15
ئمازانّ د ـ ئخاثارّ ن ـ ئمومنّ مّݣراون ݣ - لقدس
1 دّوند ييتّس ن - ووداين نّا يومنّين س - لماسيح زݣ ثمازيرث ن - أيث ياهودا غر أنطاكيّا، قّيمين أر سّلمادن ئمومنّ،a أراسن تّينين: «هاثين مش ؤر ثزݣينم ئمشينّا دا يتّيني شّرع ن - سيدنا موسى ؤر ئدّي ربّي أكون ئفوكّا».
2 داي وراس ئعجيب ؤياد نّا نّان ئي بولوس د - برنابا أها نّاغن أݣيدسن. ݣ ـ ثينݣيرا، مساسان ئمومنّ ن ـ أنطاكيّا أد أزنن بولوس د - برنابا د - ييتّس ن - ئمومنّ ضنين غر لقدس حما أد مداشارن د - ئمازانّ د - ئخاثارن ن ـ ؤݣراو ن ـ ئمومنّ خف ثغاوسا ياد.
3 داي يمصافاض أݣيدسن ؤݣراو ن ـ ئمومنّ، دّون كّين خف ثمازيرث ن - فينيقيّا د - ثمازيرث ن - سّاميرا، أر تّقّيسن ئي يمومنّ خف ميمش أيد ؤمنن أود وينّا ؤر ݣينين ؤداين س ـ سيدنا عيسى، داي فرحن شايݣان س ـ ئنغميسن أد نّاسن نّان.
4 نتّا ييوضننّ غر لقدس، ئرحباسن ؤݣراو ن - ئمومنّ كول، ئلين ديكسن ئمازانّ د - ئخاثارّ ن ـ ؤݣراو. أها يقّيساسن بولوس د ـ برنابا أينّا ݣان كول س ـ لعوان ن ـ ربّي.
5 ماشان كّرن ييتّس ن ـ ئمومنّ س ـ سيدنا عيسى ݣانين زݣ ثربيعث ن ـ ئفرّيسين أها نّان: «هاثين ئخصّاياصن أود ئي يمومنّ نّا ؤر ݣينين ؤداين أد زݣنن، ثينيماسن أد تݣّين أينّا دا يتّيني شّرع ن - سيدنا موسى».
6 داي مّݣراون ئمازانّ د - ئخاثارّ ن ـ ؤݣراو حما أد مداشارن خف ثغاوسا ياد.
7 فّير ن ـ مايد مساوالن شايݣان خف ؤياد، ئكّر بطرس ئبدّ أها ينّاياسن: «أيايثما، هاثين ثسّنم كول نّون ئيس ئي يسثي ربّي زّيݣون مشثا أياد أد ئنيخ ئنغميسن ژيلنين خف لماسيح ئي وينّا ؤرݣينين ؤداين حما أد ئيسّ أمنن.
8 د - ربّي نّا يسّنن مايد ئلّان ݣ - وولاون ن - ميدّن كول ئسنعث ئيس غيفسن ئرضا لّيݣ أسن ئوشا رّوح نس ئمشينّا أخث ئوشا أود نوكّني.
9 ربّي ؤر ئݣي ثودماوين ئنݣراخ أݣيدسن، أها يزّديݣ ؤلاون نسن ئدّخ ئيسّ ؤمنن.
10 ئوا مّاخ ألّيݣ ثرام دغي أداسث ثسطيّرم ئي ربّي، أر ثسّاسايم ئي ئمومنّ نّا ؤر ݣينين ؤداين أݣّوا نّامي ؤر غين ئمزوورا نّخ ؤلا نوكّني أث ناسي.
11 ئهي، نوكني دا نتّامن ئيد رّحمث ثخاثارث ن ـ سيدنا عيسى أس نفوكّا ئمشينّا فوكّان أود نثني».
12 داي أغولن كول نسن سوسمن، قّيمين أر سّغادن غر برنابا د - بولوس لّيݣ أراسن تقّيسن ميمش أيداسن ئوشا ربّي جّهد أد ݣين لمعجزاث د - لعجايب ئنݣر ن - لݣنوس نّا ؤر ݣينين ؤداين.
13 نتّا فسثان، ئسيول يعقوب ئنّاياسن: «أيايثما، سّغداث ئي ماي ريخ أداون ئنيخ،
14 ئقّيساخ سيمعان بطرس خف ثيلمرث ثامزواروتّ نّاݣ ئسثي ربّي زݣ لݣنوس نّا ؤر ݣينين ؤداين ييتس ن ـ ميدّن حما أثن ئيݣ د ـ وينس.
15 د - ؤياد دا يتّمساسا نّيث د - واوال لانبيا، ئدّخ ئتّياري ݣ - لشثاب ن ـ ربّي:
16 "دّيخ أدّ أغولخ ضارث ن - ؤياد، أها بنوخ ثخامث ن ـ داود نّا يتّوتّين. دّيخ أد سمونخ أينّا زّيكس ئقّيمان أها سبدّختّيد ديخ ألثو.
17 حما أد غيفي رزون ميدّن ضنين س ـ ماس لّان، لݣنوس كول نّا سثيخ أد ݣين وينو. أياد أيد ئنّا مولانا نّا يݣان ئسكّين أد كول
18 ئتّييسّنن زݣ واهوّا"».
19 ئزايد يعقوب أراسن ئتّيني: «خف ؤياد، أينّايي ئضهرن نكّين: يوف أد ؤر نسّوعير ئسكّين خف وينّا ؤر ݣينين ؤداين نّا يومنّين س ـ ربّي.
20 ماشان ئخصّاياخ أداسن نّازن ثابراتّ نوصّاثن أد ؤر تتّين أكسوم ن ـ ثمغراص نّا تّوغرصنين ئي لاصنام، كّين س ـ تّيساع ئي لفساد، د ـ ؤكسوم ن ـ لمال نّا يمّورضصن، د ـ ئدامّن.
21 ئدّخ شّرع ن ـ سيدنا موسى لّان ئسلمادن نّا داث سّلمادنين زݣ واهوّا ݣ ـ مايد ئݣان ثامدينث، أرث تّقران ݣ - ثمزݣيديوين ن ـ ووداين كّو سّبث».
ثابراتّ نّا يوزن ؤݣراو ن ـ ئمومنّ ئي يمومنّ نّا ؤر ݣينين ؤداين
22 داي مساسان ئمازانّ د - ئخاثارّ ن ـ ؤݣراو د ـ ئمومنّ كول أد سثين ييتس ن ـ ئرݣزن زّيكسن حما أثن أزنن د - بولوس د - برنابا غر أنطاكيّا. داي سثين ياهودا نّامي دا تّينين بارسابا، د - سيلا، ݣانين زݣ ئخاثارّ ن ـ ئمومنّ.
23 أها وشيناسن ثبراتّ أد أتّاوين أݣيدسن. دا ديكس تّيينين: «نوكني أيثماثون ئمازانّ د - ئخاثارّ ن ـ ؤݣراو ن ـ ئمومنّ، نارياونّ ثابراتّ أد أيايثماثنخ ؤر ݣينين ؤداين نّا لّانين ݣ - أنطاكيّا د ـ سوريّا د - كيليكيّا، أزول غيفون،
24 هاثين نسلّا ئيس ندّان غورون ييتّس ن - ميدّن زّيݣنخ، أها سطيّرناونث، سّيسيناون أنزووم س - ؤينّاون نّان، ماشان هاثين ؤر ثنينّ نوزين شا.
25 أينّا خف مي نمساسا كول نّخ أنسثي ييتس ن - ئرݣزن، نازنثنينّ غورون د ـ أيثماثنخ عزّنين برنابا د - بولوس،
26 نّا وشانين ثودرث نسن خف سيدنا عيسى لماسيح.
27 داي نازناونّ ياهودا د - سيلا حما أداون ئنين س - ئقما نسن أينّاون ناري ݣ - ثبراتّ أد.
28 ئدّخ هاثين ئسنعثاخ رّوح ن ـ ربّي ئيس ؤراخ ئخصّا أكون نژّيژي س ـ ؤݣار ن ـ ئسكّين أد نّامي أون ئخصّا أداسن ثكّيم س ـ تّيساع:
29 أتّحيّدم ئي وكسوم ن ـ ثمغراص نّا تّوغرصنين ئي لاصنام، د ـ ئدامّن، د ـ ؤكسوم ن ـ لمال نّا يمّورضصن، أها ثكّيم س ـ تّيساع ئي لفساد. هاثين ئژيلاون مش ثحيدم ئي يسكّين أد. ئوا ربّي أكون ئعاون».
30 داي يمسافاض أݣيدسن ؤݣراو ن ـ ئمومنّ عيّنن أنطاكيّا. نتّا ييوضننّ، سمونندّ أݣراو ن - ئمومنّ أها وشيناسن ثبرات نّاسند ئوين.
31 نتّا قرانتّ، أها فرحن شايݣان س ـ واوال نّا دا يزّعيمن نّا ديكس ئتّيارين.
32 أود ياهودا د - سيلا س ـ ئخفاون نسن أر ساوالن س ـ ؤينّاسن ئسنعث ربّي، داي سيولناسن ئي يمومنّ شايݣان حما أثن زّعيمن أد مغورن ݣ ـ ليمان.
33 ضارث ن ـ مايد زّرين شان لوقث ݣ - أنطاكيّا، مصافاضن أݣيدسن ئمومنّ حما أد أغولن ݣ ـ لمان غر وينّا ثنيد ؤزنّين.
34 b 35 ئيد بولوس د - برنابا قّيمان ݣ - أنطاكيّا أر سّلمادن أوال ن ـ ربّي أر ئيسّ تبرّاحن نثني د ـ وييّاض عدّانين.
بطّو ن - بولوس د - برنابا
36 لّيݣ ثزري شان لوقث، ئنّاياس بولوس ئي برنابا: «كّراخ أناغول أدّ نكّ ئمومنّ نّا لّانين ݣ ـ ثمدينين نّاݣ نبرّح كول س ـ واوال ن ـ ربّي أنراعا مايداسن ئݣا لحال».
37 داي يرا برنابا أد أوين أݣيدسن يوحنّا نّامي دا تّينين مارقوس،
38 ماشان ؤر ئري بولوس، ئدّخ ئكّا يوحنّا مارقوس ئزريثن ݣ - ثمازيرث ن - بامفيليّا ؤر ئشمّيل لخدمث أݣّيدسن.
39 داي ؤر مساسان، نّاغن أها بضون. ئكّر برنابا ياوي أݣيدس مارقوس، نين أغرّابو غر ثݣزيرث ن - قوبروص.
40 ئيد بولوس ئسثي سيلا أد ئمون أݣّيدس، أها مصافاضن أݣيدسن ئمومنّ ݣينثن ݣ - ؤفوس ئي ربّي.
41 دّون كّين خف ثمازيرث ن - سوريّا د ـ ثمازيرث ن ـ كيليكيّا أر زّعيمن ئݣراون ن - ئمومنّ أد مغورن ݣ ـ ليمان.