صموئيل تيسّنات
1
داود ئسلا خف منغيوت ن شاول
1 ضارث ن لموت ن شاول د-ؤعايد ن دَاوُد زݣ ؤمحارب نّا ئيݣا يي ئيعماليقن، ئقّيما دَاوُد ݣ صِقْلَغ سين وُسّان.
2 ݣ واسّ ويس شراض، هان يان ؤرياز ئدّاد زݣ لموخيام ن شاول س-ئعبان نّس ئيفلين، يومس ألوض يي ييخف نّس. غاس أينّاس نييوض غر داود ئتّوتّي غر أشال أها ئيشجد.
3 ئنّاياس دَاوُد: «ماني زݣ تدّيث؟» ئنّاس: «زݣ لموخيام ن-إِسرائيل أݣد رولخ».
4 ئسقسات داود: «مايد ئيجران؟ ئني مايد ئلّان؟» ئنّاياس: «هاثين ئرول لعسكر زݣ ئمنغي موثن شيݣان زݣ لعسكر ئمث شاول د يوناثان ممّيس ألتو».
5 ئنّاياس داود يي وعرّيم نّا س ئعلمن: «ماس تسنث ئس ئمّوث شاول د يوناثان ممّيس؟»
6 ئناياس ؤعرّيم نّا س ئعلمن: «ليخ ݣ عاري ن جلبوع دا تدوخ أنّايخ شاول ئسنّد خف ؤحريش نّس، ئد لكرارس ن ئعداون نّس د-ئيسان تفورنث.
7 ئيضور ضراس أها يانّايي ئغري، نّيغاس: "هايّي".
8 أها ئنّايي: "ماي ثمسث؟" نّيغاس: "نك أعماليقي".
9 ئنّايي: "بد عفاش غيفي ثنغثي، هاثين لا تغوسخ أر توعدّابخ ئتخ ديݣي ئسول رّوح".
10 بدّخ غيفس نغخث، ئتخ سّنخ ئس ؤر ئنّي أد ييدير ضارث ؤتّوتي نّس، أسيخ تّاج نّا ئيلاّن خف ئخف نّس د سلاح ئلاّن ݣ ئغيل نّس أويغاشثنيد أسيدي غر دا».
11 يامژ دَاوُد ئعبان نّس س جهد ئيفليثن، أود ئرݣزن كول نّا ئلاّن أݣّيدس فلين ئعبان نّسن.
12 حزنن أر ترون أژومن أر ثاذݣات خف شاول د يوناثان ممّيس، د خف شعب ن ربّي ئݣان أرّاو ن-إسرائيل ئتخ خلان س سّيف.
13 داي ئنّا دَاوُد يي ؤعرّيم نّا س ئعلمن: «ما زݣ ثݣيد شݣين؟» ئنّاياس: «ممّيس ن يون ؤرݣاز أبرّاني، ئݣان أعماليقي».
14 ئنّاياس دَاوُد: «ماخ أليݣ ؤر ثݣّيدث لّيݣ توزض أفوس نّش أت تنغث أݣليد نّا ئخثار ربّي؟»
15 داي ئغرد دَاوُد يي يون زݣ ئعرّيمن نّس، ئنّاياس: «إ-واش غورس، نغث». ئيوّت ئمّت.
16 ئنّاياس دَاوُد: «دنوب نّش خف ئخف نّش، ئتخ ئمي نّش ئشاهد غيفش، أليݣ تنيت: "نغيخ ونّا ئخثار ربّي"».
داود دا ئترو خف شاول
17 ئسيول دَاوُد س يوت ن ثمديازث خف شاول د ممّيس يوناثان،
18 أها يامر أد علّمن «ثامديازث-اد ن لقوس» يي ورّاو ن يهوذا نّا ئتّوارون ݣ لشثاب ن يَاشَرَ:
19 «خف ئدغار نّم علّانين أ-إِسرائيل موثن لقياد نّخ؟
ميمش ݣان أليݣ تّوتّين وينّا جهدنين؟
20 أد ؤرعلماث س-ؤيا ݣ ثمدينث ن جَتَّ،
أد ؤر ئس تبرحاث ݣ-ئبردان ن أَشْقَلُونَ،
حما أد ؤر تفراحنث ثشيراثين ن-ئفلسطنيين،
أد ؤر ثن تعيّارن وينّا ور ئيزيين.
21 أ لعواري ن جِلْبُوعَ،
ؤر ئتّيلي غيفون لا ندا ولا أنژار ولا لغلت ن-ئݣران،
ئتخ دينّا أݣ ئرژا سلاح ن وينّا جهدنين.
د ؤمسنال ن شاول ئس ؤر دا ئسفليلي بلا زّيث.
22 لقوس ن يونثان ؤر دجين ديعايد بلا ئدامّن زݣ وينّا موثنين،
د سّيف ن شاول ؤر دجين ديعايد ئخوا زݣ وينا جهدنين.
23 شاول د يوناثان عزّنين أها ياثفوثن،
ݣ تودرت نسن ؤر دجين بضين أر لموث.
دا زݣور نسور أها جهدن خف ئزماون.
24 أ ثيرباثين ن-إسرائيل،
روياث خف شاول،
ونّاون ئسّلسان ئعبان غودانين زوقنين س دّهب.
25 ميمش أليݣ تّوتّين وينّا جهدنين ݣ لحرب؟
يونثان خف لعواري نّم أݣ ئتونغا.
26 هاثين ئقّيما ديݣي ؤنزݣوم نّش،
آݣما يونثان. ثعزّث غوري شيݣان.
ثايري نّش ثوݣر غوري ثايري ن ثوثمين.
27 ميمش أليݣ تّوتّين وينّا جهدنين أها ئيرّژ سلاح ن-ئمنغان؟».