10
توارݣيت تيشّراط: أرݣاز نّا ئرسان لكتّان
1 ݣ ؤسݣّاس ويس شراض زݣ تنباط ن كورش، أݣلّيد ن تمازيرت ن فارس ئسباين ربّي يون ن واوال ئ دانيال نّا مي تينين بلطشاصر. ئسبايناس ئد دا تجرو يوت لحرب تخاتارت. أوال اد ئݣا لحق د ؤفرّوي نّس ئوعر شيݣان داي ييسين دانيال لمعنى نّس ݣ توارݣيت.
2 ݣ ووسّان نّا، نكين دانيال زريخ واحد ؤعشرين ن واس ݣ لحزن:
3 ؤر تشيخ شا ؤتشي ياضفوتن ؤر ئكي ئمي نو أكسوم ؤلا شراب أها ؤر ݣيخ ماورد ألّيݣ تشمّل لوقت اد.
4 ݣ واس ويس ربعا ؤعشرين زݣ ويور أمزورو، ليݣ بديخ ݣ طّرف ن واسيف أخاتر نّا مي تينين دجلة،
5 هزاخ ألّن ئنو أها أنّايخ داتي يون ؤرݣاز ئلسا ئعبان ن لكتان، ئحزم س ؤستاو ن دهب ئصفان.
6 دّات نّس دا تسفيقيس أم دياماند، ؤدم نّس أم ؤسم، ألّن نّس أم لانبا ن لعافيت، ئفاسن نس د ئضارن نس أم نحاس ئصفان، د واوال نّس أم واوال ن شيݣان ن ميدن.
7 نكين دانيال، غاس نكين أݣ أناين تاوارݣيت اد، ئد ئرݣزن نا أݣيدي لاّنين ؤر ت تاناين، فيمرا ئرس غيفسن لخوف أخاتر داي رولن حما أد خزنن.
8 قيمخ وحدي دا تراعاخ ݣ توارݣيت اد تاخاترت. ؤر ئقيم ديݣي لجهد، ئورّاغ وودم ئنو أها ضعفخ شيݣان.
9 سليخ ئ لحس ن واوال نّس، توتيخ س أشال ياوييي يون ؤنودّم ئزّاين د وودم ئنو خف واشال.
10 داي ئحادايي يون ؤفوس أها ئسبديي خف ئفاسن د ئفادن، أر ترݣيݣيخ.
11 أها ئنّايي: «آدانيال، أونا ئعزين غر ربّي ئخصا ات تفهمت أوال نا ديخ أداش ئنيخ، بد خف ئضارن نّش ئدخ توازنخ غورش دغي». نتا ئشمل أوال اد بديخ أها ار ترݣيݣيخ.
12 ئنايي ألتو: «أد ؤر تݣد ادانيال، ئدخ زݣ واس امزوارو ناݣ تريد أد تفهمد توارجت اد أها تحقرد ئخف نّش دات ن ربي. ئسلا ربي ئ توترا نش داي دوخد غورش، ئدخ ربّي ئقبل توترا نش.
13 ولايني أختار ن شّياطين ن تمازيرت ن فارس ئبي غفي أبريد واحد ؤعشرين ن واس، داي ئدود ميخائيل، أخاتر ن لملائكا اد ئ ئحارب أݣدي ضد ن أختار ن شّياطين ن تمازيرت ن فارس.
14 دغي، هايي دّيخد حما أد اش سنعتخ أينا ئدّان أد ئجرو ئ شعب نّش ݣ ؤسان ئنݣّورا، ئدخ توارݣيت اد تݣا تين ووسان نا ئدان أد د دّون».
15 داي ليݣ أر ئ ئتّيني أوال اد حودرخ ئخف ئنوغر أشال أها سوسمخ.
16 أها ئدود يون ئرويس بنادم دا ئحادا أنشوشن ئنو، رزمخ ئمي نو سيولخ أها نّيخ ئ ونا ئبدين داتي: «أسيدي، ݣدخ زݣ ؤينّا أنّايخ أها ؤرغوري ئقيم لجهد.
17 ئوا ميمشي نكين ئݣان يون ئسمغ أد ئسيول د سيدي، د نكين ؤرغوري ئقيم لجهد ؤلا ؤنفوس؟».
18 داي ئحادايي ونا ئرويسن بنادم لمرت تيسنات اها ئسزعيميي.
19 أها ئنايي: «أد ؤر تݣد أيارݣاز أونا ئعزين غر ربي، أد-اش ئوش ربي لهنا سجهيد أها تسزعيمد ئخف نش»، داي ما حد نتا دا ئ ئساوال ار ئ ئتاغول لجهد داي نيخاس: «سيول أݣيدي أسيدي، ئدخ توشيدييي لجهد».
20 ئنايي: «ئس تسند ماخ أليݣ غورش د ديخ؟ علا حال دّيخ اد اغولخ باش اد ناغخ د أختار ن شّياطين ن تمازيرت ن فارس أها أداي دوخ ئدا اد ئضهير أختار ن شّياطين ن تمازيرت ن ليونان.
21 ماشان ݣ ؤمزوارو داك علمخ س ؤينا ئلان ݣ لكتاب ن لحق. ؤر ئلي ما ئ ئتعاوان خف ئعداون اد غاس ميخائيل أخاتار نون».