال ئي ميدّن غيفش. مساساخ خف منغيوث نس أها حضوخ ئزنّار ئي وينّا أرث نقّانين".
21 داي ينّايي مولانا: "كّر دّو، ئدّخ دّيخ أش أزنخ غر ثميزار نّا بعدنين، غر لݣنوس نّا ؤر ݣينين ؤداين"».
22 ئلين ميدّن أر سّغادن غر بولوس ألّيݣ ئنّا أوال أد، داي سغويّن أر تّينين: «كّساث أرݣاز أد زݣ وودم ن ـ واشال ئدّخ ؤر ئواثا أد ييدير».
23 داي يطيّراسن قّيمين أر سغويّون أر ݣّارن س ـ ئزنّارّ نسن أر زوزّورن أشال س - ئݣنّا.
24 داي ينّا ؤخاثار ن ـ لعسكر ئي يعسكرين نس أد سّكشمن بولوس غر لقشلا، أها ثفعناس أمعراض أرد ئقرّا حما أد ييسين مايداسن ئݣا ئي ووداين ألّيݣ غيفس سكّرن أنشثيد ن ـ ئغويّان.
25 نتّا أرث شرّفن حما أث هرّسن أها ينّاياس ئي لفسيان نّا يبدّان ثاما نس: «ئيس غورون لحقّ أتهرّسم شان ؤروماني مغار ؤر غيفس ثحشيمم؟»
26 نتّا يسلاّ لفسيان ئي وياد، يازّل غر أخاثار ن ـ لعسكر ئعلماس، ئنّاياس: «ماتّا ؤياد ثريد أتّݣد؟ هان أرݣاز أد أروماني أيد ئݣا!»
27 ئدّو ؤخاثار ن ـ لعسكر س ـ ئخف نس غر بولوس ئسقساث: «ئنيي، ئيس تݣيد سثيتّ أروماني؟» أها ينّاياس بولوس: «ئيّيه».
28 داي ينّاياس ؤخاثار ن ـ لعسكر: «نكّين ؤشيخ شايݣان ن ـ ئقّاريضن حما أد ݣخ أروماني» أها ينّاياس بولوس: «ئيد نكّين هاثين ݣيخ أروماني ئدّخ لوليخ غورسن».
29 داي ݣ ـ وانسا حيّدناس وينّا عوّلّين أث هرّسن حما أث سقرّان. أود أخاثار ن ـ لعسكر س ـ ئخف نس ئݣّد لّيݣ ئسّن ئيس ئݣا بولوس أروماني د ـ نتّا يشرفث.
30 س ـ أسكّا نس، ئرا وخاثار ن ـ لعسكر أد ييسين مايد ئݣا بولوس ئي ووداين ألّيݣ أر غيفس تشثوان، داي يكّساس ئشوراف، ئغرد ئي ينمغورّ ن ـ ثدّارث ن ـ ربّي، د - أيث لمݣليس ن ـ ووداين س ـ ماس لّان أدّ مونن، أها ياويثيد ئسبدّيث داثاسن.