16
تيموثاوس ئمون د ـ بولوس د ـ سيلا
1 ياوضنّ بولوس د ـ سيلا غر داربا، ثامّان سييسّ غر ليسترا. ييلي ديسّ يان ؤمومن س ـ سيدنا عيسى ئسم نس ثيموثاوس. ممّيس ن ـ يوث ن ـ ثودايث نّا يومنّ س - سيدنا عيسى، ئيد ئبّاس ئݣا أيوناني.
2 ئلين ئمومنّ ݣ - ثمدينث ن - ليسترا د - أيقونيّا أر تّينين غاس أينّا يژيلن خف ثيموثاوس.
3 داي يرا بولوس أث ياوي أݣّيدس غر أينّا غر ئدّا، أها يكّر ئزݣناس حما أد ؤرئسخسار ؤلاون ئي ووداين نّا زدغنينن ݣ - وانسيون نّا ئدّخ كول نسن سّنن ئيس ئݣا يبّاس أيوناني.
4 ئدّو بولوس د ـ ئسمونّ نس أر تكّان ثيمدينين، أر تّينين ئي يمومنّ نّا ؤر ݣينين ؤداين ثينباضين نّاس نبضن ئمازانّ د - ئخاثارّ ن ـ ؤݣراو ن ـ ئمومنّ ݣ - لقدس، أرثن توصّان أد ئسّنث تݣّان.
5 داي أر تّمغورن ئݣراون ن ـ ئمومنّ ݣ ـ ليمان، أر توعدّون كّوياس.
ثاوارݣيتّ ن - بولوس ݣ - ثمدينث ن - تارواس
6 ؤر يودّجي رّوح ن ـ ربّي بولوس د ـ ئسمونّ نس أد دّون أد برّحن س ـ واوال ن ـ ربّي ݣ ـ ثمازيرث ن ـ أسيّا، داي دّون كّين خف ثمازيرث ن - فريجيّا د - غالاطيّا.
7 لّيݣ نّيوضنن غر ثاما ن ـ ثمازيرث ن - ميسيّا، ران أد كشمن غر ثمازيرث ن - بيثينيّا، ماشان ؤر ثن يودجّي رّوح ن - سيدنا عيسى.
8 داي ثامّان كّين خف ثمازيرث ن - ميسيّا، ضرن غر لمرصا ن ـ ثمدينث ن - تارواس.
9 ئيض نّا، ئفّغد غر بولوس يان ؤرݣاز ئݣان زݣ ثمازيرث ن - ماكيدونيّا، ئبدّد بنيداس أرث ئسحوژّور ئنّاياس: «عافاش نضودّ غورخ غر ماكيدونّيا سعاوناخ».
10 غاس ئفّغد ؤرݣاز نّا غر بولوس، نيسين a ئيس أخ ئرا ربّي أندّو أنبرّح س ـ ئنغميسن ژيلنين خف لماسيح ݣ ـ ثمازيرث ن - ماكيدونيّا، نكّر ثسّاعت نّا أر نتحبّال أد غورس ندّو.
بولوس د - ئسمونّ نس ݣ - ثمدينث ن - فيليبّي
11 داي نني أغرّابو زݣ تارواس نعيّن ثاݣزيرث ن - ساموتراكي. س ـ أسكّا نس، نني ديخ أغرّابو غر لمرصا ن - ثمدينث ن ـ نيابوليس.
12 ندّو سّييسّ غر ثمدينث ن - فيليبّي، ئݣان ثامدينث ثاخاثارث كول ݣ - ثمازيرث ن - ماكيدونيّا، ثيلي ستّعمرنت رّومان. أها نقّيم ديكس شان ووسّان.
13 س - واسّ ن - سّبث، نفّغ غر برّا ن ـ ثمدينث، ندّو غر ئير ن ـ يان واسيف بار أناف شان وانسا نّاݣ دا تّمونن ووداين أد ژّالّين. داي نوث أغجديم أر نساوال ئي ييتسث ن ـ ثوثمين لّانث موننث ديسّ.
14 ثيلي ديكسنث يوث ن - ثمطّوط زݣ ثمدينث ن - ثيياتيرا ئسم نّس ليديا. أر ثزّنزا لكتّان أزݣّاغ ئغلان، ثيݣ ثامطّوط أر يتّعبادن ربّي. لّيݣ ثقّيما أر ثسّغاد، ئرژم مولانا ؤول نس أها ثامن س - ؤينّا أر ئتّيني بولوس.
15 داي ثتّوغبّز ݣ - وامان نتّاث د - وينّا لّانين كول ݣ ـ ثدّارث نس، ثشبّر ديݣنخ ثنّاياخ: «مش ئي ثحاسبم ئيس ݣيخ سثيتّ ثامومنث س - مولانا، أوريو غر ثادّارث ئنو، ثقّيميم غوري». أها ثݣاخ دّرع ألّيݣ أس ننّا واخّا.
بولوس د - سيلا ݣ - لحبس ن - فيليبّي
16 يان - واسّ، ندّا غر أنسا ن ـ ثژالّيت، نمناقّار ݣ ؤبريد د ـ يوث ن - ثعرّيمث ئݣان ثيسمغث. ئلّا ديكس يان دجّن ئݣيتّ د ـ ثامكاشفث، أرد تّرارا شايݣان ن - لفلوس ئي ييد بابين نس س ـ ؤكاشف نّا أر تّكاشاف.
17 داي أر تثفار بولوس د ـ نوكني نلّا أݣيدس أر ثسغويّو أر تّيني: «ئرݣزن أد ئسمغان ن - ربّي أنافلّا أيد ݣان، دّاندّ أداون سنعثن أبريد حما أتّفوكّام زݣ جاهنّام».
18 ثقّيم أراخ تثفار ئمشيد شايݣان ن - ووسّان ألّيݣ أس ئطيّر ئي بولوس، داي يبرّم غورس أها ينّاياس ئي دجّن نّا ديكس ئلّان: «س - ييسم ن - سيدنا عيسى لماسيح، داش تّينيخ فّغ زّيكس!» داي يفّغ زّيكس دجّن ݣ - وانسا.
19 نتّا سّنن ئيد بابين نس ئيس ؤر ثقّيمي أد تّكاشاف حما أداسند تّرارا لفلوس، كّرن أمژن بولوس د - سيلا ژّوغرنثن غر لمخزن ݣ ـ رّحبث ن ـ ثمدينث.
20 لّيݣ ثنين صّيوضن غر داث ن ـ ئنبّاضن ن ـ رّومان نّاناسن: «هان ئرݣزن أد سّين دا سكّارن ثيريتّ ݣ - ثمدينث نّخ، هاثين ؤداين أيد ݣان.
21 أر سّلمادن ئي ميدّن شان لقاعيداث نّا ؤراخ ئزرين نوكني ييرومانين أثنث نقبل ؤلا نݣاثنث».
22 داي حوفن ميدّن نّا مّوتّرنين ديسّ خف بولوس د ـ سيلا ران أثن ؤثن، أها نّاناسن ئنبّاضن ن ـ رّومان ئي يعسكرين أد غيفسن فلين ئعبان ثفعناسن أمعراض.
23 نتّا هرّسنثن شايݣان أها ݣرينثن ݣ - لحبس، وصّان أعسّاس ن - لحبس أد غيفسن ئژيّر لعسّا.
24 ئيݣ ؤعسّاس أينّاس ئتيينّان، ئݣر بولوس د ـ سيلا غر أبوض ن - لحبس، ئقّناسن ئضارّ ئنݣر ن ـ سناث ن ـ لقرطاث ن ـ ؤكشّيض ژّاينين، حما أد ؤر روّلن.
25 أتّاين ن ـ وامّاس ن ـ ييض، ئلّا بولوس د - سيلا أر تژالّان، أر تّينين ثيمديازين نّا دا يتمجّادن ربّي؛ ئلين ئحبّاسن أر غورسن سّغادن.
26 شوي ئوّث يان زّنزال أخاثار ألّيݣ ئرݣيݣي لّساس ن - لحبس، داي رژمنث ثفلوين ن ـ لحبس كول ݣ ـ وانسا أها سرينث ثيفرين ن - ئحبّاسن س ـ ماس لّان.
27 ئفافاد ؤعسّاس، يانّاي لبيبان ن - لحبس رژمن، ييغال ئيس رولن ئحبّاسن داي يصرود ثافروتّ نس ئرا أد ئنغ ئخف نس.
28 ماشان ئغرياس بولوس س - ؤغويّي ينّاياس: «رصّا، هان أتّجّرود شا ݣ ـ ئخف نش، هاثين كول نّخ نلّا داد».
29 داي يتّر ؤعسّاس ماس ئسّادّا أها يازّل غر جاج ن - لحبس ئݣّد أر ئتّرݣيݣي، ئبندق داث ن ـ بولوس د - سيلا.
30 أها يسّوفغثنيد ئسقساثن: «أ ييد سيدي مايد ئي يخصّان أث ݣخ حما أد فوكّاخ زݣ جاهنّام».
31 داي نّاناس: «أمن س - سيدنا عيسى لماسيح داي ثدّيد أتّفوكّاد شݣّ د - أيث ؤخام نش كول».
32 أها سيولناس نتّا د - أيث ثدّارث نس كول خف واوال ن - مولانا.
33 داي ياويثن ؤعسّاس ثسّاعت نّا ݣّيض ئسّيرداسن ئثرساون نسن، أها غبّزنث ݣ - وامان نتّا د - أيث ؤخام نس كول ئدّخ ؤمنن.
34 فّير ن ـ ؤينّا، ياويثن غر ثادّارث نس ئشاسن أد تشّين. أها يفرح نتّا د - أيث ؤخام نس كول ئدّخ ؤمنن س - ربّي.
35 نتّا يفّو لحال، أزنند ئنبّاضن ن ـ رّومان ييتس ن ـ ئمخزنين غر لحبس أداس ئنين ئي وعسّاس أد ئرژم ئي بولوس د ـ سيلا.
36 داي ينّاياس ؤعسّاس ئي بولوس: «هاثين ؤزنند ئنبّاضن نّاني أداون رژمخ، دغي فّغاث ثدّوم ئبردان نّون ݣ - لمان».
37 ماشان ئنّاياسن بولوس ئي يمخزنين: «هرّسناخ بنيد ن ـ ميدّن بلا أد غيفنخ حشمن د - نوكّني نݣا يرومانين، أها ݣريناخ ݣ - لحبس. ئرين دغي أداخ سّوفغن س ـ ثوفرا. ئهي ؤر دا نتّفّغ شا، ئخصّاياسن بعدا أد غورخ ددّون نثني س - ئخفاون نسن أها سّوفغناخ».
38 دّون ئمخزنين صّيوضننّ أوال أد ئي ينبّاضن، داي ݣّدن لّيݣ سّنن ئيس ئݣا بولوس د ـ سيلا ئرومانين.
39 داي دّوندّ غورسن، سحوژّرنثن أداسن سامحن أها سّوفغنثنيد، تّرن زّيكسن أد دّون ئبردان نسن زݣ ثمدينث نسن.
40 نتّا يفّغ بولوس د ـ سيلا زݣ لحبس، دّون غر ثادّارث ن ـ ليديا. مّݣراون د ـ ئمومنّ أها زّعيمنثن أد قّيمين ݣ ـ ليمان نسن. فّير ن ـ ؤينّا دّون ئبردان نسن.