8
شاوول دا يتّكرفاص أݣراو ن ـ ئمومنّ
1 ييلي شاوول ئمساسا خف منغيوث ن ـ ستيفانوس. ݣ - واسّ نّا س ـ ئخف نس تّوكرفصن ئمومنّ نّا لّانين ݣ - لقدس شايݣان. داي مزلّاعن كول نسن ݣ - ثنيلا ن - ثمازيرث ن ـ أيث ياهودا د ـ سّاميرا، ؤر ئقّيمي ݣ ـ لقدس غاس ئمازانّ.
2 كّرن ييتس ن ـ ئرݣزن نّا دا تّامنين س ـ ربّي مضلن ستيفانوس، أها رون غيفس س - ئغويّان.
3 ئيد شاوول ئرا أد ئخلّو أݣراو ن ـ ئمومنّ، ئكّر أر ئتكّا ثادّروين يوث س ـ يوث أرثنيد ئژّوغور، ئرݣزن د ـ ثوثمين، أر ثن ئݣّار ݣ - لحبس.
4 ئيد ئمومنّ نّا مزلّاعنين، قّيمان أر تموتّوين زݣ ؤدغار غر أدغار أر تبرّاحن س ـ ئنغميسن ژيلنين خف سيدنا عيسى.
5 ئكّر ؤنّامي دا تّينين فيليبّوس ئدّو غر يوث ن - ثمدينث ݣ - ثمازيرث ن ـ سّاميرا، ئقّيم أر ئساوال ئي يمزداغ نس خف لماسيح.
6 داي مونن غيفس شايݣان ن ـ ميدّن رارين ثاغضفث ئي مايد أر ئتّيني، أر غورس سّغادن أر تّانّاين لمعجزاث نّا أر ئتݣّا،
7 ئدّخ أر ئتژّع أدجّنون زݣ ن ـ وينّاݣ لّان، أر زّيكسن تفّغن س ـ ؤغويّي. أها يجّوجي أود شايݣان ن - ئفوشالّ د - ئحيزان.
8 داي فرحن ميدّن ن ـ ثمدينث نّا س ـ ماس لّان.
9 يافد لحال ݣ - ثمدينث نّا يان بو يحرݣا ئسم نس سيمون. ئسّهبض ئمزداغ ن - سّاميرا س ـ ثحرݣا نس، أر ئتّيني خف ئخف نس ؤر ئلّي ماي ثيوݣرن.
10 أرث تثفارن ميدّن كول زݣ ؤمژّيان أر أخاثار أر غيفس تّينين: «أرݣاز أد أيد ئݣان جّهد ن - ربّي نّامي دا تّينين "جّهد أخاثار"».
11 أرث تثفارن ئدّخ ئثن ئسّهبض زݣ واهوّا س - ثحرݣا نس.
12 ماشان لّيݣ أسن ئسيول فيليبّوس خف ثݣلديتّ ن - ربّي د - خف سيدنا عيسى لماسيح، كول وينّا ييسّ ؤمنّين تّوغبّزن ݣ ـ وامان س ـ ئرݣزن د ـ ثوثمين.
13 أود سيمون س - ئخف نس يومن س ـ سيدنا عيسى أها يتّوغبّز ݣ وامان، ئقّيم أر ئتّثفار فيليبّوس غر أينّا غر ئدّا، أر ئتّرعاب ݣ ـ لموعجيزاث د - لعجايب ثيخاثارين نّا أر ئتّݣّا داثاس.
14 لّيݣ سلّان ئمازانّ ݣ - لقدس ئيس ؤمنن أيث سّاميرا س ـ واوال ن - ربّي، داي أزنّاسن بطرس د - يوحنّا.
15 غاس ئوضننّ غر سّاميرا، ژّالّين زݣ ثنيلا ن ـ وينّا بحرا ؤمومنّين حما أد غيفسن دّيضر رّوح ن - ربّي،
16 ئدّخ ثنيد يوفا لحال ئسول ؤر دّيضير خف أود يوكّ ديكسن، مغار تّوغبّزن ݣ ـ وامان س - ييسم ن - مولانا عيسى.
17 داي ئسيرس غيفسن بطرس د ـ يوحنّا ئفاسّن نسن، أها يضردّ غيفسن رّوح ن - ربّي.
18 نتّا يانّاي سيمون ئيس دّيضر رّوح ن ـ ربّي خف ئمومن ليݣ ئسرس بطرس د ـ يوحنّا ئفاسّن نسن غيفسن، ييري أداسن يوش لفلوس
19 ئنّاياسن: «ؤشاثي أود نكّين ثانباط أد حما غاس ونّا خف سرسخ ئفاسّن ئنو أد غيفس دّيضر رّوح ن - ربّي».
20 داي يرار غيفس بطرس ئنّاياس: «دّو غر جهنّام شݣّين د ـ لفلوس نش ئدّخ ثغالد ئيد أتّيغيد أتّسغد ثوكّي ن - ربّي س ـ لفلوس.
21 ؤر غورش ئلّي ومور ݣ - لخدمث نّخ ئدّخ ئسّن ربّي ئيس ؤر ئمني وول نش داثاس.
22 هاثين ئخّا وياد نّا ثݣيد، ئوا ثوب ئي ربّي، أها ثتّرداس بار أداش ئغفر أينّا ثدميد ݣ ـ وول نش.
23 ئدّخ هاثين ئمشينّا أنّايخ، ئحرّا وول نش س ـ لحسد أها ثشرفش لمعصيث».
24 داي ينّاياسن سيمون: «عافاون تّراثاس كونّي ئي مولانا زݣ ثنيلا نو حما أد ؤري يتّاغ شا زݣ ؤياد نّا ثنّام».
25 ضارث ن - مايد ئسيول بطرس د - يوحنّا ئي ميدّن خف واوال ن ـ مولانا د ـ ؤينّامي سّغدن د ـ ؤينّا ݣ نژان كول، أغولن غر لقدس. أر تبرّاحن س ـ ئنغميسن ژيلنين ݣ ـ شايݣان ن - ثغرمين نّا خف أر تكّان ݣ ـ ثمازيرث ن ـ سّاميرا.
فيليبّوس د ـ لوازير ن ـ ثݣلّيت ن ـ ثمازيرث ن ـ لحاباشا
26 شوي ئسيولاس يان لمالاك ن - مولانا ئي فيليبّوس ئنّاياس: «كّر دّو ثانيلا ن - ؤفاسي، ثكّد زݣ ؤبريد نّا يخلان نّا يضرن زݣ لقدس غر غازّا».
27 ئكّر فيليبّوس ئدّو. داي يمناقّار ݣ ـ ؤبريد د - يان ؤرݣاز زݣ ئخاثارّ ن ـ ثمازيرث ن ـ لحاباشا، ئݣ لوازير ن - كنداكا ثاݣلّيت ن - لحاباشا ئيݣ أنبداد خف ؤينّا يݣان وينس كول. يوفاثيد لحال ئدّا غر لقدس أد ئعبد ربّي.
28 ييلي ياغول ئبردان نس ئني خف لكوتّشي نس، أر ئتقّرا ݣ - لشثاب ن - نّبي ئشعيا.
29 داي ينّاياس رّوح ن ـ ربّي ئي فيليبّوس: «أزّل سّيكلن لكوتّشي ياد».
30 يازّل فيليبّوس غر ثاما ن ـ لكوتّشي، ئسلاّياس ئي ورݣاز أر ئتقّرا ݣ ـ لشثاب ن - نّبي ئشعيا، داي يسقساث: «ئيس ثفريد شا ݣ ـ ؤينّا دا تقّراد؟»
31 ئرار غيفس ؤرݣاز ئنّاياس: «ميمش تݣّخ أث فروخ مش ؤر ئيث ئسنعيث شا؟» أها يسّوثر زݣ فيليبّوس أد ئني أݣيدس ݣ ـ لكوتّشي ئقّيم ثاما نس.
32 ييلي أر ئتقّرا ݣ - لشثاب أمور نّا دا يتّينين: «ئݣا أم ثيخسي نّا يتّوحرين غر ثغرصا، د ـ أمّ ؤعلّوش نّا يفسثان ئنݣر ن - ئفاسّن ن - وينّا داث تلّسنين. ؤر ئنّي أود يان واوال.
33 ئتّوكرفص أها ؤر غيفس ئتّوحشيم س ـ لحقّ، ئوا ماغا يسيولن خف ثاروا نس؟ ئدّخ ثودرث نس ثتّواكّس زݣ خف وودم ن - واشال».
34 داي يسقسا ؤرݣاز فيليبّوس ئنّاياس: «ئنيي، ماخف دا يساوال نّبي ئشعيا؟ ئيد خف ئخف نس ماد خف شان يوكّ ضنين؟»
35 داي يسفالّ فيليبّوس زݣ ؤمور أد نّيث ݣ ـ لشثاب ن ـ ربّي أراس ئتّيني ئنغميسن ژيلنين خف سيدنا عيسى.
36 نتّا أر تدّون ݣ - ؤبريد، أوضن غر يان ؤدغار لّان ديكس وامان، أها ينّاياس ؤرݣاز ئي فيليبّوس: «هاياش أمان لّان داد، ئيس ئلّا شا نّا يتكّان ئنݣري د ـ ؤغبّز؟»
37 a
38 داي يسبدّ ؤرݣاز لكوتّشي، ئضر نتّا د ـ فيليبّوس غر أمان، أها يغبّزث فيليبّوس.
39 نتّا فّغندّ زݣ وامان، ياسي رّوح ن - ربّي فيليبّوس زݣ ثاما ن ـ ؤرݣاز، ؤر ياد أرث ئتّانّاي. ئدّو ورݣاز ئبردان نس ئفرح.
40 ئيد فيليبّوس يوفانّ ئخف نس ݣ - ثمدينث ن - أشدود. داي يكّر ئدّو أر ئتبرّاح س ـ ئنغميسن ژيلنين خف لماسيح ݣ ـ ثمدينين كول ألّيݣ نّييوض غر قايصاريّا.