لينجيل ن ـ سيدنا عيسى خف ؤفوس ن ـ لوقا
1
ماخف ئتّياري واوال أد؟
1 زݣّوس كّرن شايݣان ن - ميدّن ران أد أرين لقّيسث ن ـ ؤينّا يجران غورنخ،
2 غاس ئمشينّا أختّ قّيسن وينّا ݣانين ئنيݣان نّا نژانين س ـ والّن نسن ݣ ـ ؤياد زݣ ثيزويري أها ياغولن أر تبرّاحن س ـ واوال ن ـ ربّي،
3 نّيخ ݣ ـ ئخف ئنو أود نكّين، فّير ن ـ مايد سقساخ ألّيݣ ؤمژخ صّاحث ن ـ ؤينّا يجران زݣ ثيزويري، ئژيل أداش تينّ أريخ س ـ ؤمّنداث أثاوفيلوس أمعزيز،
4 حما أتّيسيند صّاحث ن - واوال نّا مي ثسلّيد.
لمالاك ئعلم س ـ ثلاليتّ ن - يحيى نّا دا يتغبّازن ݣ - وامان
5 ݣ - لوقث نّاݣ ئݣا هيرودوس أݣلّيد ن - ثمازيرث ن - أيث ياهودا، ئلّا يان ؤنبداد ن ـ ثدّارث ن ـ ربّي ن - ووداين ئݣان زݣ ثربيعث ن - أبيّا ئسم نّس زاكاريّا، د - ثمطّوطّ نّس ئݣان زݣ ييرو ن - هارون ئسم نّس أليصاباث.
6 ئلين سّينّ نسن منان داث ن - ربّي، أر ؤحطّون شّرع ن ـ مولانا د - لفرايض نّس كول س ـ وار ألامّا.
7 ماشان ؤر غورسن لّين واراو ئدّخ أليصاباث ؤر أر تّارو ثݣا ثيݣّرث، أها ئلين سّين نسن وسّيرن.
8 يان واسّ ئلّا زاكاريّا أر ئتّݣّا لخدمث ن - ربّي ئدّخ ثلّا ثوالا ݣ - ثربيعث نّس.
9 داي ييمشينّا ثݣا لقاعيدا ن ـ ئنبدادن ن ـ ثدّارث ن ـ ربّي، تّوݣران ييلان أها ياسدّ ديكس أد ئكشم غر ثدّارث ن ـ ربّي أد ئسغوس لبخور.
10 ئلين ميدّن كول أر تژالّان برّا ݣ - لوقث ن - ؤبخّر.
11 شوي يفّغد يان لمالاك ن - مولانا غر زاكاريّا ئبدّ خف ؤفاسي ن - ؤدغار ن - ؤسغوس ن - لبخور.
12 داي يهبض زاكاريّا لّيݣ ثيانّاي أها يݣّد.
13 ماشان ئنّاياس لمالاك: «أزاكريّا أد ؤر تݣّد، هاثين ئسلّا ربّي ئي ثوثرا نّش، هان ثامطّوطّ نّش أليصاباث ثدّا أداش ثارو يان ؤربا، ثݣداس يحيى.
14 ثدّيد أتفرحد عنوݣا، د - شايݣان ن - ميدّن دّان أد فرحن س - ثلاليتّ نّس،
15 ئدّخ ئدّا أد ئݣ أمقران غر مولانا، ؤسار ئسوي شّراب ؤلا شا ضنين نّا دا يسّوفوغن ئي يخف، ئدّا أد يتّوعمّر س - رّوح ن - ربّي زݣ دّيسث ن - مايس
16 أها يرار شايݣان ن - ثاروا ن ـ إسرائيل غر مولانا ربّي نسن نّا أر تّعبادن.
17 ئدّا أدّ ئزوير مولانا س ـ رّوح د ـ جّهد أمّ وين نّبي إيليّا حما أد ئرار ؤلاون ن - لوالدين غر أراو نّس، د - وينّا عصانين غر ثانژّي ن - وينّا منانين، حما أد ئسّوجد شان ميدّن ئوجدن ئي مولانا».
18 داي ينّاياس زاكريّا ئي لمالاك: «ماس تّيسينخ ئيس ئدّا وياد أد ئجرو سثيتّ؟ ئدّخ نكّين ݣيخ أمغار د - ثمطّوطّ ئنو أود نتّاث ثوسّير».
19 ئرار غيفس لمالاك ئنّاياس: «نكّين أيد ئݣان جبرائيل نّا يبدّان داث ن - ربّي، هاثين يوزنيد أداش ئنيخ أنغميس أد ئژيلن.
20 هان شيݣّين ثدّيد أتݣد أعنژول، ؤر تّيغيد أتّسيولد أر أسّ نّاݣ ئجرا وياد، ئدّخ ؤر ثوميند س - واوال ئنو نّا يدّان أد ييلي ݣ - لوقث نّس».
21 يافد لحال ميدّن لّان أر تّعايانن زاكريّا، أها رعبن ݣ ـ ؤعطّر نّا نّيݣا ݣ - ثدّارث ن ـ ربّي.
22 ماشان لّيݣ ديفّغ، ؤر ئيغي أداسن ئسيول، داي سّنن ئس أس دّيسنعث ربّي شا لّيݣ نّيلّا جاج. أها يݣ أعنژول أراسن ئساوال غاس س - ؤضاض.
23 نتّا شمّلن ووسّان ن - لخدمث نّس، ئكّر ئدّو غر ثدّارث نّس.
24 فّير ن - ؤينّا، أر تّارو ثمطّوطّ نّس أليصاباث، أها ثفّر ئخف نّس ؤر أر تفغ خمسا ن - وايورن، أر تّيني:
25 «ئحنّا ديݣي مولانا أها يوشي ثاروا ݣ - ووسّان أد حما أد ئكّس لعيب ئنو زݣ ئنݣر ن - ميدّن».
لمالاك ئعلم س ـ ثلاليتّ ن - سيدنا عيسى
26 داي نتّا ثلّا أليصاباث ݣ - وايور نّس ويسّ ستّا، يازند ربّي لمالاك جبرائيل غر يوث ن - ثمدينث ݣ - ثمازيرث ن ـ لجاليل ئسم نّس نّاصيرا؛
27 غر يوث ن - ثعرّيمث ئسم نّس مريم، ئتّواتّرن ئي يان ؤرݣاز ئسم نّس يوسف ئݣان زݣ ييرو ن - سيدنا داود.
28 يكشم غورس لمالاك ئنّاياس: «أزول غيفم أثنّا خف ئرضا ربّي».a
29 داي ثشوّش مريم زݣ ؤينّاس ئنّا لمالاك، ثقّيم أر تخمّام ݣ ـ سّلام نّس.
30 أها ينّاياس لمالاك: «أمريم، أد ؤر تّݣّد، هان ربّي يرضا غيفم،
31 هاثين ئقّنشمين أتّيليد س - ؤديس، أها ثارود يان ؤربا ثݣداس عيسى.
32 ئدّا أد ئيݣ أكسواث، أراس قّارن ممّيس ن - ؤنافلّا، أها يݣيث مولانا ربّي د ـ أݣلّيد ئمشينّا ثيݣا لجدّ نّس سيدنا داود،
33 داي ينبض خف أيث سيدنا يعقوب خف وابدا، أها وسار ثلّي ثنݣيرا غر ثنباطّ نّس!»
34 ماشان ثنّاياس مريم ئي لمالاك: «ميمش ئتّجرو ؤياد د - نكّين سولخ ݣيخ ثاعرّيمث؟»
35 داي ينّاياس لمالاك: «ئدّا رّوح ن - ربّي أد غيفم دّيرس، ئسمالو غيفم جّهد ن - ؤنافلاّ، خف ؤياد أود ثاسلميا نّا ثدّيد أتّارود أتݣ ثازدّاݣث ن ـ ربّي، أراس قّارن ممّيس ن - ربّي.
36 هان أليصاباث ؤلث لاهل نّم ثلّا أود نتّاث س - ؤديس ن - ؤربا ݣ - ثوسر نّس، هاثين أيور نّس ويسّ ستّا أياد، نتّاث نّا خف أر تّينين ثݣا ثيݣّرث.
37 ئدّخ ؤر ئلّي أود يان ؤسكين نّا يوعرن خف ربّي».
38 داي ثنّاياس مريم: «نكّينثين ثيسمغث ن - مولانا أيد ݣيخ، قبلخ أد ئي ئتّواݣ ؤينّا ثنّيد». داي يدّو زّيكس لمالاك.
ثاوادا ن - مريم غر أليصاباث
39 ݣ - ووسّان نّا، ثكّر مريم ثازّل غر يوث ن - ثمدينث ݣ - لعواري ن - ثمازيرث ن ـ أيث ياهودا،
40 ثكشم غر ثدّارث ن - زاكاريّا ثسلّم خف أليصاباث.
41 نتّا ثسلّا أليصاباث ئي سّلام ن - مريم، ئفرفض ؤربا ݣ - ؤديس نّس. داي ثتّوعمّر أليصاباث س - رّوح ن - ربّي
42 أها ثنّا س ـ ؤغويّي: «ثانبارشث أيد ثݣيد ݣ - ثوثمين، د - ؤنبارش أيد ئݣا ييفس ن - ؤديس نّم!
43 ماخ ماتّا نكّين حما أد غوري تثدّو مايس ن - مولانا نو؟
44 هاثين غاس سلّاخ ئي سّلام نّم، ئفرفض ؤربا ݣ - ؤديس ئنو س - ؤفراح.
45 أياعريتّ نّم أثنّا يومنن ئس ئدّا أد ييلي وينّاسد ئنّا ربّي».
ثايفّارث ن - مريم
46 داي ثنّا مريم: «دا تحمادخ ئي مولانا زݣ وول ئنو كول.
47 أر تّفراح رّوح ئنو شايݣان س - ربّي يݣان أمفوكّو نو
48 ئدّخ ديݣي يراعا، نكّين ثيسمغث نّس ؤر ئواثان شا! هاثين زݣ سّياد غر داث دّان ميدّن ن - زّماناث نّا ديدّان أد غيفي تّينين ثانبارشث
49 ئدّخ ربّي يغين ئي مايد ئݣان شا يݣايي ئسكّين مقّورنين، نتّا ئصفا،
50 د ـ رّحمث نّس دا تّضار خف وينّا داث تّݣدنين زݣ زّمان غر زّمان.
51 أها يسنعث ثيغيتّ نّس لّيݣ ئسلّوزع وينّامي ثلّا ثيخيثرث ݣ - وولاون نسن.
52 ئكّس ئنبّاضن زݣ ئيد لعرش نسن، أها يسّيلي وينّاݣ ؤر ثلّي ثيخيثيرث.
53 ئسݣيون وينّا ينغا لاژّ زݣ لخير نّس، أها يازن ئمطرّحن س - ئفاسّن ؤرانين.
54 ئسعاون ثاروا ن ـ إسرائيل ئسمغ نّس، ؤر ئتّو أداسن ئيݣ رّحمث ئمشينّا يقّاول ياد
55 ئي يمزوورا نّخ، ئي سيدنا براهيم د - ثاروا نّس خف وابدا».
56 داي ثقّيم مريم غر أليصاباث أم شراض ن - وايورن، أها ثاغول غر ثادّارث نّس.
ثالاليتّ ن - يحيى نّا دا يتغبّازن ݣ - وامان
57 ثاوض لوقث نّاݣ غا ثارو أليصاباث، أها ثارو أربا.
58 داي سلّين وادجارن نّس د - لاهل نّس ئيس ديكس ئحنّا مولانا شايݣان، أها فرحن أݣيدس.
59 ݣ - واسّ ويسّ ثمانيا، دّوند حما أد زݣّنن ئي وربا أها ييرين أداس ݣين زاكاريّا خف ييسم ن - ئبّاس،
60 ماشان ثسيول مايس ثنّاياسن: «ئهي، ݣاثاس يحيى».
61 داي نّاناس: «هاثين ؤر ئلّي أود يون زݣ لاهل نّم نّا يݣان ئسم أد».
62 أها سقسان ئبّاس زاكاريّا س - ؤفوس خف ييسم نّا يرا أداس ئݣ.
63 ئتّراسن ثالّواحتّ أها ياري غيفس: «ئسم نّس يحيى». داي هبضن كول نسن.
64 ݣ ـ وانسا، ياغول ئغي أد ئسيول، ئقّيم أر ئتمجّاد ربّي.
65 داي خلعن وادجّارن نسن س ـ ماس لّان، قّيمين ميدّن أر تمّقّيسن ئسكّين أد كول ݣ - مايد ئݣان أنسا ݣ - لعواري ن - ثمازيرث ن - أيث ياهودا.
66 كول وينّا سلّانين ئي وياد قّيمان أر تخمّامن أر تّينين: «ؤرسّ ماغا يݣ ؤربا ياد أدّاي يمغور؟» ئدّخ ئلاّ مولانا أݣّيدس.
ثايفّارث ن - زاكاريّا
67 داي يتّوعمّر زاكاريّا ئبّاس ن ـ يحيى س - رّوح ن ـ ربّي، أها يكاشف ئنّا:
68 «أنبارش أيد ئݣا مولانا، ربّي ن - ثاروا ن ـ إسرائيل ئدّخ ديدّا أد ئسعاون ميدّن نّس أها يفوكّوثن.
69 داي يوشاخ يان ؤمفوكّو يجهدن زݣ ييرو ن - سيدنا داود أمزيلّز نّس
70 ئمشينّا يقّاول زݣ واهوّا س - ؤقمو ن - لانبيا نّس نّا صفانين
71 أداخ ئفوكّا زݣ ئنضليبن نّخ، د - زݣ وينّا ؤراخ حميلنين كول.
72 س ـ ؤياد أس ئسنعث رّحمث ئي لجدود نّخ، داي ؤر ئتّو ثاضا نّس ئصفان
73 ئدّخ أس ئݣّولّا ئي بّاثنخ سيدنا براهيم
74 ئس ئدّا أداخ ئفوكّا زݣ ئنضليبن نّخ، حما أث نعبد ؤر نتّݣّد شا،
75 أها نݣ وينس نمنو داثاس ؤسّان ن - ثودرث نّخ كول.
76 ئد شݣّين أممّي، دّان أداش قّارن نّبي ن - ؤنافلّا، ئدّخ ثدّيد أدّ ثزويرد مولانا حما أداس ثحبّلد ئي وبريد
77 أها ثينيداسن ئي ميدّن نّس هاثين ئلّا وفوكّا س ـ لغوفران ن - لمعصيّاث نسن.
78 داي ئدّخ ئحنّا ربّي شايݣان ئدّا أد غيفنخ دينقّر يان ؤسيدّ زݣ ييݣنّا ئݣان أمّ وين ثافوشث
79 حما أد ئسّيدّا خف وينّا قّيمانين ݣ - ثالّسث د - ئمولا ن - لموث، أها ئسنعثاخ أبريد ن - لهنا».
80 أر ئتّمغور سيدنا يحيى أر ئتّصحو ݣ - رّوح نّس. أر ئتّعيش ݣ - لخلا أر أسّيسّ نّاݣ دّيسنعث ئخف نّس ئي ثاروا ن ـ إسرائيل.