14
بولوس د - برنابا ݣ - أيقونيا
1 نتّا ييوضنّ بولوس د - برنابا غر أيقونيّا، دّون أم لقاعيدا نسن غر ثمزݣيدا ن - ووداين، قّيمين أر ساوالن ئي ميدّن خف واوال ن ـ ربّي ألّيݣ ؤمنن شايݣان ن - ووداين د ـ ئيونانين.
2 ماشان كّرن ووداين نّا ؤر ؤمينّين أها سحورّشن وينّا ؤر ݣينين ؤداين، قّيسناسن أينّا ؤر ئحلين خف بولوس د ـ برنابا.
3 واخّا يامشيس ئقّيما بولوس د - برنابا ديسّ شايݣان ن ـ لوقث، أر تبرّاحن س ـ طّايطاي خف سيدنا عيسى نّا أرثن ئسعاوان س ـ جّهد نّا أراسن ياكّا أد تݣّين لموعجزاث د - لعجايب حما أد ئسنعث ئيس ئصحا وينّا أر تّينين خف رّحمث نس ثاخاثارث.
4 داي بضون أيث أيقونيّا: ييتس ݣان زݣ ثمناطّ ن ـ ووداين، د - ييتس ضنين ݣان زݣ ثمناطّ ن ـ ئمازان سّين.
5 فّير ن ـ ؤينّا، مساسان ييتس نّا ؤر ݣينين ؤداين، د ـ ييتس ن ـ ووداين د ـ ئخاثارّ نسن أد كرفصن بولوس د ـ برنابا، رجمنثن حما أثن نغين.
6 ماشان ييوضتّنين ؤنغميس ن ـ ؤينّا ران أداسنث ݣين، أها كّرن رولن غر ثمدينث ن - ليسترا د - داربا نّا لّانين ݣ ـ ثمازيرث ن - ليكاؤنيا د ـ غر ئحيدان نسنث.
7 قّيمن ديسّ أرتبرّاحن س ـ ئنغميسن ژيلنين خف سيدنا عيسى.
بولوس د ـ برنابا ݣ - ليسترا د - داربا
8 ييلي ݣ - ليسترا يان ؤرݣاز نّامي فوشلن ئضارّ، زݣّوس ئلولا ؤر دجّين ئدّي.
9 ئقّيما أر ئسّغاد غر بولوس لّيݣ أر ئساوال، يحقّا ديكس بولوس أها يانّاي ئيس غورس ئلّا ليمان أد ئجّي.
10 داي يغراس س ـ ؤغويّي ينّاياس: «كّر بدّ خف ئضارّ نش!» أها ينقّز ؤفوشال، ئبدّ خف ئضارّ نسن أر ئتدّو.
11 نتّا يانّاين ميدّن مايد ئݣا بولوس، سغويّن س - واوال نسن ن - ثمازيرث ن - ليكاؤنيّا أر تّينين: «هان ئيد ربّي ضرندّ غورنخ ݣ ـ سّيفث ن ـ بنادم!»
12 داي ݣيناس ئي برنابا "زافس"، ݣيناس ئي بولوس "هيرمس" ئدّخ نتّا س ـ ؤماثا أيد أر ئساوالن.a
13 ثيلي ثدّارث نّاݣ أر ئتّوعباد لاصنام زفس برّا ن - ثمدينث. داي يدّود ؤنمغور ن ـ ثدّارث ن ـ زافس ئموند د ـ ميدّن، ژّوغرند ئزّݣارّ نّامي ؤݣلن ئزرورّ ن ـ ئݣدّجّوين غر ثݣّورث ن ـ ثمدينث حما أثن ݣين د ـ ثيمغراص ئي بولوس د ـ برنابا ران أثن عبدن.
14 نتّا يسلّا بولوس د - برنابا ئي وياد أها فلين ئعبانّ نسن (خف لكوفر نّا أنّاين)، أزّلين غيرسن أر سغويّون أر تّينين:
15 «أميدّن أد، مّاخ ألّيݣ دا تݣّيم أياد؟ هاثين غاس بنادم أم كونّي أي نݣا. ندّاد أداون نيني ينغميسن ژيلنين خف سيدنا عيسى لماسيح حما أتّحيّدم ئي ثيحيطّ أد، ثاغولم غر ربّي يدّرن، نّا يخلقن ئݣنّا د - واشال د - لبحر د - ماي ديكسن ئلاّن كول.
16 مشثا أياد، يودجّا ربّي لݣنوس أر تݣّين أينّا ران،
17 ماشان ؤر دجّين ثن يودجّ بلا شان ثماثارث نّاس أراسن ئسنعاث ئيس ئلّا. هاثين ئسول ألثو داون ئتّݣّا لخير: داوند ئتّازن أنژار زݣ ييݣنّا، أراون ياكّا لغلّث ݣ - لوقث نس، أر كون ئسݣاوان، أر ئسّفراح ؤلاون نّون».
18 داي مغار ئنّا بولوس د ـ برنابا أياد، غاس س ـ دّرع أس سّعنقن لغاشي أد ؤراسن غرّصن ئي ثمغراص.
19 فّير ن ـ ؤينّا، دّوندّ ييتس ن - ووداين زݣ أنطاكيّا د - أيقونيّا أها سحورّشن ميدّن خف بولوس، داي كّرن أرث كّاثن س ـ ئسلّيون ألّيݣ غالن ئيس ئمّوث أها ژّوغرنث غر برّا ن - ثمدينث.
20 ماشان لّيݣ غيفس مونن ئمحضارّ، ئكّر ئبدّ أها يعايد ئكشم غر ثمدينث. س - أسكّا نس، ئدّو نتّا د - برنابا غر ثمدينث ن ـ داربا.
بولوس د - برنابا أغولن غر أنطاكيّا ن - سوريا
21 ئبرّح بولوس د ـ برنابا س ـ ئنغميسن ژيلنين ئي أيث داربا، أها يامنن شايݣان زّيكسن س ـ سيدنا عيسى. داي ياغولن غر ليسترا د ـ أيقونيّا، دّون زݣ سييسّ غر أنطاكيّا،
22 أر تكّان خف ئݣراون ن ـ ئمومنّ أر ثن توصّان أد قّيمين ݣ - ليمان نسن، أراسن تّينين: «ئقّنن أد غيفنخ ثكّ شايݣان ن - ثمارا حما أنكشم غر ثݣلديتّ ن - ربّي».
23 داي كّو أݣراو ن ـ ئمومنّ، ئسثي زّيكس بولوس د ـ برنابا شان ئرݣزن ݣينثن د ـ ئخاثارّ ن ـ ؤݣراو. أها ژّالّين، أژومن، زرينثن ݣ - ؤفوس ن - مولانا نّاس ؤمنن.
24 داي دّون كّين خف ثمازيرث ن - بيسيديّا، أوضننّ غر ثمازيرث ن - بامفيليّا.
25 برّحن س ـ واوال ن ـ ربّي ݣ - ثمدينث ن ـ برجا، دّون فّير ن ـ ؤينّا ضرن غر لمرصا ن - أتاليّا.
26 نين أغرّابو زݣ سّييس، عايدن غر أنطاكيّا ن ـ سوريا نّا زݣ ئثن ؤزنن ئمومنّ ثيزويري، تّرن ئي ربّي غيفسن أثن ئحضو أد ݣين لخدمث ن ـ ربّي نّا شمّلن دغي.
27 نتّا ييوضننّ، سمونندّ أݣراو ن - ئمومنّ، أها قّيسناسن أينّا ݣان كول س ـ لعوان ن ـ ربّي، د - ماكّاس أيد ئرژم ربّي أبريد ن - ليمان ئي لݣنوس نّا ؤر ݣينين ؤداين.
28 أها قّيمين غر ئمومنّ ديسّ شايݣان ن - لوقث.