9
شاوول ياغول يومن س - سيدنا عيسى لماسيح
(ئمازانّ 22: 6-16؛ 26: 12-18)
1 ئيد شاوول غاس أر ئتّصوض، أرت ئتّݣالّا ݣ - ئمومنّ س ـ سيدنا عيسى أثن ئنغ. داي يكّر ئدّو غر أنمغور ن ـ ثدّارث ن ـ ربّي،
2 ئتّر زّيكس شان ثبراثين أثنث ياوي ئي يخاثارّ ن ـ ثمزݣيديوين ن ـ ووداين نّا لّانين ݣ ـ ديماشق، حما أديدس بدّين أد يامژ وينّا يوفا ديسّ كول نّا ثفارنين أبريد ن - مولانا، لا ييرݣزن ؤلا ثيوثمين، أها يرارثن شرفن غر لقدس.
3 ئكّر شاوول ئدّو غر ديماشق. نتّا يدجّاورنّ، هان يان ؤسيدّ ئنقّرد غيفس زݣ ييݣنّا أمّ ووسم.
4 داي يتّوتّي س - أشال، ئسلّا ئي شان واوال أراس ئتّيني: «أشاوول، أشاوول، ماخ ألّيݣ دا يي تّكرفاصد؟»
5 داي ينّاياس شاوول: «ماي ثمسد أسيدي؟» ئرارد غيفس واوال ئنّاياس: «نكّين عيسى نّا دا تّكرفاصد».a
6 b «كّر بدّ ثكشمد غر ديماشق، ئدّا أداش ئتّويني دينّ مايد غيفش ئلّان أتّݣد».
7 ئيد ئسمونّ ن - شاوول بدّان ݣ ـ وانسا يبّي ديكسن واوال س - ؤهباض ئدّخ أر تسلّان ئي واوال ماشان ؤر أنّاين أود يوكّ.
8 نتّا يكّر شاوول زݣ واشال ئرژم ألّن نس، يافنّ ئخف نس ؤر أر ئتّانّاي. داي أمژناس ئسمونّ نس أفوس ألّيݣ ثينّ صّيوضن غر ديماشق.
9 ئقّيم شراض ن - ووسّان ؤر أر ئتّانّاي، ؤر أر ئتتّا ؤر أر ئسّا.
10 ييلي ݣ - ديماشق يان ؤمومن س ـ لماسيح ئسم نس حانانيا، ئفّغد غيرس لماسيح أها يغراس: «أحانانيا!» ئرار غيفس حانانيا: «هاياش نكّين أمولانا».
11 داي ينّاياس مولانا: «كّر دّو غر أزنيق نّامي دا تّينين "أزنيق ئطّعنان"، ثسقساد ݣ - ثادّارث ن - ياهودا خف يان ؤرݣاز ئݣان زݣ ثمدينث طرسوس ئسم نس شاوول. هاثين ئلّا دغي دا يتژالّا،
12 هاثين ئسنعثاسد ربّي يان ؤرݣاز ئسم نس حانانيا يكشمد غيرس، ئسرس غيفس ئفاسّن نس حما أد ياغول أد ئتّانّاي».
13 داي ينّاياس حانانيا: «ماشان أمولانا هاثين قّيسني شايݣان ن - ميدّن خف ثمارا نّا يسيكّا ؤرݣاز أد خف ئمومنّ نش ݣ - لقدس.
14 هاياشث ئدّاد أود غر داد س ـ ثنباط نّاس ؤشان ئنمغورّ ن ـ ثدّارث ن ـ ربّي حما أد يامژ وينّا دا يسّك تّامنّين».
15 ئرار مولانا خف حانانيا ينّاياس: «كّر دّو، ئدّخ أرݣاز أد نكّين أيث ئسثين أد ئيݣ أمازان ئنو غر لݣنوس ن ـ دّونيث د - ئݣلّيدن نسن د - ثاروا ن ـ إسرائيل أداسن ئسيول غيفي.
16 د ـ نكّين س - ئخف ئنو دّيخ أداس سنعثخ مشثا ن - ثمارا أي ثينّيقّانّ غيفي».
17 ئدّو حانانيا غر ثادّارث نّاݣ ئلّا شاوول ئكشم غورس، ئسرس غيفس ئفاسّن نس أها ينّاياس: «أݣما شاوول، هاثين يوزنيد غورش مولانا عيسى نّا غيرش ديفّغن لّيݣ تثدّيد ݣ - ؤبريد غر داد. يوزنيد حما أداش دّيعايد ئژري نش أها ثعمّرد س - رّوح ن - ربّي».
18 داي ݣ - وانسا ياتّويد زݣ والّلن ن ـ شاوول شا يݣان أم ئسارّن ن - ؤسلم، ياغول أر ئتّانّاي. أها يكّر ئتّوغبّز ݣ ـ وامان س ـ ييسم ن ـ سيدنا عيسى لماسيح.
19 فّير ن ـ ؤينّا يتّشا شا، ياغول ئݣ لاباس.
شاوول دا يتبرّاح س ـ سيدنا عيسى ݣ - ديماشق
ئقّيم شاوول ييتس ن - ووسّان غر ئمومنّ ݣ - ديماشق.
20 ئكّر ݣ ـ وانسا أر ئساوال ئي ميدّن ݣ - ثمزݣيديوين أراسن ئتّيني هاثين سيدنا عيسى سثيتّ ئݣا ممّيس ن - ربّي.
21 داي هبضن وينّا أراس سّغادنين كول أر تّينين: «ئيس ؤر ئيد واد أيد أر ئخلّون وينّا دا تّامنّين س - وادّخ نّامي دا تّينين عيسى ݣ ـ لقدس؟ أها يدّود غر داد غاس حما أثن يامژ ئشرفثن ئرارثن غر ئنمغورّ ن ـ ثدّارث ن ـ ربّي؟»
22 ماشان ئزايد شاوول أر ئساوال س ـ يان جّهد أخاثار، داي ؤر سّينن ووداين نّا زدغنين ݣ - ديماشق ماس غيفس تّراران ئدّخ أراسن ئسنعاث س ـ ثميثار ئيد سيدنا عيسى أيد ئݣان سثيتّ لماسيح.
23 نتّا ثزري شان لوقث، مساسان ووداين خف شاوول أث نغين،
24 ماشان ئتّوناياس ئيس غيفس مساسان، أر حطّون ثيݣّورين ن ـ ثمدينث س ـ ييض د - واسّ حما أث نغين.
25 داي يان ييض، ݣينث ئمومنّ ݣ - يان وازّݣاو، سضرنث س ـ ئزاكارن زݣ يان ؤخبو ئلّا ݣ - ؤݣادير نّاس ئضورن ئي ثمدينث.
شاوول ݣ - لقدس
26 نتّا ييوضنّ شاوول غر لقدس، ييري بار أد يامّو د - ئمومنّ نّا لّانين ديسّ، ماشان كول نسن ݣّدن زّيكس ئدّخ ؤر ؤمينن ئيس ياغول سثيتّ ئݣا أمومنّ س ـ سيدنا عيسى.
27 داي يسعاونث برنابا يكّر ياويث غر ئمازانّ، ئقّيساسن ميمش أيد يانّاي شاوول لماسيح ݣ - ؤبريد لّيݣ ديدّا غر ديماشق، د ـ ميمش أيداس ئسيول مولانا. ئقّيساسن ألثو ميمش أيد أر ئساوال شاوول س ـ طّايطّاي خف سيدنا عيسى ݣ - ديماشق.
28 داي زݣ سيّيس، ئقّيما أر أݣّيدسن ئتمون ݣ - لقدس أر ئساوال س ـ طّايطّاي س - ييسم ن - مولانا عيسى.
29 أر ئساوال ألثو ئي ووداين نّا دا ساوالنين س - ثيونانيث ئقّيم أر أݣيدسن ئتّمرارا أوال، ئميل ران أود نثني أث نغين.
30 نتّا سنن ئمومنّ أينّا، سضرنث غر لمرصا ن ـ قايصاريّا أها أزننث زݣ سّييس غر ثمدينث ن ـ طرسوس.
31 أغولن ئݣراون ن ـ ئمومنّ ݣ ـ ثمازيرث ن ـ أيث ياهودا كول، د ـ لجاليل، د - سّاميرا ئلّا غورسن لهنا. أر تّمغورن ݣ ـ ليمان، أر تّݣدن ربّي، أر تعدّون ئمومن س - لعوان ن ـ رّوح ن ـ ربّي.
بطرس ݣ - لدّا د - يافا
32 ئيد بطرس أر ئتدّو زݣ وانسا غر أنسا ݣ ـ ثمازيرث كول، داي يدّو أدّ ئيكّ أود ئمومن نّا زدغنين ݣ - ثمدينث ن ـ لدّا.
33 يافنّ ديسّ يان ؤرݣاز ئسم نس ئنياس، ثمانيا ن - ئسݣّاسن أيد ئفوشل ؤر دجّين ئكّير زݣ ثيسّي.
34 داي ينّاياس: «أ يينياس، هاثين ئجّوجيش سيدنا عيسى لماسيح، كّر سمون ثيسّي نش» داي يكّر ݣ ـ وانسا.
35 ئمزداغ ن - لدّا د - وين شارون س ـ ماس لّان أنّاين ئينياس أر ئتدّو أها أغولن أمنن س ـ سيدنا عيسى.
36 ثيلي ݣ - ثمدينث ن ـ يافا يوث ن - ثمومنتّ ئسم نس طابيثا، زعما "ثاملالث"، أر تݣّا ديما لخير ئي ميدّن، أر ثسعاوان ئمژلاض شايݣان.
37 يوغت شا ݣ - ووسّان نّا ثمّث، أها سّيردنت سيرسنت ݣ ـ يوث ن ـ ثمصريث.
38 داي سلّان ئمحضرّ ئيس ئلّا بطرس ݣ ـ لدّا، د ـ لدّا ؤر ثبعيد شا خف يافا، أها كّرن أزنن غورس سينّ ن - ئرݣزن أداس ئنين: «عافاك، أورا غورخ دغيا».
39 ئكّر بطرس ݣ ـ وانسا يمون أݣيدسن غر يافا. نتّا ييوضنّ، سّيلينث غر ثمصريث، مّوترنث غيفس ثينّا مي مّوثن ئرݣزن كول أر تّرونث أراس سنعاثنث ثيكبرين د - ئعبانّ نّا أر ثوݣنّو طابيثا لّيݣ ثسول ثدّر.
40 داي يسّوفغ بطرس ميدّن كول غر برّا، ئوّث خف ئفادّن ئژّال، أها يبرّم غر أمتّين ئنّاياس: «أطابيثا، كّر!» داي ثرژم ألّلن نس. نتّا ثانّاي بطرس، ثوث أغجديم.
41 ياژض غورس بطرس أفوس نس أتّيسعاون أتبدّ، ئغرد ئي يمومنّ د - ثينّامي مّوثن ئرݣزن ئسنعثاسنتّ ثدّر.
42 داي يساقّا ؤنغميس ن ـ لموعجيزا ياد ݣ - يافا س ـ ماس ثلّا، أها أمنن شايݣان ن - ميدّن س - مولانا عيسى.
43 ئقّيم بطرس شايݣان ن - ووسّان ݣ - يافا غر يان بو يسليخن ئسم نس سيمعان.