ئسكّين نّا ݣان ئمازانّ
1
1 ؤريخاش أثاوفيلوس ݣ - لشثاب ئنو أمزوارو مايد أر ئتݣّا سيدنا عيسى كول د - مايد أر ئسّلماد ئي ميدّن زݣّوس ئسفالّ لخدمث نس،
2 أر أسّ نّا ݣ ـ ئتّواسي غر ئݣنّا. داث ن ـ مايد ئتّواسي غر ئݣنّا، ئوصّا س - جّهد ن ـ رّوح ن ـ ربّي وينّا يسثي أد ݣين ئمازانّ نس.
3 فّير ن ـ مايد غيفس ئكّا ومرّث ن ـ لموث، ئفّغد غيرسن شايݣان ن ـ ثيلمرّات ݣ ـ ربعين ن ـ واسّ، يصّوحاياسن س - شايݣان ن - ثميثار ئيس ديكّر زݣ لموث، أها يسيولاسن خف ثݣلديتّ ن - ربّي.
ئمازانّ دا تّعايانن أد غيفسن ديسوݣّز ربّي رّوح نس أمّ ؤينّاسن ئقّاول
4 نتّا أر ئتتّا أݣيدسن ݣ ـ ووسّان نّا، يوصّاثن ئنّاياسن: «أد ؤر تّفّغاث زݣ لقدس، عايناث أداوند يازن ئبّا أينّاون ئقاول، نّا خف أون سيولخ ياد.
5 مشد يحيى أر ئتغبّاز ميدّن ݣ - وامان،a ئيد كونّي ئدّا ربّي أكون ئغبّز ݣ - رّوح نس ضارث ن - شان ووسّان دروسنين».
6 نتّا مّݣراون ئمازانّ ديخ د ـ سيدنا عيسى سقسانث نّاناس: «أمولانا، ئيد دغي أݣ غا ثرارد ثاݣلديتّ ئي ثاروا ن ـ إسرائيل؟»
7 أها ينّاياسن: «مايداون ئدّان ݣ ـ ؤياد أتّيسينم، ئدّخ زّماناث د ـ لاوقّاث ئبّا أي داثن ئسرسّان س - ثنباطّ نس،
8 ماشان أدّاي غيفون دّيضر رّوح ن ـ ربّي، ئدّا أداون ئوش جّهد، أها ثݣيم ئنيݣان ئنو، ثقّيسماسن ئي ميدّن غيفي ݣ - لقدس، ݣ ـ ثمازيرث ن ـ أيث ياهودا س ـ ماس ثلّا، ݣ ـ سّاميرا، د - ݣ ـ مايد ئݣان أنسا ݣ ـ دّونيث كول».
9 نتّا ينّا سيدنا عيسى أياد، ئتّواسي غر ئݣنّا، قّيمين نثني أر ديكس تّراعان. شوي ثاسيث يوث ن ـ ثسيݣنوت زݣ منيداسن ؤر ياد أرث تّانّاين.
10 نيثني سولن أر سموقّولن س ـ ئݣنّا بار أثانّاين، هان سينّ ن ـ ئيد لمالاك س - ملسيواث ثيملّالين بدّاند غيفسن،
11 أها نّاناسن: «أيايث لجاليل، ماكون ياغن ألّيݣ ثبدّام دا ثسموقّولم س ـ ئݣنّا؟ هان سيدنا عيسى ياد نّا زّيݣون ئتّواسين غر ئݣنّا، ئقّنثين يان واسّ أدّ ياغول ئمشينّا تّانّايم ئدّا».
ماتياس ئتّوسثي أد يامژ لخدمث ن ـ ياهودا
12 داي عايدن ئمازانّ غر لقدس ئدّخ ثنيد يوفا لحال لّان ݣ ـ عاري نّامي دا تّينين "عاري ن ـ زّيثون" ؤر ئبعيدن خف لقدس غاس س ـ أمّ ثمنميّا ن ـ ؤحوريف.
13 نتّا ييوضننّ، ألين غر ثمصريث نّاݣ قّيمان. ئلّا بطرس، د ـ يوحنّا، د ـ يعقوب، د ـ أندراوس، د ـ فيلبّوس، د ـ توما، د ـ بارتولماوس، د ـ متّى، د ـ يعقوب ممّيس ن - حالفا، د ـ سيمعان لموجاهيد، د - ياهودا ممّيس ن - يعقوب.
14 ئلين كول نسن أر تژالّان كويّاس ئموناسن رّاي، نيثني د - ييتسث ن - ثوثمين، د - أيثماس ن - سيدنا عيسى، د - مريم مايس.
15 يان واسّ، مݣراون ئمومنّ س ـ أم ميّا د - عشرين ن ـ يوكّ، داي يبدّ بطرس ݣ - وامّاس نسن أها ينّاياسن:
16 «أيايثما، هاثين لابدّا أد ئجرو وياد نّاس ئجران ئي ياهودا ئسخريوطي نّا يوشان ثماثارث ئي وينّا ييوي حما أد أمژن سيدنا عيسى، ئدّخ أياد أس ئكاشف رّوح ن ـ ربّي س ـ ؤقمو ن ـ نّبي داود ݣ ـ لشثاب ن ـ ربّي.
17 ياهودا يكّا يݣا يوك زّيݣنخ، ئتّوسثي أد يامّو ݣ - لخدمث ن ـ ربّي أݣيدنخ.
18 ئسغا ييݣر س - ئقّاريضن نّا يومژ خف لغضر نس، ئتّوتّي خف وودم نس أها يطّيقس ؤديس نس فّغناسد ئصرمان.
19 داي سلّان ئمزداغ ن - لقدس كول ئي وياد نّاس ئجران، أها ݣيناس ثانقّوبث ئي ييݣر نّا، أراس تّينين س - واوال نسن: "حقل داما"، زعما "ئݣر ن - ئدامّن".
20 ئزايد بطرس ئنّاياسن: هان لشثاب ن - ژّابور دا يتّيني: "أومي ثخلا ثدّارث نس أد ؤر ديكس ئزدّغ أود يوكّ"، أر ئتّيني ألثو: "أها يامژ شان يوكّ ضنين لخدمث نس".
21 ئوا يخصّاياخ أنسثي شان يوكّ أد ييلي ݣ ـ وانسا نس، ئخصّا أد ئيݣ يوكّ زݣ وينّا أر أݣّيدنخ تمونّين لوقث كول نّا يكّا مولانا عيسى أݣيدنخ،
22 زݣوس ئيث ئغبّز سيدنا يحيى ݣ ـ وامان أر أسّ نّاݣ ئيث ئسّيلي ربّي غر ئݣنّا، داي ونّا غا نسثي ئدّا أد ئيݣ أود نتّا ئنيݣي أݣيدنخ خف ثنشرا ن - سيدنا عيسى زݣ لموث».
23 داي سثين سينّ ن ـ ئرݣزن: يوسف نّامي دا تّينين بارسابا أراس قّارن أود يوستوس، د - ماتياس.
24 أها ژّالّين كول نسن أر تّينين: «أمولانا هاثين ثسّند مايد ئلّان ݣ ـ وولاون ن - ميدّن كول، ئوا سنعثاخ مان ديكسن ݣ - سينّ أد أي ثسثيد
25 حما أد ئيݣ أمازان ݣ - وانسا ن - ياهودا نّا يزرين لخدمث أد حما أد ئدّو غر أنسا نّا يواثا».
26 داي ݣرين ئلان، ياسدّ ݣ - ماتياس، أها يامّو د - ئمازانّ س ـ حضاعش.