صموئيل ثامزواروتّ
1
ثوثرا ن حنّا
1 ئكّا يان ؤرياز ئسم نّس ألقانا، ممّيس ن يروحام، ممّيس ن أليهو، ممّيس ن توحو، ممّيس ن صوف زݣ تقبيلت ن-أفرايم. ئزدغ ݣ تمدينت ن رامتايم صوفيم ݣ تمازيرت ن عاري ن-أفرايم نّا ئلّان ݣ تمازيرت ن-إسرائيل.
2 لّانت غورس سنات ن تعيّالين: يوث ئسم نّس حنّة ئد ثايض فننّة. فننّة غورس ئشيرّان، ئد حنّا ؤر دا تّارو.
3 كّو ياسݣاس دا ئتدّو ألقانا زݣ تمدينت نّس أد ئعبد ربّي، ربّي ن لعسكر أها ئغرص يي ثامغروصث ݣ ثمدينث ن شيلوه، نّاݣ ئلاّن سين ورّاو ن عالي ئسم نّسن حُوفني د فينحاس ئكهّان ن ربّي. (ئرݣزن نّا ئصلحن ئسنن مولانا).
4 أدّاي دا تݣّان ثيمغراص، ألقانا دا ياكّا يي ثمطّوط نّس فننّة د-ئيشيرّان نّس د تشيرّاثين نّس كول نّسن يون ؤمور يي كّو يون زيكسن زݣ ثمغروصت.
5 ئد حنّا داس ياكّا سين ئيمورن ئتخ داتّيتيري. والاينّي ربّي ؤر ئيشي أرّاو يي حنّا.
6 فننّة ثاشنا ن حنّا، داس ئتّيعجيب دّيما أتّيتسحرق، أها أر تّيتزوار ئتخ تݣا تيݣرت ؤر دا تّارو.
7 دّيما، دا تّيتسحراق أسݣاس ثفّير ن وايض، كّو لوقث ݣ دّان غر تادّارت ن ربّي. أينّاخ أس دا ترو حنّا أها ؤر دا تّيري أت تّش.
8 داي ئسقسات ألقانا أرݣاز نّس: «أحنّا، ماخ ألّيݣ دا ترود؟ ماخ ألّيݣ ؤر دا تتّاد؟ د ماخ ألّيݣ ئغوس وُول نّم؟ ئس ؤر-أم ؤفخ نك عشرا ن-ئشيرّان؟».
حنّا ݣ ؤخام ن ربّي
9 داي تبد حنّا أتژّال ضارت ن مايد شملن زݣ تسّي نّسن د وُتشّي نّسن ݣ شيلوه. ئلّا عالي أكهّان ئقّيما خف لكرسي ثاما ن تفلوت ن ثادّارت ن ربّي.
10 س وُول نّس ئغوسن أها تژّال يي ربّي س-ئمطّاون حرّانين،
11 داي ثقّاول يان لقاويل يي ربّي أها ثنّاس: «أربّي نّا ئغيين يي كولشي، عافاش، رحم ثيسمخث نش، ها نكّين ئخوبيي أد-ؤر يي تتّود، شيي لعيل، دّيخ أتفرزخ أد-ئݣ أخدّام نّش أها ؤر-اس تكّسخ أزّار أبدا ن دّونيت».
أوال ن عالي د حنّا
12 داي تسغزيف حنّا ثاژالّيت نّس داث ن ربّي. ئقّيم عالي أر-يتراعا ئمي نّس.
13 أر تژالّ حنّا زݣ وُول نّس أها ؤر دا تحرّاش غاس أنشوشن نّس، ؤر ئسلّي يي واوال نّس. داي ئغال عالي ئس تسكّر.
14 داي ئنّاياس: «أر ماتّا لوقت أي تريد أت تقيمد تسكّرد؟ باراكا نتيسّي ن شراب».
15 داي ثجاوبث: «لا أسيدي، ؤر سكّيرخ شا ولا سويخ شراب. نكّين ياث ثمطوت ئحزن، دّيخد غر ديتخ حما أد خوُوخ ؤل ئنو داث ن ربّي.
16 أد-ور تغال ئس ثݣا تسمخث نّش أم تومسيخين. مش سغزيفخ ثاژالّيت ئنو، غاس ئتخ ئعمّر وُول ئنُو س مشرضول د لحزن».
17 أها ئينّاياس عالي: «مون د لمان، ئدّا ربّي ن-إسرائيل أد-ام ئوش أينّاس تترد».
18 داي ترار غيفس: «أد يادج ربّي نّعمت نّش دّيما يي تسمخث نّش». داي تدو ݣ-ؤبريد نّس أها تتش. داي ؤر-يقّيمي وُودم نّس ئغيّر.
ثلاليت ن صَمُوئِيل
19 سا أسكّا نّس، تيفاوت زيك، ئدّو ألقانا د-أيت ؤخام نّس أد سجدن يي مولانا أها عايدند غر ثادّارت نّسن ݣ الرّاما. داي ئيݣن ألقانا د تمطّوط نّس حنّا. أها ئسلاّ ربّي يي ثُوثرا ن حنّا.
20 ݣ-وسݣاس نّا، ثاسي حنّا أر تّارو أها تارو أربا. داي تنّا: «ئتخ ثي ترخ يي ربّي، أد-اس ݣخ ئسم ن صَمُوئِيل» (ئسم ن صَمُوئِيل لمعنا نّس: ترخت يي ربّي).
حنّا دا تهدو صَمُوئِيل يي ربّي
21 ضارت ن-ؤياد، ئدّو ألقانا د-أيت ؤخام نّس غر شيلوه أد-ئوش ثامغروصت ن-وسݣاس يي ربّي، د ؤينّا س-ئقّاول.
22 والاينّي حنّا ؤر ثدّي د-ؤرياز نّس. داي ثنّاس: «أد ݣونيخ أرد كسخ ئيف يي ؤربا، عاد أيد تّاويخ أد ئيبد داث ن ربّي، أها أدجخت دينّا أبدا».
23 ئرار غيفس ألقانا: «واخّا، ݣ أينّام ئعجبن. قّيم أر دا س ثكسد ئف. ئدّا ربّي أد ئݣ أينّا ئقّاول». داي ثقّيم حنّا ݣ ؤخام نّس أت ثسوطض ممّيس ألّيݣ اس ثكس ئف.
24 ألّيݣ اس ثكّس ئف يي وربا، ثاويث غر ثادّارت ن ربّي ݣ شيلوه. ثاوي ديتس شراض ئعجليين د سين ئيربعيين ن-ئردن د-وݣدّيد ن شراب ئد أربا ئسول ئمژي شوي.
25 داي غرصن يي يان ؤعجلي، أوين أربا غر عالي.
26 ثنّاس حنّا يي عالي: «سامحي أسيدي، س ثاغزي ن لعمر نّش أسيدي ئس ديثشتيد تامطّوط نّا ئبدّان أݣيدش داد، أر تژالّا يي ربّي.
27 أربا ياد أيد تّرخ يي ربّي أها ئوشي أينّاس تّرخ.
28 أينّاخ أس دّيخ أت تهدوخ يي ربّي، أد ئݣ وينس أبدا. داي شجدن كول نّسن يي ربّي دينّا.