17
بولوس د - سيلا ݣ - ثمدينث ن - تاسالونيكي
1 ئدّو بولوس د ـ سيلا كّين خف ثمدينث ن - أمفيبوليس د - أبولونيّا أوضننّ غر ثمدينث ن - تاسالونيكي. ثيلي ديسّ يوث ن - ثمزݣيدا ن - ووداين.
2 ئدّو بولوس أمّ لقاعيدا نس غر ثمزݣيدا. ئقّيم أر ئتّمرارا أوال د ـ ميدّن زݣ لشثاب ن ـ ربّي شراض ن ـ ئيد سّبث نّا مسثفارنين،
3 أراسن ئسّفرو أراسن ئصّوحا ئيس ئكّا والابدّا أد ئتّومرّث لماسيح ئمّث أها يكّرد زݣ لموث. داي ينّاياسن: «هاثين سيدنا عيسى ياد نّاخف داون ساوالخ دغي أيد ئݣان لماسيح».
4 أمنن ييتس ن ـ ووداين س ـ ؤينّا أر ئتّيني بولوس أها أمّون ݣ ـ ؤݣراو نس نتّا د ـ سيلا، أمنن أود شايݣان ن ـ ئيونانين نّا أر تّعبادنين ربّي د - شايݣان ن ـ ثوثمين نّامي يمقّور وادّور.
5 داي ينغ لحرّ ييتس ن ـ ووداين نّا ؤر ؤمينّين، أها كّرن سمونند يان ؤربيع ن ـ ئصلݣوطن حما أد سحورّشن ميدّن أد سكّرن ثيريتّ ݣ - ثمدينت. داي أزلّين كول نسن كشمن خف يان ؤرݣاز داس تّينين ياسون أد رزون بولوس د - سيلا حما أثنيد سّوفغن ئي ميدّن.
6 نتّا ؤر ثن ؤفين، أها ژّوغرندّ ياسون د - ييتّس ن - ئمومنّ ضنين، أوينثن غر ئنبّاضن ن - ثمدينث أر سغويّون أر تّينين: «هان ئرݣزن دّاخ سّين نّا سكّرنين ثيريتّ ݣ - مايد ئݣان أنسا، ئوضندّ أود غر ثمدينث نّخ،
7 أها يرحباسن ياسون أد غورس قّيمين ݣ ـ ثدّارث نس. كول نسن ؤر دا تّضاعن ثانباطّ ن ـ ؤݣلّيد ن ـ رّومان، أر تّينين ئلّا يان ؤݣلّيد ضنين ئسم نس عيسى».
8 داي أليناسن ئدامّن ئي ميدّن د - ئنبّاضن ن - ثمدينث لّيݣ سلّين ئي وياد.
9 ياسون د - ئمومنّ ضنين نّا لّانين أݣيدس ؤشان لكافالا، أها رژمناسن.
10 داي غاس ثقّن ثالّسث، أزنن ئمومنّ بولوس د - سيلا غر ثمدينث ن - بيريّا. نتّا ييوضننّ، دّون غر ثمزݣيدا ن - ووداين.
11 ئلين ووداين ن ـ بيريّا ئوسعاسن لخاضر خف وين تاسالونيكي. أها قبلن أوال ن - ربّي س ـ وولاون نسن، قّيمين أر ؤرزّون ݣ - لشثاب ن ـ ربّي كّوياس ران أد ئسينن ئيس ئصحا ؤينّا أراسن ئسّلماد بولوس.
12 داي يامنن شايݣان زّيكسن س ـ سيدنا عيسى، أمننث أود ييتسث ن - ثيونانين نّامي يمقّور وادّور د - شايݣان ن - ئرݣزن.
13 نتّا سلّان ووداين نّا لّانين ݣ - تاسالونيكي ئيس أر ئتبرّاح بولوس س - واوال ن - ربّي أود ݣ - بيريّا، أها ثفارنث غر ديسّ، قّيمين أر سحورّوشن ميدّن أد غيفس سكّرن ثيريتّ.
14 داي كّرن ئمومنّ ݣ ـ وانسا أوين بولوس أر ئير ن ـ لبحر حما أد ئني أغرّابو أد ئدّو، ئيد سيلا د - تيموثاوس قّيمان ݣ ـ بيريّا.
15 مونن ييتس زّيكسن د ـ بولوس ألّيݣ ثينّ صّيوضن غر ثمدينث ن - أثينا، أها عايدند، ئوصّاثنيد بولوس أداس ئنين ئي سيلا د - تيموثاوس أتّثفارن دغيا.
بولوس دا يتبرّاح س ـ واوال ن ـ ربّي ݣ - أثينا
16 لّيݣ أر ئتّعايان بولوس سيلا د ـ تيموثاوس ݣ - أثينا، يانّاي لاصنام ݣ ـ مايد ئݣان أنسا ݣ ـ ثمدينث داي يطيّراس شايݣان.
17 ئكّر ئدّو غر ثمزݣيدا، ئقّيم أر ئتّمساوال د ـ ووداين د - ئيونانين نّا أر تّعبادنين ربّي، أر ئتّمساوال أود د ـ ميدّن نّا أر ئتّافا كويّاس ݣ - رّحبث ن ـ ثمدينث.
18 يوث ن ـ ثيلمرث، أر ئتّمرارا أوال د ـ ييتّس ݣانين زݣ ثربيعث ن - لفالاسيفا نّامي دا تّينين ئبيقّورين د - ئرواقين، مشد ييتس نّان غيفس: «مايدا ئتّيني بو وديدا ياد؟» ئيد ييتس ضنين نّان: «عينخ واد دا يساوال خف شان ئيد ربّي نّا ؤر نسّين». ئدّخ أر ئساوال خف سيدنا عيسى د - ثنشرا زݣ لموث.
19 داي ياوينث غر لمݣليس ن ـ ثمدينث نّامي دا تّينين أريوباغ أها نّاناس: «نرا أنيسين ماتّا وسّلمد أد ؤجديد نّا خف دا ثساوالد؟
20 ئدّخ هاثين نسلّاياش دا تّينيد ييتس ن - ئسكين ݣانين لعجب، نرا أنيسين ماي ثن ئݣان».
21 يافد لحال أيث أثينا س ـ ماس لّان د - ئبرّانين نّا زدغنين ديكس دا زّروين لوقث نسن س ـ ؤماثا ݣ ـ ؤسّغاد غر ئسكّين ݣانين ؤجديدن نغد دا غيفسن سوالن.
أوال ن - بولوس ݣ - لمݣليس ن - أريوباغ
22 داي يبدّ بولوس ݣ - وامّاس ن - لمݣليس أها ينّاياسن: «أ يايث أثينا، ئضهري ديݣون ئيس ثحضام دّين زݣ مايد ئݣان ثاسݣا.
23 ئدّخ لّيݣ أر سّاراخ ݣ - ثمدينث نّون، أر تّراعاخ ئسكّينّ نّا دا تّعبادم، ؤفيخ يان وانسا نّاݣ دا تعبادم ئتّواري غيفس: "وين ربّي نّا ؤر ئسّين أود يوكّ" ئوا هاثين ربّي ياد نّا أر تّعبادم أها ؤر تّسّينم، نتّا أخف داون ساوالخ.
24 ربّي ياد أيد ئخلقن دّونيث د - مايد ديكس ئلّان كول، نتّا أيد ئݣان باب ن - ييݣنّا د - واشال، ؤر دا يزدّغ ݣ - ثيدّار نّاس ئعديل بنادم س - ؤفوس نس.
25 ؤر ئقّيل غر ميدّن أداس ݣين أود ئميق ئدّخ نتّا س ـ ئخف نس أي دا ياكّان ئي ميدّن س ـ ماس لّان ثودرث د - وونفوس د - مايد ئݣان شا.
26 ئخلق لݣنوس ن ـ دّونيث كول زݣ يان ؤرݣاز، ئݣيثن خف وودم ن - واشال أديكس زدغن، أها يسرصّا زݣ ثيزويري مشثا أغا كّين ݣ ـ ثودرث نسن د ـ لحدود ن ـ ثميزار نسن.
27 ئݣاسن ربّي أمشيسّ حما أد غيفس رزون بار أثمّانّين أها يافينث، مغار ؤر ئبعيد نتّا خف أود يوك ديݣنخ.
28 ئدّخ نتّا أس دا نتّيدير، أر نتحرّاش أها نيلي ݣ ـ دّونيث. ئمشينّا نّان ييتس زݣ ئمديازن نّون: "نوكّني ثاروا نس أي نݣا"».
29 «ئوا لّيݣ نݣا ثاروا ن - ربّي، ؤراخ ئخصّا أنيغال ئيس ئݣا ربّي أمّ شان لاصنام ن ـ وورغ نغد وين نّقّرث نغد وين ؤژرو نّا يعديل بنادم س ـ ؤفوس نس أمشيسّ أسث ئسنعث لعقل نس.
30 هاثين ربّي ئسّورفاسن ئي ميدّن أياد نّا يزرين ئدّخ ؤر سّينن ئسكّين أد؛ ماشان دغي، دا يتّيني ئي ميدّن كول ݣ - مايد ئݣان أدغار أد عايدن غر أبريد نس.
31 ئدّخ ئݣا ربّي يان واسّ نّاݣ غا يحاسب ميدّن ن ـ دّونيث س - لحقّ خف ؤفوس ن - يان ؤرݣاز نّا يسثي. أها يوشاسن ئي ميدّن كول ثماثارث ن ـ ئيس ثيسثي لّيݣ ثيد ئسكّر زݣ لموث».
32 نتّا سلّين وينّا حاضرنين ئي بولوس ئسيول خف شان يوكّ يكّرد زݣ لموث، قّيمين ييتّس ديكسن أر غيفس تصّان، ئيد ييتّس ضنين نّاناس: «نرا أداخ ثسيولد ؤݣار خف ؤياد لمرث ضنين».
33 داي يفّغ بولوس زݣ لمݣليس نسن.
34 ماشان ييتّس زّيكسن ݣان زݣ ثمناطّ ن ـ بولوس أها أمنن س ـ سيدنا عيسى. ئلّا ديكسن ؤنّامي دا تّينين ديونيسيوس ئݣان يوكّ زݣ أيث لمݣليس ن ـ أريوباغ، د ـ يوث ن - ثمطّوط ئسم نس داماريس، د ـ وييّاض ضنين.