3
أجّوجي ن - ؤرݣاز ئفوشلن زݣ ئضارّ
1 يان واسّ، ئدّا بطرس د - يوحنّا غر ثدّارث ن - ربّي أد ژّالّين ثژالّيت ن - تّلاثا ن ـ ثدݣّاتّ.
2 داي هان ييتس ن ـ ميدّن ؤسيند يان ؤرݣاز ئفوشلن زݣ ئضارّ زݣّوس ئلولا، سرسنث ثاما ن ـ ثاݣّورث ن ـ ثدّارث ن - ربّي نّامي دا تّينين "ثاݣّورث ئغودان". كّويّاس دا ثيد تّاسين سرسنث ديسّ حما أد ئتتّر ئي وينّا دا كتشّمنين غر ثدّارث ن ـ ربّي.
3 لّيݣ يانّاي بطرس د - يوحنّا ران أد كشّمن، ئتّراسن شان صّاداقا.
4 حقّان ديكسن، أها ينّاياس بطرس: «سكسو ديݣنخ!»
5 داي يسموقّل ديكسن ؤفوشال، ئغال ئيس ران أداس ؤشين شا.
6 ئميل ئنّاياس بطرس: «ؤر غوري لفلوس، ماشان أداش ؤشخ أينّا غوري يلّان: س - ثنباطّ ن - سيدنا عيسى لماسيح ؤنّاصيرا، داش تّينيخ كّر بدّ أر تدّود!»
7 يامژ بطرس أفوشال زݣ ؤفوس نس أفاسي ئسبدّيث، أغولن ئضارّ نس د ـ ثكعّين نسن صحون ݣ ـ وانسا،
8 داي ينقّز ئبدّ خف ئضار نس أر ئتدّو. ئكشم أݣّيدسن غر ثدّارث ن - ربّي أر ئتدّو أر ئتّنقّاز س ـ ؤفراح أر ئتمجّاد ربّي.
9 أها يانّاينث وينّا لّانين ديسّ كول أر ئتدّو، أر ئتّمجّاد ربّي.
10 أكزنث ئيد نتّا أماثراو دّاخ أفوشال نّا أر ئتّغيمان ثاما ن - «ثݣّورث ئغودان» داي هبضن، قّيمين رعبن ݣ ـ ؤينّاس ئجران.
أوال ن - بطرس ݣ - ثدّارث ن ـ ربّي
11 ئسول ؤفوشال نّا يجّين ئنّض ݣ ـ بطرس د ـ يوحنّا ؤر أر أݣيدسن ئبطّو، أزّلين غورسن ميدّن كول غر أسقّيف ن ـ ثدّارث ن ـ ربّي نّامي دا تّينين: "أسقّيف ن ـ سوليمان" قّيمين هبضن.
12 نتّا يانّاي بطرس أينّا داي ينّاياسن: «أثاروا ن ـ إسرائيل، ماكون ياغن ألّيݣ ثهبضم ݣ - ؤياد؟ د ـ ماخ ألّيݣ دا ديݣنخ ثسموقّولم؟ ئيس ثغالم ئيس نجّوجي أرݣاز أد س ـ جّهد نّخ نغد ئدّخ دا نتعباد ربّي شايݣان.
13 هاثين ربّي نّا أر ئتعباد سيدنا براهيم د ـ ئسحاق د - يعقوب د ـ ئمزوورا نّخ أيد ئجّوجين أرݣاز أد حما أد ئسّمغور س ـ ؤمزيلّز نس سيدنا عيسى نّا ثوشام كونّي ئي ؤنبّاض بيلاطوس، أها ثنشرمث داثاس مغار ئعوّل نتّا أداس ئرژم
14 ئيّيه، ثنشرم سيدنا عيسى يݣان أزدّاي ن ـ ربّي نّا يمنان، أها ثتّرم زݣ بيلاطوس أداون دّيرژم ݣ ـ وانسا نس ئي بو لارواح.
15 ثنغام باب ن ـ ثودرث، ماشان ربّي يسكّرثيد زݣ لموث، د ـ نوكّني نݣا ئنيݣان خف ؤياد.
16 هاثين ليمان س - سيدنا عيسى أيد ئجّوجين أرݣاز أد نّا دا تّانّايم أها ثيسينمث، د - ليمان س - سيدنا عيسى أيداس ئوشان ثوجيث ئمشينّا ثانّايم كول نّون».
17 «دغي أيايثما، نكّين سّنخ ئيد أينّا ثݣام كونّي د - ئنمغورّ نّون ئي سيدنا عيسى ثݣامث ئدّخ ؤر ثفريم شا.
18 ماشان س ـ ؤياد، ئݣا ربّي أينّاس كاشفن لانبيا نس مشثا أياد لّيݣ نّان ئدّا لماسيح أد غيفس ثكّ ثمارا ياد كول.
19 ئوا ثوباث، ثاغولم غر ربّي حما أداون ئغفر لمعصيّاث نّون.
20 حما أد غيفون دّيسوݣّز مولانا ؤسّان ن - لهنا أدّاي أون دّيازن ديخ سيدنا عيسى لماسيح نّاون ئسثي ياد حما أد ئيݣ أمفوكّو نّون.
21 ماشان ئقّانثينّ أنّيقّيم ݣ - ؤجنّا أرد ياوض زّمان نّاݣ ئعدّيل ربّي كولشي أد ئيݣ ؤجديد، أم ؤينّاس كاشفن لانبيا نس منانين زݣ واهوّا.
22 هان سيدنا موسى ينّا: "ئدّا مولانا ربّي نّون أداوندّ يازن يان نّبي ييمشينّا ييد يوزن، ئدّا أد ئيݣ زݣ ميدّن نّون، ئوا سّغداث ئي وينّا يدّا أداون ييني كول.
23 ئيد ؤنّا ؤر ئرين أداس ئسّغد ئي نّبي ياد، ئدّا أد ئتّييكّس زݣ ميدّن ن ـ ربّي أها يتّوخلو"».
24 «أود نّبي صاموئيل د ـ لانبيا كول نّا ددّانين ضاراس كاشفن س ـ ؤينّا دا يتجرّون ݣ ـ ووسّان أد.
25 هاثين كونّي أمي ينّا ربّي ئي لانبيا نس أداون سيولن، ثامّوم ݣ ـ ثاضا نّا يقّاول ربّي ئي يمزوورا نّون لّيݣ أس ئنّا ئي سيدنا براهيم: "س ـ ييرو نش دّيخ أد ݣخ لباراكا ݣ ـ لݣنوس ن - دّونيث كول".
26 هاثين كونّي ديمزوورا أمي دّيوزن ربّي أمزيلّز نس سيدنا عيسى حما أد ئݣون ئيݣ لباراكا أدّاي دّيرار كّو يوكّ ديݣون زݣ لفعايل نس نّا خّانين».