2
أسوݣّز ن ـ رّوح ن - ربّي خف ئمومنّ
1 نتّا ييوض واسّ ن ـ لعيد ن ـ ووداين نّامي دا تّينين لعيد ن ـ خمسين، يافد لحال وينّا يومنّين س ـ سيدنا عيسى مونن كول نسن ݣ - يان وانسا.
2 شوي سلّان ئي شان ؤصوض ئݣان أمّ وين ؤزوو يجهدن ئكّاد زݣ ييݣنّا، أها سلّاناس وينّا لّانين كول ݣ ـ ثدّارث نّاݣ قّيمان.
3 داي فّغند غورسن شان ييلّساون ݣانين أم وين لعافيث، أها بضون، ئرس خف كّو يوكّ ديكسن يان ييلّس.
4 داي تّوعمّرن كول نسن س - رّوح ن - ربّي، قّيمين أر ساوالن س ـ واوال ن ـ لݣنوس ضنين ئمشينّا أسن ئسنعث رّوح ن ـ ربّي أد ئيسّ سيولن.
5 يافد لحال لقدس ݣ ـ ووسّان نّا ثعمّر س ـ ووداين نّا دا تّعبادنين ربّي، دّاند زݣ مايد ئݣان ثامازيرث ݣ ـ دّونيث.
6 لّيݣ سلّان ئي وينّا، أزّليند شايݣان زّيكسن حما أد أنّاين مايد ئجران، داي رعبن ئدّخ كّو يوكّ ديكسن أر ئتسلّا ئي يمومنّ أر ساوالن س - واوال ن ـ ثمازيرث نس.
7 قّيمين هبضن، أر تّميينين ئنݣراتسن: «ئيس ؤر ئيد أيث لجاليل أيد ݣان ويد كول نّا دا ساوالنين؟
8 ئوا ماكّاس ألّيݣ دا يتسلاّ كّو يوكّ ديݣنخ ئي واوال ن - ثمازيرث نس؟
9 مشد ييتس زّيݣنخ ݣان زݣ ثمازيرث ن ـ فارثيّا، د ـ مادّيا، د ـ عيلام. د ـ ييتس ضنين ݣان زݣ ثمازيرث ن - ئنݣر ن ـ سين ئسافّن، د ـ ثمازيرث ن ـ أيث ياهودا، د ـ كابدوكيّا، د ـ بونتوس، د ـ أسيّا.
10 ئلين ديݣنخ وينّا ددّانين زݣ ثمازيرث ن ـ فريجيّا، د ـ بامفيليّا، د ـ ميصر، د ـ زݣ ثنيلا ن ـ لقايراوان ݣ ـ ليبيا. ئلين ديݣنخ شايݣان ن ـ وينّا ددّانين زݣ روما
11 لا يوداين ؤلا يبرّانين نّا ثفارنين دّين ن ـ ووداين، ئلين أود وينّا ددّانين زݣ ثݣزيرث ن ـ كريتّ د ـ ثميزار ن ـ واعرابن. واخّا ييمشيسّ كّو يوكّ ديݣنخ أراسن ئتسلّا دا ساوالن س - واوال ن ـ ثمازيرث نس خف ئسكّين ئخاثارّ نّا يݣا ربّي».
12 داي هبضن كول نسن ؤر فرين شا ݣ ـ ؤينّا يجران، قّيمين أر تّمسقسان ئنݣراتسن: «ئوا ماتّا وياد؟»
13 ئيد ييتس ضنين أر غيفسن تصّان أر تّينين: «هاثين ويد فّغن ئخفاون نسن س ـ شّراب».
بطرس دا يساوال ئي ميدّن خف ئنغميسن ژيلنين
14 داي يبدّ بطرس نتّا د ـ ئمازانّ س ـ حضاعشّ ئسيول ئي ميدّن س - ؤغويّي ينّاياسن: «أيايثما يوداين د - أوينّا لّانين كول ݣ - لقدس، راراث لبال نّون ئي وينّا دّيخ أداون ئنيخ حما أتّيسينم مايد ئجران سثيتّ:
15 هاثين ميدّن أد ؤر فّيغن شا ييخفاون نسن س ـ شّراب ئمشينّا ثغالم، ئدّخ بحرا لتسّعود ن - ثيفاوث أياد».
16 «ماشان أياد نّا ثنّايم ثيفاوث أد ئكاشف ئيسّ نّبي يوئيل مشثا أياد لّيݣ ئنّا:
17 "ئنّا ربّي: ݣ - ووسّان ئنكّورا دّيخ أد ؤشخ زݣ رّوح ئنو ئي ميدّن كول، داي أر تكاشافن ئشيرّان نّون د - ثشيرّاثين نّون س ـ واوال ئنو، أها يانّاين ئعرّيمن نّون أينّا غاسن سنعثخ، وارݣان ئمغارن نّون ثيويرݣا.
18 ݣ - ووسّان نّا، دّيخ أد ؤشخ زݣ رّوح ئنو أود ئي يسمغان ئنو، ئوثمان د ـ تّوثمين، أها أر تكاشافن كول نسن س ـ واوال ئنو.
19 دّيخ أد ݣخ لموعجزاث سافلّا ݣ - ؤجنّا، د - لعجايب سادّا ݣ - واشال، دّان أد ئلين ئدامّن د - لعافيث د - شايݣان ن - واݣّو.
20 ثدّا ثافوشث أتسّولس، ئزويغ وايور أم ئدامّن داث ن - ماي ديتدّو واسّ ن - مولانا يݣان أسّ أخاثار ن ـ لعزّ.
21 ماشان كول ونّا يغران ئي مولانا يدّا أد ئفوكّا"».
22 ئزايد بطرس ئنّاياسن: «أثاروا ن ـ إسرائيل، سّغداث ئي ماي ريخ أداون ئنيخ: هاثين ئصّوحاياون ربّي ئيس دّيوزن سيدنا عيسى س - لموعجيزاث د - لعجايب د ـ تّميثار نّا يݣا خف ؤفوس نس ئنݣراثون، ئمشينّا ثسّنم كول نّون.
23 د ـ ربّي س ـ ئخف نس ئلّا يزمّم ياد زݣ ثيزويري أينّا يدّان أد ئجرو، ييلي ئسّن ئيد أتّامژم، ثوشيمث ئي وينّا فّغنين شّرع ن ـ ربّي أداس دّزين ئمسمارّ ݣ ـ ئفاسّن د ـ ئضارّ خف ئحنيݣن ن ـ ؤطّورق، أها نغينث.
24 ماشان ئسكّرثيد ربّي زݣ لموث، ئفوكّوثيد زݣ ثنباطّ ن ـ لموث ئدّخ ؤر تّيغي أثينّ ثامژ.
25 هاثين ئكاشف غيفس سيدنا داود أها ينّا: "دا تّانّايخ مولانا داثي كويّاس، ئلّا خف ؤفاسي نو حما أد ؤر تݣّدخ.
26 خف ؤياد ئفرح وول ئنو أرش ئتمجّاد ؤقمو نو س ـ ؤفراح، داي أود صّاحث ئنو ثدّا أتّسݣونفا س ـ رّجا نّا غوري يلّان.
27 ئدّخ ؤر ثدّيد أدي ثادّجّد ݣ - وامّاس ن - ئمتّين، ؤلا ثزريد أزدّاي نش نّا ثسثيد أد ئرشو ݣ ـ ثمضلث.
28 ثسنعدّي أبريد ن - ثودرث، أها ثدّيد أتّعمّرد ؤول ئنو س - ؤفراح أدّاي ثيليد أݣيدي"».
29 ئزايد بطرس ئنّياسن: «أيايثما يخصّا أداون ئنيخ س ـ طّايطاي، هان ئبّاثنخ نخ أمزوارو سيدنا داود ئمّوث أها يتّومضل، د - ثمضلث نّس ثسول غورخ غر دغي.
30 سيدنا داود ئݣا نّبي، يسين ئيس أس ئقّاول ربّي س ـ ثݣالّيت ئيس ئدّا يوكّ زݣ ييرو نس أد ئيݣ أݣليد ئمشينّا ثيݣا نتّا.
31 د ـ سيدنا داود ئسنعثاس ربّي أينّا غا يجرون، داي يكاشف س ـ ثنشرا ن - لماسيح لّيݣ ئنّا: "ؤرث يودجّي ربّي ئنݣر ن - ئمتّين، د ـ لݣنازث نس ؤر ثرشي ݣ ـ ثمضلث".
32 د - سيدنا عيسى ياد س ـ ئخف نس ئسكّرثيد ربّي زݣ لموث، د - نوكّني كول نّخ نݣا ئنيݣان خف ؤياد.
33 لّيݣ ئيث ئسّيلي ربّي ئبّاس غر ئديس نس أفاسي ئݣان أنسا ن ـ لعزّ، ئوشاس رّوح نس ئمشينّا ئقّاول أها يسوݣّزثيد غيفنخ ئمشينّا دا تّانّايم دغي أراس تسلّام.
34 داي ئدّخ سيدنا داود ؤر يولي غر ئݣنّا، ؤر ئيد ئخف نس أخف أر ئساوال لّيݣ ئنّا: "ئنّا مولانا ئي مولانا نو: قّيم خف ؤفاسي نو
35 أرد ݣخ ئنضليبن نش دّاو ن ـ ئضارّ نش"».
36 «ئوا يخصّاياون أثاروا ن ـ إسرائيل كول نّون أتّيسينم ئيد سثيتّ سيدنا عيسى ياد نّا ثطّورقم خف ئحنيݣن أيد ئسثي ربّي ئيݣّيث د ـ مولانا د ـ لماسيح».
37 نتّا سلّان ئي وياد نّاسن ئنّا بطرس، ئقّيم ديكسن لحال أها سقسانث نتّا د - ئمازانّ ضنين نّاناسن: «ماي نتݣّا أيايثماثنخ؟»
38 داي ينّاياسن بطرس: «ثوباث ئي ربّي، د - كّو يوكّ ديݣون أد ئتّوغبّز ݣ ـ وامان س - ييسم ن - سيدنا عيسى لماسيح حما أداون ئغفر ربّي لمعصياث نّون. داي يدّا أداون ئتّوش رّوح ن ـ ربّي.
39 ئدّخ أياد ئقّاولاونث ربّي كونّي د ـ ثاروا نّون، ئقّاولث أود ئي لݣنوس ضنين، ئي وينّا يسثي كول مولانا ربّي نّخ أد ݣين وينس».
40 ئقّيم بطرس أراسن ئساوال شايݣان أرثن ئتّنهو أراسن ئتّيني: «فوكّوياث ئخفاون نّون زݣ لعيقاب نّا نّيقّان لجيل أد أنفراراغ!»
41 كول وينّا يومنّين أوال ن ـ بطرس تّوغبّزن ݣ ـ وامان، داي ݣ ـ واسّ نّا ثزايد أمّ تلتالاف ن ـ يوكّ ݣ - ؤݣراو ن ـ ئمومنّ.
42 ئلين كويّاس أر سّغادن غر أينّا أراسن سّلمادن ئمازانّ، ݣين كول نسن أم واوماثن، أر تشّارن أغروم حما أد شثين سيدنا عيسى، أر تژالّان.
43 أها تّوݣينث شايݣان ن - لعجايب د - لموعجيزاث خف ئفاسّن ن - ئمازانّ، داي هبضن ميدّن كول.
44 أر تّمونن ئمومنّ كول نسن ݣين أمّ يوكّ، أر تشّارن أينّا غورسن ئلّان،
45 أر زنزان ئݣران نسن د ـ ؤينّا يݣان وينسن أر بطّون أثيݣ نس خف لحساب ن - ؤينّا يخصّان ئي كّو يوك ديكسن.
46 أر تمݣراون كويّاس ݣ - ثدّارث ن - ربّي س ـ يان رّاي، أر تشّورن أغروم ݣ - ثيدّار نسن، أر تتّين س - ؤفراح د ـ ثازدݣي ن - وول،
47 أر تمجّادن ربّي. داي رضون غيفسن ميدّن كول، أر ئتّزاياد مولانا كّوياس ݣ ـ ؤݣراو نسن وينّا يفوكّا.