6
سبعا ن ـ ئرݣزن تّوسثين حما أد سعاونن ئمازانّ
1 داي ݣ ـ ووسّان نّا لّيݣ عدّان ئمومنّ شايݣان، كّرن ووداين ئبرّانين أر تشثوان خف ؤداين أيت تمازيرث ئدّخ ؤر أر تّاكّان ئي نّامي مّوثن ئرݣزن زّكسن أمور نسنث زݣ لموعاوناث ن - كويّاس.
2 داي غريندّ ئمازانّ س - ثناعش ئي وݣراو ن ـ ئمومنّ كول أها نّاناسن: «هاثين ؤراخ ئعديل نوكني أنزري أبرّح س ـ واوال ن ـ ربّي، نقّيم أر نبطّو لموعاواناث.
3 ئوا سثياث أيايثما سبعا ن - ئرݣزن زّيݣون، ئتّواسّنن ئيس ݣان لمعقول أها عمّرن س - رّوح ن - ربّي ثيلي غورسن ثانژّي، داي نݣيثن أد قّابلن ئسكّين أد.
4 ئيد نوكّني ندّا أنحضو تژالّيت د ـ ؤبرّح س ـ واوال ن ـ ربّي».
5 داي يعجباسن رّاي ن ـ ئمازانّ كول نسن، أها سثين ستيفانوس ئݣان أرݣاز غر ئلّا ليمان أخاثار ئعمّرن س - رّوح ن - ربّي، سثين فيليبّوس، د ـ بوروخورس، د ـ نيكانور، د ـ تيمون، د ـ بارميناس، د - نيقولاوس ئݣان زݣ أنطاكيّا، نّا يثفارن دّين ن ـ ووداين مشثا أياد ياغول فّير ن ـ ؤينّا أر ئتّامن س ـ سيدنا عيسى.
6 داي أويند ئمومنّ سبعا ياد نّا سثين غر داث ن - ئمازانّ، سيرسن غيفسن ئمازانّ ئفاسّن نسن أها ژّالّين زݣ ثنيلا نس.
7 داي أر ئتساقّا واوال ن - ربّي ݣ ـ مايد ئݣان أنسا، أر تعدّون ئمومن شايݣان ݣ - لقدس، أمنن أود شايݣان ن ـ ئنبدادن ن ـ ثدّارث ن ـ ربّي.
ستيفانوس ئتّييمژ
8 ييلي ستيفانوس ئݣا ديكس ربّي شايݣان ن ـ لباراكا، ئوشاس جّهد أد ئيݣ لموعجيزاث د ـ لعجايب ثيخاثارين ئنݣر ن - ميدّن.
9 داي كّرن يان واسّ ييتس ن ـ ووداين زݣ لقيراوان د ـ ليسكانداريّا، ݣانين زݣ ثمزݣيدا نّامي دا تّينين "ثيمزݣيدا ن ـ ئسمغان تّورژمنين" د ـ ييتس ضنين ݣانين زݣ كيليكيّا د - أسيّا قّيمين أر تمغانّان د ـ ستيفانوس.
10 ماشان ؤر غين أث ئرّون س ـ ثانژّي نّاس ئوشا رّوح ن ـ ربّي ݣ ـ واوال.
11 داي كّرن سحورّشن ييتّس ن - ميدّن أد ئنين: «هاثين نسلّاياس ئي ستيفانوس أر ئتقّيس أينّا ؤر ئرحلين خف سيدنا موسى د - ربّي».
12 داي سكّرند غيفس س ـ ؤياد نّا نّان ميدّن د - ئخاثارّ د - ئسّلمادن ن - شّرع، كّرن أمژنث ژّوغنث غر لمݣليس.
13 أها أويند ئنيݣان ن - ثحلّال حما أد غيفس ئنين: «هان أرݣاز أد ؤر دا يتبدّا زݣ واوال نّا ور ئحلين خف ثدّارث ن ـ ربّي د - شّرع ن ـ سيدنا موسى.
14 د ـ نوكني نسلّاياس دا يتّيني يدّا واد نّامي دا تّينين عيسى وناصيرا أد ئردل ثدّارث أد ن ـ ربّي أها يبدّل لقاعيداث نّا نكّوسا زݣ سيدنا موسى».
15 داي سموقّلن وينّا لّانين كول ݣ - لمݣليس ݣ ـ ستيفانوس أها يانّاين ؤودم نس ئݣا أمّ وين شان لمالاك.