5
حانانيا د - سافيرا
1 ييلي أود يان ؤرݣاز أراس تّينين حانانيا، ئزّنزا نتّا د - ثمطّوط نس سافيرا يان ييݣر،
2 ماشان ئسّينف شا زݣ واثيݣ ن - ييݣر ئي يخف نس، ثيلي ثمطّوط نس ثسّن، أها ياويد أينّا يقّيمان ئي يمازانّ أمّيد غاس أينّا أس ثيزّنزا.
3 داي ينّاياس بطرس: «أحانانيا، مّاخ ألّيݣ ثودجّيد شّيطان أد ئعمّر ؤول نّش أها ثسحيلّلد خف رّوح ن - ربّي، ثسّينفد شوي زݣ واثيݣ ن - ييݣر ئي يخف نش؟
4 ماخ ئيس ؤر ئيد وينش أيد ئݣا داث ن ـ ماي تّزّنزيد، د ـ ضارث ن ـ ماي تزّنزيد، أينّاس تزّنزيد كول وينش أيد ئݣا أد ئيسّ ثݣد أينّا ثريد. ئوا ماخ ألّيݣ ثدميد لغشّ ݣ ـ وول نش؟ هاثين ؤر ئيد ميدّن أخف ثسحيلّلد ماشان خف ربّي».
5 غاس ئسلّا حانانيا ئي يواليون أد، ئتوتّي س ـ أشال ئمّث. داي ݣّدن شايݣان وينّا سلّانين كول ئي وياد.
6 دّوند ييتس ن - ئعرّيمن كّفننث، أسينث غر برّا أوينث أث مضلن.
7 زرينث أم شراطّ ن - ثاسّاعين، ثدّود ثمطّوط ن ـ حانانيا ؤر ثسّين مايد ئجران.
8 داي يسقساتّ بطرس ئنّاياس: «ئنيي، ئيد أثيݣ أد أس ثزّنزام ئيݣر؟» أها ثنّاياس: «ئييّه، أثيݣ نّا أس ثنزّنزا».
9 داي ينّاياس بطرس: «مّاخ ألّيݣ ثمساساد شمّ د - ؤرݣاز نّم أتغشّام رّوح ن - ربّي؟ هان وينّا مضلّين أرݣاز نّم ئوضنض غر لباب، دّان أشم أسين أود شمّين».
10 داي ثتّوتّي ݣ - وانسا غر ئضارّ نس أها ثمّث. نتّا كشمندّ ئعرّيمن أفنتّيد ثمّوث، أسينتّ أوينتّ مضلنتّ ثاما ن - ؤرݣاز نس.
11 أݣراو ن ـ ئمومنّ س ـ سيدنا عيسى س ـ ماس لّان د - وينّا سلاّنين كول ئي مايد ئجران ݣّدن شايݣان.
لموعجزاث نّا يتّوݣان خف ئفاسّن ن ـ ئمازانّ
12 داي تّواݣنث خف ئفاسّن ن ـ ئمازانّ شايݣان ن - لموعجزاث د - لعجايب بنيد ن - ميدّن. ئلين وينّا أر تّامنّين س ـ سيدنا عيسى كول أر تمّݣراون ݣ - ؤسقّيف ن - سوليمان ݣين أمّ يوكّ.
13 أود يوكّ ؤر ئݣين زݣ ؤݣراو نسن ؤر أر ئتّزعيم أد غورسن ئدّو غر ديسّ، ماشان أر ثن توقّارن ميدّن.
14 أها أمنن شايݣان ن - ئرݣزن د - ثوثمين س ـ سيدنا عيسى، أمّون أݣيدسن.
15 داي كّرن ميدّن أرد تّاسين ئموضين نسن غر ئبردان، أرثن سروسن خف ئسدّارين د - ثيسّيوين حما أدّاي يزري بطرس، بار أتسّيغ غاس أود ثيلي نس شا ديكسن أها ثجّوجيث.
16 أر دتدّون شايݣان ن - ميدّن زݣ ثمدينين نّا يلّان ثانيلا ن - لقدس، أر دتّاسين ئموضينّ د - وينّا أر سغارن وادجّنون، أر تجّين كول نسن.
ئمازانّ ݣ - لحبس
17 ماشان أنمغور ن ـ ثدّارث ن ـ ربّي نتّا د ـ ئسمونّ نس ݣانين زݣ ثربيعث ن - ئصدّوقين ئنغاثن لحرّ ن ـ ئمازانّ،
18 داي كّرن أمژنثن ݣريثن ݣ - لحبس.
19 ماشان ݣّيض، يوزند مولانا يان لمالاك، ئرژم لبيبان ن - لحبس ئسّوفغ ئمازانّ أها ينّاياسن:
20 «دّوياث غر ثدّارث ن - ربّي، ثسيولم ئي ميدّن خف ؤينّا يݣان كول وين ثودرث أد ثوجديت د ـ ربّي».
21 داي ݣين ئمازانّ أينّاسن ئنّا لمالاك، دّون كشمن غر ثدّارث ن - ربّي ئسول لحال ؤر ئفّو قّيمين أر سّقران ميدّن.
داي يكّر ؤنمغور ن ـ ثدّارث ن ـ ربّي د - ئسمونّ نس سمونند ئخاثارّ ن ـ ووداين كول أد ݣين لمݣليس، أها أزنن أدّاوين ئمازانّ زݣ لحبس.
22 ماشان لّيݣ دّان ئعسّاسن غر لحبس، ؤر نّوفين ئمازانّ. أها ياغولندّ غر أيث لمݣليس،
23 نّاناسن: «هاثين نوفانّ لبيبان ن ـ لحبس رݣلن، د - ئعسّاسن لّان بدّان داثاسن، ماشان لّيݣ نرژم ؤر نّوفي أود يوكّ ديكسن جاج».
24 نتّا يسلّا ؤخاثار ن - ئعسّاسن ن ـ ثدّارث ن ـ ربّي د - ئنمغورّ ن ـ ثدّارث ن ـ ربّي ئي يواليون أد، داي رعبن أر تمسقسان خف مايد ئجران؟
25 شوي ئدّود شان يوكّ ئنّاياسن: «هان ئرݣزن نّا ثݣرام ݣ - لحبس لّان ݣ ـ ثدّارث ن ـ ربّي دا سّلمادن ميدّن!»
26 داي يدّو ؤخاثار ن - ئعسّاسن نتّا د - ئرݣزن نس راريند ئمازانّ بلا أداسن ݣين دّرع ئدّخ ݣّدن أثن نغين ميدّن س - ئژرا مش كرفصن ئمازانّ.
27 لّيݣ ثن سّكشمن سبدّينثن داث ن - أيث لمݣليس، ئنّاياسن ؤنمغور ن ـ ثدّارث ن ـ ربّي:
28 «ئيس ؤراون ننّي أد ؤسار ساوالاث ئي ميدّن خف عيسى ياد، أها ثكّرم أر ثسّلمادم ميدّن غيفس ݣ ـ مايد ئݣان أنسا ݣ ـ لقدس، ثيريم أداخ ثسّيسّيم منغيوث نس».
29 ئرار غيفسن بطرس د - ئمازانّ ضنين نّاناسن: «ئخصّاياخ أنضاع ربّي ؤر ئيد ميدّن.
30 كونّي ثنغام سيدنا عيسى لّيݣ تّوݣلم خف ئحنيݣن ن ـ ؤطّورق، ماشان ربّي نّا أر تّعبادن ئمزوورا نّخ ئسكّرثيد زݣ لموث.
31 أها يسّيليث غر أفاسي نس ئݣان أنسا ن ـ لعزّ، ئيݣّيث د ـ أنمغور د ـ وونّا يتّفوكّان بار أد ثوبن ميدّن ن ـ إسرائيل، تّوغفرنثاسن لمعصيّاث نسن.
32 د ـ نوكّني نݣا يينيݣان خف ؤياد كول، ئݣّيث أود رّوح ن - ربّي نّا يوشا ربّي ئي وينّا دا تّضاعنين أوال نس».
33 نتّا سلّان أيث لمݣليس ئي يواليون أد، أها يطيّراسن شايݣان ئرين أد نغين ئمازانّ.
34 ماشان ئلّا ديكسن يان ؤفرّيسي ئسم نس غامالائيل ئݣان أسّلماد ن - شّرع، أرث تّوقّارن ميدّن كول. ئكّر ئبدّ أها ينّاياسن ئي يايث لمݣليس أد سّوفغن ئمازانّ شوي غر برّا.
35 داي ينّاياسن: «أثاروا ن ـ إسرائيل، راراث لبال نّون ئي وينّا خف ثعوّلم أتّݣيم ئي يرݣزن أد.
36 ئيس ثتّوم توداس نّا يكّان مشثا أياد، أر ئتّيني خف ئخف نس ئݣا أخاثار، أها ثفارنث أم ربعميّا ن - ؤرݣاز، ماشان ئتّونغا داي مزلّاعن ئمسثفرّ نس كول أمّاني ؤر دجّين كّين.
37 فّير ن ـ ؤينّا، ئكّرد ياهودا أجاليلي ݣ - ووسّان نّاݣ أر ئتحاساب لمخزن أيث تمازيرث أها ثفارنث شايݣان ن - ميدّن، ماشان ئتّونغا أود نتّا داي مزلّاعن وينّاث ثفارنين كول.
38 ئوا مش ئي ثݣام دغي س ـ رّاي، كّاث س ـ تّيساع ئي ميدّن أد ثحيدماسن أد دّون، ئدّخ مش ديكّا وياد نّا دا سّلمادن زݣ ميدّن ؤر ئدّي أد ئقّيم.
39 ئيد مش ديكّا سثيتّ زݣ ربّي، هاثين ؤر تّيغيم أثن ثسبدّيم، غاس مش ثرام أتّنّاغم د - ربّي».
40 داي ݣين أيث لمݣليس س - رّاي ئي غامالائيل، غريندّ ئي يمازانّ، هرّسنثن أها نّاناسن أد ؤسار ساوالن خف سيدنا عيسى، رژمناسن.
41 داي فّغن ئمازانّ زݣ لمݣلس فرحن شايݣان ئدّخ ئثن يانّاي ربّي واثان أد تّوحقّرن خف سيدنا عيسى.
42 ئلين كّوياسّ أر سّلمادن ݣ - ثدّارث ن ـ ربّي د - ݣ - ثيدّار نسن. ؤر دجّين بدّين زݣ ؤبرّح ئيد سيدنا عيسى أيد ئݣان لماسيح ن ـ ربّي.