51
ثامديازث ثيسّ 51
ئي وخاثار ن ـ ئمديازن. ثايفّارث ن ـ داوود، لّيݣ غورس ئدّا نّبي ناثان أها يفقّع غيفسa ضارث ن ـ مايد ئفسد د ـ بيثشابع.
1 أربّي رحميي
س ـ ثايري نّش نّا ؤر دا ئتّقضون،
د ـ س ـ ثاسا نش نّا يعدّان
سفض لفعايل ئنو نّا ؤر ئحلين.
2 سّيرديي أرد صفوخ زݣ لمعصيّاث ئنو،
ثزّديݣدي زݣ دّنوب ئنو.
3 نكّين سّنخ لفعايل ئنو نّا ؤر ئحلين،
د ـ دّنوب ـ نّا ݣيخ ؤر دا تفّغن منيدي.
4 شݣّين ئويل نش أربّي أيد عصيخ،
أها ݣخ أينّا يخان داث ن ـ والّن نش.
حما أدّاي غيفي ثحكمد أد ئيݣ ؤينّا ثنّيد سثيتّ،
د ـ ؤينّا س ـ غيفي ثنبضّ أد ئيݣ لحقّ.
5 هاثين نكّين لوليخد ديݣي لمعصيث،
د ـ زݣّوس ثوسي ئمّا نو أر ئي تّارو أيد ديݣي دّنوب.
6 لحقّ أيدا دا تّيريد أربّي أتّافد ݣ ـ وول ن ـ بنادم،
د ـ ݣ ـ جاج ئنو دا يي ثسلمادّ ثانژّي.
7 سفض دّنوب ئنو س ـ ثوتّيلث ؤزوكنّيb حما أد زديݣخ،
سّيرديي داي ملولخ ؤݣار ن ـ ؤثفل.
8 أدّجي أد أشيخ ديخ د ـ ؤفراح أها ئفجّج وول ئنو،
داي ثرشقاسن ئي يغصان نّا ثسنّمروريد.
9 برّم وودم نش زݣ دّنوب ئنو،
ثسفضّ لمعصياّث ئنو كولّ.
10 أربي خلق ديݣي يان وول أزدّاي،
ثݣد جاج ئنو يان روح ؤجديد ئمنان.
11 أد ؤر ئي تژّع زݣ داثاش،
د ـ أد ؤر زيݣي تّكّس روح نش.
12 راريد أفراح س ـ ؤفوكّا نّا يي ثفوكّاد،
ثوشديي ثيغيتّ س ـ رّوح نّش نّاس ئيش تّضاعخ.
13 داي دّيخ أد سنعتخ ئبردان نش ئي أيث لفعايل نّا ؤر ئحلين،
د ـ وينّا دنبنين دّان أد غورش داغولن.
14 فوكّايي أربي زݣ ئدامّن نّا نّغليخc،
شݣين ئݣان أمفوكّو نو،
داي أر ئتغنّا ييلّس ئنو ئس ثمنيد.
15 أمولانا رژم أخميمن ئنو،
داي ئسريرّا وقمو ئنو أرش ئتمجّاد.
16 شݣ أربّي ؤر داش تسّفراح ثمغروصث ؤما أليݣ أش تّݣيخ.
ثامغروصث ئغوسن ؤر داش تّيعجيب.
17 ثامغروصث نّا دا يتّيري ربّي نتّاث ؤول ئثوبن،
يا ربّي شݣ ؤر دا تحقّارد يوك نّا ثمّݣراژ
أر ثينقّا وول نّس خف لفعايل نّا يݣا.
18 س ـ لخاضر نّش،
تنهلّا يا ربّي ݣ ـ صهيونd ثݣداس لخير،
ثبنود ديخ ئݣودار نّاس ئضورن ئي لقودس.
19 لوقث نّا ثدّيد أتفرحد س ـ ثمغراص خف لحساب ن ـ شّرع،
س ـ ثمغراص ئغوسن د ـ ثوكّيوين نّا يشمّلن.
لوقث نّا دّان ميدّن أداش غرصن ئي ئمݣّيزن أفلّا ن ـ وانسا ن ـ ثغرصا نش.