2
ثاورجيت ن ؤݣليد نبوخدنصر
1 ݣ ؤسݣّاس ويسّين ݣ ثنباط ن نبوخدنصر، إيتوارجي نبوخدنصر ثيويرجا إيث إيسوݣذن ها يوفرو زيكس أنودّم،
2 أها إيبرّح أد ددّون غيرس أيت لحكما كول: ئسحّارن د ئشوافن د ئد بو تحرݣا د لمجوس أس سّفرون لمعنا ن تويرجا نّس. أها دّاند بدّين دتاس.
3 داي إنياسن ؤݣليد: «نكّين وارجيخ ثاوارجيت نّا ئسروين لعقل ئنو، ها ؤر تّافاخ رّاحت أل إيسينخ لمعنا نّس».
4 داي واجبنت لمجوس س واوال ن أيت أرام: «أتعشث أبدا يا سيدي. عاوذاخ أينا ثوارجاث أداكث أنفسر».
5 داي إنياسن ؤݣليذ: «ها نكّ أنّيخ يان واوال مش ؤوري تفسّيرم ثاوارجيت اد د ؤرزوم نس أد كون بيخ ذ لقراطي، ها رّخ ثدار نّون ذ إميزار.
6 مشي ئ تسفروم توارجيت اد د-ؤرزوم نس أداون ؤشخ توكّيوين ها كرمخ كون شيݣان. إوا عاوداث إيي ثوارجيت اد د-ؤفسّر نّس».
7 ها جوبنث لمرث ثيسناث: «أد إعاود ؤݣليد ثوارجيت ئ سمغان نّس، أها نسنعثاس لمعنى نس».
8 داي إنياسن ؤݣليد: «نكين سنخ غاس ثرام أتربحم لوقت، لحقاش ثسنم إس-ؤر ديخ أدْ بْدّلخْ أَوَالْ ئِنُو.
9 مش ؤري تسفروم ثوارجيت، لعقاب أنون ديدج، كني ثمتفاقم أد إيثنيم أوال إيفرغن، حما اد بدلخ لحكام ئنو. مش إيثنام ثوارجيت أد إسينخ إس ثقدام أذ إتسوفغم».
10 داي نّان لمجوس إوݣليد: «ؤور إلي أݣد إيدج خف واشال إغين أداك إسنعث ماي تتّرد، ها عمري ؤر إجري غر شا ؤݣليد أخثار ن شّان إترن أم ؤسكينا زݣ ئسحارن د إشوافن د لمجوس.
11 أينّا تترت أسيدي ئوعر شيݣان، ؤر ئلّي أݣد إيدج ئغين أداشت إفوكّا خاس ئد ربّي، وليني ؤردا زدغن إنݣير ميدن».
12 خف ؤياد طيراس ئ وݣليد بزاف، دا يامّر س منغيوث ن أيت لحكما كول ن ثݣليت ن بابل.
13 داي إفغد ﻻمر س منغيوث نسن، ييلي زيكسن دانيال د ئ مدوكال نّس.
14 ها إسيول دانيال س نزازيث ئ أريوخ أخثار ن ئعساسن ؤݣليد نّا إفغن أدينغ أيت لحكما ن بابل.
15 داي إنياس دانيال: «مّاخ ألّيݣ إوشا ؤݣليد ﻻمرا إوعرن؟» ها إعوداس أريوخ اينّا يجران.
16 ها إݣشم دانيال غر دات ؤݣليد داي إتراس شوي لوقت أكا أداس إرزم ثاوارجيت.
17 داي إعايد دانيال غر ثادارث نس ها إيعلم إيمدوكال نس: حننيا د ميشائيل د عزريا س ؤينّا ئجران،
18 أكا د ترن إ ربّي ن ؤوجنا أرحمث خف ؤسكينا حما ؤرئتّونغا دانيال د إيمدوكال نس د أيت لحكما ن بابل.
ثژليط ن ثنميرت.
19 دَايْ ئِسْبَايْنْ رَبّي سّرْ ئِ دَانْيَالْ ݣْ يِيضْاضْ أَهَا ئِحْمدْ رَبِّي ن ؤوجنا.
20 إنّا: «أد ئتوبارش ربّي أبدا إبديدان، نتّا أغر ثلا نژاژيث د لجهد.
21 أنتا أݣ إيتبدالن لوقت د لحال، أل إسهوّاد إݣليدن أل ئتهزّا وين ضنين، أر يا كا نزازيث ئ أيت لحكما، د لفهم ئ أيت ثوسنا.
22 نتّا أݣ إسضهارن إسكّين نّا ؤردا إيتضهارن، ئسّن ما ݣ أﻻّن ݣ تالّسث، نتّا أغرمي إلا ؤسيد.
23 شݣ أربي ن لاّجدود ئنو أي تحمادخ أل تسباحخ، ألّيݣ غفي ثنعمت س نژاژيت د جهد، ها ثسنعتي ماين تّر زّيك ها ثسنعتّاخ لمعنا ن توارجيت ن ؤݣليد».
أبداد ن دانيال دات ن ؤݣليد
24 فّير ؤينا إنّا دانيال ئ أريوخ نّا إكلّف ؤݣليد س منغيوث ن أيت لحكما ن بابل: «أد ؤر نق أيت لحكما ن بابل. سكشميي غر ؤݣليد حما أدا س سضهرخ ثوارجيت نّس».
25 داي إسكشميث أريوخ دغيا غر ؤݣليد داي إنياس: «ؤفيخ إدج ؤرياز سݣ ثربيعث ن يهوذا نّا دينفان غر تمازيرت ن بابل، نتّا أداش ئرزم ثوارجيت».
26 داي إسقسا ؤݣليد دانيال ئتّوسمّان بلطشاسر: «إس ثغيث شݣ أد يي ثسنعثيث لمعنا ن ثوارجيت نّا أنّايخ ها ثسفسرثييت؟»
27 داي إيرارد غيفس دانيال: «سّر أخمي تقلاّبث ؤر ئتقدّا أݣد إدج زݣ أيت لحكما د ئشوافن د ئسحّارن د وينّا ئتكشافن س ئتران أد سنعثن ئ وݣليد أيناّ إيتتر.
28 والاينّي أسيدي إيلا ربّي ن ؤجنّا لا يسضهار أينّا ؤر دا إتضهارن. أها أري إسنعاث ئ وݣليد نبو خذنصّر ما غاي إجرون ݣ ؤسان نّا ديدان. ثوارجيت نّش د ؤنّا ثنّايث ݣ ؤنودم نش، نتّا أيا:
29 أيا ݣليد: ألّيݣ ثليث لا ثجنيث ثوارجاث أينّا غرا إجرون ݣ ؤوسان د دان أد دون، ربّي أيدا ئسبايان سّر ها إسنعثا ك ما راي إجرون.
30 ها إسنعثييت ؤر إيد س نزازيث ئنو يوݣرن نژاژيت ن شيݣان ميدن كول أدرنين، وليني أكا داك إنيخ أيا ݣليد أسفسر ن ثوارجيت نكّ أها تسينت إخميمن ن ؤول نكّ.
دانيال لاي إسنعاث ثوارجيت
31 كيين أيا ݣليد توارجات لصنام أخثار إسفقاسن ييلي لايبد منيداك ها أل إسخلاع ؤرعا ديكس.
32 ها ييلي إيخف نس زݣ دّهب إيصفان، إدمارن د إغيرن نس زݣ نقرث، أعديس د ؤينّا ئلان نّاݣ ن ئفادّن زݣ نحاس.
33 ها ݣين إيلغان نس زݣ ؤزال، إيلين إضارن نس زݣ ؤزال ئشّورن د إدقي.
34 ألّيݣ ثليت لترعاث غيرس ئكرنونّي يون ؤزرو أخثار زݣ عاري وخا ؤر ثيويض ؤفوس أبنادم، ثوّث لصنام غر إدارن نس ݣانين سݣ ؤوزال د إدقي ها ثنغديثن.
35 داي إنغد ؤوزال د إدقي د نحاس د نقرث د دّهب ݣ لمرت داي أغولن كول نسن أم واليم ݣ وارّار لوقت ن ؤنبدو دا ياويثن واضو ألّيݣ ؤرا أسنقيم لثر. ولايني أژرو إيوثن لصنام، يغول ئݣا عاري أخثار ها يعمر أشال كول.
36 تاد أيد ئݣان ثوارجيت نّش ها نكين أداش إنيخ لمعنى نّس:
37 كيين أيا ݣليد أݣين أݣليد إݣليدن، لاحقاش ربّي ؤجنا أك-يوشان ثݣليت د تنباط د جهد د لعزّ.
38 ئوشاك ثنباط كول خف ماݣ أﻻن ݣ واشال خف بنادم د طيور د لوحوش. كيين أيد إيݣان إيخف ن دّهب نّا توارجات.
39 تسول أتضهر فيراك شا ن تݣليت ياضن إيمزين ݣ لجهد زݣ تݣليت نيك، فيراس أتضهر ثݣليت ثيشّارطّ إيݣان سݣ نحاس أرا ينبضن كول خف دونيث.
40 ها ثتابعيت ثݣليت ثيس ربعا إيقسحن أم ؤزال، لحقّاش ؤزّال لايرزّا أر إسنغاد كول شي. إمشي أيثݣا ثݣليتا ثقسح أم ؤزال. أترز ثسنغد كول ثݣليدين ضنين.
41 أم ؤيا ثنايث إيدارن د إيدودان نسن شّارنين س إدقي د وزال، أم واكين أرا ثبضو ثݣليت ييلي ديكس أقساح ن ؤزال، أم مكا ثنايث ؤزال ئشّورن س إدقي.
42 يلين شان ئدودان ن إيدارن سك ؤزال ها ݣين وين ضنين سݣ إدقي، أم واكين أغا ݣين ثمناضين ن ݣليت شا إيقسح شا إيرطب.
43 أم ؤينا ثنايث إيدقي إشورن س ؤزال، أمشي ثݣليدين دان أد شّورن ݣراتسن س إييول هاورت أميونّاضن إنݣراسن ئدّخ ؤزال ؤر دا إتشّار د إيدقي.
44 ݣ ووسان إݣليدنا أد إيسبد ربّي ن إݣنوان ثݣلديت ؤري إهدمن أبدا، هاور إيتدجا ثنباط نس أت ياوي شا ن لݣنس ياضن، أتسنغد ثخلو كول ثݣليدين. ئد نتاث أتيدير أبدا.
45 ئدّخ ثنايت أژرو ئكرنونيين سݣ عاري بلا إيفاسن، إيسنغد ؤزال د نحاس د إيدقي د أنقرث د دّهب. ربّي أخثار إسنعث إوݣليد مرا إيجرون ݣ ووسان أرا دياسن، ثوارجيتا د ستيتّ أيثݣا د أرزوم نّس إصحا».
46 داي إيتوتي نبوخدنصر خف ؤدم نس ها إيبندق ئ دنيال هاي إوشاس توكّيوين د لبخور.
47 دا إينياس ؤݣليد ئ دنيال: «ستيتّ ربّي نون إݣا ربّي ن ئد ربّي، إݣ أݣلّيد ن إݣلّيدن أل إيسنعاث الأسرار خفانين، ئدّخ ثغيث أترزمث ثاوارجيتا».
48 داي إيسمغور أوݣليد س-دانيال هاي إوشاس شيݣان ن توكّيوين غلانين، إيݣيث د أنبّاض خف لعامالا ن بابل كول د أخثارن لعسكر د خف أيت لحكما س ؤمتا.
49 داي إتر دانيال يي ؤݣليد أد ئݣ شدرخ د ميشخ د عبدنغو د إنباضن خف إسكين ن لعامالا ن بابل، ئد دانيال إيقيم ݣ لقصر ؤݣليد.