19
بولوس ݣ - أفسوس
1 لّيݣ نّيلّا أبولّوس ݣ - كورونثوس، ئكّا بولوس زݣ وامّاس ن ـ ثمازيرث ن أسيا ياوضنّ غر أفاسوس. يافنّ ديكس ييتّس ن - ئمومنّ.
2 داي يسقساثن: «ئيس غيفون ديݣّز رّوح ن ـ ربّي لّيݣ ثومنم س ـ سيدنا عيسى؟» أها نّاناس: «ئهي، ؤر دجّين نسلاّ كول ئيس ئلّا رّوح ن - ربّي».
3 ئسقساثن ديخ ألثو: «ئوا ميمش ئݣا وغبّز ن ـ وامان نّا ثتّوغبّزم؟» أها نّاناس: «أغبّز ݣ ـ وامان نّا أر ئتݣّا سيدنا يحيى».
4 داي ينّاياسن بولوس: «سيدنا يحيى أر ئتغباز ميدّن ݣ - وامان حما أد سنعثن ئيس ثوبن، أراسن ئتّيني أد أمنن س - وونّا غا ديدّون ضاراس، نتّا سيدنا عيسى».
5 لّيݣ سلّان ئي وياد أها كّرن تّوغبزژن ݣ - وامان س - ييسم ن - سيدنا عيسى.
6 داي يسيرس غيفسن بولوس ئفاسّن نس أها يرسد غيفسن رّوح ن - ربّي، قّيمين أر ساوالن س - ئواليون ؤر ݣينين وينسن، أر ساوالن س ـ ؤينّاسن ئسنعث ربّي.
7 ئلين س - أم ثناعش ن - ؤرݣاز.
8 ئقّيم بولوس أر ئتدّو غر ثيمزݣيدا ن ـ ووداين كّوياس شراض ن - وايورن، أراسن ئساوال س ـ طّايطاي، أراسن ئصّوحا أينّا يݣان وين ثݣلديتّ ن - ربّي بار أد أمنن.
9 ماشان ييتّس ديكسن عصاناسن وانّليثن أها ؤر رين أد أمنن، قّيمين أر تّينين أينّا ؤر ئحلين خف ؤبريد ن ـ مولانا داث ن - ميدّن كول. داي يدّو بولوس ئزريثن ياوي أݣيدس ئمومنّ، أراسن ئساوال كويّاس ݣ - سّكويلا ن - يان ؤرݣاز داس تّنين تيرانّوس.
10 سين ن - ئسݣّاسن أيد أر ئتݣّا ييمشيد ألّيݣ سلّان ئمزداغ ن - ثمازيرث ن - أسيا كول ئي واوال ن - مولانا، لا يوداين ؤلا ئيونانين.
11 أر ئتݣّا ربّي خف ؤفوس ن - بولوس لموعجيزاث نّا ؤر دّجين يانّاي أود يوكّ،
12 ألّيݣ أغولن ميدّن أر تّاوين لازياف د ـ ئعبانّ نّا يسّيغن صّاحث ن ـ بولوس أرثن سروسن خف ئموضينّ نسن أها أر تجّين، أر زّيكسن تفّغن وادجّنون.
أراو ن - ساكاوا أنمغور ن ـ ثدّارث ن ـ ربّي
13 ئلين ييتّس ن - ووداين دا تكّان ثيمدينين أر سّوفوغن أدجّنون زݣ ميدّن نّاݣ لّان. ييتس زّيكسن أر سّخدامن ئسم ن ـ سيدنا عيسى، أر تّينين ئي وادّجنون: «س ـ ييسم ن - عيسى نّاس دا يتبرّاح بولوس، داون نتّيني فّغاث».
14 ييلي غر يان ؤنمغور ن ـ ثدّارث ن ـ ربّي ئسم نّس ساكاوا سبعا ن - واراو، كول نسن دا تّݣان أمّ ؤياد.
15 نتّا ران أود نثني أد سّوفغن دجّن زݣ يان ؤرݣاز س ـ ييسم ن ـ سيدنا عيسى أها ينّاياسن دجّن: «نكّين سّنخ سيدنا عيسى، ئسينخ مايد ئمس بولوس: ئي كونّي ماي ثمسم؟»
16 داي يحوف غيفسن ؤرݣاز نّاݣ ئلّا دجّن أها ييرّوثن كول نسن، ئهرّسثن؛ أها يفلي غيفسن ئعبانّ، ئستّورسثن. داي رولن زݣ ثادّارث نّا.
17 ئمزداغ ن ـ أفاسوس س ـ ماس لّان، لا يوداين ؤلا ئيونانين، سلّان ئي وياد نّا يجران أها ݣّدن شايݣان، أغولن أر سّمغورن س ـ ييسم ن - سيدنا عيسى.
18 دّوند شايݣان ن ـ وينّا يومنّين أر تقرّان س ـ ؤينّا يخّان نّا كّان أر تݣّان كول.
19 داي كّرن شايݣان زّيكسن، زݣ وينّا أر تݣّانين ثيحرݣا سمونند لشثوب نسن سغوسنثن منيد ن - ميدّن كول، أها حاسبن أثيݣ نسن أفينن خمسين ألف ن - ؤقّاريض ن - نّقّرث.
20 س ـ وامشيد أس أر ئتمغور وادّور ن ـ واوال ن - ربّي ؤݣار س ـ جّهد ن ـ مولانا، أر ئيسّ تّامنن شايݣان ن ـ ميدّن.
ثيريتّ نّا يكّرن ݣ ـ أفسوس
21 فّير ن ـ ؤياد نّا يجران، ئعوّل بولوس أد ئيكّ خف ثمازيرث ن - ماكيدونيّا د - ثمازيرث ن - أخائيّا أدّاي يدّو غر لقدس، أها ينّا: «أدّاي دكّخ لقدس، ئقّنينّ أد دّوخ أدّ كّخ أود روما».
22 داي يازن سينّ زݣ وينّا داس تعاوانّين، تيموثاوس د - أريسطوس حما أث زويرن غر ماكيدونيّا، ئيد نتّا يزايد ئقّيما ݣ - أسيّا.
23 ݣ ـ لوقث نّا، ثكّر يوث ن ـ ثيريتّ ثخاثارث ݣ ـ أفسوس خف نّيرث ن ـ ؤبريد ن - لماسيح.
24 ئدّخ ئلّا يان ؤسكّاك داس تّينين ديميتريوس، أر ئعدّيل ثادّروين ثيمژّيانين زݣ نّقّرث غاس أمّ ثدّارث نّاݣ دا يتّوعباد لاصنام نّامي دا تّينين "ثاربّيت أرطاميس"، أراسدّ ئتّرارا وينّا شايݣان ن - لفلوس نتّا د ـ ؤينّا أر خدّمنين كول ݣ ـ ؤياد.
25 داي يكّر ديميتريوس ئسموند ئخدّامن نس د ـ ئسكّاكن كول أها ينّاياسن: «هاثين ثسّنم أيايثما ئيد لخدمث أد أيداخ دّيروران أطرّح أد نّاݣ نلّا.
26 هان كونّي ثانّايم أها ثسّغدم ئي ميمش أيد ئسّخضا ونّامي دا تّينين بولوس شايݣان ن ـ ميدّن، ؤر ئيد غاس داد ݣ - أفاسوس ماشان أود ݣ ـ أسيّا س - ؤماثا، أراسن ئتّيني هان لاصنام نّا دا يعدّيل بنادم س ـ ئفاسّن ؤر ݣين ئيد ربّي ئرسلين.
27 د ـ ؤياد ؤر ئيد غاس أدّ ئرار ئرژان ئي لخدمث نّخ أها حقّرنت ميدّن، ماشان دّان ميدّن أد ؤر توقّارن ثدّارث نّاݣ دا تّوعباد ثاربّيت أرطاميس؛ داي ئمژيݣ وادّور نس، نتّاث نّا دا تّعبادن ميدّن كول ݣ - أسيّا د - ݣ ـ دّونيث س ـ ماس ثلّا!»
28 نتّا سلّين ئي وياد أها يطيّراسن شايݣان، كّرن أر سغويّون أر تّينين: «ثمقّور أرطاميس ثاربّيت ن - أيث ؤفسوس!»
29 داي مّوترند ميدّن، ثكّر ثيريتّ ݣ ـ ثمدينث كول. أها أمژن غايوس د - أريسترخوس نّاد مونّين د ـ بولوس زݣ ماكيدونيّا، ژّوغرنثن غر أنسا نّاݣ دا تّمونن ميدّن.
30 ييري بولوس أد ئدّو أد ئمساوال ميدّن، ماشان ؤرث ؤدجّين ئمومنّ.
31 أزنند غورس أود ييتس ن ـ ئمدّوكال نس ݣانين زݣ ئخاثارّ ن - أسيا تّرن زّيكس أد ؤر ئتدّو غر أينّا ݣ ـ مّوترن ميدّن.
32 داي يكّر ؤضروي أر سغويّون ميدّن، كوّشا د ـ مايد أر ئتّيني، د - ؤماثا ديكسن ؤر ئسّين ماخف دّمّوترن.
33 كّرن ييتس ن ـ ووداين نزغند يان ؤرݣاز داس تّينين ئسكاندار زݣ وامّاس ن ـ ميدّن، دحينث غر داث حما أداسن ئسيول. داي يهزّا أفوس نس أد فسثين حما أداسن ئسّفرو أينّا يجران.
34 ماشان لّيݣ سّنن ئيس ئݣا يوداي، قّيمن ديخ ألثو أر سغويّون أمّ سناث ن - ثاسّاعين أر تّينين س ـ يان ؤقمو: «ثمقّور أرطاميس ثاربّيت ن ـ أيث ؤفسوس».
35 ݣ ـ ثينݣيرا، ئسنّيرسثن ؤكتاتبي ن ـ ؤنبّاض ن ـ ثمدينث لّيݣ أسن ئنّا: «أيايث ؤفسوس، هاثين ؤر ئلّي ونّا ؤر ئسّينن ئيد ثامدينث ن - ؤفسوس أيد ئݣان ثاعسّاسث ن ـ ثدّارث نّاݣ دا تّوعباد ثاربّيت أرطاميس ثاخاثارث د ـ لاصنام نس نّاخد ياتّوين زݣ ييݣنّا.
36 ؤر ئلّي ونّا يتّينين ؤر ئلّي وياد، ئوا نّيرساث هانّ أتّجّروم شا نّا خف ئي كون تّمݣراژ.
37 ئدّخ هان كونّي ثيويمد ئرݣزن أد سّين د ـ نثني ؤر ؤشيرن شا زݣ ثدّارث ن ـ ثاربّيت نّخ أرطاميس ؤلا تّرݣمن.
38 داي مش ثلّا غر ديمتاريوس د - ئحرايفين نّا لّانين أݣّيدس شان دّعوث ئنݣراسن د ـ شا، لّانث غورغ لمحكاماث د - ئنبّاضن، أد دّون أد مّسدعاون غورسن.
39 نغد مش غورون ثلّا شان دّعوث ياضن، ئخصّا أد غيفس ئتّوحشم ݣ ـ لمحكا س ـ لقانون.
40 ئوا غوراون أن تّوعاقب خف ثريتّ أد نّا يكّرن أسّا ئدّخ ؤر نتّافا ماي ننّا خف ؤضروي ياد نّا نسكّر».
41 غاس ئنّا أياد، يازن ميدّن أد دّون ئبردان نسن.