13
رّوح ن - ربّي ئسثي برنابا د - شاوول
1 ئلين ݣ - ؤݣراو ن - ئمومنّ س ـ سيدنا عيسى نّا يلّان ݣ - أنطاكيّا ييتّس ن ـ ئرݣزن نّا دا ساوالنين س ـ ؤينّاسن ئسنعث ربّي د - ييتس ن ـ ئسّلمادن، نثني: برنابا، د - سيمعان نّامي دا تّينين أقبلي، د - لوقيوس ئݣان زݣ ثمدينث ن - لقيراوان، د - مناين نّا يݣمان د - ؤنبّاض هيرودوس، د ـ شاوول.
2 يان واسّ، لّان أژومن أر تّعبادن مولانا، أها ينّاياسن رّوح ن - ربّي: «أدّجاثي برنابا د - شاوول أد ݣين لخدمث نّاخف ئثن سثيخ».
3 ضارث ن ـ مايد أژومن ژّالّين، أها سيرسن ئفاسّن نسن خف برنابا د ـ شاوول، ؤزننثن أد دّون.
برنابا د - شاوول ݣ - ثݣزيرث ن - قوبروص
4 س ـ وامشيد يوزنثن رّوح ن - ربّي، دّون ضرن غر لمرصا ن - سالوكيّا، نين أغرّابو سّييسّ غر ثݣزيرث ن - قوبروص.
5 نتّا رسن ݣ ـ ثمدينث ن - سالاميس، دّون أر تبرّاحن س ـ واوال ن ـ ربّي ݣ ـ ثمزݣيديوين ن - ووداين. ييلي أݣّيدسن يوحنّا نّامي دا تّينين مارقوس أراسن ئتّعاوان.
6 ئيكّ برنابا د ـ شاوول ثاݣزيرث ن ـ قوبروص كول ألّيݣ نّيوضن غر ثمدينث ن - بافوس ئلّان ݣ ـ ئديس ضنين ن ـ ثݣزيرث. مناقّارن ديسّ د ـ يان ووداي بو يحرݣا ئسم نس بارياشوع، أر ئسحيلّيل خف ميدّن أراسن ئتّيني يݣا نّبي،
7 ئݣا زݣ وينّا والانين غر أنبّاض ن ـ ثݣزيرث سيرجيوس باولوس ئݣان أرݣاز ئشوان. داي يكّر سيرجيوس يازن غر برنابا د - شاوول أد غورس ددّون ئرا أداس سيولن خف واوال ن - ربّي.
8 ماشان ئنّولاثن بارياشوع بويحرݣا، ئسم نس س ـ ثيونانيث "عاليم"، أر يورزّو أد ؤر ئتّادّجا أنبّاض أد يامن س ـ لماسيح.
9 داي يتّوعمّر شاوول نّامي دا تّينين بولوس س - رّوح ن - ربّي، ئسخوژّر ݣ ـ عاليم بو يحرݣا
10 أها ينّاياس: «أممّيس ن ـ لحرام، أونّا يعمّرن س ـ مايد ئݣان لغشّ د - ثاحراميّات، أيانضليب ن - ؤينّا يژيلن كول، ئيس ؤر دا تعناقد زݣ ؤسّفرغ ن ـ ئبردان ن - مولانا منانين؟
11 ئدّا مولانا دغي أكّ ئوّث أها ثݣد أدرغال، ؤسار ثانّايد أسيدّ أر لوقث نّاݣ ئرا». داي ݣ ـ وانسا سّولسنثاس والّن، ئقّيم أر ئتّربّال، أر يورزّو مايداس ئتّامژن أفوس.
12 نتّا يانّاي ؤنبّاض سيرجيوس مايد ئجران أها يامن س ـ سيدنا عيسى، ئقّيم ئهبض ݣ ـ ؤسّلمد نّامي يسلّا خف لماسيح.
برنابا د - بولوس ݣ - أنطاكيّا ن ـ بيسيديّا
13 فّير ن ـ ؤينّا، ئدّو بولوس د - ئسمونّ نّس نين أغرّابو زݣ بافوس غر ثمدينث ن - برجا ݣ - ثمازيرث ن - بامفيليا. داي يبضو أݣيدسن يوحنّا مارقوس ديسّ، ياغول غر لقدس.
14 ئيد نيثني عيّنن أنطاكيّا نّا ئلّان ݣ ـ ثمازيرث ن ـ بيسيديّا. س ـ واسّ ن - سّبث، دّون كشمن غر ثمزݣيدا ن - ووداين ؤثن أغجديم.
15 داي فّير ن ـ مايد غيفسن ئتّوقرا شا زݣ شّرع ن ـ سيدنا موسى د - لشتوب ن - لانبيا أمّ لقاعيدا، غرين ئخاثارّ ن - ثمزݣيدا ئي بولوس د ـ برنابا نّاناسن: «أيايثماثنخ، مش غورون ئلّا شان واوال نّا يسعاوانّ ميدّن أد، عفاون سيولاث».
16 داي يبدّ بولوس ئهزّا أفوس نس حما أد فسثين أها ينّاياسن: «أثاروا ن ـ إسرائيل د ـ أوينّا دا تّامنّين س - ربّي كول، سّغداث ئي ماي ريخ أداون ئنيخ،
17 هاثين ربّي نّا دا تّعباد ثاروا إسرائيل أيد ئسثين ئمزوورا نّخ، ئسّمغور أدّور نسن لّيݣ ݣان ئبرّانين ݣ - ثمازيرث ن - ميصر، أها يسّوفغثنيد زّيكس س - ثيغيتّ نس ثاخاثارث.
18 ئساعفثن أمّ ربعين ن - ؤسݣّاس ݣ - لخلا.
19 أها يخلو سبعا ن - لݣنوس ݣ - ثمازيرث ن - كنعان، ئوش ثمازيرث نسن ئي يمزوورا نّخ أتّݣ ثينسن.
20 أياد كول ئكّا أمّ ربعميّا د ـ خمسين ن ـ ؤسݣّاس. فّير ن ـ ؤينّا، ئوشاسن ربّي ئنمغورّ أر غيفسن تّنباضن أر لوقث ن - نّبي صاموئيل».
21 «شوي تّرن زّيكس أداسن ئوش شان ؤݣلّيد، داي يوشاسن ربّي شاوول ممّيس ن - قايس زݣ ئغصّ ن - بنيامين، ئيݣ أݣلّيد نسن ربعين ن - ؤسݣّاس.
22 ماشان ئكّساس ربّي ثانباطّ، ئيݣ سيدنا داود د ـ أݣلّيد نسن ݣ ـ وانسا نس، أها ينّا غيفس ربّي: "داود ممّيس ن - ياسّا يݣا أرݣاز نّا يرا وول ئنو، ئدّا أد ئيݣ أينّا ريخ كول".
23 د ـ زݣ ييرو ن ـ سيدنا داود أزݣ ئݣا سيدنا عيسى نّادّ يوزن ربّي أد ئفوكّو ثاروا ن ـ إسرائيل ئمشينّا يقّاول.
24 داي داث ن ـ مايد ئسفالّ سيدنا عيسى لخدمث نس، يوفاد لحال سيدنا يحيى أر ئتبرّاح ئي ثاروا ن ـ إسرائيل كول أد ثوبن ئي ربّي، تّوغبّزن ݣ ـ وامان.
25 نتّا يدّجاور سيدنا يحيى أد ئشمّل لخدمث نّس أها ينّا: "ماي ثغالم مايد مسخ؟ هاثين ؤر ئيد نكّين أيد ئݣان أمفوكّو نّا دا تّعايانم، ماشان هاثين ئدّاد ضاري، د ـ نكّين ؤر واثاخ أود أد ريخ ئفيلان ن - ئبوركسن نس"».
26 «أيايثما، أثاراو ن - سيدنا براهيم د - أوينّا دا تّعبادنين ربّي كول، هاثين نوكني أمي دّيوزن ربّي أوال أد ن - ؤفوكّا.
27 ماشان ميدّن ن - لقدس د ـ ئخاثارّ نسن ؤر سّينن ئيد سيدنا عيسى أيد ئݣان لمسايح، ؤلا فران أوال ن ـ لانبيا نّا دا تّقران كّو سّبث. داي حشمن غيفس س ـ لموث أمّ ؤينّا غيفس نّان لانبيا.
28 مغار ؤر غيفس ؤفين شا نّا خف ئواثا لموث، تّرن زݣ ؤنبّاض بيلاطوس أث ئنغ.
29 نتّا ݣاناس أينّاس غيفس كاشفن لانبيا كول، كّسنثيد زݣ وافلّا ن - ئحنيݣن نّاخف ئيث طّورقن، أها مضلنث.
30 ماشان ئسكّرثيد ربّي زݣ لموث.
31 أرد ئتفّغ شايݣان ن - ووسّان غر وينّا مونّين أݣيدس زݣ لجاليل غر لقدس. ݣين دغي ئنيݣان نس، أر تقّيسن ئي ميدّن غيفس أينّا ݣ ـ نژان.
32 نوكني ندّاد غورون أداون نيني ئنغميسن أد ژيلنين: هان أينّا يقّاول ربّي ئي يمزوورا نّخ
33 ئݣاياخث دغي نوكّني ئݣان ثاروا نسن لّيݣ دّيسكّر سيدنا عيسى زݣ لموث. أياد أخف دا يساوال ؤمور ويسّ سينّ زݣ ژّابور لّيݣ غيفس ئنّا: "شݣّين ممّي، أسّا سنعثخ ئي ميدّن ئيس ݣيخ ئبّاش".
34 هاثين ئسكّرد ربّي سيدنا عيسى زݣ لموث أها وسار ئمّوث، ئمشينّا ينّا ياد ݣ ـ لشثاب نس: "دّيخ أداون ؤشخ لباراكاث ئنو أم ثينّا قّاولخ ئي داود".
35 أر ئتّيني ݣ ـ يان ؤمور ضنين ݣ ـ ژّابور، "ؤر ثدّيد أتّادجّد أزدّاي نش نّا ثسثيد أد ئرشو ݣ ـ ثمضلث"».
36 «سيدنا داود ݣ ـ ثودرث نس، ئݣا أينّاس ئنّا ربّي. فّير ن ـ ؤينّا يمّث، ئتّومضل ثاما ن - لجدود نس أها يرشو ݣ ـ ثمضلث.
37 ئيد سيدنا عيسى نّاد ئسكّر ربّي زݣ لموث ؤر ئرشي ݣ ـ ثمضلث.
38 أيايثما، ئخصّاياون أتّيسينم ئيد سيدنا عيسى ياد نّا خف داون نساوال أيد ئغين أداون ئغفر لمعصيّاث نّون.
39 كول ونّا ييسّ يومنّ، ئدّا أد ئفوكّا زݣ لمعصيّاث نس، ئيد شّرع ن - سيدنا موسى ؤر ئتّيغي أكون ئفوكّا زݣ لمعصيّاث نّون.
40 ئوا راراث لبال نّون، هان أكون ياغ ؤينّا نّان لانبيا. ئدّخ هاثين نّان:
41 "راعيواث أوينّا دا تعژّارنين ݣ - واوال ن ـ ربّي، هبضاث أها ثخلوم. هاثين دّيخ أد ݣخ ݣ - ووسّان نّون يان ؤسكّين نّا ؤر ثدّيم أتّامنم مغار أونث ئنّا شا"».
42 لّيݣ ئرا بولوس د ـ برنابا أد فّغن زݣ ثمزݣيدا، تّرن زّيكسن ميدّن أدّ أغولن غورسن ݣ ـ سّبث نّا دّيدّان حما أداسن سيولن ديخ ألّثو خف ئسكّين أد.
43 نتّا دّان، مونن أݣيدس شايݣان ن - ووداين د - شايݣان ن ـ وينّا أر تّعبادنين ربّي زݣ لݣنوس ضنين. ئقّيم بولوس د ـ برنابا أرثن توصّان أد أمنن ݣ ـ ربّي نّا ديكسن ئحنّان.
44 لّيݣ ثيوض سّبت ضنين، مونندّ ئمزداغ ن - ثمدينث س - ؤماثا حما أد سّغدن ئي واوال ن - ربّي.
45 نتّا يانّاين ووداين شايݣان ن - ميدّن دّاند أد سّغدن، أها ينغيثن لحرّ. أمژن عوتزّان غر بولوس خف ؤينّا أر ئتّيني كول، أرث رݣّمن.
46 داي يرار غيفسن بولوس د - برنابا س ـ طّايطاي أها نّاناسن: «هاثين كونّي ديمزوورا أمي يخصّا أنيني أوال ن ـ ربّي. ماشان ؤر تّريم، أها ثسنعثم ئيس ؤر ثواثام ثودرث ن - وابدا، أينّا خف مي ندّا أندّو دغي أث نيني ئي لݣنوس نّا ؤر ݣينين ؤداين.
47 أياد أيد ئرا مولانا أث نݣ ئدّخ ئنّا ݣ ـ لشثاب نس: "ݣيخش د - أسيدّ ئي لݣنوس نّا ؤر ݣينين ؤداين حما أنّ ثصّيوضّ أفوكّا ن ـ ربّي ئي ميدّن ݣ ـ مايد ئݣان أنسا ݣ - دّونيث"».
48 لّيݣ سلّين وينّا ؤر ݣينين ؤداين ئي وياد، فرحن شايݣان أها حمدن ئي ربّي خف واوال نس، أمنن كول وينّا يسثي ربّي أغيرسن ثيلي ثودرث ن - وابدا.
49 داي يساقّا واوال ن - ربّي ݣ - ثمازيرث نّا س ـ ماس ثلّا. 50 ماشان سحورّشن ووداين ئخاثارّ ن ـ ثمدينث د - ييتسث ن ـ ثوتمين مي ئمقّور وادّور نّا أر تّعبادنين ربّي. داي كّرفصن بولوس د ـ برنابا، أها ژعنثن زݣ ثمازيرث نسن.
51 داي ئنقّر غيفسن بولوس د ـ برنابا أݣضرور ن ـ ئضارّ نسن أها دّون غر ثمدينث ن - أيقونيّا.
52 ئيد ئمومنّ ݣ ـ أنطاكيا فرحن شايݣان، تّوعمّرن س ـ رّوح ن ـ ربّي.