4
بطرس د - يوحنّا ݣ - لمݣليس ن ـ ووداين
1 ئسول بطرس د - يوحنّا أر ساوالن ئي ميدّن، بدّيند غيفسن ييتس ن - ئنبدادن ن ـ ثدّارث ن - ربّي، د - ؤخاثار ن - ئعسّاسن ن - ثدّارث ن ـ ربّي، د - ييتس ن - ئرݣزن زݣ ثربيعث ن ـ ئصدّوقّين.
2 ئطيّراسن شايݣان ئدّخ أر ئسّلماد بطرس د ـ يوحنّا ميدّن، أراسن تّينين هاثين دّان ئمتّين أد تكّرن زݣ لموث ئمشينّا ديكّر سيدنا عيسى.
3 أها يامژنثن ݣرينثن ݣ - لحبس أر أسكّا نس ئدّخ ييوض ياد ييض.
4 ماشان شايݣان زݣ وينّا سّغدنين ئي واوال نسن ؤمنن، أغولن وينّا دا تّامنّين س ـ سيدنا عيسى لّان س - أمّ خمسالاف ن ـ ؤرݣاز، بلا ثيوثمين د ـ ئشيرّان.
5 س - أسكا نس، مّݣراون ئخاثارّ ن ـ دّين، د - ئخثارنّ ن ـ ووداين د - ئسّلمادن ن - شّرع ݣ - لقدس،
6 ييلي أݣيدسن حنّان ئݣان أنمغور ن ـ ثدّارث ن ـ ربّي، ييلي قيافا، د ـ يوحنّا، د ـ أليسكاندر، د ـ ييتس ضنين نّا مسنين ئي ونمغور ن ـ ثدّارث ن ـ ربّي.
7 أويند بطرس د - يوحنّا، سبدّينثن داثاسن أها سقسانثن: «ماتّا جّهد نّاس ثجّوجيم أرݣاز أد، د ـ ييسم ن ـ مي أي ثسّخدمم؟»
8 داي يعمّر بطرس س ـ رّوح ن ـ ربّي أها يرار غيفسن ئنّاياسن: «أيينمغورّ نّخ د - ئخاثارّ نّخ،
9 مش ئيد ئيس داخ ثسقسام أسّا خف لخير نّا نݣا ئي وفاشال، د ـ ميمش أيد ئجّي،
10 ئوا ييسيناث كول نّون، ئسينن ميدّن ن - إسرائيل س ـ ماس لّان ئيس ئجّي ؤرݣاز أد نّا يبدّان داثاون س - ثنباطّ ن ـ ييسم ن - سيدنا عيسى لماسيح ؤنّاصيرا، نّا ثطّورقم كونّي خف ئحنيݣن، ماشان ئسكّرثيد ربّي زݣ لموث.
11 سيدنا عيسى ياد أخف ئتيينّا ݣ ـ لشثاب ن ـ ربّي:a "هان أژرو نّا ؤر ثريم أييبنّاين أيد ياغولن ئݣا ياژرو ن - ثغمرث".
12 هاثين ؤر ئلّي أود يوكّ نّاخ ئتفوكّان زݣ ؤينّاخ نّيقّان أغلّايينّ غاس سيدنا عيسى، ئدّخ ؤر ئلّي شان يوكّ ضنين ݣ ـ دّونيث كول نّا يوشا ربّي ئي ميدّن حما أثن ئفوكّا».
13 نتّا أنّاين أيث لمݣليس زّعامث ن - بطرس د - يوحنّا، داي هبضن ئدّخ سّنن ئيس ݣان ييتس ن ـ ئرݣزن ؤر قّرانين شا أمّ ؤماثا ن ـ ميدّن، أغولن سّنن ئيس كّان أر تّمونن د ـ سيدنا عيسى.
14 ماشان ؤر ؤفين ماي نّان ئدّخ ئلّا وفوشال نّا يجّين ئبدّا أݣّيدسن.
15 داي سّوفغن بطرس د ـ يوحنّا غر برّا ن ـ لمݣليس، قّيمين أر تمداشارن ئنݣراتسن،
16 أر تّمسقسان: «ماي نتّݣّا ئي يرݣزن أد؟ هان ئمزداغ ن - لقدس كول سّنن ئيس ݣان لموعجيزا ثخاثارث، ؤر نتّيغي أنيني ؤر ثجري.
17 ماشان حما أد ؤر ئتساقّا وياد أد ؤݣار ئنݣر ن - ميدّن، ئخصّاياخ أثن نسّيݣّد حما أد ؤسار ساوالن ئي ياود يوكّ خف عيسى زݣ ضارث ن ـ واسّا».
18 داي رارينثنيد غر جاج ن ـ لمݣليس أها نهرنثن أد ؤسار ساوالن ئي ياود يوكّ خف عيسى، ؤلا سّلمدن ميدّن غيفس.
19 ماشان ئنّاياسن بطرس د - يوحنّا: «ئوا مايداون ئضهرن كونّي، ئيد أد ييري ربّي أكون نضاع ماد أثنضاع نتّا؟
20 هاثين ؤر نتّيغي أنفسث أد ؤر نساوال خف ؤينّا نانّاي د - ؤينّامي نسلّا».
21 داي سّيݣّدنثن ديخ ألثو أها رژمناسن، ؤر ؤفين ميمش ݣان أثن كرفصن، ݣّدن أد سكّرن ميدّن ثيريتّ ئدّخ كول نسن أر تمجّادن ربّي خف ؤينّا يجران.
22 ئدّخ أرݣاز نّا يتّوجّوجين س ـ لموعجزا ياد ثلّا غورس ؤݣار ن ـ ربعين ن - ؤسݣّاس.
ثاژالّيت ن - ئمومنّ
23 غاس رژمن أيث لمݣليس ئي بطرس د - يوحنّا، أغولن غر ئسمونّ نسن أها قّيسناسن أينّاسن نّان ئنمغورّ ن ـ ثدّارث ن ـ ربّي د - ئخاثارّ ن - ووداين.
24 نتّا سلّان ئمومنّ كول ئي وينّا، كّرن أر تژالّان كول نسن أر تّينين: «أسيدي ربّي، أونّا يخلقن ئݣنّا د - واشال د - لبحر ؤلا ماي ديكسن ئلّان.
25 شݣّ أيداس ئسنعثن مشثا أياد س ـ رّوح نش ئي يبّاثنخ سيدنا داود أمازان نش أد ييني: "مّاخ ألّيݣ هيجن لݣنوس، أر ݣّارن ميدّن لحساباث نّا ؤر ئنفيعن شا؟
26 حبّلن ئݣلّيدن ن - دّونيث ئي يمنغي، أها مساسان ئنبّاضن خف مولانا د - لماسيح نّا يسثي".
27 أياد س ـ ئخف نس أيد ئجران ݣ - ثمدينث أد، لّيݣ ئمّݣراو ؤݣلّيد هيرودوس، د - ؤنبّاض بيلاطس لبونطي، د - ئبرّانين، د - ميدّن ن - إسرائيل حما أد ݣين ثامودّوت ئي سيدنا عيسى، أمزيلّز نش أزدّاي نّا ثݣيد د - لماسيح نّا ثسثيد.
28 أها ݣين أينّا ثزمّمد ياد س - ثنباطّ نش د - لخاضر نش أد ئجرو.
29 ئوا راعا أربّي دغي، هاثين دا تتݣالّان ديݣنخ. نوكّني نݣا يمزيلّزن نش، سعاوناخ أنيغي أنبرّح س ـ واوال نش س ـ طّايطّاي.
30 سوݣّزد ثوجيث زݣ غورش، ثݣد لموعجيزاث د - لعجايب حما أتسّمغورد ئسم ن - ؤمزيلّز نش أزدّاي سيدنا عيسى».
31 نتّا ژّولّان، ئرݣيݣي وانسا نّاݣ مّݣراون، داي تّوعمّرن كول نسن س - رّوح ن ـ ربّي، قّيمين أر تبرّاحن س ـ واوال ن - ربّي س ـ طّايطاي.
ثوشّرشا ينݣر ن ـ ئمومنّ
32 كول وينّا دا تّامنّين س ـ سيدنا عيسى ئموناسن رّاي ݣين أمّ يوكّ، أود يوكّ ديكسن أر ئتّينين هان أيدّا نس ئݣا وينس غاس نتّا، ماشان أر تشّورن أينّا غيرسن ئلّان كول.
33 ئلين ئمازانّ أر تّينين ئي ميدّن س - يان لجهد أخاثار ئيس ݣان ئنيݣان خف ثنشرا ن - سيدنا عيسى زݣ لموث، أها يݣ ديكسن ربّي لباراكا شايݣان.
34 أود يوكّ ديكسن نّامي يخصّا شا، ئدّخ كول وينّا غر لّان ييݣران نغد ئغرمان أر ثن زّنزان، أر دّتّاوين أثيݣ نسن
35 ئي يمازانّ، أر ثبطّون نثني أر أكّان ئي كّو يون أينّاس ئخصّان.
36 أمشيد أيد ئݣا يوسف نّامي أر قّارن ئمازانّ برنابا معنى "بو ثرݣازث" ئݣان زݣ ثقبيلث ن ـ أيث لاوي، ئلال ݣ ـ قوبروص،
37 ئلّا غيرس يان ييݣر ئكّر ئزّنزيث أها ياويد أينّاس ثيزّنزا ئي يمازانّ.