20
بولوس ݣ - ثمازيرث ن - ماكيدونيّا د - ثمازيرث ن - ليونان
1 نتّا ثنّيرس ثريتّ، ئغردّ بولوس ئي يمومنّ أها يسيولاسن حما أثن ئزّعيم أد مغورن ݣ ـ ليمان، داي يمصافاض أݣّيدسن ئدّو غر ثمازيرث ن ـ ماكيدونيّا.
2 ئيكّ ديكس مايد ئݣان أنسا، أر ئساوال ئي يمومنّ شايݣان حما أثن ئزّعيم أد مغورن ليمان. داي يدّو زݣ سّييسّ غر ثمازيرث ن - ليونان.
3 ئقّيم ديكس شراض ن - وايورن. نتّا أر ئتحبّال أد ئني أغرّابو غر سوريا، ئسلّا ئيس غيفس مساسان ووداين أث نغين، داي ياغول ئخمّم أد عايد زݣ ؤبريد ن - ماكيدونيّا.
4 ئمون أݣيدس ؤنّامي دا تّينين سوباتروس ممّيس ن - بورّوس ئݣان زݣ ثمدينث ن - بيرييّا، د - أراستارخوس د - ساكوندوس ݣانين زݣ ثمدينث ن - تاسالونيكي، د - غايوس د ـ ثيموثاوس ݣانين زݣ ثمدينث ن - داربا، ييلي تيخيكوس د - تروفيموس ݣانين زݣ أسيّا.
5 أها دّون زويرناخ a غر ثمدينث ن - تارواس، قّيمين أراخ تݣانّاين ديسّ.
6 ئيد نوكّني، غاس ئزري لعيد ن ـ ؤراخصيس، نني أغرّابو زݣ ثمدينث ن - فيليبّي، ناوضنّ غورسن غر تارواس ݣ ـ خمسا ن ـ ووسّان، أها نكّ ديكس سبعا ن - ووسّان.
أسّيدر ن - أفتيخوس ݣ ـ تارواس
7 س ـ واسّ ن ـ سّبث غر ݣّيض، نمّݣراو أنشّار أغروم حما أنشثي سيدنا عيسى، ئقّيم بولوس أر ئساوال ئي ميدّن خف واوال ن ـ ربّي أر أمّاس ن ـ ييض ئدّخ ئعوّل س - أسكّا نس أد ئدّو ييبردان نس.
8 يافد لحال ثامصريث نّاݣ نمّݣراو أغنث ديكس شايݣان ن ـ ثفثيلين.
9 ييلي يان ؤعرّيم ئسم نس أفتيخوس ئقّيما خف ثاما ن ـ سّرجم، أرث ئتّاوي ؤنودّم لّيݣ ئسّغزيف بولوس أوال؛ شوي يقّرطّ ؤنودّم داي ياتّوي زݣ ثمصريث ثيسّ سناث س ـ أشال، نتّا هزّانث أفينثينّ ئمّوث.
10 داي يضر بولوس زݣ ثمصريث، ئحودر غيرس ئݣراس ئغيل أها ينّاياسن: «أد ؤر تݣّداث هاثين ئدّر!»
11 عايدن فّير ن ـ ؤينّا ألين غر ثمصريث، ئبّي بولوس أغروم تشّين. ئقّيم أراسن ئساوال ديخ ألثو ألّيݣ ييفاو لحال، ئكّر ئدّو ئبردان نس.
12 ئيد أعرّيم، ئوينث غر ثدّارث نس ئلّا يدّر، أغولن وولاون نسن نّيرسن.
ثوادا زݣ ثمدينث ن - تاراوس غر ثمدينث ن - ميليتّوس
13 داي نزوير نوكني بولوس، نني أغرّابو غر ثمدينث ن - أسّوس حما أث نعاين ديسّ أث نسني ݣ ـ ؤغرّابو أمّ ؤينّا خف ئمساسا أݣيدنخ، ئدّخ ئعوّل نتّا أنّ ئدّو غر ديسّ ݣ ـ ؤبريد.
14 نتّا ييوضاخنّ غر أسّوس، ئني أݣيدنخ ݣ ـ ؤغرّابو أها ندّو غر لمرصا ن ـ ثمدينث ن ـ ميتيلينا.
15 ندّو سّييسّ، ناوضنّ س - أسكّا نس غر منيد ن - ثݣزيرث ن - خيّوس. ݣ ـ واسّ ويسّ شراض نزري زݣ ثاما ن ـ ثݣزيرث ن - ساموس،b ناوضنّ ݣ - واسّ ويسّ ربعا غر ثمدينث ن - ميليتوس.
16 ؤر نكّي خف ثمدينث ن ـ أفاسوس ئدّخ دّيوفا لحال بولوس ؤر ئعوّيل أد غيفس ئيكّ حما أد ؤر ئتعطّار ؤݣار ݣ - ثمازيرث ن - أسيّا، ئرا بار أنّياوض دغيا غر لقدس حما أد ئحاضر ئي لعيد ن - خمسين.
بولوس دا يتّمصافاض د ـ ئخاثارّ ن ـ ؤݣراو ن ـ ئمومنّ
17 داي يازن بولوس غر ئخاثارّ ن ّـ ئمومنّ ݣ ـ أفاسوس أد غورس ددّون غر ميليتّوس.
18 لّيݣ ديوضن غورس أها ينّاياسن: «هان كونّي ثسّنم أينّا ݣيخ كول ݣ ـ لوقث نّا كّيخ أݣّيدون زݣ واسّ أمزوارو نّاݣ ددّيخ غر ثمازيرث ن - أسيّا.
19 لّيخ أر تݣّاخ لخدمث ن ـ مولانا س ـ ئمطّاون ؤر دجّين سخاثيرخ ئخف ئنو، أها سيكّين غيفي ووداين شايݣان ن ـ ثمارا س ـ ثخندالّاسين نسن.
20 ݣيخ ثامسّومانث، ؤر دجّين غيفون فّيرخ أينّا كون ئتّنفاعن كول، ماشان أراون تبرّاحخ ئيسّ س ـ طّايطاي برّا، أراونث سّلمادخ ݣ - ثادّروين نّون.
21 أر تتّرخ زݣ ووداين د - ئيونانين أد ثوبن ئي ربّي أها يامنن س - سيدنا عيسى لماسيح.
22 دغي هايي دّيخ أد ضاعخ رّوح ن ـ ربّي أها دّوخ غر لقدس مغار ؤر سّينخ ماي نّيقنن أدي يجرو دينّ.
23 ݣ ـ ثمدينين كول نّا أر تكّاخ، أر ئي يعلّم رّوح ن - ربّي ئيس ئي نيقّن أد تّييمژخ ݣ ـ لحبس، ثكّ غيفي شايݣان ن ـ ثمارا.
24 ماشان ؤر غوري ثواثا ثودرث ئنو شا، مايد ئي يهمّان نكّين غاس أد ݣخ أينّا غيفي يلّان، أها ݣخ لخدمث نّا يي يوشا سيدنا عيسى أتّݣخ: أد دّوخ أد ئنيخ ئي ميدّن ئنغميسن ژيلنين خف رّحمث ن ـ ربّي ثاخاثارث».
25 «مشثا أيد أر سّاراخ ئنݣراثون أراون ساوالخ خف ثݣلديتّ ن - ربّي، ماشان دغي سّنخ ئيس ؤسار يانّاي أود يوكّ ديݣون ؤدم ئنو زݣ ضارث ن ـ واسّا.
26 خف ؤياد، داون تّينيخ أسّا س ـ طّايطاي هاثين برّاخ زّيݣون مش ثفّغم أبريد ن ـ ربّي.
27 ئدّخ هاثين نّيخاون أينّا يرا ربّي كول، ؤر غيفون فّيرخ أود ئميقّ.
28 ئوا لعار نّون ئخفاون نّون، د ـ لعار نّون وينّا خف ئكون ئݣا رّوح ن ـ ربّي د ـ ئنبدادن. ݣاث أمّ ئمكساون، ثحضوم أݣراو ن - ئمومنّ نّا خف ئوشا ربّي ئدامّن ن ـ ممّيس حما أثن ئفوكّا.
29 هاثين سّنخ ئيد أدّاي دّوخ، دّان ييتس ن ـ ميدّن ݣانين أمّ ووشّان نّاݣ ؤر ثلّي رّحمث أد كشّمن ئنݣراثون أها خلون أݣراو ن ـ ئمومنّ.
30 دّان أود ييتّس زّيݣون كونّي أد سّفراغن لحقّ حما أد سّخضون ئمومنّ أثن ثفارن.
31 ئوا لعار نّون ئخفاون نّون، ثشثيم ئيد شراض ن ـ ئسݣّاسن س ـ ييض د - واسّ أيد أر كون توصّاخ، روخ غيفون س ـ ئمطّاون».
32 «دغي أيايتما، ؤدجّيخكون ݣ - ؤفوس ن - ربّي أكون ئحضو. د - واوال نس نّا دا يسنعاثن رّحمث نس ثاخاثارث ئدّا أكون ئسعاون أتّمغورم ݣ ـ ليمان، ئوشاون لبركاث نّا يقّاول ئي ميدّن نّا يسثي أد ݣين وينس.
33 ؤر دجّين عشيقخ نّقّرث ن ـ أود يوكّ ؤلا يورغ نس ؤلا ييعبانّ نس.
34 كونّي س ـ ئخفاون نّون ثسّنم ئيد ئفاسّن أد ئنو أس أر خدّمخ حما أدّ رارخ أينّايي يخصّان نكّ د ـ ئسمونّ ئنو.
35 ݣ ـ ؤينّا أر تݣّخ كول، سنعثخاون ئيس أخ ئخصّا أنخدم أها نوّث ثامارا حما أنسعاون وينّا ؤرغينين ئي شا. أد ؤر تتّوياث ئواليون ن - سيدنا عيسى لّيݣ ئنّا: "أياعريتّ ن ـ ونّا دا ياكّان ؤݣار ن ـ وونّا دا يتّامژن"».