18
بولوس ݣ - ثمدينث ن - كورينثوس
1 ضارث ن - ؤينّا، يفّغ بولوس زݣ أثينا يدّو غر ثمدينث ن - كورينثوس.
2 ئمناقّار ديسّ د ـ يان ووداي ئلولان ݣ ـ ثمازيرث ن ـ بونطوس ئسم نس أكيلا، ئلّا بحّرا أيدّ ئدّا نتّا د - ثمطّوط نس بريسكيلاّ زݣ ثمازيرث ن - طّاليان ئدّخ ئنبض ؤݣلّيد ن ـ رّومان كلوديوس أد فّغن ووداين س ـ ماس لّان زݣ ثمدينث ن - روما. ئكّر بولوس ئدّو غورسن أثنيد ئيكّ.
3 داي ئدّخ أود نثني دا عدّيلن ثيخامين أمّ نتّا، ئقّيم غورسن أر ئخدّم أݣيدسن.
4 د ـ كّو سّبث، أر يتدّو بولوس غر ثمزݣيدا ن ـ ووداين أر ئتّمساوال د ـ ووداين د ـ ئيونانين بار أد عنقن س ـ واوال نس أها يامنن س ـ سيدنا عيسى.
5 نتّا ييوضدّ سيلا د - تيموثاوس زݣ ثمازيرث ن - ماكيدونيّا، ئزري بولوس أينّا أر ئتّݣا كول حما أد يار س ـ ؤفوس. ئكّر أر ئتبرّاح س ـ ئنغميسن ژيلنين ئي ووداين، أراسن ئصّوحا ئيد سيدنا عيسى أيد ئݣان لماسيح.
6 ئميل برّمن ديكس قّيمين أرث رݣّمن. داي ينقّر بولوس أݣضرور زݣ ئعبان نس أها ينّاياسن: «أموتّل نّون خف ئخفاون نّون، نكّين برّاخ زّيݣون. زݣ دغي غر داث، دّيخ أد دّوخ أد برّحخ س ـ واوال ن ـ ربّي ئي لݣنوس نّا ؤر ݣينين ؤداين».
7 داي يمّوتّي بولوس زݣ ؤينّا ݣ ـ ئزدغ، ئدّو ئقّيم غر يان ؤرݣاز ؤر ئݣين ؤداي دا يتّعبادن ربّي، ئسم نس تيطوس يوستوس، ثلّا ثادّارث نس ثومژ خف ثيمزݣيدا.
8 يامن كريسبوس، ئݣان أنمغور ن - ثمزݣيدا، س - سيدنا عيسى نتّا د - أيث ؤخام نس كول. د ـ شايݣان ن - ميدّن ضنين ݣ ـ كورونثوس سّغدن غر أوال ن ـ بولوس، أها يامنن أود نثني س ـ سيدنا عيسى تّوغبّزن ݣ - وامان.
9 يان ييض، ئفّغد لماسيح غر بولوس أها ينّاياس: «أد ؤر تݣّد! ماشان زايد سيول أد ؤر تفسثا،
10 نكّين لّيخ أݣّيدش. هاثين ؤر ئتّيغي أود يون أش ياوض ئدّخ شايݣان ن - ميدّن ݣ - ثمدينث أد وينو أيد ݣان».
11 ئيكّ بولوس ݣ ـ كورينثوس أسݣّاس د - ستّا ن - وايورّ أر ئسّقرا أوال ن - ربّي ئي ميدّن.
12 ݣ ـ لوقث نّاݣ ئݣا غاليون أنبّاض خف ثمازيرث ن - أخائيا، مساسان ووداين خف بولوس، كّرن أمژن أوينث غر لمحكاما.
13 أها نّاناس ئي ونبّاض: «هان أرݣاز أد دا يورزّو أد ئسّعنق ميدّن حما أد عبدن ربّي س ـ ؤينّا ؤر دا يتمساسان د ـ شّرع نّخ».
14 ماشان غاس ئرا بولوس أد ئسيول حما أد ئرار خف ئخف نس، داي ئنّاياسن ؤنبّاض غاليون ئي ووداين: «سّغداث أيوداين، مور ئيد ئيس ئݣا ؤرݣاز أد شا نّا يخّان نغد ئجّرا شا، دّيخ أكون ساعفخ أها سّغدخ غورون.
15 ماشان لّيݣ ئݣا لحال غاس أمغانّا ينݣراثون خف ئواليون د - ييسماون د - شّرع نّون، مسّفراواث كونّي ينݣراثون. نكّين ؤر ريخ أد نبضخ ݣ ـ ئسكّين أمّ ويد».
16 أها يژّعثن زݣ لمحكاما.
17 داي كّرن ميدّن أمژن سوستانيس أنمغور ن - ثمزݣيدا ن ـ ووداين أها ؤثنث داث ن - لمحكاما، ئميل ؤر ديكسن تّييوي ؤنبّاض غاليون.
بولوس ياغول غر أنطاكيّا
18 ئزايد بولوس ئقّيم شوي ݣ - كورنثوس، داي يمصافاض د - ئمومنّ حما أد ئدّو أد ئني أغرّابو غر سوريا، ثمون أݣيدس بريسكيلّا د ـ أكيلّا. ماشان داث ن ـ مايد ئني أغرّابو زݣ لمرصا ن ـ ثمدينث ن ـ كانخاريّا، ئكّس أزّار ئدّخ ثيد يوفا لحال ئقّاول شا ئي ربّي.a
19 نتّا ييوضننّ غر ثمدينث ن - أفاسوس، ئبضو بولوس د ـ بريسكيلا د ـ أكيلا يدّو غر ثمزݣيدا ن ـ ووداين، ئقّيم أر أݣيسن ئتّمرارا أوال.
20 داي تّرن زّيكس أد ئقّيم غورسن شوي أها ؤر ئري.
21 ماشان لّيݣ أر ئتمصافاض أݣّيدسن ئنّاياسن:b «دّيخ أدّ عايدخ غورون مش ئرا ربّي». داي يني أغرّابو زݣ أفاسوس.
22 نتّا يرس ݣ - لمرصا ن ـ قايصاريّا، ئݣّافي غر لقدس ئسلّم خف ؤݣراو ن - ئمومنّ، ئضر فّير ن ـ ؤينّا غر أنطاكيّا.
23 ئيكّ ديكس شوي ن ـ لوقث، ئكّر ئدّو أر ئتكّا ثميزار ن - غالاطيّا د - فريجيّا يوكّث س ـ يوكّث، أر ئساوال ئي يݣراون ن ـ ئمومنّ حما أثن ئسعاون أد مغورن ݣ ـ ليمان نسن.
أبولّوس دا يتبرّاح س ـ واوال ن ـ ربّي ݣ - أفسوس د ـ كورينثوس
24 داي يدّود ݣ ـ لوقث نّا غر أفاسوس يان ووداي يݣان زݣ ثمدينث ن ـ ليسكانداريّا ئسم نس أبولّوس. ئسّن أد ئسيول، أها يحسو لشثاب ن ـ ربّي.
25 ييلي ئسّن شايݣان خف ؤبريد ن ـ لماسيح، ئحرّوياس وول. داي يكّر أر ئساوال ئي ميدّن، د ـ ؤينّا أراسن ئسّلماد كول خف سيدنا عيسى يݣا سثيتّ. ئيد أغبّز، ئسّن غاس ونّا أر ئتّݣا سيدنا يحيى.
26 ئكّر أبولّوس أر ئساوال س ـ طّايطاي ݣ - ثمزݣيدا ن ـ ووداين، داي ثسلّاياس برسكيلا د ـ أكيلا، أها ياوينث غر ثدّارث نسن سنعثناس ؤݣار خف ؤبريد ن - ربّي.
27 شوي يرا أبولّوس أد ئدّو غر ثمازيرث ن - أخائيا، داي زّعيمنث ئمومنّ، أرين يوث ن ـ ثبراتّ ئي يمومنّ نّا لّانين ݣ ـ أخائيّا، تّرن زّيكسن أداس رحبن. نتّا ييوضنّ، أها يسعاون شايݣان وينّا يومنّين س ـ رّحمث ن ـ ربّي.
28 ئقّيم أر ئتّمرارا أوال نتّا د ـ ووداين، أرثن ئسّفسثا س ـ طّايطاي س ـ ثميثار ثيقّورارين نّا أراسن ياكّا زݣ لشثاب ن ـ ربّي ئيد سيدنا عيسى أيد ئݣان لماسيح.