28
بولوس ݣ - ثݣزيرث ن - مالطا
1 ضارث ن ـ ماي نراح، ناغول نسّن ئيس داس تّينين ئي ثݣزيرث نّا مالطا.
2 تنهلّان ديݣنخ ئمزداغ ن ـ ثݣزيرث شايݣان، أها سّيغناخ لعافيث رحبن ئسّنخ كول نّخ ئدّخ ئلّا وصمّيض أر ئكّاث ؤنژار.
3 داي يسموند بولوس يوث ن ـ ثزدمث ن - ئكشّيضن، نتّا أر ثن ئݣّار ݣ - لعافيث، ئفّغد زّيكسن يان ئفيغر ئژّعثيد لحما، داي يقّساس زݣ ؤفوس.
4 لّيݣ أنّاين ئمزداغ ن ـ ثݣزيرث ئفيغر ئݣّلولاد زݣ ؤفوس ن ـ بولوس، داي ميونّان ئنݣراتسن: «ؤر ديكس شّك ئݣا ؤرݣاز أد بو لارواح. مغار ئراح ؤرث ئتّشي لبحر، ؤر ثدّي ثاربّيت نّخ ن ـ لحقّ أتّادّج أد ييدير».
5 ماشان ئنقّر بولوس ئفيغر زݣ ؤفوس نس ئݣرتّين ݣ - لعافيث أها ؤرث ياغ أود ئميقّ.
6 ئيد ميدّن أرتّينين ݣ ـ ئخفاون نسن ئدّا أد يافّ نغد أد ئتّوتّي ئمّث ݣ ـ وانسا، ماشان قّيمان أر تݣانّاين ألّيݣ عنقن أها ؤر ثياغ أود ئميقّ. أغولن بدّلن رّاي نسن أها نّان: «أرݣاز أد شان ربّي أيد ئݣا».
7 ئلين ݣ - واتّاين نّا ييتّس ن - ييݣران ݣانين وين ؤنبّاض ن - ثݣزيرث ئسم نس بوبليوس. داي يغراخ غر ثادّارث نس، ئرحباخ شايݣان أها نقّيم غورس شراض ن - ووسّان.
8 يافد لحال ئبّاس ن - بوبليوس ياغث شا ؤر دا يتكّر، داث تّامژ ثاولا، ياغث يان ؤسرام ئوعرن. داي يكشم غورس بولوس، ئسيرس غيفس ئفاسّن نس ئژّالّ زݣ ثنيلا نس أها يجّوجيث.
9 نتّا يجرا وياد، دّوند أود ئموضين ن ـ ثݣزيرث كول غر بولوس أها يجّوجيثن.
10 داي سّمغورن ئسّنخ، ؤشيناخ شايݣان ن - ثرزّيفين. نتّا نرا أندّو ييبردان نّخ أها أويناخد أينّا غا نحدادّجا كول ݣ ـ ؤبريد.
ثاوادا ن - بولوس زݣ مالطا غر روما
11 يافاخدّ لحال نكّا شراض ن ـ وايورن ݣ ـ ثݣزيرث، داي نني ݣ - يان ؤغرّابو ن - ليسكانداريّا ئسم نس: "ئيد ربّي ئشنيون". يوفاثيد لحال أود نتّا يزّري ثاݣرسث ديسّ.
12 ناوضنّ غر ثمدينث ن - ساراكوسا أها نقّيم ديكس شراض ن - ووسّان.
13 ندّو زݣ سّييس ݣ ـ ؤغرّابو نمون د - ثاما ن - ثغارث ألّيݣ نّيوض غر ثمدينث ن - ريجيون. س ـ أسكّا نس، ئصوضدّ ؤزݣو زݣ ثمناطّ ثافاسيث، داي ناوضنّ غر ثمدينث ن - بوطيولي ݣ ـ سينّ ن ـ ووسّان.
14 نافنّ ديسّ شان ئمومنّ، أها تّرن زّيݣنخ أنقّيم غورسن سبعا ن - ووسّان. داي نثامّا فّير ن ـ ؤينّا غر روما.
15 نتّا سلّين ئمومنّ نّا لّانين ݣ ـ روما ئيس نلّا ندّان ݣ ـ ؤبريد، أها دّوند ݣريناخدّ عرّاض غر سّوق ن ـ أبيّوس د ـ غر يان وانسّا داس تّينين "شّراض ن - ئيد لفندق". نتّا يانّايثن بولوس أها يحمد ئي ربّي ياغول ئزعم شايݣان.
بولوس ݣ - روما
16 لّيݣ نّيوض غر روما،a ؤدّجان بولوس أد ئزدغ ئويل نس، أر غيفس ئتعسّاس غاس يان ؤعسكري.
17 فّير ن ـ شراض ن - ووسّان، ئغرد بولوس ئي يخاثارن ن - ووداين أد غورسد دّون. لّيݣ ّدمّوترن غورس ئنّاياسن: «أيايثما، هاثين ؤر ݣيخ شان لعار ئي ميدّن نّخ ؤلا نّيخ شا نّا يخّان خف لقاعيداث ن - ئمزوورا نّخ، واخّا أمشيسّ ؤمژني ݣ ـ لقدس أها وشيني ئي ينبّاضن ن ـ رّومان.
18 فّير ن ـ مايد ئي سقسان ئنبّاضن ن ـ رّومان، ؤفانينّ ؤر ݣيخ شا نّا خف واثاخ أد تّونغخ أها ييرين أد ئي رژمن،
19 ئميل ؤر رين ووداين. داي ؤر ؤفيخ ماي ݣيخ أغولخ سموتّيخ دّعوث ئنو غر أݣلّيد ن ـ رّومان، ماشان ؤر ئيد ئيس ريخ أد دعوخ ئي ميدّن ئنو.
20 أياد أخف أوندّ غريخ أكون أنّايخ أها سيولخاون، ريخ أتّيسينم ئيس تّوكرفخ ئمشيد ئدّخ دا تّامنخ س ـ لماسيح نّا دا تّعايان ثاروا ن ـ إسرائيل كول».
21 داي نّاناس: «نوكّني ؤراخ تّيويض أود يوث ن ـ ثبراتّ غيفش زݣ ثمازيرث ن - أيث ياهودا، ؤلا ديدّا شان يون زݣ ميدّن نّخ سّيينّ أداخ ئقّيس شا غيفش، نغد أخ ئنّا شان واوال نّا يخّان غيفش.
22 ماشان نرا أنسّغد ئي ماي دا تّينيد شݣّين، ئدّخ هاثين نسلّا ئيس دا ضاضّان ميدّن ݣ ـ مايد ئݣان أنسا أبريد أد نّا تّفارد».
23 داي مساسان أݣيدس خف شان واسّ نّاݣ غورسد تّاغولن. نتّا ييوض واسّ نّا، دّوندّ غورس س ـ شايݣان. داي يقّيم بولوس أراسن ئساوال زݣ ثيفاوث أر ثادوݣّاتّ، أراسن ئسّفرو ئسكّين ݣانين وين ثݣلديتّ ن - ربّي، أراسن ئتّيني أينّا ينّا شّرع ن - سيدنا موسى د - لشثوب ن - لانبيا خف سيدنا عيسى بار أديسّ أمنن.
24 داي أمنن ييتّس زّيكسن س - ؤينّا أر ئتّيني بولوس، ئيد وييّاض ؤر رين أد أمنن.
25 نتّا يانّايثن بولوس كّرن أد دّون ؤر مساسان ئنݣراتسن، داي ينّاياسن قبل أد فّغن: «هاثين سثيتّ أيد ئنّا رّوح ن - ربّي ئي يمزوورا نّخ س - ؤقمو ن - نّبي ئشعيا،
26 لّيݣ أس ئنّا: "دّو غر ميدّن أد ثينيداسن: مغار دا ثسّغادم أر ثسّغادم ؤسار ثفريم، د ـ مغار دا تّراعام أر تّراعام ؤسار ثانّايم.
27 ئدّخ ميدّن أد عصاناسن وانّليثن. قّنن ئمجّان نسن ؤر رين أد سّغدن ئي واوال ئنو، قّنن ألّن نسن ؤر رين أد أنّاين أينّا دا تݣّاخ حما أد ؤر تّانّاين س - والّن نسن ؤلا سّغدن س - ئمجّان نسن ؤلا فران س - وانّليثن نسن، أينّا خف مي ؤر دّين أدّ أغولن غوري حما أثن جوجيخ"».
28 داي ينّاياسن ديخ بولوس: «ئخصّاياون أتّيسينم ئيس دّيوزن ربّي ئنغميسن أد ژيلنين خف ؤفوكّا أود ئي لݣنوس نّا ؤر ݣينين ؤداين، د - نيثني دّان أد غورس سّغدن».
29 b