11
1 داي سلّان ئمازان د - ئمومنّ ضنين نّا لّانين ݣ - ثمازيرث ن ـ أيث ياهودا ئيس ؤمنن أود وينّا ؤر ݣينين ؤداين س ـ واوال ن - ربّي.
2 نتّا يعايد بطرس غر لقدس، فقّعن غيفس ووداين نّا يومنّين س ـ لماسيح.a
3 أها نّاناس: «ماخ ألّيݣ ثكشمد غر وينّا ؤر ݣينين ؤداين b أها ثشّد أݣّيدسن!»
4 داي يقّيساسن بطرس س ـ ؤمنّداث أينّا يجران، أها ينّاياسن:
5 «يان واسّ لّيخ أر تژالّاخ ݣ - ثمدينث ن ـ يافا ألّيݣ ئي يسوا شا، داي يسنعثيد ربّي شا يݣان أم يان ليژار أخثار ئتّييمژن زݣ ثبرضين نس س - ربعا أها يݣلولاد غوري س ـ أشال.
6 لّيݣ حقّاخ جاج نس، أنّايخ مايد ئݣان لبهايم د ـ لوحوش د ـ ئمرارادن د ـ ئجضاض.
7 داي سلّاخ ئي شان واوال أر ئي يتّيني: "أبطرس، كّر غرّص أر تتّاد".
8 أها نّيخاس: "ؤر تّيغيخ وارضاراس أد ݣخ أينّا أمولانا، ؤر دجّين تّشيخ أينّا ؤر ئزدّيݣن ؤلا أينّا يسّحرم شّرع نّخ".
9 داي يسيولييدّ واوال ديخ ألثو زݣ ييݣنّا أها ينّايي: "أينّا يزّري ربّي ئي ووتشي أد ؤر تّيني شݣ ؤر ئزري!"
10 أياد ئجرا شراط ن - ثيلمرّات، داي يتّواسي ليژار نّا س ـ ؤينّا ديكس ئلّان غر ئݣنّا.
11 شوي هان شراض ن - ئرݣزن بدّاند داث ن - ثݣّورث ن - ثادّارث نّاݣ قّيميخ، تّييزنندّ غوري زݣ ثمدينث ن ـ قايصاريّا.
12 داي ينّايي رّوح ن ـ ربّي أد دّوخ أݣّيدسن أد ؤر زّهزاخ، مونن أݣّيدي ئمومنّ أد س - ستّا ݣانين زݣ يافا. لّيݣ نكشم غر ثادّارث ن - ؤرݣاز نّا غوري دّيوزنن،
13 ئقّيساخ ميمش أيد غورس ديفّغ يان لمالاك ݣ ـ ثدّارث نس، أها ينّاياس: "أزن شان ئرݣزن غر ثمدينث ن ـ يافا، ثغرددّ ئي سيمعان نّامي دا تّينين بطرس.
14 هاثين ئدّا نتّا أداش ييني شان ئنغميسن نّاس غا ثفوكّاد شݣّ د - أيث ؤخام نّش كول".
15 نتّا أر ساوالخ، ئضردّ غيفسن رّوح ن - ربّي ئمشينّا غيفنخ دّيضر أود نوكّني ݣ - ثيزويري.
16 داي شثيخدّ أوال ن ـ مولانا لّيݣ أخ ئنّا: "سيدنا يحيى أر ئتغبّاز ميدّن ݣ - وامان، ئيد كونّي ئدّا ربّي أكون ئغبّز ݣ - رّوح نس".
17 ئوا دغي ݣ ـ ئثن ئسمساسا ربّي أݣيدنخ، ئوشاسن أينّاخ ئوشا أود نوكّني ليݣ نومن س - مولانا عيسى لماسيح، مايد مسخ نكّين حما أد نّالخ أينّا يرا ربّي؟»
18 نتّا سلّان وينّا سكّرنين أوال ئي وياد نّاسن ئقّيس بطرس، أغولن سوسمن، قّيمين أر تمجّادن ربّي أر تّينين: «زّيغ ئوشا ربّي تّوبث أود ئي وينّا ؤر ݣينين ؤداين حما أد غورسن ثيلي ثودرث ثارصليث!»
أݣراو ن - وينّا دا تّامنّين س ـ سيدنا عيسى ݣ - أنطاكيّا
19 ئيد ئمومن نّا مزلّاعنين س - ؤكّرفص نّا غيفسن ئكّان ضارث ن - مايد ئتّونغا ستيفانوس، دّان أر فينيقيّا د - قوبروص د - أنطاكيّا، ماشان ؤر أر تّينين أوال ن - ربّي غاس ئي ووداين.
20 ئيد ييتّس زّيكسن ݣانين زݣ قوبروص د - لقيروان دّان غر أنطاكيّا، قّيمين أراسن تبرّاحن أود ئي وينّا ؤر ݣينين ؤداين س ـ ئنغميسن ژيلنين خف مولانا عيسى.
21 داي يلّا ربّي أݣيدسن، أها ثوبن شايݣان ن ـ ميدّن أمنن س ـ مولانا.
22 أوضنن ئنغميسن أد أݣراو ن ـ ئمومنّ نّا يلّان ݣ - لقدس، داي كّرن أزنن برنابا غر أنطاكيّا.
23 لّيݣ نّييوض برنابا يانّاي ئيس ئرضا ربّي خف ميدّن ديسّ، ئفرح أها يزّعيمثن كول نسن أد قّيمين ݣ ـ ليمان نسن س ـ مولانا.
24 ييلي برنابا يݣا أرݣاز ئژيلن غر ئلّا ليمان أخاثار أها يعمّر س - رّوح ن - ربّي. أمنن ديخ شايݣان ن - ميدّن س ـ لماسيح.
25 ئكّر برنابا يدّو غر ثمدينث ن ـ طرسوس أر يورزّو شاوول،
26 نتّا يوفاث ياويثيد أݣيدس غر أنطاكيّا. أها قّيمين سّينّ نسن أسݣّاس س ـ ماس ئلّا أر تّمݣراون د ـ ؤݣراو ن ـ ئمومنّ أها سّلمدن شايݣان زّيكسن. أنطاكيّا نّيث أݣاسن ئتّوݣا ݣ ـ ثيلمرث ثامزواروتّ ييسم ن ـ "ئماسيحين" ئي يمومنّ س ـ سيدنا عيسى.
27 داي ݣ - لوقث نّا، سرّحند ييتس ن - ئرݣزن نّا أر ساوالنين س ـ ؤينّاسن ئسنعث ربّي زݣ لقدس غر أنطاكيّا.
28 ييلي ديكسن يوكّ ئسم نس أغابوس، ئكاشف س - رّوح ن ـ ربّي ئيس ئدّا أد ييلي يان ن - بوهيّوف أخاثار ݣ - دّونيث كول. أها يجرو وينّا سثيتّ لّيݣ ئݣا كلوديوس أݣلّيد ن ـ رّومان.
29 داي مساسان ئمومنّ نّا زدغنين ݣ - أنطاكيّا أد أزنن أينّامي غين حما أد سعاونن ئمومنّ نّا زدغنين ݣ - ثمازيرث ن ـ أيث ياهودا.
30 داي يوشين أينّا سمونن ئي برنابا د - شاوول حما أثينّصّيوضن ئي يخاثارّ ن - ؤݣراو ن ـ ئمومنّ ݣ ـ لقدس.