10
بطرس د - كورنيليوس
1 ييلي ݣ - قايصاريّا يان ؤرݣاز ئسم نس كورنيليوس، ئݣا أخاثار ن - يوث ن ـ ثربيعث ن ـ لعسكر ن ـ رّومان نّامي دا تّينين "ثاربيعث ن - طّاليان".
2 كورنيليوس ئݣا أرݣاز ئمنان، أر ئتݣّد ربّي نتّا د - أيث ؤخام نس كول، أر ياكّا شايݣان ن ـ صّاداقاث ئي يمژلاض، أر ئتژالّا ئي ربّي كوياسّ.
3 يان واسّ أتّاين ن - تّلاثا ن ـ ثدݣّات، ئفّغد غورس يان لمالاك ن ـ ربّي أها ئغراس: «أكورنيليوس!»
4 ئسموقّل كورنيليوس ݣ - لمالاك ئݣّد، أها ينّاياس: «ماي ثريد أسيدي؟» داي ينّاياس لمالاك: «هاثين ئسلّا ربّي ئي ثژيلّا نش يانّاي صّاداقاث نّا دا تّاكّاد ئي يمژلاض ئرضو غيفش.
5 ئوا يازن دغي شان ئرݣزن غر يافا، ثغرددّ ئي سيمعان نّامي دا تّينين بطرس.
6 هاثين ئلّا يݣا أنبݣي غر يان بو يسليخن ئسم نس سيمعان، ثلّا ثدّارث نس ثاما ن - لبحر».a
7 داي غاس ئدّا لمالاك نّا أراس ئساوالن ئي كورنيليوس، ئغرد ئي سينّ زݣ ئمزيلّزن نس د - يان ؤعسكري ئحضان ربّي، زݣ وينّا دا تّمونّين أݣيدس كويّاس.
8 ئقّيساسن أينّا يجران كول، أها يازنثن غر يافا.
9 س ـ أسكّا نس، لّيݣ نّدجّاورن غر يافا، يولي بطرس غر أفلّا ن ـ ئغرم أتّاين ن - وامّاس ن ـ واسّ أد ئژّال.
10 ئنغيث لاژّ ييري أد ئتشّ. نتّا أراس تحبّالن ئي مايد ئتتّا، ئسويث شا.
11 داي يسنعثاسد ربّي ئݣنّا يرژم، د - شا يݣان أم شان ليژار أخثار ئݣّلولاد س - أشال زݣ ثبرضين نس س - ربعا.
12 ئلّا ديكس مايد ئݣان لوحوش ن - واشال، د - ئمرارادن د - ئجضاض.
13 داي يسلّا بطرس ئي شان واوال ئنّاياس: «أبطرس، كّر غّرّص أرتتّاد».
14 ماشان ئنّاياس بطرس: «ؤر تّيغيخ وارضاراس أد ݣخ أينّا أمولانا، ؤر دجّين تشّيخ أينّا ؤر ئزدّيݣن ؤلا أينّا يسّحرم شّرع نّخ».
15 ئسيولاسدّ واوال ديخ ألثو ينّاياس: «أينّا يزّري ربّي ئي ووتشي أد ؤر تّيني شݣ ؤر ئزري!»
16 ئجرو وياد شراطّ ن - ثيلمرّات، داي يتّواسي ليژار نّا أخاثار غر أجنّا.
17 لّيݣ ئقّيما بطرس ئهبض، أر ئتخمّام ݣ ـ ؤياد نّاسد ئسنعث ربّي، هان ئرݣزن نّادّ يوزن كورنيليوس ؤفان ثدّارث ن ـ سيمعان، ئلين بدّان ݣ - ثݣّورث.
18 أر قّارن أر تسقسان: «ئيس غورون ئلّا داد سيمعان نّامي دا تّينين بطرس؟»
19 ئسول بطرس أر ئتّخمّام ݣ - ؤينّاسد ئسنعث ربّي، ئسيولاسدّ رّوح ن ـ ربّي ئنّاياس: «هان شراض ن - ئرݣزن بدّان ݣ ـ ثݣّورث دا غيفش ؤرزّون،
20 ئوا كّر سرّح غورسن، ثموند أݣّيدسن أد ؤر زّهزا، ئدّخ هاثين نكّين أي ثنينّ يوزنّ».
21 داي يسرّح غورسن بطرس ئنّاياسن: «نكّين أيد ئݣّان بطرس نّا خف دا ثورزّوم. مايد ئي ثرام؟»
22 داي نّاناس: «هاثين يوزناخد ؤخاثار ن - لعسكر ن ـ رّومان كورنيليوس، ئݣان أرݣاز ئمنان دا يتّݣدن ربّي، أرث توقّارن أيث ثمازيرث ن ـ ياهودا كول. ئفّغد غورس يان لمالاك ن ـ ربّي أها ينّاياس أداش دّيغر غر ثادّارث نس حما أد ئسّغد ئي واوال نّا غاس ثينيد».
23 داي يسكشمثن بطرس حما أد نسين ديسّ ئيض نّا.
س - أسكا نس، ئكّر ئمون أݣّيدسن نتّا د ـ ييتّس ن - ئمومنّ ضنين ݣانين زݣ يافا.
24 غر وانيݣن أسكّا نس، أوضنن غر قايصاريّا. ييلي كورنيليوس أرثن ئتّعايان، ئغرادّ ئي لاهل نس د - ئمدّوكال نس نّا ثيد ئوالان.
25 غاس ييوضنّ بطرس، ئنّالثيد كورنيليوس، أها يوث خف ئفادّن نس ئبندق داثاس.
26 ماشان ئهزّاثيد بطرس أها ينّاياس: «كّر بدّ، هاثين أود نكّين غاس بنادم أم شݣ أيد ݣيخ».
27 ئكشم بطرس غر ثدّارث أر ئساوال ئي كورنيليوس، يافنّ شايݣان ن - ميدّن لّان مونن جاج.
28 داي ينّاياسن: «هاثين ثسّنم كول نّون ئيس ؤراخ ئزري نوكّني ؤداين أنمعاشار د - وينّا ؤر ݣينين ؤداين ؤلا نكشم غورسن. ماشان ئسنعثيي ربّي أد ؤر سار تّينيخ خف أود يوك ؤر ئزدّيݣ نغد ئحرم.
29 أياد أخف ددّيخ ليݣ غوري نثوزنم، ؤر نّيخ ئهي. ماشان ريخ أد ئسينخ مّاخ ألّيݣ غوري نثوزنم؟»
30 داي ينّاياس كورنيليوس: «ربعا ن - ووسّان أياد، أتّاين ن ـ ثلاثا ن ـ ثدݣّاتّ، لّيخ أر تژالّاخ ݣ - ثادّارث ألّيݣ دّيفّغ غر بنيدي يان - ؤرݣاز س - ئعبان ئسفاقّاسن،
31 أها ينّايي: "أكورنيليوس، هاثين ئسلّا ربّي ئي ثژيلّا نش يانّاي لخير نّا دا تݣّاد ئي يمژلاض.
32 ئوا يازن غر يافا، ثغرددّ ئي سيمعان نّامي دا تّينين بطرس، هاثين ئݣا أنبݣي غر سيمعان بو يسليخن ئزدغن ثاما ن - لبحر".b
33 داي يازنخنّ غورش ݣ ـ وانسا، صاحا نش لّيݣ تثدّيد. دغي هاياخ نلّا كول نّخ داث ن - ربّي حما أنسّغد ئي مايداش ئنّا مولانا كول أداخ تّينيد».
أوال ن - بطرس
34 ئكّر بطرس أر ئساوال ئنّاياسن: «دغي سّنخ سثيتّ ئيس ؤر دا يتّݣّا ربّي ثودماوين ئنݣر ن ـ ميدّن.
35 ماشان ربّي دا يتّرضو خف وينّا داث تݣّدنين كول أر تݣّان أينّا يژيلن داكّ ماتّا لݣنس نّا زݣ ݣان.
36 هاثين يوزند أوال نس ئي ثاروا ن ـ إسرائيل أداسن ييني ئنغميسن ژيلنين ن ـ لهنا س - سيدنا عيسى لماسيح ئݣان مولانا ن - ميدّن كول.
37 هان كونّي ثسّنم مايد ئجران ݣ - ثمازيرث ن - أيث ياهودا كول. ئسفالّ ؤينّا ݣ ـ لجاليل فّير ن - مايد أر ئتبرّاح سيدنا يحيى أراسن ئتّيني ئي ميدّن أد تّوغبّزن ݣ ـ وامان.
38 ربّي يسثي سيدنا عيسى ؤنّاصيرا يوشاس رّوح نس د ـ جّهد. أها يسعاونث لّيݣ أر ئتدّو غر مايد ئݣّان أدغار أر ئتݣّا لخير، أر ئجوّجوي كول وينّا خف ئنبض شّيطان.
39 د ـ نوكّني ئمازانّ نݣا يينيݣان خف ؤينّا يݣا كول ݣ - ثمازيرث ن ـ أيث ياهودا د - لقدس. أها نغينث لّيݣ أس دزّان ئمسمارّ خف ئحنيݣن ن ـ ؤطّورق.
40 ماشان ئسكّريد ربّي زݣ لموث ݣ - واسّ ويسّ شّراض يادجّيث أدّ ئتّويانّاي،
41 ؤرث أنّاين ميدّن كول، ماشان غاس ئنيݣان نّا يسثي ربّي ياد، نوكّني نّا ئتشّان ئسو أݣّيدس ضارن ن ـ ماي ثيد ئسكّر ربّي زݣ لموث.
42 أها يوصّاياخ أنسيول ئي ميدّن غيفس، أها نينياسن هاثين نتّا أيد ئسثي ربّي أد ئنبض خف وينّا دّرنين د - وينّا مّوثنين.
43 سيدنا عيسى أخف سيولن لانبيا كول أها نّان هاثين كول وونّا ييسّ يومنّ ئدّا أداس تّوغفرنث لمعصيّاث نس س ـ ثنباطّ ن ـ ييسم نس».
44 ئسول بطرس أر ئساوال، ئضردّ رّوح ن - ربّي خف وينّا أر سّغادنين كول.
45 داي هبضن ووداين نّا يومنّين س ـ سيدنا عيسى نّاد مونّين د - بطرس ليݣ ئوشا ربّي رّوح نس أود ئي وينّا ؤر ݣينين ؤداين لّيݣ ؤمنن س ـ سيدنا عيسى.
46 ئدّخ هاثين أراسن تسلّان أر ساوالن س - واوال ؤر ئݣين وينسن أر سّمغورن س ـ ربّي. داي يسيول بطرس ئنّا:
47 «ميدّن أد ئضردّ غيفسن رّوح ن - ربّي ئمشينّا غيفنخ دّيضر أود نوكّني، ئوا ئيس ئغي شان يوكّ أداسن ييني أد ؤر تّوغبّازن ݣ ـ وامان؟»
48 أها ينّاياسن أد تّوغبّزن ݣ ـ وامان س - ييسم ن - سيدنا عيسى لماسيح. داي سّوثرن زّيكس أد غيرسن ئقّيم شان ووسّان.