9
تزاليت ن دانيال
1 ݣ ؤسݣّاس أمزورو ن داريوس ممّيس ن حشوير نا ئݣان زݣ تريكت ن مادي، نا ياغولن أݣليد ن تمازيرت ن بابل.
2 ݣ ؤسݣّاس أمزورو ن تنباطّ نّس، نكّين دانيال، ليݣ قراخ لشتوب ن ربّي فهمخ زݣ واوال ن مولانا ئ نبي إراميا، ئس تدا أد تك سبعين ن ؤسݣّاس خف تخلي ن تمدينت ن لقدس.
3 داي برمخ ؤدم ئنوغر ربي باب لقدرا حما اد ت تترخ زَوْݣخ ديكس س وَزوم د ملسيت ن لحزن أها ݣخ ئغد خف ؤقرو نو.
4 داي نيخ ݣ توترا نو د ؤقرّا نو س لمعصييات ن شعب ئنو ئ مولانا ربي نو: «أربي باب لقدرا أخاتار أموقّر نا يومزن ݣ لعاهد أر ترحامد وينا ش ئتيرين اها ار تضاعن لوصييات نش.
5 نݣا لمعصييات، نݣا لعار، نعصاك اها ؤر نݣي س لوصييات نش د شّرع نّش.
6 ؤر نݣي س رّاي ئ لانبيا نّا ئݣان ئسمغان نش، نّا ئسيولن خف ئسم نّك ئ ئݣلّيدن نّخ د ئنبّاضن نّخ د لجدود نّخ د ميدن كول ن تمازيرت.
7 شݣين، أباب لقدرا تصلحد ئد نكني يوغاخ لعار أم ݣ واس اد نكني ئرݣزن ن يهوذا د ئمزداغ ن تمدينت ن لقدس د أيت إسرائيل كول وينّا قربنين د وينّا بعدنين وينّا ئتوزلعن ݣ تميزار كول نّا غر تن تزعد ئدخ ش غضرن.
8 ييه أمولانا، هاتين يوغاخ لعارداتاش أم لجدود نخ، نكني د ئݣلّدين نّخ د ئنباضن نّخ ئدخ نعصاك.
9 ولايني شݣ أباب لقدرا ربي نّخ، تݣيد ؤرحيم أر تغفارد دنوب وخا نعصاك.
10 ؤر ش نضاع أمولانا ربي نّخ، ؤر نݣي س شرع نا خد توزند د لانبيا نّا ئݣان ئسمغان نش.
11 أيت إسرائيل كول عصان شرع نك بعدن زيك حما ؤر تسلان ئ لوصييات نش. داي ئتوتي غيفنخ لعنت نا ئلان ݣ شرع ن موسى ئسمغ نش ئدخ ندنب.
12 تݣيد س لحكام نا س غيفنخ تحكمد نكني د ئنباضن نخ توتاخ س لمصيبا تخاتارت د ؤينا ئوقعن ݣ تمدينت ن لقدس ؤر دجين ئجري أم نتا ݣ دونيت كول.
13 لمصيبا نا خ ئوتن أم ؤينا ئلان ݣ شرع ن موسى د نكني امولانا ربي نخ، ؤر ش نسحوزر أها ؤر نبعيد زݣ دنوب نخ أها ؤر نرار لبال ئ واوال نش ئݣان لحق.
14 شݣ أمولانا أݣ سوجدن لمصيباياد اها توتاخ ئس. أينا تݣاد أمولانا ربي نخ ئݣا لحقَّ، ئد نكني ؤر ش نضاع.
15 دغي، أربّي نّخ باب لقدرا، تسوفغت شعب نّش زݣ تمازيرت ن مصر س درع نش أها ئتياسن غيفك ؤينا أر أساد، ئد نكني ندنب أها نݣا لعار.
16 أباب لقدرا، أينا تݣاد كول ئݣا لحق، أد ؤر اش ئتطيار خف تمدينت نّش لقدس د جبل ن صالحين نش، ئدخ ونّاخ ئضورن ݣان تمدينت ن لقدس دشعب نك د أزوار س سباب ن لمعصيات نخ د دنوب ن لجدود نخ.
17 دغي أ ربي نخ، سغد ئ توترا د ؤزاوݣ ن ئسمغ نش، خف سيبت نش أباب لقدرا سموقل س تاضفي غر تادّارت نش نا ئهدمن.
18 آربّي سمال ئمجّان نّك أها تسغّتّ! رژم ألّن نّك أها تسموقلد غر أردام نخ د تمدينت نّش. نكني ؤر غورش نوسي ؤراون ئدخ نستاهل ولايني ئدخ تخاتر رحمت نش.
19 آباب لقدرا سغد. آباب لقدرا غفر. آباب لقدرا رعا ديݣنخ أها تݣد شا. خف نّيرت نش أربي نو أد ؤر تعطّال. ئدخ تختارد تمدينت اد أت تݣ تينّش د شعب أد ئݣ ويّنش».
جبريل دا ئسفرو توارݣيت ئ دنيال
20 داي ليݣ سولخ أر ساوالخ أر تترخ أر تقرّاخ س لمعصييات ئنو د لمعصييات ن شعب ئنو ايت اسرائيل أها ار تزوݣخ ݣ مولانا ربي نو خف جبل ن صالحين،
21 نتا ار تترخ، جبريل لملاك نا انّايخ ݣ لبدو ن توارݣيت ياضن زݣ قبل ئداد غوري ار ئتافراو س زرب ݣ لوقت ن توكي ن تمغروصت ن تادݣات.
22 ئفرزي اوال اها ئنايي: "أدانيال، نك ديخد غورش دغي حما أد أش سفسرخ تاورݣيت.
23 غاس تبديت ار تزواݣد ݣ ربي، يازند لواجاب نس، دوخد اد اش تينيخ ئدخ تعزت غر ربي. ئوا ݣ لمجهود اد تفهمت اول اد د توارݣيت اد.
24 «ئݣا ربي 490 ن ؤسݣاس ئ شّعب نش د تمدينت ئتوقدسن، باش ؤر تغيما لمعصييت ئحدّا لعار، خلصن ميدن حما أد اسن توغفرنت دنوب، باش اد جرون تويرݣا دؤينا خف سييولن لانبيا أها تمّوش تادارت ن ربي منا ؤجديد ئ ربي.
25 هان اينا ئخصا اد تيسند تفهمت، زݣوس ئفغ واوال نا ئسيولن خف ؤعايد زݣ ؤغرب د ؤعاود ن لبني ن لقدس ار د ياغول أنبّاض نّا ئختار ربي أد تيلي 483 ن ؤسݣاس، فيراس اد د ئدو يون ن زمان ئوعرن.
26 فير ن 434 ن ؤسݣاس، أد ئتّونغ ونا ئتّوختارن اها ؤر ئلي ما غا س ئعاون. ئدود يون ؤݣليد اها ئهدم لعسكر نس تامدينت د تادرت ن ربي. تيخلي نس اد تيلي ام تاقومت ن وامان، ولايني ار لوقت ن لموت نس، اد ئلين شيݣان ن ئمنغان د ردم ئمشنا ئنا ربي.
27 ݣ سبعا ن ئسݣاسن ئدا ؤݣليد نا أد ئݣ تاضا د شيݣان ن ميدن أها ݣ نّص ن سبعا ن ئسݣاسن اد أد ئبطّل تيمغراص د تُوكِّيوِين ؤر تغيمان ݣ تادارت ن ربي. ئعبد ديكس لصنام نّا ديتاوين أهلاك د لموت، ئتوخلو أود نتّا س ئخف نّس».