21
ثوادا ن ـ بولوس غر لقدس
1 ضارث ن ـ ماي نبضا أݣّيدسن، نني أغرّابو نعيّن ثاݣزيرث ن - كوس. س ـ أسكّا نس، ندّو غر ثݣزيرث ن - رودوس، نثامّا سييسّ غر لمرصا ن ـ ثمدينث ن - باتارا.
2 ناف ديسّ يان ؤغرّابو دا يتدّو غر ثمازيرث ن ـ فينيقيّا، أها نني ديكس ندّو.
3 ناوضنّ غر بنيد ن ـ ثݣزيرث ن - قوبروص، داي نزريتّ خف ؤژلماض نّخ نثامّا غر ثمازيرث ن - سوريا. نرس ݣ ـ لمرصا ن ـ ثمدينث ن - صور ئدّخ ديسّ أݣ غا يسرس ؤغرّابو أينّا دّيوسي.
4 داي ندّو نرزو خف ئمومن نّا لّانين ݣ ـ صور، نتّا نوفاثن أها نقّيم غورس سبعا ن ـ ووسّان. قّيمين أرتوصّان بولوس أد ؤر ئتدّو غر لقدس ئمشينّا أسن ئسنعث رّوح ربّي.
5 لّيݣ شمّلن ووسّان نّا نكّا غورسن، نرا أندّو ييبردان نّخ. أها مونن أݣّيدنخ ئمومنّ كول س - ثوثمين نسن د - واراو نسن زݣ ثمدينث أر ئير ن - لبحر، نوث خف ئفادّن أها نژّال.
6 نتّا نمصافاض أݣيدسن، نني أغرّابو، أغولن نثني ئبردان نسن.
7 داي نثامّا س ـ ؤغرّابو زݣ صور أر ثامدينث ن - بوتوليمايس، أها نسلّم خف ئمومنّ نّا لّانين ديسّ، نقّيم غورسن يان واسّ.
8 س ـ أسكّا نس، ندّو غر ثمدينث ن - قايصاريّا، نݣ ئنبݣاون غر فيليبّوس نّا دا يتبرّاحن س ـ واوال ن ـ ربّي، ئيݣ يوكّ زݣ ئرݣزن س ـ سبعا a نّا سثين ئمازانّ أد بطّون لموعاواناث.
9 ئلينث غورس ربعا ن - ثعرّيمين أر ساوالنث س ـ ؤينّاسنث ئسنعث ربّي.
10 ضارث ن ـ مايد غورس نكّا شايݣان ن - ووسّان، ئدّاد زݣ ثمازيرث ن - أيث ياهودا يان ؤرݣاز أر ئتّكاشافن س ـ ؤينّاس ئسنعث ربّي ئسم نس أغابوس.
11 ياسي أفكّاس ن - بولوس ئشرف ئيسّ ئضارن نس د - ئفاسّن نّس أها ينّا: «دا يتّيني رّوح ن - ربّي: ئدّا باب ن ـ ؤفكّاس أث شرفن ووداين أمّ وامشيد ݣ ـ لقدس أها وشينث ئي وينّا ؤر ݣينين ؤداين».
12 لّيݣ نسلّا ئي وياد، نقّيم أراس نتدمّام ئي بولوس نوكّني د - ئمومنّ نّا لّانين ديسّ أد ؤر ئتدّو غر لقدس.
13 داي ينّاياخ: «ماتّا ؤياد نّا دا تݣّام، مّاخ ألّيݣ دا تّروم أر تبّيم ثاسا نو، هاثين نكّين وجدخ ؤريد غاس أد تّوشرفخ ݣ ـ لقدس، ماشان أود أنّ مّثخ ديكس خف سيدنا عيسى».
14 نتّا ؤر زّيكس نيوي شا، ناغول نسوسم أها ننّا: «أد ييلي وينّا يرا مولانا».
15 شان ووسّان ضارث ن - ؤينّا، نحبّل ئي ثوادا أها نامژ أبريد غر لقدس.
16 مونن أݣّيدنخ ييتّس ن - ئمومنّ زݣ قايصاريّا، أويناخ غر ثدّارث ن ـ يان ؤرݣاز ئݣان زݣ قوبروص، ئيݣ زݣ ئمومنّ ئمزوورا ئسم نس ماناسون حما أد غورس نقّيم.
بولوس ݣ - لقدس
17 نتّا نيوضنّ غر لقدس، رحبناخ ئمونّ أها فرحن ئسّنخ شايݣان.
18 س ـ أسكّا نس، نمون د ـ بولوس غر يعقوب، ئلين ئخاثارّ ن ـ ؤݣراو ن ـ ئمومنّ كول نسن مونن غورس.
19 داي يسلّم غيفسن بولوس، أها يقّيساسن س ـ ؤمّنداث أينّا يݣا ربّي كول خف ؤفوس نس ئنݣر ن - لݣنوس نّا ؤر ݣينين ؤداين.
20 نتّا سلّان ئي وينّا، أها حمدن ئي ربّي كول نسن، داي نّاناس ئي بولوس: «أݣماثنخ، هان شݣّ دا تّانايد، مشثا ن ـ والفيون ن - ووداين أيد يومنّ س ـ سيدنا عيسى، د ـ كول نسن داثن تّاسي نّعرث شايݣان خف شّرع ن ـ سيدنا موسى.
21 هاثين ئتّوينّاياسن غيفش ئيس دا ثسّلمادّ ئي ووداين نّا لّانين ݣ ـ ثميزار ن ـ لݣنوس ضنين أد حيّدن ئي شّرع ن ـ سيدنا موسى، أراسن تّينيد أد ؤر تزݣّانن ئي واراو نسن د ـ أد ؤر تّثفارن لقاعيداث نّخ.
22 ئوا ماي نتّݣّا دغي؟ ئدّخ هاثين ئقّنثنينّ أد ئسينن ئيس تثدّيد.
23 مش أخ ثݣيد س ـ رّاي، ئيݣ أينّا غاش نيني: هاثين لّان غورخ ييتس ن ـ ربعا ن - ئرݣزن قّاولناس شا ئي ربّي،
24 مون أݣيدسن غر ثدّارث ن ـ ربّي ثݣد أݣيدسن لقاعيدا ن ـ ثازدݣي، تخلّسد أينّا غيفسن ئلّان كول حما أد كّسن أود أزّار، داي ييسينن ميدّن كول ئيس ؤر ئݣي ؤينّا غيفش ئتّوينّان سثيتّ، ئسينن ئيس ثحضيد أود شݣّين شّرع أمّ نثني.
25 ئيد ئمومنّ نّا ؤر ݣينين ؤداين، هاثين نوزناسن ياد ثابراتّ، أر ثنن نتوصّا أد حيدن ئي وكسوم ن ـ ثمغراص نّا تّواݣنين ئي لاصنام، د ـ ئدامّن، د ـ ؤكسوم ن ـ لمال نّا يمّورضصن، أها حيّدن ئي لفساد».
26 داي يݣاسن بولوس س ـ رّاي. س ـ أسكا نس، ئمون د ـ ئرݣزن س - ربعا يزّديݣ ئخف نس أݣيدسن. فّير ن ـ ؤينّا، ئكشم غر ثدّارث ن ـ ربّي أد ئعلم س ـ ميلمي أغا شمّلن ووسّان ن ـ ثازدݣي حما أد تّواوش ثمغروصث خف كّو يوكّ ديكسن.
بولوس ئتّييمژ ݣ - ثدّارث ن ـ ربّي
27 نتّا يدجّاور ؤسبيع ن ـ ثازدݣي أد ئشمّل، أنّاين ييتس ن ـ ووداين ݣانين زݣ أسيّا بولوس ݣ ـ ثدّارث ن ـ ربّي، أها سحورّشن غيفس ميدّن كول، داي كّرن أمژنث،
28 أر سغويّون أر تّينين: «ئورداون أيوداين، هاياون أرݣاز نّا دا يسّلمادن ئي ميدّن ݣ ـ مايد ئݣان أنسا أينّا ؤر ئحلين خف ميدّن نّخ، د ـ شّرع نخّ، د ـ ثدّارث أد ن ـ ربّي، أها يسّكشم ألثو ييتس نّا ؤر ݣينين ؤداين غر أنسا ياد أزدّاي أها يسخنونسث».
29 نّان أياد ئدّخ كّان أنّاين بولوس ݣ ـ ثمدينث أر ئتّمون د ـ يان ؤرݣاز زݣ ؤفسوس ؤر ئݣين ؤداي ئسم نس تروفيموس، أها غالن ئيس ثيسّكشم بولوس غر ثدّارث ن ـ ربّي.
30 داي ثكّر ثيريتّ ݣ ـ ثمدينث كول، أزّليند ميدّن زݣ مايد ئݣان ثانيلا أمژن بولوس ژّوغرنث غر برّا ن - ثدّارث ن ـ ربّي، أها قّنن ثيفلوين ݣ ـ وانسا.
31 نتّا ران أث نغين، ياوضنّ ؤنغميس أخاثار ن - لعسكر ن - ئرومانين ئيس ثكّر ثيريتّ ݣ - لقدس كول.
32 ئكّر ݣ ـ وانسا ياوي أݣيدس ييتس ن ـ ئعسكرين د ـ ييتس ن ـ ئيد لفسيان أها أزّلين غيرسن. نتّا أنّاينث ميدّن ئدّاد نتّا د - ئعسكرين نس، أغولن رصّان ؤر ياد أر كّاثن بولوس.
33 ئثامّا وخاثار ن ـ لعسكر غر بولوس يامژث، أها ينّاياسن ئي يعسكرين أث شرفن س - سناث ن ـ ثيفرين، ئقّيم أر غيفس ئتّسقسا لغاشي حما أد ييسين مايد ئمس د ـ مايد ئجّرا.
34 داي أر سغويّون ميدّن، كّوشا د ـ مايد أر ئتّيني. نتّا ؤر ئغي أد ييسين مايد ئجران سثيتّ زݣ ژّاژا نّا سكّرن، داي ينّاياسن ئي يعسكرين أد أوين بولوس غر لقشلا.
35 غاس صّيوضنن ئعسكرين بولوس غر ثمسولاي نّا دا سّالاينين غر لقشلا، أسينث حما أد فوكّان زݣ لغاشي نّا يهيجن.
36 ئدّخ ثنيد يوفا لحال أرث تّثفارن أر سغويّون: «نغاتّ، نغاتّ!»
37 نتّا ييوضننّ غر لباب ن ـ لقشلا، داي ينّاياس بولوس ئي وخاثار ن - لعسكر: «ئيد أدي ثادّجد أداش ئنيخ شان واوال»، داي ينّاياس ؤخاثار ن ـ لعسكر: «ئيد ئيس ثسّند أتّسيولد س - ثيونانيث؟
38 ماخ ئيس ؤر ئيد شݣّين أيد ئݣان أميصري دّاخ نّا يسكّرن ثيريتّ مشثا أياد، أها ياوي ربعالاف ن - أيث لارواح غر صّحرا؟»
39 داي ينّاياس بولوس: «ئهي، نكّين ؤداي أي ݣيخ زݣ ثمازيرث ن - كيليكيّا، لوليخ ݣ ـ ثمدينث ن ـ طرسوس نّا يتّييسّنن شايݣان. عافاش أدجّي أد سيولخ ئي ميدّن».
40 أها يادجّيث أد ئسيول. داي يبدّ بولوس ݣ ـ ثمسولاي، ئهزّا أفوس نس ئي ميدّن حما أد فسثين. نتّا سوسمن، ئسيولاسن س - ثعيبرانيث نسن أها ينّاياسن: