7
أوال ن - ستيفانوس
1 داي يسقسا ونمغور ن ـ ثدّارث ن ـ ربّي ستيفانوس ئنّاياس: «ئيس ئصحا ؤياد نّا غيفش نّان ئنيݣان؟»
2 ئرار غيفس ستيفانوس أر ئتّيني: «سّغداث أيايثما د - ئخاثارّ نّخ كول: هاثين ئفّغد ربّي باب ن ـ لعزّ غر ئبّاثنخ براهيم لّيݣ ئزدغ ݣ - ثمازيرث ن ـ ئنݣر ن ـ سين ئسافّن a داث ن - مايد ئمّوتّي غر ثمدينث ن - حاران.
3 داي ينّاياس: "زري ثمازيرث نش د - لاهل نش، ثدّود غر ثمازيرث نّا دّيخ أداش سنعثخ".
4 أها يكّر سيدنا براهيم ئݣّادج زݣ ثمازيرث ن - ئكّلدانين ئدّو يزدغ ݣ - حاران. ضارث ن - مايد ئمّوث ئبّاس، ئسموتّيثيد ربّي زݣ سّييس غر ثمازيرث أد نّاݣ ثزدغم كونّي دغي.
5 أها وراس ئوشي زّيكس أود لقرط، أود ماني ݣ ـ ئسروس أضار. ماشان ئقاولاس أداس تّيوش أتّݣ ثينس، ثيݣ ثين ثاروا نس فّيراس، واخّا ثيد يوفا لحال لوقث نّا يسول ؤر يورو.
6 ئسيولاس ربّي ديخ ئنّاياس: "ثدّا ثاروا نش أتزدغ ݣ - شان ثمازيرث ثابرّانيث ݣين ديكس ئسمغان، تّوكرفصن ربعميّا ن - ؤسݣّاس.
7 ماشان دّيخ أد عاقبخ لقوم نّا غاثن ئݣين د - ئسمغان. فّير ن - ؤينّا، دّان أد فّغن زݣ ثمازيرث نّا دّوند أد ئي عبدن ݣ - وانسا أد".
8 داي ينّاياس ربّي ئي سيدنا براهيم أد ئزݣن ئي يوثمان ݣ ـ واراو نس حما أد ئيݣ ؤزݣن ثماثارث خف ثاضا نّا يݣا أݣيدس. نتّا يورو سيدنا براهيم ئسحاق، ئزݣناس ݣ - واسّ ويس ثمانيا. ئزݣن ئسحاق ئي يعقوب، ئزݣن يعقوب ئي واراو نس س - ثناعش ݣانين لجدود نّخ ئمزوورا».
9 «د ـ سيدنا يوسف ئݣا يوكّ زّيكسن، حسدنث أيثماس كّرن زّنزينث أها يݣ ئسمغ ݣ - ثمازيرث ن ـ ميصر، ماشان ئلّا ربّي أݣّيدس.
10 ئفوكّوث زݣ ثماريوين نّا غيفس ئكّان كول، ئوشاس ثانژّي داث ن - فرعون أݣلّيد ن ـ ميصر. داي يرضو غيفس فرعون أها يݣيث د - أنبّاض خف ثمازيرث ن - ميصر د - أنبداد خف ؤينّا يݣان وينس كول.
11 شوي يكّر بوهيّوف ݣ - مايد ئݣان أنسا ݣ ـ ثمازيرث ن ـ ميصر د - كنعان، ثكّ ثمارا ثخاثارث خف لجدود نّخ د ـ واراو نسن ئدّخ ؤر ؤفين ماي تّشان.
12 نتّا يسلّا سيدنا يعقوب ئيس لّان ييردن ݣ ـ ميصر، يازن لجدود نّخ غر ديسّ ثيكّلث ثامزواروتّ.
13 ݣ - ثوادا نسن ثيسّ سناث ئسّيكز سيدنا يوسف ئخف نس ئي يايثماس، ياغول فرعون ئسّن ماي مسن أيث ؤخام نس.
14 داي يازن سيدنا يوسف غر ئبّاس يعقوب أدّ ئدّو نتّا د - لاهل نس كول، ئلين س - خمسا ؤسبعين ن - يوكّ.
15 أها يضر سيدنا يعقوب غر ميصر نتّا د - واراو نس، زدغن ديݣس ألّيݣ مّوثن.
16 تّورارينث لݣنازاث نسن غر شاكيم، تّومضلن ݣ - ثمضلث نّا يسغا سيدنا براهيم زݣ ثقبيلث ن ـ أيث حمّور».
17 «داي لّيݣ ثدّجّاوار لوقث نّاݣ ئتݣّا ربّي أينّاس ئقّاول ئي سيدنا براهيم، يوفاد لحال ميدّن نّخ عدّان شايݣان ݣ - ميصر.
18 شوي أر ئتّنباض يان ؤݣلّيد ضنين خف ثمازيرث ن ـ ميصر ؤر ئسّين أود ئميقّ خف سيدنا يوسف.
19 ئيݣ ثاخندالّاسث ئي لجدود نّخ، ئسيكّ غيفسن ثمارا، ئݣاسن دّرع أد ݣرين س ـ ثسلمييوين نسن حما أد مّثنث.
20 داي ݣ - لوقث نّا أݣ ئلولا سيدنا موسى. ئوشاس ربّي زّين عنوݣّا، ئݣم ݣ - ثادّارث ن - ئبّاس شراض ن - وايورن.
21 نتّا تّوژيرن أيث ؤخام نس ݣرين ئيسّ، داي ثافث ئلّيس ن - فرعون ثاسيث ثسّݣميث ثݣيث د - أمّ ممّيس.
22 ئلمد سيدنا موسى ثوسنا ن - أيث ميصر، ياغول ئجهد ݣ - ؤينّا أر ئتّيني د ـ ؤينّا أر ئتݣّا.
23 لّيݣ غيرس ثلّا ربعين ن - ؤسݣّاس، ئخمّم أد ئدّو أد ئسّيݣ خف لحالث ن - ميدّن نس ثاروا ن ـ إسرائيل.
24 يان واسّ، يانّاي يوكّ ديكسن أرث ئتّكرفاص يان ؤميصري، داي يكّر غيفس أها ينغ أميصري.
25 ئغال ئيس دّان ميدّن نس أد فرون ئيس ئدّا ربّي أثن ئفوكّا خف ؤفوس نس، ئميل نيثني ؤر فرين شا.
26 س - أسكا نس، يانّاي سينّ زݣ ميدّن نس أر تّناغن ئنݣراتسن، ييري أثن ئسمصالاح أها ينّاياسن: "أييرݣزن، ماخ أليݣ دا تّناغم، هاثين ثݣام أوماثن؟"
27 ماشان ئدحيث ؤنّا أر ئتعدّان خف ؤسمون نس أها ينّاياس: "ماش ئݣان أد غيفنخ ثنبضّ أها ثحشمد غيفنخ؟
28 ئيد ئيس ثريد أد ئي ثنغد أكيسّ ثنغيد أميصري أسّنّاط؟"
29 نتّا يسلّا سيدنا موسى ئي وياد، داي يرول غر ثمازيرث ن - مديان. ئݣنّ ديكس أبرّاني، يارونّ ديكس سينّ ن ـ ئشيرّان».
30 «لّيݣ ثزري ربعين ن - ؤسݣّاس، ئفّغد يان لمالاك غر سيدنا موسى ݣ ـ يان ؤحدّيق ن ـ لعافيث ياغن ݣ - يوث ن ـ ثزݣّوارث ݣ ـ لخلا ن - عاري ن - سينا.
31 لّيݣ ينّاي سينا موسى أينّا يهبض، داي غاس يتّوجي غر ثزݣّوارث حما أد ئنژو مزيان، ئسلّا ئي مولانا ينّاياس:
32 "هاثين نكّين ربّي نّا أر تعبادن ئمزوورا نش، ربّي نّا أر ئتّعباد براهيم د - ئسحاق د - يعقوب". داي يݣّد سيدنا موسى ثاسيث ثرݣاݣيتّ أها ؤر ياد ئغي أد ئراعا غر ثزݣّارث.
33 داي ينّاياس مولانا: "كّس ئدوكا نش ئدّخ هان أنسا نّاݣ ثبدّيد ئزدّيݣ، لّيخ ديݣس.
34 هاثين أنّايخ ثمارا نّا دا يتكّان خف ميدّن ئنو ݣ - ميصر، سلّاخ ئي ؤندّور نسن أها ضرخدّ أثن فوكّاخ. دغي أورا، دّيخ أش رارخ غر ميصر"».
35 «هاثين سيدنا موسى ياد س ـ ئخف نس أيد ؤر رين ميدّن نس أها نّاناس: "ماش ئݣان أد غيفنخ ثنبضّ أها ثحشمد غيفنخ؟" نتّا أيدّ يوزن ربّي أد ئݣ أنمغور نسن أها يفوكّوثنيد س - لعوان ن - لمالاك نّا غيرس دّيفّغن ݣ - ثزݣّارث نّاݣ ثاغ لعافيث.
36 نتّا أي ثنيد ئسّوفغن زݣ ميصر س ـ شيݣّان ن - لعجايب د ـ لموعجيزاث نّا ديكس ئݣا، ئݣّيثنث أود ݣ ـ لبحر أزوݣّاغ، د ـ ݣ ـ لخلا ربعين ن ـ ؤسݣّاس.
37 د - سيدنا موسى أيد ئنّان ئي ثاروا ن ـ إسرائيل: "ئدّا مولانا ربّي نّون أداوندّ يازن يان نّبي غاس ئمشينّا ييد يوزن نكّين".b
38 د ـ نتّا أيد ئلّان د ـ ميدّن نّخ ݣ - لخلا، ئيݣ أمازان ئنݣراتسن د - لمالاك نّا أراس ئساوالن خف عاري ن - سينا، يامژد زّيكس ئواليون نّا دا ياكّانين ثودرث حما أداخ ثنيد ئصّيوض.
39 ئميل ؤر رين ئمزوورا نّخ أداس ݣين س ـ رّاي ئي سيدنا موسى أها ؤرث رين، أر تّينين أوايد ياغولن غر ميصر.
40 داي نّاناس ئي هارون: "عديلاخ شان ئيد ربّي أداخ سنعاثن أبريد ئدّخ ؤر نسّين مايداس ئجران ئي موسى ياد نّاخ دّيسّوفغن زݣ ميصر".
41 أها عديلن لوقث نّا يان لاصنام ئݣان أم ؤݣندوز، غرصناس ئي ثمغروصث، أها فرحن س - ؤينّا عديلن س ـ ئفاسّن نسن.
42 داي يبرّم زّيكسن ربّي، يادجّيثن أر تعبادن ثافوشث د ـ وايور د ـ ييثران ئمشينّا ئتّيارين ݣ - لشثاب ن - لانبيا: "أميدّن ن - إسرائيل، ئيد نكّين أمي ثݣام ثيمغراص نغد ئي ثوشام ثوكّيوين ربعين ن - ؤسݣّاس نّا ثكّام ݣ - لخلا؟
43 ئهي، ماشان ثيويمتّ غاس ݣ ـ لاصنام نّون نّا ثوسيم: ثاخامث ن - مالوخ، د - ييثري ن - ربّي نّون رامفان نّا ثعديلم أرثن تّعبادم. خف ؤياد دّيخ أكونينّ زلخ ؤنينّ ئي ثمازيرث ن - بابيلون"».
44 «أها أسين ئمزوورا نّخ أݣيدسن ݣ ـ لخلا ثخامث نّا داسن ئسنعاثن ئيس ئلّا ربّي أݣيدسن. ثتّوعديل ئمشينّاس ئنّا ربّي ئي سيدنا موسى لّيݣ أستّ ئسنعث.
45 فّير ن ـ ؤينّا، أمژنت زّيكسن واراو نسن ݣانين لجدود نّخ، أسينت أݣيدسن لّيݣ كشمن ثمازيرث ن - لݣنوس نّا يسّوفغ ربّي زݣ داثاسن دّاو ن ـ ثنباطّ ن - ياشوع. ثقّيم غورسن ديسّ أر لوقث ن - سيدنا داود.
46 ئرضو ربّي خف سيدنا داود، داي يتّراس ئي ربّي أث يادجّ أد ئبنو شان ثدّارث نّاݣ تّعبادن ميدّن ربّي ن ـ يعقوب
47 ئميل ݣ ـ ثينݣيرا، سيدنا سوليمان أيداس ئبنان ئي ربّي ثادّارث.
48 ماشان ربّي أنافلّا ؤر دا يزدّغ ݣ - ثيدّار نّا يعديل بنادم. ئمشينّا ينّا نّبي نّا ينّان:
49 "ئنّا ربّي: أجنّا أيد ئݣان لعرش ئنو، ئيݣ واشال أنسا نّاݣ دا سروسخ ئضارّ ئنو. ئوا ماتّا ثادّارث نّا ثدّام أد ئي ثبنوم؟ د - ماتّا ودغار نّاݣ تسݣونفاخ؟
50 ئيس ؤر ئيد نكّين أيد ئعديلن أياد كول نّا يلّان؟"».
51 ئزايد ستيفانوس ئنّاياسن: «هاثين عصاناون وانّليثن، ؤر ثريم أتّ رژمم ؤلاون نّون د ـ ئمجّانّ نّون ئي واوال ن ـ ربّي. غاس أم كونّي أم لجدود نّون، ثسولم دا تّنالام رّوح ن - ربّي.
52 مان ݣ ـ لانبيا أيد ؤر ؤمريّثن لجدود نّون؟ نغان وينّا كاشفنين ئيس ئدّا أدّ ئدّو ؤفرضي نّا يمنان داث ن ـ ربّي، نّا ثغضرم أها ثنغيمث.
53 كونّي أيد يومژن شّرع ن - ربّي نّاود يوزن د ـ لمالايكاث، ئميل ؤر داث تّضاعم؟».
منغيوث ن - ستيفانوس
54 نتّا سلّان أيث لمݣليس ئي وينّا ينّا ستيفانوس، أها يطيّراسن شايݣان، قّيمين أر غيفس سمّغژاژن ثيغماس.
55 ماشان ئهزّا ستيفانوس ألّن نس غر أجنّا، د ـ نتّا يعمّر س - رّوح ن - ربّي، أها يانّاي لعزّ ن - ربّي د - سيدنا عيسى يلّا يبدّا خف ؤفاسي ن - ربّي.
56 داي ينّا: «راعيواث، هاثين دا تّانّايخ أجنّا يرژم د - ممّيس ن - بنادم ئبدّا خف ؤفاسي ن - ربّي».
57 داي قّنن أيث لمݣليس ئمجّان نسن أها سغويّن س - ؤينّامي غين، حوفن غيفس كول نسن.
58 ژّوغرنث غر برّا ن - ثمدينث، قّيمين أر ثكّاثن س ـ ئنݣما حما أث نغين. كّسن ئنيݣان ئژنّار نسن سيرسنثن ثاما ن - يان ؤعرّيم داس تّينين شاوول حما أداسن ثن ئحضو.
59 لّيݣ أر كّاتن ستيفانوس س - ئنݣما، أر ئقّار أر ئتّيني: «أمولانا عيسى أوينّ رّوح ئنو».
60 داي يتّوتّي خف ئفادّن نس أها يسغويّ ئنّا: «أمولانا غفراسن أياد نّا ݣان». غاس ئنّا ستيفانوس أياد ئسّوفغ ئمان.