12
لموث ن - يعقوب ݣماس ن - يوحنّا
1 داي ݣ - لوقث نّا، يكّر ؤݣلّيد هيرودوس a أر ئتمرّاث ييتّس ن ـ ئمومنّ س ـ سيدنا عيسى لماسيح.
2 أها يحشم خف يعقوب ݣماس ن - يوحنّا س ـ لموث، نغينث ئعسكرين نس س - ثفروتّ.
3 نتّا يانّاي هيرودوس أينّا يعجباسن ئي ووداين، ئكّر يامژ أود بطرس ݣ - ووسّان ن - لعيد ن - ؤراخصيس،
4 أها يݣريث ݣ - لحبس، ئوشيث ئي ربعا ن - ثربّاع ن ـ ئعسكرين أد غيفس عسّسنث، د ـ كّو ثاربيعث س - ربعا ن - ئعسكرين. ييلي يعوّل أد غيفس ئحشم داث ن - ميدّن أدّاي يزري لعيد.
5 ئقّيم بطرس ݣ - لحبس، ثيلي غيفس لعسّا ثخاثارث، ئيد أݣراو ن ـ ئمومنّ أر ئتژالّا زݣ ثنيلا نس س ـ وار ئبدّي.
6 داي ييض نّا حما ثيفاوث أثيد ئسّوفغ هيرودوس أد غيفس ئحشم داث ن - ميدّن، يوفاد لحال بطرس ئلّا يݣّن ئنݣر ن - سينّ ن ـ ئعسّاسن ئتّوشرف غورسن س - سناث ن - ثيفرين، ئلين ئعسكّرين ضنين أر تعسّاسن داث ن - ثݣّورث ن ـ لحبس.
7 شوي هان يان لمالاك ن ـ مولانا يبدّاد غيفس، داي يسّيدّا لحبس. ئنزل لمالاك بطرس زݣ ثسݣا نس ئسفافاث، أها ينّاياس: «كّر دغيا!» داي أتّوينث ثݣفرين ݣ ـ وانسا زݣ ئفاسّن نس.
8 ئنّاياس ديخ لمالاك: «كّر أسّ أفكّاس نش، ثقّند ئدوكا نش». ئيݣ بطرس أينّاس ئنّا لمالاك. أها ينّاياس ديخ ألثو: «لس أژنّار نش تّفارديي».
9 داي يفّغ بطرس ئثفار لمالاك، ؤر ئسّين ئيس ئجرا وينّا سثيتّ، ئغال ئيد غاس ئيس أر ئتّوارݣا.
10 كّين خف ثربيعث ثامزواروتّ ن ـ ئعسّاسن د - خف ثيسّ سناث، أوضننّ غر لباب ن - ووزّال نّا دا يتّاوين غر ثمدينث، داي يتّورژم لباب غاس ئي يخف نس أها فّغن. ئمون أݣيدس لمالاك أر ئخف ن ـ ؤزنيق، ئزريث ݣ ـ وانسا.
11 داي يعايدّ بطرس ئخف نس أها ينّا: «ياه دغي سّنخ سثيتّ ئيس دّيوزن مولانا لمالاك نس أد ئي يفوكّو زݣ هيرودوس، د - زݣ ؤينّا دمان ووداين كول أدي يجرو».
12 لّيݣ ئفرا بطرس مايد ئجران، ئكّر ئدّو غر ثادّارث ن - مريم مايس ن - يوحنّا نّامي دا تّينين مارقوس. ئلين شايݣان ن - ئمومنّ مونن ديسّ أر تژالّان.
13 نتّا يوث لباب، ثدّود يوث ن - ثمزيلّزث ئسم نس رودا أتّسّغد ماي دا يكّاثن لباب.
14 نتّا ثوكز أوال ن - بطرس، ثفرح شايݣان داي ؤر ياد أس ثرژيم. ثازّل غر جاج ن - ثادّارث أداسن ثعلم ئيس ئلّا بطرس ئبدّا برّا ن ـ لباب.
15 داي نّاناس: «ئيس ثفّغد ئخف نّم ماد؟» ماشان نتّاث ثومژ ݣ ـ واوال نس أراسن ثصّوحا ئيد سثيتّ، داي نّاناس: «هاثين غاس لمالاك نس أينّا!»
16 ئقّيم بطرس أر ئتنقّار لباب ألّيݣ أس رژمن. نتّا أنّاينث، داي هبضن.
17 ئهزّا أفوس نس أد سوسمن، أها يقّيساسن ماكّاس ألّيݣ ثيد ئسّوفغ مولانا زݣ لحبس، داي ينّاياسن: «قّيساث ئي يعقوب د - ئمومنّ ضنين أياد نّا يجران». ئكّر ئفّغ ئدّو غر شان وانسا ضنين.
18 نتّا يفّو لحال، ݣّدن شايݣان ئعسكرين نّاد يوفا لحال عسّسن، أر تمسقسان خف مايداس ئجران ئي بطرس؟
19 يازن هيرودوس ئعسكرين نس أد غيفس رزون، ماشان ؤرث ؤفين. داي ئسقرّا ييعسّاسن، أها يحشم غيفسن س ـ منغيوث. فّير ن ـ ؤينّا، ئفّغ هيرودوس زݣ ثمازيرث ن ـ أيث ياهودا يدّو غر قايصاريّا ئقّيمنّ ديكس شوي.
20 ييلي هيرودوس ئطيّراس، ئنّاغ د ـ أيث صور د - صايدا. داي مساسان ئنݣراتسن أها يازنند غورس يان ؤݣراو حما أد مصالاحن أݣيدس. كّرن تّرن زݣ بلاستوس ئݣان لوازير نس أد أݣيدسن ئبدّ، ئدّخ ؤر غيرسن مازݣ أسند ئتكّا ووتشّي غاس ثمازيرث نّا خف ئنبض هيرودوس.
21 لّيݣ ييوض واسّ نّا خف مساسان أدّيكس مݣراون، ئلسا هيرودوس ئعبان نس ن - ؤݣلّيد، أها يقّيم خف لكورسي ن - لعرش أر ئساوال ئي ميدّن.
22 داي سغويّن ميدّن أر تّينين: «ئݣا أمّي دا يساوال ربّي ؤر ئيد بنادم!»
23 داي يوّث لمالاك ن - مولانا هيرودوس ݣ - وانسا س ـ يان ييغنشا ئدّخ ثن يودجّا أر ئيسّ سّمغورن أمّي يݣا ربّي. داي تّشينث ئكتّشاون زݣ جاج أها يمّث.